Uei U Blei jong ka Baibl?

1. Katno ngut ki blei bashisha ki don katkum na ka Baibl?

Na ka Testament Barim- Ka jinghikai jong ki Kpa tymmen bad ki Nongïathuhlypa:

Deuteronomi 6:4 To sngew, Ah Israel: U Trai uba U Blei jong ngi u long uwei U Trai.

U Blei u ïathuh ha ki jaidbynriew Israel ba U long uwei, kum ka jinghikai pyrshah ïa ki hima nongwei kiba don hajan jong ki, kiba mane bun ki blei.

Deuteronomi 4:35 Ha me keiñ la pyni ïa kane, khnang ba men ïoh tip ba U Trai u long U Blei: ym don uwei pat, tang ma u.

Ym don uwei pat, tang ma u. Ka dei ha kane ka nongrim ba U Blei u la ai ïa ka hukum banyngkong kaba khang ïa ngi ban mane bun ki blei. (Pule Eksodos 20:1-3)

Jeremaiah 10:10 Hynrei U Trai u long U Blei uba shisha; u long U Blei uba im, bad u syiem uba junom; ha ka jingbitar jong u ka khyndew ka khynniuh, bad ki jaid bynriew kim lah shah ïa ka jingbitar ba ϊaibat jong U.

Na ka Testament kaba Thymmai- Ka jinghikai jong ki Apostol U Khrist:

1 Korinth 8:4 Shaphang kaba bam namar kata na kita kiei kiei ruh ba la kñia ha ki bleithaw, ngi tip ba u bleithaw um long ei ei ruh em ha ka pyrthei, bad ba ym don U Blei hynrei tang uwei.

1 Timothi 2:5 Namar don uwei U Blei, bad uwei u ksiang ruh hapdeng U Blei bad ki briew, U Khrist Jisu, uba u hi ruh u briew.

Jakob 2:19 Me me ngeit ba U Blei u long uwei, me leh bha keiñ, kata ki ksuid ruh ki ngeit, bad ki sngewkiuh keiñ.

Ki Apostol ki hikai ba don tang uwei U Blei, wat ki Ksuid ruh ki tip ïa kata!

2. Mano Uta uba bitdor tam ban ïathuh ha ngi shaphang U Blei uba shisha?

Ioannis 1:18 Ym don mano mano ruh ba la ïohi ïa U Blei mynno mynno ruh; uta U Khun ba la kha marwei, uba long ha ka shadem U Kpa, u hi u la pynpaw ïa u.

Dei U Jisu, U Khun jong U Blei.

Ioannis 3:11 Shisha, shisha nga ong ha me, ba ïa kata kaba ngi ïatip ngi ïakren, bad ïa kaba ngi la ïohi ngi ïaphla.

Haba kren shaphang U Blei, U Jisu u ïathuh ha ngi ïa kaei kaba u tip bad ïa kaei kaba u la ïohi. Kata ka long ka mishon jong U haba u wan hiar na bneng: ban ai ha ngi ïa ka jingshemphang ba ngin ïoh ithuh ïa U Blei (1 Ioannis 5:20). Ngi lah ban shaniah skhem ha ki jinghikai jong U Jisu namar un ym len ϊa ka jingshisha shaphang U Blei. U Jisu u ong, “phim shym la ithuh ϊa u (U Blei); hynrei nga nga ithuh ϊa u; te lada nga ong ba ngam ithuh ϊa u, ngan long kum ma phi, uba lamler: hynrei nga ithuh ϊa u, bad nga sumar ϊa ka ktien jong u.” (Ioannis 8:55)

3. Katkum U Jisu, Mano ba dei 'U Blei uba shisha'?

Ioannis 17:3 Kane te ka long ka jingim bymjukut, ba kin ϊoh ithuh ïa me U Blei uba shisha tang ma me hi, bad ϊa U Jisu Khrist, ϊa uba me la phah.

Kine ki dei ki kyntien badonbor jong U Jisu mynba u dwai sha U Kpa. Ka jingithuh ϊa U Blei ka long kaei kaei kaba don jingϊadei bad ka jingim bymjukut. Bad U Jisu u pynpaw ha ngi ba U Blei uba shisha u dei U Kpa. Ha kane ka dkhot harum U Ioannis ruh u ϊathuh ha ngi ba U Jisu u la kam ba U Blei u long U Kpa jong U hi.

Ioannis 5:18 Namar kata te kita ki Jiw ki la nang ïawad dong ïa kaban pynïap noh ïa u (Jisu), ym tang naba u la pynkhein ïa ka sabbaton, hynrei ba u la ong ruh ba U Blei u long u Kpa jong u hi, u da leh ïalade marryngkat bad U Blei.

4. Katkum U Jisu, Mano ba dei 'U Trai ka bneng bad ka khyndew'?

Mathaios 11:25 Mynkata U Jisu ula ïathuh bad ula ong: Nga nguh ϊa me, Ko Kpa, U Trai ka bneng bad ka khyndew, ba me la buhrieh ϊa kine kiei kiei ruh na kiba stad bad kiba sian, bad me la pynpaw ϊa ki ha ki khunlung.

Katkum ka kitab Jingpynpaw 14:6,7 ka jingkhot kaba khadduh jong U Blei ka dei ka jingkhot ban sheptieng ϊa U, ban ai ka burom ha U bad ban mane ïa U, uba la thaw ïa kiei kiei baroh ha bneng bad ha khyndew. Te mano ba dei Une U Blei uba la thaw ïa kiei kiei baroh? U Paul u jubab ïa kane ka jingkylli bad u ong ba dei“U Trai ka bneng bad ka khyndew”uba la thaw ïa kiei kiei baroh (Ki Kam Ki Apostol 17:24). Kane ka long kaba donkam ïa ngi ban tip, ïoh ba ka jingsheptieng bad ka jingmane jong ngi ka leit sha u Ïakjakor uba long “u blei jong kane ka pyrthei” (2 Korinth 4:4). Bad katkum U Jisu ngi sngewthuh shai ba une “U Trai ka bneng bad ka khyndew” u long 'U Kpa' jong U (peit ruh Loukas 10:21). Une u longrynϊeng katkum ka Jingpynpaw 14 lynnong, ϊa uba ngi dei ban sheptieng, ban ai ka burom bad ban mane u dei 'U Kpa' jong U Jisu.

Hangne ngi ϊohi ba dei U Jisu uba pynpaw ha ngi ϊa kane ka jubab, Balei ym dei da ki nongïathuhlypa ne ki apostol ki ban ai ha ngi ϊa kum kane ka jubab kaba shai lait noh tang na U Jisu?

Mathaios 11:27 Kiei kiei baroh la ai ha nga na U Kpa jong nga: ym don ruh uba ithuh ϊa U Khun, hynrei tang U Kpa; lymne uba ithuh ϊa U Kpa, hynrei tang U Khun bad uta ha uba uta U Khun u mon ban pynpaw ϊa u.

Namar dei tang U Jisu uba ϊohi bad ithuh khambha ϊa U Kpa, bad shibynta na ka mishon U Jisu haba ula wan na bneng sha kane ka pyrthei ka long ban pynithuh ha ngi ϊa U Kpa khnang ba ngin ϊoh mane ϊa u ha ka mynsiem bad ha ka jingshisha. Hynrei ka jingeh ϊa ka pyrthei mynta kaba kynthup ϊa kiba bun ki khristan ruh, ka long ba ki la shah shukor ha kaba ϊadei bad ka jingmaneblei. Dei namarkane ba U Blei u sa phah ϊa ka khubor kaba khadduh bad kane ka khubor ka dei shaphang ϊano ngin mane. Namarkata ka long kaba donkam ba ngin tip, bad sngewthuh ϊano ngi mane. Bad kaba sngewtynnad ka long ba ngi ϊoh ϊa ka jubab na U Jisu.

5. U Jisu u hikai ïa ngi ba ngin duwai shano?

Mathaios 6:9-13 Namar kata phin duwai kumne: Ko Kpa jong ngi uba ha bneng, long bakhuid ka kyrteng jong me. Wan ka hima jong me. Long ka mon jong me ha ka khyndew, kumba ha bneng . . . Naba ka jong me long ka hima, bad ka bor, bad ka burom ruh, ha la ka rta.Amen.

U Jisu u hikai ïa ngi ba ngi dei ban duwai sha 'U Kpa' uba long U Blei uba shisha tang ma u hi. Shuh shuh, ngi dei ban pdiang ba ka hima, ka bor bad ka burom ki long ki jong U Kpa.

6. Kano ka long ka hukum kaba kongsan na ki baroh?

Markos 12:28-32 Ha ba ula wan te ha u uwei na ki nongthoh uba la ïohsngew ba ki ϊasaid paralok hi, uba da sngewthuh ruh ba u la ϊathuh bha ϊa ki, ula kylli ϊa u, Kano ka long ka hukum kaba kongsan na ki baroh? U Jisu ula ϊathuh te ha u, kaba kongsan na ki hukum baroh long, Sngew, Ah Israel, U Trai uba U Blei jong ngi u long uwei U Trai. Men ieit ϊa U Trai U Blei jong me da ka dohnud jong me baroh, bad da ka mynsiem jong me baroh, bad da ka jingmut jong me baroh bad da ka bor jong me baroh, kane keiñ ka hukum kaba kongsan. Kaba ar ruh ka long kane: men ieit ϊa la u paramarjan kumba ϊa lade. ym don ka hukum kawei pat kaba kham khraw ϊa kine. Uta u nongthoh u la ong te ha u, kaba dei, ko Nonghikai! Me la ong kaba shisha, ba U long uwei, bad ym don uwei pat hynrei tang ma U.

Kane ka dei ka jingϊathuhkhana, kaba la thoh shaphang ka jingïakren U Jisu bad uwei na ki nongthoh. Ϊa u nongthoh (u ‘scribe’) la ju tip ϊa u kum uba trei ϊa ka kam ban bud ϊa ki jingthoh bakhuid ban pynmih bun tylli ki kopi jong ka testamen barim khnang ba ki briew kiba kwah kin ïoh pule, namar ha kato ka por ym pat shym la don ki kor shon kot lane ki printer kumba la ju don mynta. Une u nongthoh um shym la thoh tang shiphew tylli ki kopi hynrei kane ka dei ka kamram jong u man ka sngi, bad un jin da la tip bha ϊa ki jingthoh bakhuid, kumno ba ka la hikai shaphang U Blei bad ϊa kiei kiei kiba ϊadei shaphang U Blei. Bad na kane ngi sngewthuh shai, ba ka jingkylli kaba une u nongthoh u buh ha U Jisu, kam dei namar ba u kwah tip ïa kata ka hukum ba kongsan hynrei ka dei namar ba u kwah ban tynjuh ϊa U Jisu hato u dei ne em uta U Messiah. U nongthoh hi u tip ϊa ka jubab kaba dei, namarkata, ka jubab kaba U Jisu u ai ka long kaba pdianghun ha une u nongthoh uba tip ha la ka dohnud ba kaei kaba U Jisu u ong ka long kaba shisha bad u pynskhem hadien ba “ym don da uwei pat hynrei tang ma u”. Bad ha ka jingshisha U Jisu ula sot ϊa kine ki kyntien na Deuteronomi 6:4,5 ;10:12, Lebitikos 19:18. Kane ka long ka sakhi ba wat ha ka por jong U Moses, ka jingngeit kaba long salonsar ka dei ba ki ngeit ha Uwei U Blei.

Ban tip ïa U Blei ka long kaba kongsan ha shwa ba ngin lah ban ieit ïa U. Ka jingtip kaba beit shaphang U Blei ka long kaba kongsan na ka bynta ka jingïadei jong ngi bad U.

7. Hato U Jisu u pynrem bad pynbeit ïa u nongthoh?

Markos 12: 34 Ynda U Jisu ula ϊohi te ba ula ϊathuh stad, ula ong ha u, Mem long jngai na ka hima U Blei. Te naduh kata ym don ba nud ban kylli ei ei ϊa u.

U Jisu um shym la pynrem lane pynbeit ïa u nongthoh, hynrei pynban U la kyntiew ïa u. U nongthoh u dei u Jiw. Namarkata, ka jingngeit jong u nongthoh ka phalang ïa ka jingngeit jong ka jaidbynriew Jiw hi baroh kawei. Ki Jiw ki ngeit tang ha uwei U Blei:

Ioannis 8:41 Ynda kumta ki la ϊathuh ha u, . . . ngi don uwei U Kpa, uba U Blei keiñ.

8. Hato U Jisu u pynithuh mano ba dei une uwei U Blei jong ki Jiw?

Ioannis 8:54 U Jisu ula ϊathuh, Lada nga pyndon burom ϊa lade, ka burom jong nga kam long ei ei ruh em; U Kpa jong nga u long uba pyndon burom ϊa nga; ϊa uba phi phi ong ba u long U Blei jong phi.

Uwei U Blei jong ki Jiw dei 'U Kpa jong U Jisu’.

9. Hato U Blei u long tang u jong ki Jiw?

Rom 3:29 Lane U Blei u long tang u jong ki Jiw hi? um long u jong ki Jentil ruh? Hooid keiñ, u jong ki Jentil ruh.

10. Ïano ki nongmaneblei kiba shisha ki mane?

Ioannis 4:23 Hynrei ka por kan jia, bad ka long mynta keiñ, haba ki nongmane Blei kiba shisha kin ïa mane ïa U Kpa ha ka mynsiem bad ha kaba shisha naba U Kpa ruh u wad ïa kiba kum kita ban ïamane ïa U.

Ki nongmaneblei kiba shisha ki mane ϊa 'U Kpa', ki sngewthuh ϊa U Blei uba shisha, uba thaw ϊa ka bneng bad ϊa ka khyndew. Nga ngeit ba phi ruh phi thrang ban long ki nongmaneblei kiba shisha, khnang ba phin long kiba la kloi haba U Jisu un wan.

11. Katkum ki Apostol, mano ba dei uwei U Blei?

1 Korinth 8:6 Hynrei ϊa ngi don tang uwei U Blei U Kpa, na uba long kiei kiei baroh, bad ma ngi ha u; bad uwei U Trai uba U Jisu Khrist, da uba long kiei kiei baroh, bad ma ngi da u.

Ephesos 4:6 Uwei U Blei bad U Kpa ϊa baroh, uba halor baroh, bad lyngba ϊa baroh, bad ha baroh.

Jakob 3:9 Da une hi ngi kyrkhu ïa U Blei uba U Kpa; bad da une hi ngi tim noh ïa ki briew, ïa kiba la thaw kat kum ka dur U Blei.

2 Petros 1:17 Namar ula pdiang na U Blei uba U Kpa ϊa ka jinglong burom bad ïa ka jingpyndon burom...

2 Ioannis 3 Kan long lem bad ngi ka jingaiei, ka jingisynei bad ka jingsuk na U Blei uba U Kpa bad na U Jisu Khrist U Khun, uta u Kpa, ha ka jingshisha bad ha ka jingieit.

Judah 1 U Judah, u shakri U Jisu Khrist bad u para U Jakob, Ha kita ϊa kiba la khot, kiba ieit ha U Blei U Kpa, bad ϊa kiba la ri noh khnang ϊa U Jisu Khrist.

Katkum ki Apostol, uwei U Blei jong ka Baibl u dei 'U Kpa' jong U Jisu.

12. Mano ba dei 'U Blei baim bad bashisha'?

1 Thessaloni 1:9-10 Namar ma ki hi ki ïa pynbna shaphang jong ngi kaba kumno ka jingpdiang jong phi ïa ngi, bad kumno phi la phai sha U Blei na ki bleithaw, ban shakri ïa U Blei baim bad bashisha, bad ban khmih lynti ïa U Khun jong U na bneng, ïa Uba u la pynmihpat na kiba ïap, U Jisu keiñ, uba pyllait ïa ngi na kata ka jingbitar kaban sa wan.

Ha kane ka dkhot don arngut ki kynja-blei –“U Blei baim bad bashisha” bad “U Khun jong U”. Ka long kaba shai bha ba "U Blei baim bad bashisha" u dei 'U Kpa', bad U Jisu pat u dei U Khun jong U Blei baim bad bashisha.

13. Hato ki Khristan banyngkong ki ϊaineh skhem ha kane kajuh ka jingngeit jong ki Apostol?

Ki Kam 2:42 Bad ki la ϊaineh skhem ha ka jinghikai jong ki apostol bad ha ka jingïasyllok, bad ha kaba kdiah kpu, bad ha ki jingduwai de.

14. Mano ba long ‘U Tynrai bah’ jong kiei kiei baroh?

1 Korinth 8:6 Hynrei ϊa ngi don tang uwei U Blei U Kpa, na uba long kiei kiei baroh, bad ma ngi ha u; bad uwei U Trai uba U Jisu Khrist, da uba long kiei kiei baroh, bad ma ngi da u.

2 Korinth 5:18 Te kiei kiei baroh ki long na U Blei, uba la pynïasuk noh ïa ngi ha lade hi da U Jisu Khrist, bad uba la aiti ha ngi ïa ka jingpyntrei ïa ka jingpynïasuk.

Rom 11:36 Naba na u, bad da u, bad sha u, long kiei kiei baroh: ha uba to long ka burom sha ki bymjukut! Amen.

Ephesos 4:6 Uwei U Blei bad U Kpa ϊa baroh, uba halor baroh, bad lyngba ϊa baroh, bad ha baroh.

U Blei U Kpa u long U Tynrai bah jong kiei kiei baroh. U long U Kpa jong U Jisu, jong ki angel bad jong ngi ruh. U long u tynrai jong ka jingim, ka jingshai, ka jingkmen, ka jingsuk, ka jingpyntngen, ka jingshisha, ka jingieit bad ka jingbha bad kiei kiei baroh.

15. Mano ba thaw ïa kiei kiei baroh?

Ki Kam 17:24 Uta U Blei keiñ uba la thaw ïa ka pyrthei bad ïa kiei kiei baroh kiba don ha ka, uba haba u long U Trai ka bneng bad ka khyndew, um shong ha ki iing blei ba la thaw da ki kti.

Ngi la ïohi mynne ha ka jingkylli 4 ba “U Trai ka bneng bad ka khyndew” dei U Blei U Kpa. Dei U Blei U Kpa uba thaw ïa kiei kiei baroh.

16. Kumno U Blei U Kpa u thaw ïa kiei kiei baroh?

Kolosai 1:16 Naba ha U (U Khrist) la thaw ïa kiei kiei baroh, ha ki bneng bad ha ka khyndew, kiei kiei kiba lah ban ïohi bad kiei kiei kibym lah ïohi, la ki khet lane ki hima lane ki jingsynshar lane ki bor; ïa kiei kiei baroh keiñ la thaw da u bad ïa u.

Hebru 1:1-2 Ha kine ki sngi kiba khadduh u (U Blei) la kren ha ngi ha U Khun; ïa uba u la thung ban long u nongïohpateng ïa kiei kiei baroh, da u (U Khun) ruh la thaw ïa ki pyrthei.

Ioannis 1:3 Da u (U Ktien) la long kiei kiei baroh, bad khlem ma u ym shym la long kaei kaei ruh kaba la long.

U Blei U Kpa u thaw ïa kiei kiei baroh lyngba U Jisu Khrist. U Blei u la ai ha U Jisu ϊa ka bor bad U Jisu kum u rangbah nongtei u pyndep bad pynϊaid ϊa ka jingthmu jong U Blei. Hynrei U Jisu u ai lut ϊa ka burom sha U Kpa kum “U Trai ka bneng bad ka khyndew” bad “U Syiem uba khraw” jong ka bneng salonsar (Salm 95:3).

17. Mano ba kyrshan bad ba pyndap ϊa kiei kiei baroh?

Salm 135:6-7 U Trai u la leh ϊa kaei kaei baroh, kaba u la mon, ha bneng bad ha ka khyndew, ha ki duriaw bad ha ki jingjylliew baroh. U pynkyntiew ϊa ki jynhaw na kiba kut ka khyndew; u pynlong ki lielieh ϊa u slap; u pynmih ϊa ka lyer na ki jingkynshew jong u.

Ki Kam Ki Apostol 17:28 Namar ha u ngi im, bad ngi khih, bad ngi long de; kumba kiba na ki nongthaw jingrwai jong phi hi ruh ki la ong, Namar ngi long ruh ki khun ki ksiew jong u.

Salm 104:27-30 Kine baroh ki khmih ϊa me (U Blei), ba men ai ha ki ϊa ka jingbam jong ki ha la ka aiom. Ϊa kaba ma me me ai ha ki ki ϊa tam; me plie ϊa la ka kti, te ki la kdang da kaba bha. Me buhrieh ϊa la ka khmat, ki la jynjar; me shim noh ϊa ki mynsiem jong ki, ki ϊap, bad ki phai noh pat sha la ka khyndew. Me pynmih noh ϊa la U Mynsiem, la thaw ϊa ki; bad me pynthymmai ϊa ka khmat jong ka khyndew.

Hebru 1:3 (U Jisu) Uba haba u long ka jingtyngshain ka burom jong u (U Kpa), bad ka dur hi ka jinglong tynrai jong u (U Kpa), bad (U Jisu) uba kyrshan ïa kiei kiei baroh da ka ktien ka bor jong u, haba u la lah pynlong ka jingpynkhuid ïa ki pop, u la shong ha ka kti kamon jong Uba khraw tam sha jrong;

Kolossai 1:17 Bad (U Jisu) u long mynshuwa kiei kiei baroh, bad ha u kiei kiei baroh ki ϊaneh lang.

(Pule ruh na Jenesis 8:21-22; Job 38:33-37; Salm 36:6; 104:1-35; 2 Petros 3:7.)

U Blei U Kpa uba la thaw ïa kiei kiei baroh da U Jisu Khrist u la kyrshan bad pyndap ruh ϊa ki lyngba U Jisu Khrist.

18. Hato U Khrist u don 'Blei'?

Ha ka por ka jinglongbriew jong U Khrist - Shwa ka jingïap bad ka jingmihpat jong U:

Mathaios 27:46 Te hamar kaba khyndai baje, U Jisu u la pyrta da ka ktien kaba jam, u da ong, Eli, Eli, lama sabakhthani (kata kaba long, U Blei jong nga, U Blei jong nga, balei ba me la iehnoh ïa nga?).

Hadien ka jingmihpat jong U:

Ioannis 20:17 U Jisu u ong ha ka, To wat ktah ïa nga; namar ngam pat leit kiew sha la U Kpa: hynrei to khie leit sha ki para jong nga, bad to ong ha ki: Ngan sa leit kiew sha U Kpa jong nga, bad U Kpa jong phi, bad U Blei jong nga, bad U Blei jong phi.

Ephesos 1:3 Long ba la kyrkhu ïa U Blei bad U Kpa U Jisu Khrist uba U Trai jong ngi, uba la kyrkhu ïa ngi da ki jingkyrkhu bakynja mynsiem baroh ha ki jaka bneng ha U Khrist.

Jingpynpaw 3:12 Uta uba jop, ngan pynlong u rijied ïa u ha ka iing U Blei jong nga, te un ym mih noh shuh shabar: bad ngan thoh halor jong u ïa ka kyrteng U Blei jong nga, bad ïa ka kyrteng jong kata ka nongbah U Blei jong nga, Ka Jerusalem bathymmai, kaba wan hiar na bneng na U Blei jong nga, bad ïa kata ka kyrteng jong nga kaba thymmai.

U Kpa u dei U Blei jong U Khrist.

19. Katkum U Jisu, Mano ba long 'u bakhraw tam’ ïa baroh?

Ioannis 10:29 U Kpa jong nga, uba la aiti ïa ki ha nga, u long uba kham khraw ïa baroh, bad ym don uba lah ban knieh kynthet ïa ki na ka kti U Kpa jong nga.

Ioannis 14:28 Phi la ϊohsngew kumno nga la ong ha phi, Ngan sa leit noh, bad ngan wan pat ha phi. Lada phi la ieit ϊa nga, phin da kmen namar ba nga la ong, Ngan sa leit noh sha uta U Kpa: namar uta U Kpa u long uba kham khraw ban ϊa nga.

U Blei U Kpa u long uba kham khraw ban ϊa baroh kynthup lang ϊa U Jisu namar U Kpa u long ha shuwa ϊa kiei kiei baroh, u long na ki bymjukut bad Um don jingsdang lane jingkut. Bad na U ki sdang kiei kiei baroh. U long U Alpha bad U Omega, U Tynrai bah jong kiei kiei baroh.

20. Mano ba long 'U Khlieh duh' jong kiei kiei baroh?

Salm 7:17 Ngan ainguh ha U Trai katba kum ka hok jong u: bad ngan rwai ka jingϊaroh ha ka kyrteng U Trai U Bahakhlieh tam eh.

Salm 91:1 Uta uba shong ha ka jaka barieh jong U Bahakhlieh tam eh, un ϊoh ϊaineh hapoh ka jingkah jong U Badonbor baroh.

1 Korinth 11:3 Hynrei nga mon ba phin tip; ba u khlieh u briew baroh long U Khrist; bad u khlieh ka kynthei long u rangbah; bad ba u khlieh jong U Khrist de long U Blei.

Ephesos 3:14,15 Namar kane te nga pyndem ïa la ki khohsiew ha U Kpa, na uba la jer kyrteng ïa ki kur baroh ha bneng bad ha khyndew.

U Blei U Kpa u long U Khlieh jong ka longïing longsem bakynja-bneng. U long ruh U Khlieh jong U Jisu Khrist hi.

21. Hato Une U Blei baim bad bashisha u pyrkhat, u niewkor, u kitkhlieh, u ieit bad u sumar ϊa ka jingim jong phi bad jong nga?

Salm 33:13-15 U Trai u khmih na bneng; u ϊohi ϊa u khun bynriew baroh; na ka jaka shong jong u u khmih ϊa baroh kiba shong ha ka khyndew. Ma u keiñ uba thaw dur ϊa ki dohnud jong ki baroh, uba pyrkhat ϊa ki kam jong ki baroh.

Salm 103:14 Naba u tip ϊa ka jinglong jong ngi; u kynmaw ba ngi long ka khyndew.

Jeremaiah 29:11-13 Naba nga tip ϊa ki jingmut kiba nga pyrkhat shaphang jong phi, ong U Trai, ki jingmut ka jingsuk keiñ, te ym ki jong ka jingsniew, ban ai ka jingkyrmen ϊa phi ha ka por bakut jong phi. Te phin khot kyrpad ϊa nga, bad phin ϊoh leit ban duwai ha nga, nga ruh ngan shahshkor ϊa phi. Bad phin wad ϊa nga, bad phin shem ϊa nga, haba phin wad ϊa nga da ka dohnud baroh.

1 Petros 5:6,7 To phin pynrit ϊa lade namar kata hapoh ka kti bakhraw bor ka jong U Blei, ba un ϊoh pynkhraw ϊa phi ha ka ϊa babit; da kaba bred halor jong u ϊa ka jingkhuslai jong phi baroh, naba u sumar sukher ma u shaphang jong phi.

1 Ioannis 3:1 Ha khmih phi kaba kumno ka jingieit uta U Kpa u la ai ha ngi, ba la khot ϊa ngi ki khun U Blei: bad kumta ngi long. Namar kane keiñ kata ka pyrthei kam ithuh ϊa ngi, naba kam shym la ithuh ϊa u.

Salm 32:8 Ngan pynnang ϊa me bad ngan hikai ϊa me ha ka lynti kaba men leit: ngan sneng ϊa me da kaba khmih la ka khmat ha me.

1 Timothi 2:3-5 Kane ka long kaba bha bad kaba pdiang hun ha khmat U Blei U Nongpynim jong ngi; uba mon ba ki briew baroh kin ϊoh lait im, bad ba kin poi sha ka jingtip ϊa ka jingshisha. Namar don uwei U Blei, bad uwei u ksiang ruh hapdeng U Blei bad ki briew, U Khrist Jisu, uba u hi ruh u briew.

U Blei Badonbor baroh u pyrkhat ϊa phi, u kynmaw ϊa phi, u niewkor shibun ϊa phi, u ieit eh ϊa phi, u sumar sukher ϊa phi bad u don ka jingthmu kaba bha na ka bynta jong phi. U ϊalam ϊa phi bad ϊa nga ban poi sha ka jingtip ϊa ka jingshisha ba don tang uwei U Blei bad uwei U Ksiang ruh U Jisu Khrist ϊa uba U la thung ban long U Kapten jong ka jingpynim jong ngi.

Ngi la ïohi shai ba ka ktien jong U Blei ka ïathuh ha ngi ba don tang uwei U Blei. Bad une uwei U Blei um dei da uwei pat nalor U Kpa jong U Jisu Khrist. Une uwei U Blei u long U Tynrai jong ki jingim bad ki bor BAROH. Ka don tang kawei ka lynti ba ngin lah ban ithuh ïa U Blei- kata ka long lyngba U Jisu Khrist, uba la wan ban ai ha ngi ïa ka jingtip kaba shisha shaphang U Blei.

******