KA JUBAB JONG U BLEI IA KA JINGAIDAW JONG U BRIEW BA U KHLEM SUMAR IA KA SABBATON JONG U

KA DAW 1: Ka long kaba shitom ban sumar ia ka sngi bahynniew.

JUBAB: Mathaios 16:24 “U Jisu u la ong ha ki synran jong u: Lada uno uno ruh u mon ban wan nadien jong nga, ai ba un len ïa lade, bad un rah ïa la ka diengphna, bad un wan bud ïa nga.” (Pule ruh - Mathaios 10:38; Markos 8:34; Loukas 9:23; 14:27).

KA DAW 2: Nga hap ban pyndap ha iing ha sem; kan sa ktah ia ka kamai kajih jong nga.

JUBAB: Mathaios 16:25,26 “Naba uno uno ruh uba mon ban pynim ïa la ka mynsiem, un duh noh ïa ka, bad uno uno ruh u ban duh noh ïa la ka mynsiem na ka bynta jong nga, un shem ïa ka. Naba u briew un myntoi aïu, lada un ïoh ïa ka pyrthei baroh, bad un duh noh ïa la ka mynsiem? Lane u briew un ïapli da ei ïa la ka mynsiem?” (Pule ruh – Mathaios 6:24, 31-33; Loukas 12:15-37; 1 Timothi 4:8; Salm 37:3; Isaiah 65:13,14).

KA DAW 3: Baroh baroh ki sumar ia ka sngi nyngkong.

JUBAB: Mathaios 7:13,14 “To bsut lyngba ïa ka khyrdop bakhim: naba ka kylluid ka khyrdop, kaba jlan ruh ka lynti, kaba lam sha ka ban jot; bun ruh kiba ïabsut na kata. Hynrei, A kaba khim kata ka khyrdop; A kaba wit ruh kata ka lynti kaba lam sha ka ban im! A ki long khyndiat ruh kiba shem ïa kata!” (Pule ruh – Proberb 11:21; 16:5; Eksodos 23:2).

KA DAW 4: Bun ki briew kiba shlur lane ki banang bastad ki hikai ba ka jingrakhe ia ka sngi nyngkong ka long kaba dei.

JUBAB: Hosia 10:13 “Phi la lur ïa ka jingbymman, phi la ot ka jingbymhok; phi la bam ïa u soh ka jinglamler: namar me la shaniah ha la ka lynti, ha u paidbah ki riewshlur jong me.” (Pule ruh - 1 Korinth 1:25-27; Jingpynpaw 18:23).

KA DAW 5: Ngi ngi long kiba bieit bad ngim nang eiei ruh em, bad ngi hap ban peit sha ki ban ioh jinghikai.

JUBAB: Proberb 19:27 “To wai noh, ko khun, na kaba sngap ïa ka jinghikai ïa ka ban tang shu pynbakla na ki ktien ka jingtip.” (Pule ruh - 2 Timothi 3:1-7)

KA DAW 6: Ki ain jong ka sorkar ki pynbor ban rakhe ia ka sngi nyngkong.

JUBAB: Ki Kam 4:19 “U Petros bad u Ïoannis ki la ïathuh bad ki la ong ha ki, La ka shong hok ha khmat U Blei ban sngap ïa phi kham tam ban ïa U Blei, to khan (bishar) ma phi.” (Pule ruh – Ki Kam 5:29; Daniel 3:16-18; 6-10).

KA DAW 7: Ka thaw jingkulmar bad jingiapait.

JUBAB: Loukas 12:51,52 “Phi mut ba nga la wan ïa ka ban ai ka jingsuk ha ka pyrthei? Nga ong ïa phi, Em, hynrei, ka jingïaleh makynti pynban. Naba naduh mynta kin long san ngut ha kawei ka ïing kiba ïaleh makynti paralok, lai ngut ki ïaleh ïa ki ar ngut, ar ngut ruh ki ïaleh ïa ki lai ngut.” (Pule ruh – Loukas 12:49; Mathaios 10:34-37; Ioannis 15:19; 17:14; 1 Syiem 18:17,18).

KA DAW 8: Ngan sa duh noh ia ka burom bad wanrah jinglehrain.

JUBAB: Mathaios 5:11,12 “Suk ma phi haba kin ïakrenbeiñ, bad pynshitom ïa phi, bad ba kin ong ki ktien bymman baroh ruh ïa phi na ka bynta jong nga, haba ki shu lamler. To ïakmen, to ïashadkmen ruh: namar ka bakhraw ka bainong jong phi ha ki bneng: naba kumta ki la ïa-pynshitom ïa ki nongïathuhlypa kiba la mynshuwa jong phi.” (Pule ruh – Loukas 6:22,23,26; 1 Ioannis 4:5).

KA DAW 9: Kam da pher than kano ka sngi nga sumar, lada nga sumar ha ka rukom kaba beit.

JUBAB: Eksodos 20:9,10 “Hynriew sngi men trei, bad men leh ïa ka kam jong me baroh: hynrei, ka sngi ka bahynñiew ka long ka Sabbaton ïa U Trai U Blei jong me: ha kata men ym leh kaei kaei ruh ka kam.” (Pule ruh – Mathaios 15:3,9). Ban sumar beit ia kano kano ka sngi, ka dei da kaba sumar ia ka kumba hukum U Blei; lym kumta, ka hukum jong U kam long kaba beit. Ban sumar ia baroh ki sngi ha kaba rukom kaba beit, ka dei da kaba trei naduh ka sngi banyngkong haduh ka sngi bahynriew, bad ban shongthait ha ka sngi bahynniew.

KA DAW 10: Nga sheptieng ia ki jinghikai bathymmai.

JUBAB: Eksodos 20:11 “Naba ha ki hynriew sngi, U Trai u la thaw ïa ka bneng bad ïa ka khyndew, ïa ka duriaw ruh, bad ïa baroh katba don ha ki, u la shong sngi ruh ha kata ka sngi ka bahynñiew: namar kata, U Trai u la kyrkhu ïa ka sngi Sabbaton, bad u la pynkyntang khuid ïa ka ruh.” (Pule ruh – Jenesis 2:2).

KA DAW 11: Ngam tharai shuh ba kine ki hukum barim kin dang teh.

JUBAB: Jeremaiah 6:16 “Kumne u ong U Trai, To ïeng phi ha ki lynti bad to khmih, bad kylli shaphang ki lynti ïaid ki barim, ha kaba don kata ka lynti babha, bad to ïaid ha ka, bad phin shem kaba jahthait ïa ki mynsiem jong phi.” (Pule ruh – Jeremaiah 2:11-13, 18:15).

KA DAW 12: U apostol Paul u hikai ba kiei kiei ki barim ki la leit noh.

JUBAB: 2 Korinth 5:17 “Kumta, lada uei uei ruh u don ha U Khrist, u long u jingthaw bathymmai; kiei kiei ruh ki barim ki la duh noh, ha khmih kiei kiei baroh ki la jia long ki bathymmai.” U ‘briew batymmen’ jong ka pop u dei ban leit noh. Ynda kumta u briew u kylla long uba thymmai – ym dei ka hukum. 2 Timothi 3:16,17 “Ka Jingthoh baroh ka long kaba la pyrsad mynsiem da U Blei, bad kaba myntoi ïa ka jinghikai, ïa ka jingsneng, ïa ka jingpynbeit, ïa ka jingpynmlien kaba ha ka hok: khnang ba u briew jong U Blei un ïoh long janai, haba la pyndap biang ïa u sha ka jingleh babha baroh.”

Proberb 30:5,6 “Ka ktien baroh ka jong U Blei ka long ba la pynphrang: u long ka stieh ha kita kiba shaniah ha u. Me wat pynlang ha ki ktien jong u, ïoh ba un sneng ïa me, bad ban shem ïa me uba lamler.”

Ekklesiastis 12:13,14 “Kane ka long ka jingkyllum; ïa baroh la ïohsngew: sheptieng ïa U Blei, bad sumar ïa ki hukum jong u; namar kane baroh ka long ka kamram u briew. Namar U Blei un wallam ïa ka kam baroh ha ka jingbishar, bad ïa kaei kaei baroh ba la buhrieh, la ka long ka babha lane ka basniew.”

“KATA KA KTIEN U TRAI KA ÏAISAH BYMJUKUT.” 1 Petros 1:25.