Suk kiba shah pynshitom

KI JINGKYRKHU BASHISHA – BYNTA VIII – Suk kiba shah pynshitom

Ka jingaiei bad ka jingsuk to kan long ha phi na U Trai jong ngi U Jisu Khrist. Ka bynta jong kane ka jingpule ka la long na ka jingiathuhkhana jong U Jisu halor u lum ka jingkyrkhu. Ki long ki jinghikai kiba shem mynsiem bad kiba iadei bad ka jingsuk bad jingkyrmen jong u khun bynriew ba la hap ha ka pop.

KA JINGIATHUHKHANA HALOR U LUM

[Phi lah ban shem ha Mathaios 5,6,7 bad Loukas 6:20-49.]

Suk kiba ioh pynshitom

Mathaios 5:10 Suk kiba ioh pynshitom na ka bynta ka hok: naba jong ki long ka hima ki bneng.

U Jisu u khlem pynbna ia ka jingkyrkhu ha kito kiba shah pynshitom namar ka jingleh bym dei jong ki lane namar ka jingleh sniew jong ki hi hynrei ha kito kiba shah pynshitom na ka bynta ka jingiaineh jong ki ha ka jingshisha U Jisu Khrist. “Namar wat ai ba uno uno ruh na phi un shah shitom kum u nongpyniap briew, lane u nongtuh, lane u nongleh basniew, lane kum uba shait lorni leh lushia ia ki kam kiwei: hynrei lada uno uno ruh u shuh shitom kum u Khristan, wat ai un sngew lehrain, hynrei to un pyndon burom ia U Blei ha kane ka kyrteng.” (1 Petros 4:15,16).

Ban bud ia U Jisu kam long khlem ki jingeh. “Naba ha phi la ai na ka bynta U Khrist, ym tang ban ngeit ha u, hynrei ban shah shitom ruh na ka bynta jong u.” (Philipi 1:29). Ki jingjynjar kin wan namar U soitan u shun ia ki briew jong U Blei. Un pynshitom bad pynkhia da ki jingeh khnang ba ki riewngeit kin man thait bad artatien ia U Blei bad ba kin phaidien noh na lynti U Trai. Ka Baibl ka ong, “Te uta u iakjakor u la sngewbitar lep ia kata ka briew (ka balang), bad u la leit noh ban ialehthma bad kita kiba sah na u symbai jong ka, kita kiba sumar ia ki hukum U Blei bad kiba bat ia kata ka jingphla ia U Jisu Khrist.” (Jingpynpaw 12:17).

Ki synran banyngkong jong U Jisu ki la mad ia ka jingshah pynshitom kum ki Khristan tang na ka daw ba ki kohnguh ia ka jingshisha bad ialap ia ka jingshisha, kim sngewlehrain ban shah na ka bynta U Jisu. Ka histori ka iathuh ha ngi kumno ba ki synran bad ki Khristan mynshuwa ki shah ia ka jingpynshitom bakhraw bad bashyrkhei kumba la thoh ha ka kot ‘Fox’s book of martyrs’ da U John Fox.

U Paul u iathuh ha ngi shaphang ka jingshah shitom jong u kum U Khristan, ha kine ki kyntien kiba sngewsynei, “ha ki jingtrei minot kham tam shikatdei, ha ki jingsympat ba kham palat, ha ki ïing byndi kham bunsien, ha ki jingïap bunsien. Na ki Jiw, san sien nga la ïoh sawphew nawei thri. Lai sien la shoh ïa nga da ki dieng sympat, shi sien la lynthem maw ïa nga, lai sien nga la shah paitlieng, shi miet shi sngi nga la don ha ka duriaw bajylliew; ha ki jingleit bunsien, ha ki jingma na ki wah, ha ki jingma na ki nonglute, ha ki jingma na la ki para jaid, ha ki jingma na ki Jentil, ha ki jingma ha ka nongbah, ha ki jingma ka khlaw, ha ki jingma ha ka duriaw, ha ki jingma hapdeng ki lok ba-arsap; ha ka jingtrei minot bad ka jingtrei shitom, ha ki jingbymïohthiah bunsien, ha ka jingthngan bad ka jingsliang, ha ki jingshah jingit bunsien, ha ka pjah bad ka jinglyngkhuit, nalor kita kiei kiei ruh kiba nabar. Don ruh kaba ban ïa nga ha la ka sngi, ka jingsumar ïa ki balang baroh keiñ. Uei ba sngewtlot, ba nga ruh ngam sngewtlot? ïano ba la pynthut, ba nga ngam pluh?” (2 Korinth 11:23-29).

Ka jingiasyllok bad ki jingshah shitom jong U Khrist

Kumba ki briew jong ka pyrthei ki la pynshitom ia U Jisu, kumta ruh kin sa pynshitom ia ki nongbud jong U Jisu, namar ba kim ithuh ia U Blei lymne ia U Khun jong U Blei.

Ioannis 15:18-21 Lada ka pyrthei ka shun ia phi, phi tip ba ka la shun ia nga mynshuwa ia phi. Lada phi la long na ka jong ka pyrthei, kata ka pyrthei kan da ieit ia la ka jong: hynrei naba phim long na ka jong ka pyrthei, hynrei nga nga la jied ia phi na ka jong ka pyrthei, namar kata keiñ kata ka pyrthei ka shun ia phi. To kynmaw ia kata ka ktien kaba nga la ong ma nga ha phi, U shakri um long uba kham khraw ia u kynrad jong u. Lada ki la leh beiñ ia nga, kin leh beiñ ruh ia phi: lada ki la sumar ia ka ktien jong nga, kin sumar ia ka jong phi ruh. Hynrei ia kine kiei kiei baroh kin leh ia phi na ka bynta ka kyrteng jong nga, naba kim ithuh ia uta uba ia phah ia nga.

Mathaios 24:9 Ynda kumta kin ai noh ia phi ha ka shitom, bad kin ia pyniap noh ia phi; bad phin long kiba la shun da ki kynja bynriew baroh na ka bynta ka kyrteng jong nga.

2 Timothi 3:12 Bad baroh kiba mon ban im riewblei ha U Khrist Jisu kin shah lehbein.

Namar kata, to ngin ym sngewlyngngoh, lymne sngewduh jingkyrmen lada kin wan ki jingpynshitom ha ngi namar U Khrist u la dep iathuhlypa, hynrei to ngin iasngewnguh pynban ia U Blei ba ngi ioh ka lad ban iashim bynta ha ka jingshah shitom jong U Khrist katkum ba la iathuhlypa. Bad ainguh ruh ia U Jisu ba U khlem shym la thok ia ngi. U iathuhlypa ia ka jingiashem jong ngi kumba ki long. Shisha, u long uba ngi lah ban shaniah.

Ioannis 16:1-4 Ia kine kiei kiei ruh nga la kren ha phi, ba phin ym thut. Kin kyntait noh ia phi na ki synagog; shisha ka por ka jia, ba uno uno ruh uba pyniap noh ia phi, un mut ba u ainguh ha U Blei. Te ia kine kiei kiei ruh kin leh ia phi, naba kim ithuh ia U Kpa, lymne ia nga. Hynrei ia kine kiei kiei ruh nga la iathuh ha phi, ba ynda la jia kata ka por, phin ioh kynmaw ia ki, ba nga nga la iathuh ha phi.

U Paul u kwah ym tang ban ithuh ia U Jisu hynrei ban iasyllok lane iashim bynta ha ki jingshah shitom kumba la shah U Khrist.

Philipi 3:10 Ba ngan ioh ithuh ia u, bad ia ka bor ka jingmihpat jong u, bad ia ka jingiasyllok ki jingshah jong u, haba la pynsyriem ia nga ha ka jingiap jong u.

Rom 8:17 Kumta lada ngi long ki khun, ngi long ki nongioh pateng ruh; ki nongioh pateng U Blei keiñ bad ki nongiaioh pateng lem bad U Khrist de; lada shisha ngi iashah shitom lem bad u, yn ioh pyndon burom lem ia ngi ruh bad u.

Philipi 1:29 Naba ha phi la ai na ka bynta U Khrist, ym tang ban ngeit ha u, hynrei ban shah shitom ruh na ka bynta jong u.

Ka jingpynshitom ka lah ban wan na iing na sem ruh bad na ka kynhun Khristan kiba kam ba ki long ki nongbud U Khrist. Namar kata wat sngewpher lane sngewduh mynsiem lada phi hap ban ieng marwei ha iing ha sem, ha imlang sahlang bad ha ka balang.

U Jisu u ong, “Wat mut ba nga la wan ban buh ka jingsuk ha ka pyrthei: ngam shym la wan ban buh ka jingsuk, hynrei ka wait. Naba nga la wan ba u briew un ialeh bad la u kpa, ka khun ruh bad la ka kmie, ka pyrsakurim ruh bad la ka syngken kurim.” “U para te un ai noh ia la u para ia kaban iap, u kpa ruh ia la ki khun : ki khun ruh kin ieng ialeh ia ki kmie ki kpa, bad kin iapyniap ruh ia ki. Te phin long ia kiba la shun da ki briew baroh na ka bynta ka kyrteng jong nga; hynrei uta uba da iaineh ha ban da kut, uta kein uban lait im.” “Bad ki nongshun u briew kin long kiba na iing jong u hi. Uta uba ieit ia u kpa lane ka kmie nalor jong nga, ym dei ia u ban ioh ia nga; bad uta uba ieit ia u khun lane ia ka khun nalor jong nga, ym dei ia u ban ioh ia nga. Bad uta ubym shim ia la ka diengphna bad bud nadien jong nga, ym dei ia u ban ioh ia nga. Uta uba shem ia la ka jingim un duh noh ia ka; bad uta uba duh noh ia la ka jingim na ka bynta jong nga un shem ia ka.” (Mathaios 10:21,22,34-39).

Balei U Blei u shah ba ki jingjynjar kin wan?

1Petros 4:12-14 Ko hep baieit, to wat sngewphylla phi ia kata ka jingtynjuh bameh ding kaba ha phi, kaba jia ia kaban tynjuh ia phi, kumba da jia kaba khyllah ha phi: hynrei kat kumba phi ioh bynta lem na kita ki jingshah shitom U Khrist, to kmen noh: ba ha kata ka jingpynpaw ia ka burom jong u phi ruh phin ioh kmen da ka jingkmen kaba khraw. Lada la kren bein ia phi namar ka kyrteng U Khrist, suk ma phi: naba U Mynsiem jong ka burom bad u jong U Blei u iaishong ha phi: ha phang jong ki shisha la kren bein ia u, hynrei ha phang jong phi la pyndon burom ia u.

Ka jingpynshitom bad ka jingjynjar ka long ka jingtynjuh ban phrang ia ka jingngeit jong ngi. Bun ki kylli, Balei U Blei um pynsuk beit ia ngi kham palat ban ia ki bymman? Lada U Blei u shah tang ka jingsuk ha ngi hapdeng ki jingpynshoi kiba bun, ngin sa hap ha ka pop da kaba suk. Hynrei ka long na ka bynta ka jingmyntoi bad jingbha jong ngi ba U Blei u shah ia ka jingjynjar ba kan wan ha ngi. Kan pynlong ia ngi ba ngi kynmaw bad shaniah baroh ha ka kti jong U Blei. Ka long ban pynkynmaw ia ngi ba ngim lah ban leh ei ei ruh em da lade. U Blei u long u nongialeh bad nongkyrshan na ka bynta jong ngi.

Naba jong ki long ka hima ki bneng

Ka ktien U Blei ka ong, “ba ka dei ia ngi ban bsut shapoh ka hima U Blei lyngba shibun ki jynjar.” (Ki Kam Ki Apostol 14: 22).

1 Petros 1:6,7 Ha kaba phi ïasngewkmen eh, la mynta khyndiat por, lada donkam, la pynsngewsih ïa phi ruh ha kiba bun jaid ki jingtynjuh; khnang ba kata kaba phrang ïa ka jingngeit jong phi, kaba kham kordor ïa ka ksiar kaba jot noh, la la phrang ruh ïa ka da ka ding, yn ïoh shem ïa ka ha ka jingïaroh bad ka burom bad ka jinglong burom, ha ka jingpynpaw U Jisu Khrist.

Kito kibym lehrain ia U Jisu, U Jisu ruh un ym lehrain ia ki ynda Un wan, kata kamut, Un pdiang sngewbha ia ki bad khot noh ia ki sha ka iing shongneh bymjukut. Hynrei uno uno ruh u ban sngewlehrain ïa U Jisu bad ïa ki ktien jong u, “ïa uta keiñ U Khun u briew un lehrain, ynda un wan ha ka burom jong u, bad ka jong U Kpa, bad ka jong ki angel bakhuid.” (Loukas 9:26)

Watla ka jingim Khristan ka long kaba eh, ka long kham jem shibun bad kham sting shibun ban ia ka jingim bakynja pyrthei. Ka jingim Khristan ka long kaba eh ha ka doh hynrei ka mynsiem ka shah jem ia kiei kiei baroh. Ka jingim bakynja pyrthei ka long kaba suk ha ka doh tang shipor hynrei ka mynsiem ka pang, ka khuslai bad ka shitom ha la ka sngi.

Dei tang kane ka jingkyrmen bad ka jingpyntngen jong ki martyrs – U Jisu u la jan wan. Ka jingsuk bakhraw bad ka jingkhawai bymjukut ka ap ia phi ha bneng. Namar kata wat khih khuslai ha ka dohnud jong phi, to iaishah slem bad iai kyrmen ha ki ktien U Jisu.

Jakob 5:7,8 Namar kata, to shah slem, ko parabangeit, haduh kata ka jingwan U Trai. Ha khmih, uba rep u ap khmih ïa u soh bakor jong ka khyndew, u da ïai-ap slem ïa u, tad ynda u la ïoh pdiang ïa u slap bashuwa bad bakhatduh. To ïashah slem ruh ma phi, to pyneh skhem ïa ki dohnud jong phi, naba kata ka jingwan U Trai ka la jan.