Suk kiba shah krenbeiñ

KI JINGKYRKHU BASHISHA – BYNTA IX – Suk kiba shah krenbeiñ

Ka jingaiei bad ka jingsuk to kan long ha phi na U Trai jong ngi U Jisu Khrist. Ka bynta jong kane ka jingpule ka la long na ka jingiathuhkhana jong U Jisu halor u lum ka jingkyrkhu. Ki long ki jinghikai kiba shem mynsiem bad kiba iadei bad ka jingsuk bad jingkyrmen jong u khun bynriew ba la hap ha ka pop.

KA JINGIATHUHKHANA HALOR U LUM

[Phi lah ban shem ha Mathaios 5,6,7 bad Loukas 6:20-49.]

Suk kiba shah krenbeiñ

Mathaios 5:11,12 Suk ma phi haba kin iakrenbeiñ, bad pynshitom ia phi, bad ba kin ong ki ktien bymman baroh ruh ia phi na ka bynta jong nga, haba ki shu lamler. To iakmen, to iashad kmen ruh : namar kaba khraw ka bainong jong phi ha ki bneng: naba kumta ki la iapynshitom ia ki nongiathuhlypa kiba la mynshuwa jong phi.

Ka jingshah krenbeiñ ka dei sa kawei pat ka jingialeh jong U Soitan ia ki briew jong U Blei, ban pyndom pynbitar ia ki khnang ba kin leh pop ia U Blei. Ym tang kumta, hynrei U Soitan u pyrshang ban pynphriang khubor bakla shaphang ki briew U Blei khnang ba kiwei ki briew kin ym shaniah shuh ha ki kum ki nongrah khubor U Blei. U Khun U Blei ruh u iakynduh ia kane ka jingialeh pyrshah jong u kpa jong ki jinglamler ha ki sngi jong U ha ka doh, sa katno tam lei ia ngi.

Mathaios 10:24,25 U synran um long halor u nonghikai, lymne u shakri halor u kynrad jong u. La biang ïa u synran ba un long kum u nonghikai jong u, ïa u shakri ruh kum u kynrad jong u. Lada ki la khot ‘Belsebul’ ïa u trai ïing, kaba katno tam ba kin ïakhot sin ïa kita kiba na ka ïing jong u!

Lada ia U Trai Jisu ruh u shah kren beiñ sa katno tam lei ki nongbud jong U. Bun ki Khristan kiba im riewblei ha U Khrist, ki shah kynnoh kum ki nongmane ksuid lane ki nongmane ha ka niam ksuid ‘occult’. Don ruh kiba shah kynnoh ba ki la shah ialam da u mynsiem bymman. Ki ktien bymman laiphew jait ki mih na ki shyntur ki briew ban bret ia ki briew U Blei.

Bad katno ka long kaba sngewsih lada ki nongkrenbein ki dei hi ki briew kiba kam ba ki long ki Khristan. Bunsien ki briew U Blei namar ba ki rit paid ki ju shah kynthup lane shah niew lang bad kito kiba la phaidien na ka jingngeit. Katno ka jingsniew ban iohi ba ki bymman ki kynnoh sniew pynban ia ki riewkhuid jong U Blei da kijuh ki jingkynnoh kiba la dei ban kynnoh ia ki. U Khristan bym iaineh u kynnoh ia U Khristan ba iaineh ba u long uba arsap bad u nonghikai balamler. Haba ki Khristan ki ialap ia ka jingneh jong ka hukum U Blei kiba shah kynnoh ba ki long kiba pyrkhing kum ki Pharisi, bad haba ki ialap ia ka gospel U Khrist ki shah ong ba ki la pyndam noh ia ki hukum U Blei, haba ki maham ia kiwei shaphang ka pop ki shah kynnoh pynban ba ki long kiba tohmet bad kiba bishar ia kiwei. Haba ki maham ia kiwei shaphang u khristlamler lane u mrad khlaw ki shah kynnoh pynban ba ki long ki nongkrenbein niam. Bad haba ki khot ia ki briew ba kin shaniah tang ha U Khrist kum U Mawsiang baskhem ki shah kynnoh pynban ba ki long “kiba pynkylla khongpong ia ka pyrthei.” (Ki Kam 17:7).

U Paul ruh u shah kren beiñ. Haba u sneng ia ki nong Korinth u ong, “Wat haduh mynta ruh, ngi thngan bad ngi sliang, bad ngi lyngkhuit, bad la shohbeiñ ïa ngi, bad ngim don ka jaka shong bathikna; bad ngi ïatrei minot, da kaba trei da ki kti jong ngi hi. Haba krenbeiñ sat ïa ngi, ngi kyrkhu; haba behbeiñ ïa ngi, ngi ïaishah; haba kren sniew ïa ngi, ngi kyrpad: la ñiew ïa ngi kum ka jakhlia jong ka pyrthei, bad kum ki synrum jong kiei kiei baroh, jin haduh mynta.” (1 Korinth 4:11-13).

Wat nym sngewlyngngoh haba ki wan ki jingpynshitom, kim long kiei kiei kiba thymmai, hynrei kiba la ju jia ha man la ka arta ha ki briew U Blei. U Jisu u ong, “naba kumta ki la iapynshitom ia ki nongiathuhlypa kiba la mynshuwa jong phi.”

Haba ki shu lamler

Kam lei lei kaei kaba ki briew kin kren ia phi haba ki shu lamler. Tang ma phi bad U Blei ba tip khambha ia ka jingshisha shaphang ka jingim jong phi. Wat pynsngap lymne pynkhuslai ia lade da ki jingpyrkhat bymman, haba ki long tang ban pynduh mynsiem bad pynartatien ia ka jinglong Khristan jong phi ha U Trai. Lada phi sngewthuh bad tip shai ba phi don ha ka liang U Trai bad ba U Trai u don ha ka liang jong phi, wat pynsngew ia ka jingkren beiñ jong no jong no ruh. Kita kiba kren beiñ ia phi ki long kiba lamler. Ki hi ia lade kim kwah ban rung sha ka hima U Blei, kim kwah ban iaid ha ka lynti jong U Trai bad kumta ki kren bein ia kito kiba iaid shisur bad shi jingmut ha ka lynti jong ka bneng.

Mathaios 10:26 Namar kata, to wat sheptieng ïa ki: naba ym don kaei kaei ruh ba la tap, ïa kaba yn ym pynpaw; bad ba la buhrieh, ïa ka ban ym pyntip.

Ka jingshisha kan sa paw ha kawei ka sngi. Ka dei ia ngi tang ban long kiba iaishah bad kiba ieit ia ki nongialeh pyrshah kumba ki long bad “ym kiba leh markylliang ïa ka basniew namar ka basniew, lane ïa kaba krenbeiñ namar kaba krenbeiñ; hynrei, da kumwei keiñ kiba kyrkhu; haba tip ba sha kane khnang la khot ïa phi, ba phin da ïoh ïa ka jingkyrkhu. Namar jar uba mon ban ieit ïa ka jingim, bad ban ïohi ïa ki sngi babha, to un khang noh ïa u thylliej jong u na ka basniew, bad ïa ki rmiang shyntur jong u na ka ban kren ïa kaba shukor: to un da kynriah noh na ka basniew, bad ba un da leh ïa ka babha: to un da wad ïa ka jingsuk, bad un da beh brai ïa ka. Naba ki khmat U Trai ki ïalong halor ki bahok, bad ki shkor jong u ki sha ka jingduwai jong ki; hynrei, ka khmat U Trai ka ïaleh ïa kiba leh ïa kiei kiei ki basniew.” (1 Petros 3:9-12).

To iakmen, to iashad kmen

U Khristan u don ka daw kaba biang eh shaphang balei u kloi ban shah shitom na ka bynta U Khrist. Ka dei namar ba un sa ioh pateng lem bad U Khrist ia ka burom jong ka bneng. U kloi ban duh ia kiei kiei kiba tang shipor na ka bynta kiei kiei kiba neh bymjukut.

Ah ka jingkmen aiu kum kane, haba uwei un iohi ia ka khmat U Kpa uba ha bneng! Ki khmat jong ngi ki la khmih tang sha U Kpa babha, bad da ka jingkmen ngin sa ong biang ha bneng kumba ngi la ong hangne ha pyrthei, “Nga don ïano ha bneng hynrei, tang ma me? Bad ym don ha ka khyndew uba nga kwah nalor jong me.” (Salm 73:25).

To iakmen, namar ki jingjynjar bad ki jingshitom baroh kin wai noh. To iashad kmen namar phi la lait im na ka pop bad na ka bor jong ka. To iakmen, namar phin ia im shirta bad U Trai Jisu. To iakmen, namar ka hok kan sa synshar bad ka pop kan ym don shuh. To iakmen namar U Trai Jisu um ju lamler. U ong, “Shisha, Nga wan kloi.” (Jingpynpaw 22:20).

Ynda ki la siewspah baroh kin poi ha ka hima U Blei, “U Blei un ñiad noh ïa ka jingjaw ummat baroh na ki khmat jong ki; bad ka jingïap kan ym long shuh, lymne ka jingsngewsih, lymne ka jingïam, lymne ka jingpang, kan ym long shuh: kita kiei kiei kiba mynshuwa ki la leit noh. Te uta u bashong halor kata ka khet u la ong, “Ha khmih, nga thaw thymmai ïa kiei kiei baroh.” Bad u ong, “To thoh: naba kine ki ktien ki long kiba ïaineh bad bashisha.” (Jingpynpaw 21:4-5).

Ka bneng ka long kaba shisha, U Jisu Khrist u long U Trai jong ka, bad U kwah ban long U Trai jong ka dohnud jong phi bad jong nga ruh.

To iaineh paralok baieit, ngin sa iashem ha bneng!