Ki Conspiracy theories! Ka Baibl ka ong kumno?
Ka kyntien “conspiracy” kamut “ka jingiasylla buit sniew”. Haba ong ‘conspiracy’ ia kaei kaei kamut ka dei ka jingthmu barieh jong ki briew lane jong kano kano ka kynhun ban leh ia kaei kaei kaba be-aiñ lane kaba sniew ia kiwei.
WAT LADA DEI KA CONSPIRACY
Lada dei ka conspiracy shalyndet jong u Covid-19, hato U Blei jong ngi Un sngap jar bad Un um leh ei ei?
Lada dei ka conspiracy shalyndet jong u Covid-19, hato ka jingieit jong U Blei kan rem noh?
Lada dei ka conspiracy shalyndet jong u Covid-19, hato don jingkyrmen ia ki briew jong U Blei?
Kane ka jingpang khlam ka la ktah ha baroh shi satlak ka pyrthei. Ha ki katto katne i kumba U Blei um don shisha. Hynrei ha kiba ngeit Blei pat u Soitan u la ioh ka lad ban pynsngewthuh bakla shaphang U Blei ba U long ubym ieit. U Soitan u la tynjuh bad buh jingkylli ia ka jingieit bah jong U Blei hakhmat ki briew khnang ba ki briew kin hap ha ka pop. Ko ki nongpule baieit, phim donkam ban salia ia ka kam jong u. Namar U Jisu u ong, “Naba U Blei u la ieit katta katta ïa ka pyrthei katba u la aiti noh ïa la U Khun ba la kha marwei ba uei uei uba ngeit ha u, un ym jot shuh hynrei un ïoh ka jingim bymjukut.” (Ioannis 3:16). U Blei u ieit ia ka pyrthei phareng, ka pyrthei negro, ka pyrthei dkhar, ka pyrthei garo bad ka pyrthei khasi kumjuh. U ieit ia baroh da ka jingieit bymjukut khlem da niew shiliang iano iano ruh.
Wat lada dei ka conspiracy, wat lada dei ka jingthmu basniew jong ki bymman, ngi don ka khubor babha na U Blei kaba khamkhraw ban ia ka khubor babha jong ki briew, kaba ong kumne – “To wat sheptieng me, namar nga long ryngkat bad me; wat sngewma namar nga long U Blei jong me.” (Isaiah 41:10). U Blei U Badonbor halor baroh u dang synshar. U lah ban iada, ban sumar bad pyndap ia ngi. U Blei jong ngi u lah ban tuklar bad tehlakam ia kiei kiei baroh katba U mon. Namarkata ngi donkam tang ban shaniah ha U khlem jingsheptieng ia kaba sniew. “Uta uba shong ha ka jaka barieh jong U Bahakhlieh tam eh, un ioh iaineh hapoh ka jingkah jong U Badonbor baroh.” (Salm 91:1)
Rom 8:28 Bad ngi iatip ruh ba kiei kiei baroh ki iatrei lem ia kaban pynbha ia kita kiba ieit ia U Blei, ia kita kein ia kiba la khot katba kum ka jingthmu jong u.
U Trai nongbuh nongthaw jong ngi U dang lah ban pynbha pat ia kaei kaei kaba la pynjot bad pynsniew. “Ha ki briew kata kabym lah, hynrei ym ha U Blei: naba kiei kiei baroh ki long kiba lah ha U Blei.” (Markos 10:27)
Phi kynmaw ha ka jingiathuhkhana shaphang ka kut jong ka Babel mynba ki briew ki la iasylla pyrshah ia ka mon U Blei. Ka jingthoh bakhuid ka ong, “Ki la ia ong ruh, Ia, ngin iatei ia ka nongbah kawei ia lade bad ia ka kut ruh kawei, kaba ka kliar jong ka kan kot haduh ka bneng; bad to ngin iathaw nam ia lade, ba ioh yn pynsakma kylleng ia ngi ha khmat ka pyrthei baroh. Bad U Trai u la wan hiar ia kaban khmih ia kata ka nongbah bad ia kata ka kut, ia kaba ki la lah iatei ki khun bynriew. U Trai u la ong ruh, Ha khmih, ki briew ki long uwei u paidlang, bad ki don baroh tang kawei ka ktien; bad ia kane ki iasdang ban leh: te mynta kaei kaei ruh em kan ym khang ia ki ban leh, ia kaba ki la lah iathmu kein. Ia, ngin ialeit hiar, bad ngin iapynbakla ia ka ktien jong ki hangta, ba kin ym iasngewthuh shuh ia ka ktien paralok hi. Kumta U Trai u la pynsakma ia ki kylleng nangta ha khmat ka pyrthei baroh; te ki la iapep noh na kaban iatei ia kata ka nongbah. Namarkata la khot Babel ia ka; naba U Trai u la pynbakla hangta ia ka ktien ka pyrthei baroh: bad nangta ruh U Trai u la pynsakma ia ki kylleng ha khmat ka pyrthei baroh.” (Jenesis 11:4-9)
Haba ki briew ki la iathmu sniew hakhmat U Blei, U Blei um shym la pynbor ia ki ban pynsangeh noh ia la ka jingthmu, tangba ha la ka jong ka kam u la leit ban tuklar bad tehlakam ia ka jingthmu bad ia ka kam jong ki. U Blei u khlem shym la pynkut noh lane pynbha noh hangto hangto. U Blei u lah eh ban leh ia kata hynrei U khlem leh. U la leit ban pynkulmar ia ka ktien jong ki, ba kin ym sngewthuh shuh iwei ia iwei hapdeng jong ki haduh ba ma ki hi ki la pynsangeh noh ia ka kam ba ki la thmu. Kumjuh ruh mynta, watla ka dei ka conspiracy jong u bymman, U Blei u lah ban tehlakam bad ban pynbha pat ia ka.
NGI DONKAM BAN IASAID:
Nyngkong eh ngi donkam ban dwai ba kane ka khlam kan kut noh kumne kumne hi. Ka long kaba bha ban thrang ia ka jingsuk. Kum ki Khristan ngi dei ban ngeit ba U Blei u long uba lah lut ban leh ia kiei kiei baroh.
1 Timothi 2:1-4 Te nga kyntu nyngkong eh namar kata, ban pynlong ki jingkyrpad, ki jingduwai, ki jingiasaid, ki jingainguh, na ka bynta ki briew baroh; ba ngin ioh im ka jingim kaba suk bad bajarjar ha ka jingriewblei bad jingshida baroh. Kane ka long kaba bha bad kaba pdiang hun ha khmat U Blei U Nongpynim jong ngi; uba mon ba ki briew baroh kin ioh lait im, bad ba kin poi sha ka jingtip ia ka jingshisha.
Kum U Dabid ngi dei ban dwai ban lait na ki jingriam kaba ki riewsniew ki la iabuit bad iasylla ban pyniap ia ngi,
Salm 31:12-16 La klet noh ia nga kum u briew uba iap ia ubym kynmaw shuh: nga long kum u khiew ba la pait. Naba nga la iohsngew ia ka jingpynbudnam jong kiba bun, ka jingsngewshyrkhei baroh sawdong: mynba ki la iasylla lang pyrshah ia nga, ki la thaw buit ban shim noh ia ka jingim jong nga. Hynrei nga la shaniah ha me, Ah Trai: nga la ong, Me me long U Blei jong nga. Ki aiom jong nga ki ha ka kti jong me: TO PYLLAIT IA NGA na ka kti ki nongshun jong nga, bad na kita kiba behbein ia nga. To pyntyngshain ia la ka khmat halor u shakri jong me: TO PYNIM IA NGA ha ka jingleh isynei jong me.
Salm 83:1-5 AH U BLEI, WAT SNGAP: WAT SNGAP JAR, BAD WAT LONG JAR JAR, AH U BLEI. Naba, ha khmih, ki nongshun jong me ki iawin: bad kita kiba shun ia me ki pynieng ia la ka khlieh. Ki iathaw buit sian pyrshah ia ki briew jong me, bad ki iasylla lang pyrshah ia kiba rieh jong me. Ki la ong, ia ngin iapynduh noh ia ki ba kin ym long ka jaid bynriew; ba ia ka kyrteng Israel yn ym kynmaw shuh. Naba ki la iasylla lang da kawei ka jingmut; pyrshah ia me ki iateh jutang.
Salm 141:9,10 TO SUMAR IA NGA na ka jingriam kaba ki la buh ia nga, bad na ki shangkhawiah jong ki nongtrei bymman. Ai ba ki bymman kin ngat ha la ki jong ki jar, haba nga pynban nga lait noh.
2 Samuel 15:31 Te la don uba ia iathuh ha U Dabid, da kaba ong, U Ahithophel ruh u don hapdeng kita kiba iashet sylla bad U Absalom. Bad U Dabid u la ong, Ah Trai, nga kyrpad ia me, to pynkylla jingbieit ia ka buit sian U Ahithophel.
Lehse ioh don ba ong – Balei ban iasaid? Hato phim tip seh ba ka dei ba kine kiei kiei ruh kin long? Hato phim tip seh ba ka sorkar kan sa pynbor ia ki briew baroh ban pdiang ia ka dak u mrad khlaw bad ban pynshitom jur ia kito kibym pdiang? Ko ki para bad ki hynmen jong nga, ngi ngim tip ia ka por shaphang kine kiei kiei ruh bad ba ym shym la kular ha ngi ba ngin iaid lyngba kita kiei kiei ruh. Hooid, kum ki nongbud U Khrist ngim dei ban kyrshan ia ka jingthmu jong u Soitan. Hynrei kum ki Khristan pat ngi dei ban thrang ia ‘ka jingim kaba suk bad bajarjar ha ka jingriewblei bad jingshida baroh’ bad ban iasaid bad kyrpad ia U Blei na ka bynta kane.
HYNREI LADA U BLEI U SNGAP JAR
Lada U Blei un sngap jar, hato ngin duh jingkyrmen noh? Lada ngin shah ktah ha ka conspiracy jong kibym riewblei, ngim donkam ban phaidien ne ban duh jingngeit ha U Blei. Lada U Blei u sngapjar U don ka daw kaba bha, hynrei kynmaw Un ym sngap jar sah. Kane kam mut satia ba U Blei u la ieit duna ia phi bad ia nga. U Blei u lah ban tynjuh ia ngi da kaba shah shipor ia u Soitan ban iaid shaphrang ha ka kam bakhadduh jong U kaba u la leh da ka jingbitar bakhraw (Jpw 12:12). U Blei un shah shipor ia u Soitan ban pynshitom bad pynjynjar ia ki briew jong U.
To ai ba ka jingdwai jong ngi kan long katba kum ka mon U Blei. Bun ki briew ki sngewduh jingkyrmen bad ki thnum haba kim ioh ia ka jubab katba kum ka jingkhmih lynti jong ki. Bad ki sdang ban artatien ia U Blei ha ka dohnud. Ko ki para bad ki hynmen jong nga, wat khih khuslai ha ka dohnud jong phi, to ngeit phi ha U Blei bad to ngeit ha U Khrist ruh. Lada ka long kumno kumno ruh to ngin shaniah ha ka jingthmu babha jong U Blei. To ngin thrang ba ka jubab jong ka jingdwai jong ngi kan long katkum ka mon U Blei bad ha ka por jong U. Ym tang katkum ka mon jong ngi bad ha ka por ba ngi kwah. U apostol u thoh, “Te kane ka long kata ka jingsngew shaniah kaba ngi don sha u, ba, lada ngi pan ia kaei kaei ruh katba kum ka mon jong u, u sngew ia ngi.” (1 Ioannis 5:14). Bad nga sngewtynnad ban iathuh ha phi, ba lada ngi shaniah ha ka mon U Blei, ka jubab kaba ngin sa ioh kan long kaba khambha palat ban ia kaei ba ngi pan lane ngi pyrkhat (Ephesos 3:20).
Mynta ngi lah ban shah ktah ha une u khniang jingpang Covid-19. Ngam ong ba phin dwai na ka bynta kane hynrei shu ong noh lada ngi shah ktah makna ngim dei ban sngewduh mynsiem namar ki don bun ki briew kiba U Blei u ieit kum u Jakob bad ki khun jong u kiba la shah ktah ha ka nemsniew, bad kum u Job ruh ha ka jingpang khlam kaba u iakynduh. Ka lah ban long ruh ba mynta ngin ym shah ktah ha une u khniang jingpang Covid-19 hynrei lada ngin jied ban iaineh bad U Blei haduh kaba kut ngin ym lah lait na kata ka jingshah ktah ha ka jingpynshitom jur jong u Soitan ynda haba un pynshitom ia kito kiba kyntait ban pdiang ia ka dak jong u mrad khlaw lane ban mane ia ka dur jong u mrad khlaw.
Ki hynmen u Joseph ki la iasylla pyrshah ia u (Jen 37:18), u Ahithophel bad U Absalom bad ki briew jong u ki la iasylla pyrshah ia u Dabid (2 Sam 15:31–37), ki rangbah lyngdoh ki la iasylla pyrshah ia U Jisu (Math 27:1) bad kiwei kiwei de. Kine ki la shah ktah ha ka jingiasylla sniew (conspiracy) jong ki nongshun jong ki hynrei da ka jingisynei U Blei u la pyllait ia ki. Ki la iam sha U Blei, “To buhrieh ia nga na ka jingsylla barieh jong ki nongleit bymman; na ka jingwin jong ki nongkam bymhok.” (Salm 64:2). U Blei u la iohsngew ia ka jingiam jong ki bad u la pynbha pat ia ka jingiashem bajynjar jong ki namar ki la iaineh bad iaishah bad U Blei. Bad ym tang ba U Blei ula pynbha ia ka jingbym kyrmen jong ki hynrei u la pyllait ruh ia ki na ka jingiap. Ynda u Joseph u la iakynduh pat bad la ki hynmen jong u, u la ong kumne, “Phi shisha, phi la lah thmu ia kaba sniew pyrshah ia nga; hynrei U Blei u la thmu ia ka ia kaban pynbha, ia kaban pynlong ka lad, kumba ka long ha kane ka sngi, ia kaban pynim ia ki paidbah babun.” (Jenesis 50:20). Na ka jinglongmraw U Blei ula kyntiew ia u Joseph sha ka kyrdan badonburom eh ha ka ri Ijipt bad u la jia long pynban kum ka lad ban pynim ia ki briew bad ka iing ka sem jong u ha ka por jong ka nemsniew. Kumjuh ruh, ka jingshah kem bad jingshah sahnarphna jong U Jisu ha ki Jiw ka la jia long pynban ka lad jong ka jingsiewspah ia u khun bynriew ba la hap. “Te kiei kiei baroh ki long na U Blei, uba la pyniasuk noh ia ngi ha lade hi da U Jisu Khrist.” “Namar lada, mynba ngi la long ki nongshun, la pyniasuk noh ia ngi bad U Blei da ka jingiap U Khun jong u, te khamtam shibun, haba la pyniasuk ia ngi, yn pynim ia ngi da ka jingim jong u.” (2 Korinth 5:18; Rom 5:10).
Ngi lah ban shah ktah ha ha ka jingiasylla sniew jong ki briew kumba long u Job, u Joseph, u Dabid, U Jisu bad kiwei kiwei de. Hynrei ha kaba kut ngin sa long kiba kham khraw ban ia u nongjop da Uta uba la ieit ia ngi. Katto katne na ngi watla kin hap ban iaid lyngba ki jingpynshitom bajur hynrei kin ym mad ia ka jingshah pyniap, kin jop kumba jop u Job, u Joseph bad u Dabid da kaba pyndem lin ia ki nongialehpyrshah jong ki baroh. Katto katne pat kin sa jop kumba jop U Jisu da ka jingiap bad ka jingmihpat. Kiba jop kumba jop U Jisu kin sa jop da kaba jingsngewrit, ka jingngeit, ka jingpyndem ha ka mon U Blei bad da ka jingiaishah bad jingiaishah slem.
Jingpynpaw 12:11 Hynrei ki la jop noh ma ki ia u (Soitan) namar kata ka snam jong Uta U Khunlangbrot, bad namar kata ka ktien ka jingphla jong ki: te kim shym la ieit ia ka jingim jong ki jin haduh ka jingiap.
Ngim donkam ban duh jingkyrmen lane ban phaidien noh lada kam jia kumba ngi khmih lynti. To ai ba ngin iaineh bad U Blei bad ban sngewhun katba ka jia. Kum u Shadrack, u Meshak bad u Abednego ngin ia ong, “Lada ka long kumta, U Blei jong ngi ia uba ngi shakri u lah ban pyllait ia ngi na ka lawar ding ba la thang rhem: bad un pyllait ia ngi ruh na ka kti jong me, ko syiem. Hynrei lada ym kumta, to tip me, ko syiem, ba ngin ym shakri ia ki blei jong me, lymne mane ia kata ka durblei ia kaba me ia pynieng.” (Daniel 3:17,18). Bad kum u Dabid ngin ong ia U Blei, “Kane baroh ka la wan hap ha ngi; hynrei ngim shym klet ia me, lymne ngim shym leh shukor ha ka jutang jong me. Ka dohnud jong ngi kam shym phaidien noh, lymne ki jingjam jong ngi kim shym bakla na ka lynti jong me.” (Salm 44:17,18).
Namarkata, “To wat sheptieng te ia kita kiba pyniap ia ka met, bad kibym lah ban pyniap ia ka mynsiem: hynrei phin kham sheptieng ia Uta uba lah ban pynjot bad ia ka mynsiem bad ia ka met ha dujok.”(Mathaios 10:28). “Ia ka jingim jong phi la buhrieh lem bad U Khrist ha U Blei” bad yn sa pynmihpat ia phi ha ka sngi khadduh ynda U Trai jong ngi un sa wan hiar na bneng da ka jingrisa bakhraw. (Kol 3:3; 1 Thess 4:16).
Ki don ki por ha kaba ki jingthmu jong u Soitan kin ym kut noh kumne kumne hi. U Blei un ai lad ia u Soitan shipor ban pyntreikam ia la ka jingthmu khnang ba ngin dup iohi ia ka jinglong bashisha jong u kum u nongpynjot. Kumba long ha ka kut Babel U Blei un um pynbor iano iano ban pynsangeh ia kaei kaba ki nongialeh pyrshah jong U ki la thmu, shipor U Blei un shah ba ka jingthmu jong ki kan nang iaid shaphrang bad kan i kumba kan long kaba jop, hynrei kin ym lah ban pyndep janai katba kum ka jingthmu jong ki namar ha kaba kut hi ka jingthmu jong U Blei kan sa ieng bad ka jingthrang jong ki bymman baroh kan sa pulom lut bad kan sa paw ba ka long kaba thala bad kaba lehnohei. “Naba ki la thew ia ki jingsniew ia me: ki la pyrkhat ia ka buit; ia kaba kim lah ban pyndep. Namar men pynphaidien ia ki, men pyndap da la ki sai siej pyrshah ia ka khmat jong ki.” (Salm 21:11-13). “Ym don lymne ka jingstad lymne ka jingshemphang lymne ka jingpyrkhat Tba ialeh ia U Trai (Tlane, kaba lah ban jop pyrshah ia U Trai).” (Proberb 21:30). “Naba u la kren, te ka la long; u la hukum, te ka la neh skhem. U Trai u pynduh ia ki jingpyrkhat ki jaid bynriew: u pynlehnohei ia ki jingmut jong ki kynja bynriew. Ka jingpyrkhat U Trai ka neh skhem junom, ki jingmut ka dohnud jong u pateng la pateng baroh.” (Salm 33:9-11). “Don bun ki buit ha ka dohnud u briew; hynrei ka jingpyrkhat U Trai, kata kaban neh.” (Proberb 19:21). Ynda U Blei u la leh ei ei, ki bymman hi kin sa sangeh noh ban iaid shaphrang. Bad ka jingriam da kaba ki pynap ia kiwei kan sa ngat ha ki hi.
U Blei u don ka lawei na ka bynta jong phi, U don ka jingthmu babha na ka bynta jong phi. U ong, “Naba nga tip ia ki jingmut kiba nga pyrkhat shaphang jong phi, ong U Trai, ki jingmut ka jingsuk kein, te ym ki jong ka jingsniew, ban ai ka jingkyrmen ia phi ha ka por bakut jong phi. Te phin khot kyrpad ia nga, bad phin ioh leit ban duwai ha nga, nga ruh ngan shahshkor ia phi. Bad phin wad ia nga, bad phin shem ia nga, haba phin wad ia nga da ka dohnud baroh.” (Jeremaiah 29:11-13). Ko ki nongpule baieit, ngi shakri ia U Blei uba tip ia ka lawei, ym tang ba U tip ia ka lawei, hynrei U bat ia ka lawei ha ka kti jong U, ym tang ba U bat ia ka lawei ha ka kti jong U, hynrei U iathuh bad pynpaw ha ngi ia ka lawei baphyrnai. U Blei u ong ba ka hima jong U bad jong U Khun jong U ka lah jan wan. U Jisu ruh u ong, “To wat sheptieng, ko kynhun iba rit: naba U Kpa jong phi u sngewbha eh ban ai ha phi ia kata ka hima.” (Loukas 12:32). Ha kane ka hima kaba ngin sa ioh kynti ha ka jingim kaban sa wan, kan long ka jaka ha kaba ngin shem ia ka jingsuk bad ka jingjahthait kaba janai. “Te U Blei un niad noh ia ka jingjaw ummat baroh na ki khmat jong ki; bad ka jingiap kan ym long shuh, lymne ka jingsngewsih, lymne ka jingiam, lymne ka jingpang, kan ym long shuh: kita kiei kiei kiba mynshuwa ki la leit noh.” (Jingpynpaw 21:4)
WATLA KATTA RUH NGI DON TANG BAN AINGUH IA U BLEI:
U Blei um long u nongthaw ia ka jingsniew, ka jingshitom bad ka jingpang. Kine baroh ki dei ka jingmih jong ka pop. Hynrei kawei ngi dei ban sngewskhem ba U Blei u lah ban wanrah ia ka jingbha na ka jingsniew. To iaroh ia U Blei, ba ngi la mad ia ki jingmyntoi babha na ka jingwan jong une u khniang jingpang Covid-19. U Blei ka jingieit bad uba iaishah slem un shah ia kiei kiei ban jia na ka bynta ka jingbha jong ngi.
Rom 8:28 Bad ngi iatip ruh ba kiei kiei baroh ki iatrei lem ia kaban pynbha ia kita kiba ieit ia U Blei, ia kita kein ia kiba la khot katba kum ka jingthmu jong u.
Mano ban poi pyrkhat ba kane ka khlam kan jia long pynban ka lad jingmyntoi ia kiba ieit ia U Blei. Kane ka jingjia ka la ai ha ki briew U Blei ia ka por kaba biang eh ban kyndit bynriew noh na ka jinglong blem-blem, ban wad bniah ia ka Jingthoh bakhuid da lade, ban iit ia lade, ban duwai na ka bynta ka ribaibal, bad ban shim ia ka lyngkor ban ialap ia ka gospel U Khrist. Haba ngi phai ruh sha ka histori ba la dep, ngi iohi ba ha ka por jong ki nemsniew, ki khlam bad ki jingjynjar bad ki jingiakhih jong ki paidbah, ju mih ki ribaibal bakhraw hapdeng ki briew U Blei. Nangta ruh, kane ka jingjia ka la hikai ia ngi ban iaishah, ban tyngkai, ban shakri ia kiwei, ban shim khia ha kaban tei ia ka rympei Khristan ha ka nongrim babymjukut, ban siewspah ia ka por na ka bynta ki kam kiba shongkhia, ban khan adkar ha ka bam ka dih, ban ieit ia ka jingdwai bad khamtam shibun eh ban kynmaw ia U Blei kum U Nongpynim bad U Nongsumar-sukher basbun bad baieit eh jong ngi. Ka pynshlur bad kyntu ruh ia ki Khristan ban pyntreikam ia ka jingngeit, ka jingieit bad ka jinglehbha. Ka la ai ia ka dak thymmai ba ka hima U Trai ka la nang jan wat ha ka jingkhang hi, bad ka la pynkyndeh bad pynkmen shibun ia ki bad ka la ialam ia ki ban dem hakhmat U Blei ban kyrpad ia u lapbah bakhadduh ban pynlong shitrhem ia ki ha ka jingieit. Shuh shuh ka la pynlong ia ngi ban sngewngiah ia kane ka pyrthei bapop bad ban ap khmih lynti ia ki bneng kiba thymmai bad ia ka khyndew kaba thymmai, katba kum kata ka jingkular jong U Jisu, ha kiba ka hok bad ka jingsuk bajanai kin shong sah.
Kane ka jingmyntoi kam shym la long tang ha ki Khristan marwei hynrei lyngba ki Khristan kan long ka jingkyrkhu sha ki Jentil ruh, kiba dang long shabar ka jingker U Nongaplangbrot babha jong ngi, lada kin ngeit bad pdiang ia U Jisu ha ka dohnud.
KABA KHAM BHA BAN IA KIEI KIEI BAROH, KA LONG - U BLEI LEM BAD NGI
Ki nia bad ki jingpynshai jong ngi ki lah ban long tang ka jingibieit ha khmat ka pyrthei, ngim sngeweiei ia kata, ngi ruh ngim dawa ia ka jingmynjur nano nano ruh, hynrei ngi shu kwah tang ban iasam ia kaei ba ka Baibl ka don ban ong shaphang ka conspiracy jong u Soitan bad ia ka jingpyllait im kaba phylla jong U Blei. Ka por ka la dir eh ia ki nongkam u Soitan ban pynbha pat ia kane ka kam ba ki la sdang ban leh. Ka jingsarong kan ym shah ia ki ban sangeh noh. Ha kaba kut hi ngi don tang kane ban ong sha kito kiba donkti ban iasylla lang pyrshah ia ngi:
Isaiah 8:9-13 To iakhihwin, ko phi ki paidlang, te yn pynlwet ia phi; bad to shahshkor, phi baroh na ki ri kiba jngai: to panpoh ia lade, te yn pynlwet ia phi; to panpoh ia lade, te yn pynlwet ia phi. To iasylla lem, te yn pynduh noh ia ka; to kren ia ka ktien, te kan ym neh: NAMAR U BLEI U DON LEM BAD NGI. Namar U Trai u la kren kumne ha nga, da ka kti badonbor, bad u la hikai ia nga ban ym iaid ha ka lynti une u paidlang, u da ong, Wat ong, Ka jingiashet (conspiracy), shaphang kata baroh kaba une u paidlang u ong, Ka jingiashet (conspiracy); lymne wat sheptieng ia ka jingsheptieng jong ki, lymne wat sngewkiuh ia ka. U Trai ki paid kein, ia uta phin pynkyntang; bad to un long uta ka jingsheptieng jong phi, bad to un long ka jingsngewkiuh jong phi.
THE BEST OF ALL – GOD IS WITH US
Rom 8:31-39 Kumno te ngin iaong ia kine kiei kiei ruh? LADA U BLEI U LONG NA KA BYNTA JONG NGI, UEI UTA UBAN IALEH BAD NGI? Uta ubym shym la bynnud wat ia la U Khun jong u hi, hynrei u la aiti noh ia u na ka bynta jong ngi baroh, kumno te un ym ai ei lem bad u ruh ia kiei kiei baroh ha ngi? .... Uei uban pyniakhlad noh ia ngi na kata ka jingieit ka jong U Khrist? Ka lanot lane ka shipa, lane ka jingpynshitom bein, lane ka jingthngan, lane ka jinglyngkhuid, lane ka jingma, lane ka waitlam? Kat kumba la thoh; Na ka bynta jong me la dang pyniap ia ngi baroh shi sngi, la niew ia ngi kum ki langbrot ia ka jingpyniap. Hynrei ha kine kiei kiei baroh kein ngi jop thiaw da Uta uba ia leit ia ngi. Namar nga ngeit skhem ba ka jingiap, lymne ka jingim, lymne ki angel, lymne ki nongsynshar, lymne kiba don bor, lymne kiei kiei ruh kiba long mynta, lymne kiei kiei ruh kiban sa long, lymne ka jingjrong, lymne ka jingjylliew, lymne kaei kaei ruh kawei pat ka jingthaw, kan ym lah kein ban pyniakhlad noh ia ngi na kata ka jingieit ka jong U Blei kaba ha U Khrist Jisu uba U Trai jong ngi.
Ngi tip ba kawei pat ka kyrteng jong U Jisu ka long “U EMMANUEL, KABA LONG HABA LA BATAI, U BLEI LEM BAD NGI.” Ka pop ka la pyniakhlad noh ia ngi na U Blei. Hynrei U Blei u la ieit katta katta ia ngi bad U la phah ia U Khun ba la kha marwei jong U, khnang ba U Blei un lah ban long lem bad ngi lyngba U Jisu Khrist, U Khun jong U.
Bad lada phim pat ju kut jingmut na ka bynta U Khrist mynno mynno ruh, nga khot sngewbha ia phi ha ka kyrteng jong U Trai, ha kane ka por katba phi dang don ka lad, ban rai bad ban kut jingmut skhem ban aiti noh ia la ka jingim ha U Khrist. To phin khot sngewbha ia U Jisu ban wan ha ka dohnud jong phi bad phin sa shem ia ka jingjahthait kaba shisha.
U Blei u khot ia phi mynta bad U ap sa tang ia phi. Lada phin pdiang ia ka jingkhot jong U, bad shah ia U ban wan ha ka dohnud da ka jingngeit, phin sa shem shisha ia ka jingieit U Blei. U Blei un sa pynlong ha ka dohnud jong phi ia kaban mon ruh bad ia kaban leh ruh ia kata kaba U sngewbha.
U Blei u ieit ia phi bad u la teh lut na ka bynta jong phi. To pdiang bad to ngeit skhem ruh bad phin sa tip ba kiei kiei baroh kiba jia ha ka jingim jong phi ki long katba kum ka mon U Blei kiba iatrei lem ia kaban pynbha ia phi hi.
Ki artikel kiba iadei bad kane ka post:
Comentarios