Suk kiba jemnud

KI JINGKYRKHU BASHISHA – BYNTA III – Suk kiba jemnud

Ka jingaiei bad ka jingsuk to kan long ha phi na U Trai jong ngi U Jisu Khrist. Ka bynta jong kane ka jingpule ka la long na ka jingiathuhkhana jong U Jisu halor u lum ka jingkyrkhu. Ki long ki jinghikai kiba shem mynsiem bad kiba iadei bad ka jingsuk bad jingkyrmen jong u khun bynriew ba la hap ha ka pop.

KA JINGIATHUHKHANA HALOR U LUM

[Phi lah ban shem ha Mathaios 5,6,7 bad Loukas 6:20-49.]

Suk kiba jemnud

Mathaios 5:5 Suk kiba jemnud: naba kin iaioh ia ka khyndew.

Kito kiba sngewthuh ba ki donkam ia U Khrist, kito kiba sngewsih shisha ia ka pop bad kiba la iashim bynta ha ka jingsngewsih U Khrist, kin sa nang ban long kiba jemnud na U Nonghikai bakynja-blei.

Haba ong ‘jemnud’ kamut – bajar-jar, bajai-jai, ba sngewrit, ba pyndem bad ba kohnguh.

U Jisu u la kdew ia ka jingjemnud kum ka jinglong kaba kongsan eh na ki kyndon ban rung sha ka hima U Blei. Ha ka por jong U Jisu bun ki briew ki la khein kor bad ki la iabeh eh tang ban pyndep ia kiei kiei kiba shalor (lane, kiba na sla) jong ka hukum, hynrei ki la shim sting ia ka hukum bakynja mynsiem kaba kynthup ia ka jingjemnud.

Mathaios 23:23 Kordit ia phi, ki nongthoh bad ki Pharisi, kiba arsap! naba phi ai ia kaba shiphew na ka pudina bad na ka dill bad na ka kummin, bad phi iehnoh te ia kita kiei kiei kiba kham khia ki jong ka hukum, ia ka hok, bad ia ka jingisynei, bad ia ka jingngeit; ka la dei kein ia phi ban leh ia kine, bad ban ym iehnoh ia kita kiwei.

Ha ka por jong U, U Jisu u la sngewdonkam eh ban ialap nyngkong eh ia ka hok U Blei, ka jingisynei bad ia ka jingngeit. Khamtam lei lei ha kine ki por jong ngi ha kaba ka pop ka la man bun bad ka jingieit jong kiba bun ka la man khriat – ka la donkam eh ban iai pynsawa ia kine ki ktien jong U Khrist.

Ka jingjemnud la pynpaw ha ka jingim U Jisu -

Philipi 2:6-8Uba haba u long ha ka dur U Blei, um shym la niew eh ia kaban bat ban long marryngkat bad U Blei, hynrei u la pynsuda ia lade, u da shim ia ka dur mraw, haba u la jia long ha ka jingsyriem ki briew: te haba la shem ia u ha ka rukom kum u briew, u la lehrit ia lade, haba u la jia long uba kohnguh wat haduh ka jingiap, hooid, ka jingiap ka diengphna keiñ.

Markos 10:45Naba shisha U Khun u briew um shym la wan ban ioh shakri, hynrei ban shakri, bad ban ai ia ka jingim ban long ka jingsiewspah na ka bynta kiba bun.

U Jisu u la wan ban shakri. U la pynsuda ia lade – Ha kiei kiei baroh ba u leh, ka lade kam ju paw. U pyndem lut ha ka mon jong U Kpa.

Ioannis 5:30Naba ngam wad ia ka mon ka jong nga hi, hynrei ia ka mon U Kpa uba la phah ia nga.

Ka jingim U Khrist wat hapdeng ka jingeh, ka jingialeh bad ka jingjynjar ka long ka jingim kaba suk. Ka eriong jong ka jingim bad ka jingbitar U Soitan kam lah ban pynthut ia ka jingjai-jai bad ia ka jingsuk jong U.

U Jisu u tyrwa sngewbha –

Ioannis 14:27 Ia ka jingsuk nga iehnoh ha phi, ia ka jingsuk ka jong nga nga ai ha phi, ym kumba kata ka pyrthei ka ai, nga ai ma nga ha phi.

Mathaios 11:29To shim ia ka lyngkor jong nga ha phi, to hikai ruh na nga; naba nga uba lui lui bad uba rit ruh ha ka dohnud : te phin shem kaba jahthait ha ki mynsiem jong phi.

Ka dei tang lada ngi wan sha U Khrist ba ngi sa nang kumno ban long kiba jemnud (lui lui) bad kiba rit ha ka dohnud. Lada ngi kloi ban shah hikai ha U Jisu ngin sa nang kumno ban im ka jingim kaba pdiang sngewbha eh ha khmat U Blei. U Khrist u khot ia ngi ban pdiang ia U ha ka dohnud (Jpw 3:20) bad ban khmih sha U da ka jingngeit. Katba ngi iaisah ha U Khrist bad ngi khmih sha U, ki soh jong U Mynsiem U Khrist kin sa paw ha ka jingim jong ngi.

Galatia 5:22Hynrei u soh jong U Mynsiem u long ka jingieit, ka jingkmen, ka jingsuk, ka jingshahslem, ka jinglehsbun, ka jingbha, ka jingiaineh, ka jingjemnud, ka bor halor lade.

Mathaios 16:24Ynda kumta U Jisu u la ong ha ki synran jong u: Lada uno uno ruh u mon ban wan nadien jong nga, ai ba un len ia lade, bad un rah ia la ka diengphna, bad un wan bud ia nga.

To ai ba ka lade kan iap noh bad ban ym synshar shuh ha ka mynsiem jong phi.

Ynda ngi khmih ia ka jinglen lade jong U Jisu bad ia ka jingjai-jai jong U – ngin sa long kum U Daniel mynba u khmih ia ka burom jong u angel, ngin sa iohi ba ka jinglong kaba bha bad badonburom jong ngi ka long tang kum ka jain syrdep jot hakhmat U Khrist. U Daniel u iathuh, “Kam sah shuh ka bor ha nga: naba ka jingitynnad jong nga ka la kylla kaba pyut ha nga, bad ngam shym donbor shuh.” (Daniel 10:8). Hynrei lada ngi iai khmih sha U Khrist kumba ha ka iit, ngin sa bit ia ka dur jong U “na ka burom sha ka burom”. (2 Korinth 3:18).

Ka dei ka jingieit ia ka lade kaba pynjot ia ka jingsuk jong ngi. Hynrei lada ngi don ia ka jingieit U Blei ngin sa nang ban ieit ia kiwei kumba ieit ia lade.

Ka jingsarong bad ka jingkyntiew ia lade – ka dei ka mynsiem jong U Soitan.

Isaiah 14:12-14Kumno me ia hap na bneng, ko Lurshai, u khun jong ka step! kumno ia ot noh ia me sha ka khyndew, uba la ju pyndem lin ia ki jaid bynriew! Te me la ong ha la ka dohnud, Ngan kiew shabneng, ngan kyntiew ia la ka khet haneng ki khlur jong U Blei; bad ngan shong halor u lum ka jingiaseng, ha kiba kut phang shatei: ngan kiew sha lyndet ki lyoh; ngan long kum Uba hajrong tam.

U Soitan u la wan bet ia kane ka mynsiem ha u khun bynriew ha kper Eden. U Soitan u ong ha ka Im, “Phin ym iap noh shisha: Namar U Blei u tip ba, ha kata ka sngi ba phin bam na u, un sa pynpeit ia ki khmat jong phi, bad ba phin long kum ki blei, kiba tip ia kaba bha bad ia kaba sniew.” (Jenesis 3:4,5). U Soitan u kwah ia ki ba kin iasnoh kti lang bad u ha ka jingialeh bakhraw pyrshah ia U Blei. U kwah ba ma ki ruh kin don kajuh ka jinglong kum ma u – ban kwah ban long kum U Bahakhlieh tam eh. Kane ka dei kata “ka jingsarong thala shaphang ka jingim” – kaba kwah ban ieit bad kyntiew tang ia lade kham halor ban ia kiwei. (1 Ioannis 2:16). Bad haba ki kmie ki kpa banyngkong jong ngi ki la pdiang ia kane ka mynsiem, baroh kiba mih na U Adam bad ka Im ki la ioh pateng ia kane ka mynsiem basarong. (Ioannis 3:6).

Hynrei lada ngi phai sha U Khrist, U Kpa jong ka jaid bynriew bathymmai, ngin sa nang ban sngewrit. Lada U Khrist un wan ha ka jingim jong u briew, ka lade kan sa iap noh ha u.

Galatia 2:20La sahnarphna ia nga lem bad U Khrist; pynban nga im; hynrei ym ma nga shuh, hynrei U Khrist kein u im ha nga: bad kata kaba nga im mynta ha ka doh nga im da ka jingngeit kein kaba ha U Khun U Blei, uba la ieit ia nga, bad uba la aiti noh ia lade na ka bynta jong nga.

Kiba jemnud – kin ia ioh ia ka khyndew

Dei na ka jingsarong bad ka jingsngewmeng kaba la pynduh ia U Adam ia ka khyndew kaba itynnad bad kaba khuid bad ia ka kper Eden.

Kumta dei tang da ka jingjemnud bad jingpyndem bad jingaiti lut ba U Khrist u la lah ban ioh pat ia ka khyndew kaba U Adam u la duh noh.

Namar ba ngi dei ban jop kumba jop U Jisu (Jpw 3:21), kumta ngi ruh, ka dei tang da ka jingsngewrit, jingaiti lut, ba ngi lah ban long ki nongiohpateng ia ka khyndew.

Salm 37:11Hynrei kiba lui lui (jemnud) kin ioh kynti ia ka ri; bad kin pynsngewbha ia lade ha ka jingkyrhai ka jingsuk.

Ka khyndew ia kaba la kular ha kiba jemnud kam dei kane ka pyrthei kaba mynta, kaba la pyndum da ka syrngiew jong ka jingiap bad ka jingtim hynrei ka dei ka pyrthei kaban sa wan.

2 Petros 3:13Hynrei ia ki bneng kiba thymmai bad ia ka khyndew kaba thymmai, katba kum kata ka jingkular jong u, ngi iakhmih lynti, ha kiba ka hok ka shong sah.

Jingpynpaw 22:3Te ka jingtim baroh kan ym long shuh : bad kata ka khet jong U Blei bad jong uta U Khun langbrot kan long ha ka: bad ki shakri jong u kin iashakri ia u.

Jingpynpaw 21:4Te U Blei un niad noh ia ka jingjaw ummat baroh na ki khmat jong ki; bad ka jingiap kan ym long shuh, lymne ka jingsngewsih, lymne ka jingiam, lymne ka jingpang, kan ym long shuh: kita kiei kiei kiba mynshuwa ki la leit noh.

U Jisu Khrist uba long “U Syiem ka jingsuk” un synshar. Phi lah ban shaniah ha U. U long “ujuh mynhynnin, bad mynta, bad sha bymjukut.” (Isaiah 9:6; Hebru 13:8)