Kaei ka jinglong tynrai jong U Blei baim bad bashisha?

Ka jinglong tynrai jong U Blei ka long kaba maian bad kaba ngim lah ban batai lut ia ka, hynrei ia kaei kaba la pynpaw ha ka Jingthoh Bakhuid ngi iasam ha phi ha kine ki ktien kiba suk ban sngewthuh:

U Blei u long hi barobor:

Ioannis 5:26 Namar kumba U Kpa u don ka jingim halade, kumta u la ai ha U Khun ruh ban ïoh ka jingim ha lade.

Eksodos 3:14 Bad U Blei u la ϊathuh ha U Moses, NGA LONG BA NGA LONG: u la ong ruh, Kumne men ong ha ki khun Israel, NGA LONG u la phah ϊa nga ha phi.

Ka jingim ka la ju don barobor ha U Blei. Ka long ka jingim kaba tynrai, kaba khlem pan kylliang, bad kaba khlem ïoh pateng. Ka jingim jong ngi ka shong ha U Blei, ngi ϊoh na U Blei bad dei U Blei uba kyrshan ϊa ngi, hynrei ka jingim jong U Blei pat kam shong ha kaei kaei. Ϊa ngi la pynlong da U Blei, bad ϊa U ym don ba pynlong, U long uba ju long barobor.

U Blei u long na bymjukut sha bymjukut:

Isaiah 40:28 Mem shym la tip? mem shym la ϊohsngew? U Blei bymjukut, U Trai, U Nongthaw ϊa kiba kut ka pyrthei, um sngewlywait lymne ju thait; ym don jingiit ϊa ka jingshemphang jong u.

Salm 102:25-17 Naduh mynhyndai me la seng ϊa ka nongrim jong ka khyndew, bad ki bneng ki long ki jingleh ki kti jong me. Kine kin duh noh, hynrei me men ϊaisah; hooid keiñ, kita baroh kin man rim kum ka jain; kum ka jainkup men pynkylla ϊa ki; hynrei me me long ujuh, bad ki snem jong me kin ym kut. (Pule ruh Hebru 1:10-12)

Salm 90:2 Mynba mem pat pynmih noh ϊa ki lum, lymne ba mem pat thaw dur ϊa ka khyndew bad ϊa ka pyrthei, wat naduh bymjukut haduh bymjukut, me me long U Blei.

Salm 48:14 Naba une U Blei u long U Blei jong ngi junom la junom: un long u nongϊalam jong ngi jin haduh ka jingϊap.

Isaiah 57:15 Naba kumne ong uta uba ha khlieh bad hajrong tam uba shong dap ϊa ka bymjukut, uba ka kyrteng jong u U Bakhuid.

1 Timothi 1:17 Te ha U Syiem bymjukut, ubym ju ϊap, ubym lah ϊohi, uba U Blei tang ma u hi, to long ka burom bad ka jingpyndon burom ha la ka rta ha la ka rta: Amen.

1 Timothi 6:16 Uba tang ma u hi uba don ka jingbymϊap, uba shong ha ka jingshai bymlah kot; ϊa uba ym don briew uba la ϊohi, lane ba lah ban ϊohi: ha uba to long ka burom bad ka bor bah bymjukut: Amen.

U Blei u long uba bymjukut lane ubym lah thew shuh:

Salm 147:5 Uba khraw long U Trai jong ngi, bad uba khlain ha ka bor; ka jingshemphang jong u kabym kut shuh.

Job 11:7-9 Me lah ma me da kaba wad ban shem ϊa U Blei? me lah ban shem ϊa U Badonbor baroh haduh kaba janai? Ka jrong kat ka bneng; me lah leh aiu ma me? Kham jylliew ban ϊa ka jaka shong riewϊap; me lah ban tip aiu ma me? Ka jingthew jong u ka kham jrong ban ϊa ka khyndew, bad kham ϊar ban ϊa ka duriaw.

Rom 11:33 Ah ka jingjylliew bah ka jingkynrei spah ka jingstad bad ka jingtip U Blei! Ah katno ba kita ki jingkut bishar jong u ki long kibym lah iit shuh, bad kita ki lynti jong u kibym lah bud shuh!

Ka jinglong tynrai jong U Blei kam don pud bad jingthew. Ka hok, ka jingieit bad ka jingisynei jong U Blei ki long kiba bymjukut ha ka jingthew. U Blei u long kham khraw palat ban ϊa kaei kaba ngi lah ban tip bad sngewthuh.

(Pule ruh na Jeremaiah 31:3; Salm 103:17; 119:142.)

U Blei u long ka jingieit:

1 Ioannis 4:8 Uta ubym ieit um ithuh ϊa U Blei, naba U Blei u long ka jingieit.

Ka jingieit ka long ka jinglong tynrai jong U Blei. Ka jingieit ka long ka jinglong kaba halor tam na ki jinglong jong U Blei baroh. Ka long ka jinglong na ki jinglong jong U Blei. Dei ha ka jingieit ba U Blei u pynshong nongrim ϊa kiei kiei baroh. Ka jingaiei, ka jingshahslem ka jingisynei bad ka jingshisha ki mih na ka jingieit bah jong U Blei. Ban sngewthuh shaphang ki jinglong jong ka jingieit bashisha bad ϊa ka aiñ-tynrai jong ka, phi lah ban pule na 1 Korinth 13:4-13.

U Blei u long uba isynei bad uba aiei:

Deuteronomi 4:31 Naba U Trai uba U Blei jong me u long U Blei uba isynei keiñ; un ym iehnoh ϊa me, lymne pynjot ϊa me, lymne klet ϊa ka jutang jong ki kpa jong me ϊa kaba u la smai ha ki.

Eksodus 34:6,7 Te U Trai ula ϊaid lait ha shuwa jong u, bad ula pynbna, U Trai,U Trai, U Blei uba isynei bad ba aiei, uba ϊaishah slem, bad uba kynrei ha ka jingbha bad ka jingshisha, uba bat ka jingisynei ϊa ki hajar, uba map ϊa ki jingpalat, bad ϊa ka jingryngkang, bad ϊa ka pop; bad un um pynksan da lei lei ϊa u bymman, uba pynwan ϊa ki jingpalat jong ki kpa ha ki khun, bad ha ki khun jong ki khun, haduh ka lai bad kaba saw pateng bynriew.

Salm 103:8,17 U Trai u dap ka jingisynei bad uba aiei, uba jynsur ban bitar, bad uba kynrei ka jingisynei. (17) Hynrei ka jingisynei U Trai ka long na bymjukut sha bymjukut ha kita kiba sheptieng ϊa u, bad ka hok jong u ha ki khun ki khun.

Ephesos 2:4,5, 8,9 Hynrei U Blei u long uba kynrei ka jingisynei, namar ka jingieit kaba khraw jong u da kaba u la ieit ϊa ngi, wat mynba ngi la long kiba ϊap da ki jingryngkang jong ngi, u la pynim ϊa ngi lem bad U Khrist (da ka jingaiei la pynim ϊa phi). (8) Namar da ka jingaiei la pynim ϊa phi, da ka jingngeit keiñ; kata ruh ym na phi hi; ka long ka jingai U Blei: ym da ki jingleh keiñ, ba uno uno ruh un ym ϊoh ban sngew sarong.

Ephesos 1:7 Ha uba ngi ϊoh ka jingsiewspah da ka snam jong u, ka jingmap ϊa ki jingpalat jong ngi, katba kum ka jingkynrei ka jingaiei jong u.

1 Petros 5:10 Te U Blei ka jingaiei baroh, uba la khot ϊa phi sha kata ka burom bymjukut jong u ha U Khrist, ynda phi la shah shitom khyndiat por, ma u hi keiñ un da pynjanai ϊa phi, un da pynskhem, un da pynshaitbor.

(Pule ruh na Salm 130:7; 145:8; 136:1; Titos 3:5-7.)

U Blei u long uba bha:

Markos 10:18 Ym don uba bha, hynrei tang uwei, uba U Blei.

Dei tang U Blei uba long uba bha namar ka jingbha ka wan na U. Lada don kano kano ka jingbha kaba shisha hangno hangno, to tip ba U Blei u don hangta. Lah ban shem ϊa ka jinglong babha tang ha ka jaka ba U Blei u don, namar shabar U Blei kan ym don ka jingbha.

U Blei u long uba hok:

Deuteronomi 32:4 U Mawsiang, ka jingleh jong u kaba janai; namar ki lynti jong u baroh ki long ka jingbishar: U Blei ka jingshisha bad khlem ka jingbymhok, uba hok bad uba beit u long.

U Blei u long uba hok bad uba beit naduh haduh. Watla U Blei u pynksan ϊa ubym riewblei uba la ngeit ha U Jisu, U Blei u dang long hi uba hok (Rom 4:5; 3:26). Ngin ym lah ban kynnoh pop ϊa U namar ka don shisha ka jinglong bahok ha U.

(Pule ruh na Jeremaiah 12:1; Ioannis 17:25.)

U Blei u long uba khuid:

Eksodos 15:11 Uei uba kat ma me? Ah Trai hapdeng ki blei? uei uba kat ma me uba tyngshain ha ka jingkhuid, uba itieng ha ki jingϊaroh, uba leh ϊa ki kam phylla?

Ka jingkhuid jong U Blei ka dei ka jinglong bahok, bakhuid, bakyntang jong U. Ha kiwei pat ki kyntien, U long uba khlem thohbria ha ka jinglong.

(Pule ruh na Lebitikos 11:44,45; Isaiah 6:2,3; Isaiah 57:15; 1 Petros 1:15,16.)

U Blei u long uba shisha:

Salm 86:15 Hynrei me, Ah Trai, me long U Blei uba dap ka jingisynei bad ka jingaiei, uba jynsur ϊa ka jingbitar, bad uba kynrei ka jingisynei bad ka jingshisha.

Jingkhein 23:19 U Blei um long u briew, ba un lamler; lymne u khun u briew, ba un kylla kaba mut; ϊa kaba u la ong, un ym leh? Lane ϊa kaba u la kren, un ym pyndep noh?

Titos 1:2 Ha ka jingkyrmen ϊa ka jingim bymjukut, ϊa kaba U Blei, ubym lah ban lamler, u la lah kular mynshuwa ki por bymjukut.

(Pule ruh na Hebru 6:18; Salm 25:5, 10; Deuteronomi 32:4; Salm 31:5.)

U Blei u long uba janai bad uba kynsai:

Salm 18:30 Shaphang U Blei, ka lynti jong u ka long kaba janai: ϊa ka ktien U Trai la pynphrang; u long ka stieh ϊa kita baroh kiba shaniah ha u.

U Blei u long ubym lah ban bakla bad namarkata um donkam ban kylla-kaba-mut. Baroh ki jingthmu bad ki jingleh U Blei ki long kiba janai bad kiba skhem. Yn ym don shuh kaei kaei kaba kham janai bad kaba kham kynsai palat ban ϊa kata kaba don ha U Blei. (Pule ruh na Mathaios 5:48.)

U Blei u long uba ϊaineh:

Deuteronomi 7:9 To tip namarkata ba U Trai uba U Blei jong me, ma u uba long U Blei; U Blei uba ϊaineh keiñ, uba ϊaisumar ϊa ka jutang bad ϊa ka jingisynei bad kita kiba ieit ϊa u bad kiba sumar ϊa ki hukum jong u haduh shihajar ki pateng bynriew.

1 Ioannis 1:9 Lada ngi phla ϊa ki pop jong ngi, u long uba ϊaineh bad uba hok, ban map noh ϊa kita ki pop jong ngi bad ban pynkhuid ϊa ngi na kabym hok baroh.

1 Korinth 10:13 Ka jingtynjuh kam shym la ngat ha phi hynrei tang kaba u briew u lah ban shah; hynrei U Blei u long uba lah ban shaniah, uban ym shah ba yn tynjuh ϊa phi tam ϊa kata ϊa kaba phi lah, hynrei ryngkat bad kata ka jingtynjuh un thaw ruh bad ϊa ka lad ban lait, khnang ba phi lah ban shah ϊa ka.

(Pule ruh na 1 Korinth 1:9, 1 Thessaloni 5:24, 2 Thessaloni 3:3.)

U Blei u long ka jingshai:

1 Ioannis 1:5 Te kane ka long kata ka khubor ϊa kaba ngi la ϊohsngew na u, bad ngi ϊapynbna ha phi: U Blei u long ka jingshai bad ha u ka jingdum kam don satia.

Salm 104:1-2 Ko mynsiem jong nga, to kyrkhu ϊa U Trai. Ah Trai U Blei jong nga, me long uba khraw eh; me la kup da ka burom bad ka jinglong burom. Uba tap ϊa lade da ka jingshai kum da ka jaiñ; uba siang ϊa ki bneng kum ka jingkah.

1 Timothi 6:16 Uba tang ma u hi uba don ka jingbymϊap, uba shong ha ka jingshai bymlah kot; ϊa uba ym don briew uba la ϊohi, lane ba lah ban ϊohi: ha uba to long ka burom bad ka bor bah bymjukut: Amen.

U Blei u long ka jingshai bad U tap ruh ϊa ka met bakynja-blei jong U da ka jingshai batyngshain eh jong ka burom jong U. La thoh ruh ba long U “U Kpa jong ki jingshai” (Jakob 1:16).

Namarkata lada ngi kwah ban long ki khun jong ka jingshai, bad lada ngi kwah ban long kiba bha, kiba ieit, kiba isynei, kiba shisha, kiba ϊaineh, kiba hok bad kiba khuid ngi donkam ban pynϊasoh ϊa lade bad U Blei da kaba ngeit ha U Jisu Khrist. Lada ngi don ϊa U Mynsiem U Blei hapoh jong ngi ngin sa long kum U Blei ha ka jinglong.

U Blei u long ubym ju kylla:

Malakhi 3:6 Naba nga U Trai ngam ju kylla; namarkata keiñ ba ym shym la bam duh noh ϊa phi, ko phi ki khun U Jakob.

Jakob 1:17 Ka jingai babha baroh bad ka jingai bajanai baroh ka long na jrong, kaba wan hiar na U Kpa ki jingshai, bad uba ym don ka jingkylla shuh, lymne ka syrngiew kaba shat da ka jingkylla.

Hebru 6:17 Ha kaba U Blei, haba u sngewbha hi ban pyni kham shai shuh shuh ha kita ki nongϊoh ϊa kata ka jingkular, ϊa ka jingbymkylla ka jingthmu jong u, u la pynskhem ϊa ka da ka jingsmai.

U Blei um ju kylla ha ka mynsiem, ha ka jinglong bad ha ka jingthmu. U long shisha U Blei uba ngi lah ban shaniah.

U Blei u long uba kynja-mynsiem:

Ioannis 4:24 U Blei u long U Mynsiem, te ka dei ϊa kiba mane ϊa u, ban mane ha ka mynsiem bad ha kaba shisha.

Baroh kaba U Blei u long ka dei ha ka Mynsiem jong U. Ka jinglong tynrai bad ka jinglong U Blei ki don ha ka Mynsiem jong U Blei. U Blei u tip, u sngewthuh, u pyrkhat, u thmu, u kynmaw bad u don ki jingsngew ha ka mynsiem lane ha ka dohnud kumba long ma ngi ki briew (nuksa- Jenesis 6:6). Kumba treikam ka mynsiem jong U Blei kumta ruh ka long ka mynsiem jong ngi ki briew namar ϊa ngi la thaw ha ka dur jong U Blei. Hynrei ka jingϊapher hapdeng U Blei bad ki briew ka long ba U Blei u long u longrynieng uba bymjukut, uba khlem pud bad ubym lah thew shuh (1 Korinth 2:10-16). Kiei kiei baroh ki mih na U Mynsiem jong U Blei. Namarkata ki kam jong U ruh ki long kiba kynja mynsiem (nuksa- Jenesis 1:2; Sekharaiah 4:6; Ioannis 3:5-8). Ϊa kane ka bynta phin sa kham sngewthuh shuh shuh ha ka lynnong kaba dei shaphang U Mynsiem Bakhuid.

U Blei u long uba tip lut ϊa kiei kiei baroh:

1 Ioannis 3:20 Ha kita kiei kiei ba kata ka dohnud jong ngi ka pynrem ϊa ngi; naba U Blei u long uba kham khraw ϊa ka dohnud jong ngi, bad u tip ϊa kiei kiei baroh.

Ki Kam Ki Apostol 15:18 Uba pyntip ϊa kine kiei kiei ruh naduh kaba sdang ka pyrthei.

Hebru 4:13 Bad ym don ka jingthaw ba khlem paw ha khmat jong u; hynrei kiei kiei baroh ki long lyngkhuid bad kiba paw pyrshah ha ki khmat jong u bad uba ngi ϊa donkam.

(Pule ruh na Salm 147:4; Isaiah 40:28; Mathaios 6:8; 10:29; Salm 139:2; 1 Ki Syiem 8:39; 1 Petros 1:20; Isaiah 46:9-10.)

Ka jingtip lut jong U Blei ka kynthup ϊa kaba la leit noh, ϊa kaba mynta bad ϊa kaban sa wan.

U Blei u long uba stad halor baroh:

Rom 16:27 Ha U Blei, uba stad tang ma u hi, ha une keiñ, da U Jisu Khrist, to kan long ka burom sha ki bymjukut: Amen

(Pule ruh na Rom 11:33; 1 Korinth 2:7; Ephesos 1:8; 3:10.)

U Blei u long uba donbor halor kiei kiei baroh:

Jenesis 17:1 Te U Abram u la long khyndai phew khyndai snem, bad U Trai u la paw ha U Abram, bad u la ong ha u, Nga long U Blei U Badonbor baroh, to ϊaid ha khmat jong nga, bad to long me uba janai.

2 Korinth 6:18 Bad ngan long U Kpa ϊa phi, ma phi ruh phin long ki khun shynrang bad ki khun kynthei ϊa nga, ong U Trai U Badonbor baroh.

Jingpynpaw 19:6 Bad nga la ϊohsngew kum ka jingsawa u paidbah byllien, bad kum ka jingsawa shibun ki um, bad kum ka jingsawa ki pyrthat bajam, ki da ong, Halleluϊa! naba U Trai uba U Blei jong ngi, U Badonbor baroh, u la synshar.

Markos 10:27 Haba U Jisu u la khmih shain te ha ki, u la ong, Ha ki briew kata kabym lah, hynrei ym ha U Blei; naba kiei kiei baroh ki long kiba lah ha U Blei.

Jenesis 18:14 Don kaei kaei ruh ϊa kaba um lah U Trai? Ha kata ka ϊa ba la lah buh ngan wan phai pat keiñ sha me, hamar kaba ka aiom ka jingim, te Ka Sara kan ϊoh u khun.

(Pule ruh na Jenesis 35:11; Jingpynpaw 1:8; 4:8; 15:3.)

U Blei u don ka bor halor ki briew, halor ki angel, halor u soitan, halor ka jingϊap, halor ka jingjynjar bad jingshitom, halor ka mariang, halor ki khet bad ki hima, halor ki jingjia baroh bad ha kiei kiei baroh. U don ka jingkitkhlieh halor kiei kiei baroh bad ha kajuh ka por u lah ban tehlakam ϊa ki.

U Blei u long uba dap ha ki jaka baroh:

Jeremaiah 23:24 U lah uno uno ban buhrieh ϊa lade ha ki jaka barieh ba ngan ym ϊohi ϊa u? ong U Trai. Nga ngam dap ϊa ka bneng bad ϊa ka khyndew? ong U Trai.

Salm 139:7-12 Shano ngan leit na u mynsiem jong me? Lane shano ngan phet rieh na khmat jong me? Lada ngan kiew shabneng, me don hangta: lada ngan siang ϊa la ka jingthiah ha ñiamra, ha khmih, me don hangta. Lada ngan shim ϊa ki thapniang mynstep, bad ngan shong ha kiba kut ka duriaw; wat hangta ka kti jong me kan ϊalam ϊa nga, bad ka kti kamon jong me kan bat ϊa nga. Lada nga ong, Shisha ka jingdum ka tap lup ϊa nga, te ka miet kan long ka jingshai baroh sawdong ϊa nga; ka jingdum hi kam buhrieh na me, hynrei ka miet ka tyngshain kum mynsngi: ka jingdum bad ka jingshai ki ϊalong kumjuh ϊa me.

U Blei u long U Mynsiem bad U lah ban don lut ha ki jaka baroh lyngba U Mynsiem jong u. Namarkata ngi lah ban mane ϊa U Blei ha kano kano ka jaka ruh, kaba ibit ban shakri ϊa U, kumba la thoh ba “ka dei ϊa kiba mane ϊa u, ban mane ha ka mynsiem bad ha kaba shisha.” Ym don ka jaka ha kaba U Blei un um lah ban don lane ban sam lyngba. U tip jia aiu ha ki jaka baroh. U don ha ki jaka baroh, hynrei ym ha kiei kiei baroh. Ka jingngeit ba U Blei u don ha kiei kiei baroh ka dei ka jingngeit ‘Pantheism’ kaba long ka jingngeit bakla. U Blei um im lane shong sah ha kiei kiei baroh. Ka Baibl ka ϊathuh ha ngi ba U Blei um shong ha ki dieng ki maw, ha ki lum ki wah, bad ha ki khlaw ki btap lane ha u nongpop ubym pat kylla-kaba-mut lane ha ki angel bymman hynrei U Blei u sngewbha ban shong sah ha ka dohnud jong kiba la ngeit ha U Khrist, ha ki angel bakhuid bad ha ka nongbah bakhuid.

******