Kumno ngin leh ia ka Ktien jong U Blei?

Ka long kaba donkam ban shahshkor bad sumar ia ka ktien jong U Blei:

Proberb 4:20-22 Ko khun, to shahshkor ia ki ktien jong nga; to pyndem ia la ka shkor ha ki jingong jong nga. Wat ai ba kin leit noh na ki khmat jong me; to sumar ia ki hapdeng la ka dohnud. Namar ki long ka jingim ia kita kiba shem ia ki, bad ka jingkhiah ia ka doh jong ki baroh.

Hebru 2:1 Naba kumta ka dei ia ngi ban ia kham pynshah shkor ia kita kiei kiei ruh ia kiba la iohsngew, ioh ba kumno re kumno ngi tuid noh na ki.

2 Petros 1:19 Bad ngi don kata ka ktien ka jingiathuhlypa ba la kham pynskhem: ha kaba phi leh bha haba phi pynshah shkor ia ka, kumba ha ka sharak batyngshain ha ka jaka badum, tadynda kan mih ka sngi, bad u lur shai un da mih ha ki dohnud jong phi.

(Pule ruh na Proberb 4:4,13)

Ngi dei ban bsa ia lade da ka Ktien U Blei, naba ka long ka jingbam bakynja-mynsiem:

Salm 119:103 Katno ki long kiba thiang ki ktien jong me ia ka shyntur jong nga! Kham thiang keiñ ban ia ka ngap ha ka shyntur jong nga!

Job 23:12 Ngam shym phaidien na ki hukum ki rmiang shyntur jong u; nga la kham kynshew ia ki ktien ka shyntur jong u ban ia la ka jingbam badonkam.

Jeremaiah 15:16 La shem ia ki ktien jong me, bad nga la bam ia ki.

Mathaios 4:4 Bym tang da u kpu hi ba un im u briew, hynrei da ki ktien baroh ba mih noh na ka shyntur U Blei.

1 Petros 2:2 Kum ki khunlung badang kha, to phin kwah hir hir ia kaba sngur ka dud kaba dei mynsiem, khnang ba phin ioh san da ka sha ka jingpynim.

Ngi donkam ban pyrkhat bad puson ia ka Ktien U Blei:

Joshua 1:8 Wat ai ba kane ka kitab ka hukum kan jah noh na ka shyntur jong me, hynrei men iaipyrkhat ia ka synñia sngi, khnang ba men ioh sumar ban leh katba kum ia baroh ba la thoh ha ka: naba kumta men roi ha la ka lynti, bad kumta men man bha.

Salm 119:99 Ka kham khraw ka jingshemphang jong nga ban ia ka jong ki nonghikai jong nga baroh; naba ki jingphla jong me ki long ka jingpyrkhat jong nga.

(Pule ruh na Salm 1:2,3; 119:78, 148)

Ngi dei ban ieit ia ka Ktien U Blei bad shah ba kan shong sah ha ki dohnud jong ngi:

Deuteronomi 11:18 Namarkata to buh khop ia kine ki ktien jong nga ha ka dohnud jong phi bad ha ka mynsiem jong phi, bad to teh ia ki kum ka dak ha ka kti jong phi, bad kin long kum ki jingdeng shyllangmat hapdeng ki khmat jong phi.

Salm 40:8 Nga sngewbha ban leh ia ka mon jong me, Ah U Blei jong nga; bad ka hukum jong me ka don ha ka dohnud jong nga.

Salm 119:97 Ah katno nga ieit ia ka aiñ jong me! ka long ka jingpyrkhat jong nga baroh shisngi.

Salm 119:140 Ka ktien jong me kaba khuid phar; namarkata u shakri jong me u ieit ia ka.

Salm 119:162 Nga shad kmen ha ka ktien jong me, kum uba shem ia ka jinglute shibun.

Kolossai 3:16 Ai ba ka ktien U Khrist, kan shong kyrhai hapoh jong phi ha ka jingstad baroh.

(Pule ruh na Deut 6: 6,7; Salm 119:20, 47, 48, 127, 131)

Pule ia ka Ktien U Blei bad wad bniah ia ka Jingthoh Bakhuid:

Ioannis 5:39 (U Jisu u la ong) Phi iit bha ia ki jingthoh, naba ha ki phi mut ba phi ioh ka jingim bymjukut; kita ruh ki long kiba iaphla ia nga.

Ki Kam ki Apostol 17:11 (Ki Nong Beria) kiba la pdiang ia kata ka ktien da ka jingsngew la kloi baroh, ha la ka sngi ki da iit bniah ia ki jingthoh, la kine kiei kiei ruh ki lah long kumta ne em.

1 Timothi 4:13,16 To men minot ha kaba pule, ha kaba kyntu: ha kaba hikai. (16) To sumar shaphang ia lade, bad ia la ka jinghikai; to men iaineh ha kine kiei kiei.

Ngi dei ban phla bad ban jubab ia ki jingkylli da ka Ktien U Blei:

Salm 119:42 Kumta ngan ioh ka jingphai ktien ia uta uba krenbein ia nga; naba nga shaniah ha ka ktien jong me.

Proberb 22:20:21 Hato ngam shym la thoh ha me ia kiei kiei kiba bha eh ki jong ki jingpyrkhat bad ka jingtip: ia kaban pyntip ia me ia ka jingskhem ki ktien ka jingshisha, ba me lah ban leit lam lem ia ki ktien ka jingshisha sha kita kiba la phah ia me?

Philipi 2:15,16 Hapdeng kita la iohi ia phi kum ki jingshai ha ka pyrthei, da kaba bat tyrwa ia ka ktien ka jingim.

Titos 1:9 Uba bat skhem ia ka ktien bashisha kaba long katba kum kata ka jinghikai... ban pynkynduh (pynkohnguh) ruh ia kiba iapharshi kylliang (kiba iasaid kylliang).

1 Petros 3:15 Bad to long kiba kloi ha la ka sngi ia kaban ai jubab ha uwei pa uwei baroh uba pan na phi ia ka jingpyninia shaphang kata ka jingkyrmen kaba ha phi, hynrei da ka jingjemnud bad ka jingtieng burom.

1 Petros 4:11 Lada uno uno ruh u kren, un kren kein kum ki jingong U Blei.

Ngi dei ban hikai bad ialap ia ka Ktien U Blei:

Jeremaiah 23:28 Uta uba don ka ktien jong nga, to un kren biang biang ia ka ktien jong nga... ong U Trai.

Habakkuk 2:2 Te U Trai u la iathuh ha nga, bad u la ong, To thoh ia kane ka jingithuhpaw, bad to pynshai bha ia ka halor ki lyngkniap, ba uta uba phet u lah ban pule ia ka.

Mathaios 28:20 Da hikai ia ki ban sumar ia kiei kiei baroh kat kiba nga la hukum ia phi.

Ki Kam ki Apostol 8:25 Ki la iaphla bad ialap ia ka ktien U Trai.

Ki Kam ki Apostol 18:11 Te u la iaishong shi snem hynriew bnai, u da hikai ia ka ktien U Blei hapdeng jong ki.

2 Timothi 4:2 To men ialap ia kata ka ktien... to sneng, to kyntu.

(Pule ruh na 1 Korinth 2:4,13; Ioannis 12:49; 14:10,24; 17:8.)

Ngi dei ruh ban hikai ia ki khun ki kti da ka Ktien U Blei:

Deuteronomi 6:7 Bad men iai hikai ia ki ha la ki khun, te men kren shaphang jong ki haba me shong ha la iing, bad haba me iaid ha ka lynti, bad haba me thiah ruh, bad haba me khie ruh.

2 Timothi 3:15 Bad ba na myndang khunlung me la tip ia kita ki jingthoh bakhuid, kiba lah ban pynstad ia me sha ka jingpynim da ka jingngeit kaba ha U Khrist Jisu.

(Pule Salm 78:1-8)

Hikai da “ka dud” ia kiba dang khunlung bad da “ka doh” ia kiba la rangbah:

Hebru 5:13 Namar uno uno ba ju bam tang ka dud u long ubym shemphang ia ka ktien ka hok: namar u long u khunlung.

Hebru 5:14 Hynrei ka jingbam kaba eh ka long ia ki rangbah, kiba namar ka jingmlien ki don ia ki jingsngewthuh ba la pynmlien ban bishar ia kaba bha ruh bad ia kaba sniew.

1 Korinth 3:1,2 Kumta ruh ma nga, ko para bangeit, ngam shym lah ban kren ha phi kum ha kiba kynja mynsiem, hynrei kum ha kiba kynja doh, kumba ha ki khunlung ha U Khrist kein. Nga la ju bsa ju pjiah ia phi da ka dud, ym da ka jingbam: namar phim lah ban shah ia kata; wat haduh mynta ruh phim pat lah.

Ioannis 16:12 Nga dang don shibun kiei kiei ruh ban ong ha phi, hynrei phim lah ban shah ia ki mynta.

KAEI KABA NGIM DEI BAN LEH IA KA KTIEN U BLEI?

Ngim dei ban pule da ka jingartatien:

Loukas 24:25 Ynda kumta u la ong ha ki, Ah phi kiba mut bakla, bad ba shanti (suki) ka dohnud ia kaban ngeit ia kiei kiei baroh kiba ki nongiathuhlypa ki la iathuh!

Hebru 4:2 Namar shisha ha ngi ruh ia ialap ia ka gospel kumba ha kita ruh; hynrei kata ka ktien ba la iohsngew kam shym pynmyntoi ia ki, namar ym shym ia khniot lang ia ka bad ka jingngeit ha kita kiba la iohsngew.

Ngim dei ban bakla da ka jingbymtip ia ka ktien:

Mathaios 22:29 Phi bakla, ba phim tip ia ki jingthoh, lymne ia ka bor U Blei.

(Pule ruh na Mathaios 12:3; 19:4; 21:42; Ioannis 20:9: Ki Kam 13:27.)

Ngim dei ban iakhun lane pynkyllain ia ki Jingthoh Bakhuid:

2 Korinth 2:17 Namar ngim long kum kita kiba bun, kiba pynkhleh (pynpyut/pynsniew) ia ka ktien U Blei.

2 Korinth 4:2 Hynrei ngi la kyndiah eh na kiei kiei ruh kiba rieh jong ka jinglehrain, haba ngim iaid ha ka buit sianti, lymne khleh phon ia ka ktien U Blei; hynrei da ka jingpynpaw ia ka jingshisha ngi da iaroh ia lade ha ka jingiatiplem ki briew baroh ha khmat U Blei.

2 Petros 3:16 Kumba ha kita ki shithi jong u baroh ruh, haba u kren ha ki shaphang kine kiei kiei ruh: ha kiba don kiei kiei ruh kiba eh ban sngewthuh, ia kiba kita kibym nang bad kibym neh ki pynkyllain, kumba ki leh ruh ia kita kiwei ki jingthoh, ia kaban pynjot noh ia lade hi.

(Phi lah ban pule lut na 2 Petros 3:14-17.)

Ngim dei ban iania iamai halor ki jinghikai kibym donkam bad kiba eh ban sngewthuh:

Rom 14:1 Te phin shim lok ha lade ia uta uba long tlot ha la ka jingngeit, hynrei ym sha kaban iasaid pynrem ia ki jingmut kyndiah jong u.

2 Timothi 2:14-16 To pynkynmaw ia ki shaphang kine kiei kiei ruh, da kaba hukum jur ia ki ha khmat U Trai ban ym iapyneh shaphang ki ktien, ia kaban ym myntoi ei ei ruh em, hynrei tang ia kaban pynbakla ia kiba iohsngew. To pyrshang smat ban aiti ia lade ba la pdianghun da U Blei, kum u nongtrei ubym donkam ban lehrain, uba iasam beit ia ka ktien ka jingshisha. Hynrei na kita ki ktien bieit bathala to kiar noh; namar kin ianang kham iaid sha ka jingbymriewblei.

Titos 3:9 Hynrei to kiar noh na ki jingiasaid babieit, bad na ki jingkhein jinghiar pateng, bad na ki jingiania bad na ki jingiania shaphang ka hukum; namar ki long kibym myntoi bad kiba thala.

Ngim dei ban pyneh ia ki dohnud jong ngi bad ban kyntait ia ka ktien:

2 Khronikl 36:16 Hynrei ki la rkhiebeiñ ia ki nonglamktien jong U Blei, bad ki la ñiewbeiñ ia ki ktien jong u.

Proberb 13:13 Jar uba ñiewbeiñ ia kata ka ktien u wallam ka jingjot halor lade.

Isaiah 5:24 Ki la kyntait ia ka hukum U Trai ki paid, bad ki la beiñ ia ka ktien jong U Bakhuid ki Israel.

Sekharaiah 7:12,13 Shisha keiñ, ki la pynlong ia la ki dohnud kum u mawleiñ, ba ioh kin iohsngew ia ka hukum, bad ia ki ktien kiba U Trai ki paid u la lah phah da la u mynsiem da ka kti kita ki nongiathuhlypa kiba mynshuwa.

Hebru 3:15 Mynta ka sngi, lada phin iohsngew ia ka ktien jong u, to wat pyneh ia ki dohnud jong phi.

Kaba kut jong kito kiba artatien bad kiba kyntait ia ka ktien:

2 Khronikl 36:16 Ki la ñiewbeiñ ia ki ktien jong u... haduh ba ka jingbitar U Trai ka la mih pyrshah ia ki briew jong u, katba ym don jingshna shuh.

Salm 50:17,21 Haba me isih ia ka jinghikai, bad ba me bred shadien jong me ia ki ktien jong nga. (21) Ia kine me la leh, nga ruh nga la sngap jar; me la mut ba nga la long kumjuh kum ma me: hynrei ngan sneng ia me, bad ngan buh pynbeit ia ki ha pyrshah ki khmat jong me.

Isaiah 5:24 Namarkata kumba ka thylliej ding ka bam duh ia u jyntang kha, bad u langiap u nang them ha ka jingmeh ding, u thied jong ki ruh un long kum ka jingpyut, bad ka jingphuh jong ki kan man pui pui: namar ki la kyntait ia ka hukum U Trai ki paid, bad ki la bein ia ka ktien jong U Bakhuid ki Israel.

Hosia 4:6 Ia u paidlang jong nga ia pynjot namar bymdon jingtip; namarba me la kyntait ia ka jingtip, nga ruh ngan kyntait ia me, ba men ym long lyngdoh satia ha nga: naba me la klet ia ka hukum U Blei jong me, nga ruh ngan klet ia ki khun jong me.

Sekharaiah 7:11,12 Hynrei ki kim ju treh ban sngap... namarkata keiñ ka la wan ka jingbitar kaba khraw na U Trai ki paid.

Ioannis 12:48 Uta uba kyntait noh ia nga, bad ubym pdiang ia ki ktien jong nga, u don kaba pynrem ia u: kata ka ktien ia kaba nga la kren, kata keiñ kan pynrem ia u ha ka sngi khadduh.

Loukas 16:31 Lada kim sngap ia U Moses bad ki nongiathuhlypa, kin ym ngeit ruh wat lada mihpat uwei na ki nongiap.

Ka jingkohnguh bad jingsumar ia ka ktien bakhuid ka pyni ba ngi ithuh bad ngi ieit ia U Jisu:

Ioannis 8:31 Lada phi iaisah ha ka ktien jong nga, phi long ki synran jong nga da shisha.

Ioannis 14:15 Lada phi ieit ia nga, to sumar ia ki hukum jong nga.

Ioannis 14:21 Uta uba don ki hukum jong nga bad ba sumar ia ki, uta u long uba ieit ia nga.

Ioannis 14:23 Lada uno uno ruh u ieit ia nga, un sumar ia ka ktien jong nga.

Jakob 1:22 Te to long phi ki nongleh ia ka ktien, bad ym tang ki nongsngew, da kaba shukor noh ia lade hi.

1 Ioannis 2:3 Bad ha kane ngi tip ba ngi ithuh ia u, lada ngi sumar ia ki hukum jong u.

1 Ioannis 5:3 Namar kane ka long ka jingieit ia U Blei, ba ngi da sumar ia kita ki hukum jong u.

2 Ioannis 6 Bad kane ka long kata ka jingiaieit, ba ngin iaiaid katba kum kita ki hukum jong u.

Jingpynpaw 3:8 Phi la ri skhem ia ka ktien jong nga, bad pham shym la len ia ka kyrteng jong nga.

Ki jingmyntoi haba shahshkor bad sumar ia ka Ktien U Blei:

Deuteronomi 7:9 To tip namarkata ba U Trai uba U Blei jong me, ma u uba long U Blei; U Blei uba iaineh keiñ, uba iaisumar ia ka jutang bad ia ka jingisynei bad kita kiba ieit ia u bad kiba sumar ia ki hukum jong u haduh shihajar ki pateng bynriew.

Salm 1:2,3 Hynrei uba ka jingsngewbha jong u ka ha ka hukum U Trai: bad ha ka hukum jong u u pyrkhat synñia sngi. Te un long kum u dieng ba la thung harud ki wah um, uba sei ia u soh ha la ka aiom, uba ka sla jong u ruh kam tlor noh; bad kaei kaei ruh kaba u leh kan man bha.

Salm 37:31 Ka hukum U Blei jong u ka ha ka dohnud jong u; ki jingjam jong u kin ym tyrsiang satia.

Loukas 8:15 Kita kiba... haba ki la iohsngew ia ka ktien ki bat skhem ia ka, bad ki sei soh da ka jingiaineh.

Loukas 11:28 Kham suk shisha kita kiba iohsngew ia ka ktien ka jong U Blei, bad kiba sumar ruh ia ka.

Ioannis 8:51 Shisha, shisha nga ong ha phi, Lada uno uno ruh un sumar ia ka ktien jong nga, un ym iohi ia ka jingiap lano lano ruh.

Ioannis 15:7 Lada phi iaineh ha nga, bad kita ki ktien jong nga ki iaineh ha phi, ia kaei kaei ruh ba phi mon, phin pan, te kan long ia phi.

Ioannis 15:10 Lada phin sumar ia ki hukum jong nga, phin ioh iaineh ha kata ka jingieit jong nga.

1 Ioannis 2:5 Hynrei jar uba da sumar ia kata ka ktien jong u, da shisha ha uta la pynjanai noh ia ka jingieit U Blei.

1 Ioannis 3:24 Bad uta uba sumar ia kita ki hukum jong u u iaisah ha u, bad u ruh ha uta.

******