Ki Lai jait Ki Khlam ha ka Baibl
Katto katne ki sngew ym dep kam ban shu ia sngap jar kum ha kane ka por ha kaba ka jingpynshai ia kane ka jingjia ka dawa haduh katta katta na ki briew. Katto katne pat kim nud ban wad hi da lade, ki ia ap ia ka jingpynshai jong kiwei pat. Kibym ngeit Blei kin sa ong beit ba ka jingpang Covid-19 ka dei na ka jingmih basniew jong ka mariang lane na ki jingleh dusmon bad jingleh sainti jong ki riewsniew. Kiwei ki riewngeit niam kin sa pynkutnia katkum ka jingstad pyrthei kumba long kiba bun. Bun ki Khristan pat kin ong ba dei U Blei uba la wanrah ia kane ka khlam kum ka jingbishar, katto katne pat kin ong ba dei U Blei uba la leh tangba da kaba pyndonkam da ki riewsniew ban urlong ia ka jingthmu jong U, nangta kiwei pat ki la kynnoh ba dei u bymman hi uba la leh ia kane.
Ka long ka jingbieit ban kren sted palat khlem da thew da woh bha khamtam ma ngi lei lei kiba kam ba ngi long ka jingshai jong ka pyrthei. Bun na ngi ki Khristan ngi sted ban kynnoh ba dei U Blei uba la pynjia ia kane ka khlam. Katto katne na ngi ngi ong ba ka dei ka pliang jingbitar U Blei katkum ka kitab Jingpynpaw lynnong 16. Hynrei ynda nga la pule da lade hi nga shem ba kata kam dei ka jingshisha. Hooid, kane ka khlam Covid-19 ka long kawei na ki dak ba U Jisu Khrist u lah jan wan biang hynrei kam don jingiadei ei ei ruh em bad ki hynniew tylli ki khlam kiban sa jia shuwa ka jingwan U Jisu. Ngi la buh pud ia ka daw jong ka khlam tang na kawei ka rukom sngewthuh bad ngi la pynksan na ka Baibl da kaba pyndonkam bakla ia shibun ki dkhot ban pyniadei pat bad kane ka jingjia kaba mynta hynrei kam long kaba shongnia satia. Ka long kum ha ka khep jong u Job ha kaba ki briew kiba bun ki kynnoh ba dei U Blei uba la pynshitom bad pynjynjar ia u Job haba ha ka jingshisha dei u Soitan uba long shalyndet jong ka jingpang jingshitom jong u Job. Katba ha ka por ba manbha pat ngim ju kynmaw ban sngewnguh ia U Blei lane ban ai ha U ia ka burom, hynrei ynda haba wan kano kano ka jingsniew bad ka jingjynjar ngi kynnoh lut ia U Blei.
Dei tang katne ba ngi tip shaphang U Blei! Bunsien ngi lehrain ban ia kren shaphang ka gospel bad ka jingieit bah jong U Blei. Hato phi la ju pyrkhat na kaei ka daw? Ka dei namar ba ngim ithuh, ngim ngeit bad ngim pat mad ia ka jingieit U Blei. Ngim pat thikna ba U Blei u ieit ia ngi. Hynrei ynda la jia kaei kaei kaba sniew ngi long ki nongialap kiba hakhmat duh ban iathuh sha kiwei ba U Blei u la leh ia kine kiei kiei. O ngi nang bha ban pyntieng bad maham ia ki briew bad ban sneng pynrem ia kiwei, hynrei ngi klet noh ban iathuh ha ki ia ka khubor babha bad ia ka jingkyrmen jong kiba ngeit bad ban pyntngen ia ki.
Ka jingtip ia U Blei kaba u Soitan u kwah ia ngi ban don ka dei tang katne – ba U Blei u long u Nongbishar ba eh bad ba domriang. Hato U Blei Jehobah u long kumba ngi mutdur? Ah kaba sngewsih ban iathuh ha phi ba kane ka long ka jingmane bleithaw. Ngi thaw bad dro ia U Blei katba kum ka dur jong ngi hi. Ngi ia batai ia ka jinglong jong U katba kum ka jinglong jong ngi.
Salm 50:21 Ia kine me la leh, nga ruh nga la sngap jar; me la mut ba nga la long kumjuh kum ma me: hynrei ngan sneng ia me, bad ngan buh pynbeit ia ki ha pyrshah ki khmat jong me.
U Blei um long kumba ngi pyrkhat. Nga sngewkmen ban shem ba naduh Jenesis haduh Jingpynpaw, U Blei jong ngi u long U Blei jong ka jingisynei bad jong ka jingieit.
Nga ngeit don katto katne ki jingbha kiba la wanrah da u Soitan bad khlem da khein shuh ia ki jingsniew. Don ruh katto katne ki jingjynjar kiba la wanrah da U Blei bad khlem da khein shuh ia ki jingbha. Namarkata to ngin long kiba stad ban bishar bad sngewthuh ia ka jingleh U Blei bad ia ka jingleh jong u soitan. Ka long kaba ma ban kynnoh ia U Blei ia kaei kaba u Soitan u la leh bad ban kynnoh ia u Soitan ia kaei kaba U Blei u la leh.
KI LAI TYLLI KI JAIT KHLAM HA KA BAIBL
Ka long kaba donkam ia ngi ban sngewthuh ba ki khlam baroh kim shym la jia tang na kajuh ka daw. Namarkata ngim lah ban shu buh pud ia ka daw jong ka khlam tang na kawei ka rukom sngewthuh. Katkum ka jingtip kaba bha tam kaba nga la ioh, ki don lai tylli ki jait khlam ba ka Baibl ka iathuh ha ngi:
1. Ka jingmih namar ka pop: Teng teng ki khlam ki jia namar ba ngi im ha ka pyrthei kaba pop. Ki jingpang laiphew jait ki mih namar ka jingryngkang ne jingpynkhein jong ki briew ia ki aiñ tynrai jong ka mariang bad ia ki hukum jong ka jingkoit jingkhiah ba la buh da U Blei. Ka Baibl ka ong, “Ka bainong ka pop ka long ka jingiap.” (Rom 6:23). “Namar ia kaei kaei ruh ba u briew u bet, ia kata hi un ioh ot ruh.” (Galatia 6:7). Hadien ka jingleh pop jong u Adam, U Blei u la iathuhlypa ha u ba ka jingpang jingshitom kan sa mih ha ka pyrthei namar ka jingsniew bad jingktah jong ka pop ha ka mariang bad ka imlang sahlang, “ia ka khyndew la tim na ka bynta jong me; da ka jingshitom men bam na ka baroh ki sngi ka rta jong me; kan pynmih shylluit ruh ia ki shiah bad ia ki shiah keng ia me; bad men bam ia u jhur ka lyngkha.” (Jenesis 4:17,18). U Blei u weng noh ia ka bor jong u, kata kamut, Un um khang, Un um leh ei ei hynrei Un shah ba ka mariang kan pynmih ia u soh ba la bet da u briew bad un “ioh bam ia u soh la ka jong ka lynti.” (Proberb 1:31). U Blei u long uba ieit haduh katta katta, U kwah ia ngi ban sngewthuh haduh katno ka jingmih jong ka pop ka long kaba sniew bad kaba ma khnang ba ngin isih ia ka bad ban wad noh ia ka jingim bad ka jingsuk lyngba U Khrist.
2. U Soitan shalyndet: Ka Baibl ka iathuh ruh ba ki don ki khlam bad ki nemsniew, bad ki jingpynjulor jong ka mariang, bad ki jingpynkhih jong ki bor jong ka bneng kaba shalyndet jong ki u dei u Soitan. U Blei ka jingieit um sngewbha ia kane hynrei un shah bad Un um khang ia u Soitan. La jar katta ruh U Blei u la buh ia u pud ba u Soitan un um lah ban leh tam palat ia kata kaba U Blei u la shah. Haba ngi phai sha ka kitab jong u Job ngi shem ia kawei ka nuksa. Hato u Job u la leh pop ba u sa ioh ia ka jingpang khlam kaba la ktah ia u naduh khlieh haduh kjat? Ngi tip ba u Job u im ha ka pyrthei kaba pop bad kaba sniew ha kaba ki khniang bad ki jingpang ki mih bad ki san. Hato u Soitan u long shalyndet jong ka jingshitom bad jingjynjar jong u? Khlem jingartatien, u dei u Soitan. Ka Baibl ka iathuh ha ngi ba U Blei u weng ia ka jingda na u Job bad u aiti ia u ha ka kti u Soitan shipor, “Bad U Trai u la ong ha u Soitan, Ha khmih, u (Job) ha ka kti jong me; hynrei tang ia ka jingim jong u men pynsah. Kumta u Soitan u la mih noh na khmat U Trai, bad u la shoh ia u Job da ki tohjaw kiba shitom naduh ka slakjat jong u haduh ka lyngkyrwiang khlieh.” (Job 2:6,7). La iathuh ruh ha ngi ba ka tnga jong u Job ka la kynnoh ba dei U Blei uba la pynshitom ia u Job bad ka la pynshoi ia u ban kyntait noh ia U Blei, kam lah shah ban iohi ia ka jingiaineh jong u Job ban shakri ia U Blei Jehobah haba kum kane ka jingshitom ka wan hap ha ka iing jong u bad jong ka. Nangta ruh, mynba u soitan u la pynhap ia ka ding na bneng ban thang bad bam duh ia ki langbrot bad ia ki shakri u Job, uwei u shakri u la mut ba dei U Blei uba la leh ia kane bad u la wan iathuh ha u Job, “ka ding jong U Blei ka la hap na bneng, bad ka la thang ia ki langbrot, bad ia kita ki shakri, bad ka la bam duh ia ki; bad sa tang ma nga weibriew nga la lait im ban iathuh ha me.” (Job 1:16). Hynrei haduh kaba kut u Job u la iaineh bad um shym la phaidien na U Blei bad u la long kham khraw ban ia u nongjop da Uta uba la ieit ia ngi, U Jisu Khrist.
3. Ka jingleh ka kti U Blei: Bad sa kiwei pat ki jait khlam kiba kham paw ha ka Baibl ki dei ki khlam kiba U Blei u la theh ha ki bymman. Don kiban sngewkhyllah ia kane. Kumno pat shaphang ki khlam ha Ijipt? Hato ki khlam ha ri Ijipt mynshuwa ki long tang ki khlam kiba mih hi namar ka pop, lane hato ki dei ki jingleh jong ka kti U Blei ban pyllait ia ki briew jong U? Khlem jingartatien, ki long ki jingleh jong ka kti U Blei. Pule Eksodos 7:14 – 10:29. Nangta ngi ju tip bha ruh shaphang ki hynniew tylli ki khlam lane ki pliang ka jingbitar U Blei ha ka kitab Jingpynpaw lynnong 16 kiba U Blei un sa theh ha ki bymman hashuwa ka jingwan arsien U Jisu Khrist. Ka Baibl ka iathuh ha ngi ba ym tang ba U Blei u la weng noh ia ka bor jong U hynrei ka da pyni shai ba ki long ki jingleh jong ka kti U Blei. Ngim donkam ban sngewkulmar, hynrei U Blei un leh ia ka jingbishar baroh ha ka hok, ha ka jingshisha bad ha ka jingieit.
Ki artikel kiba iadei bad kane ka post:
Comentarios