Ka Covid-19 pat ka dei ka jait khlam kaba kumno?
Nga ngeit skhem ba kane ka khlam Covid-19 ka long ka dak ba U Jisu Khrist u lah jan wan biang hynrei kam dei kaba U Blei u la pynlong. U Jisu u la dep iathuhlypa ba ha ki sngi khadduh “kin long ki nemsniew bad ki jingiapthem ruh.” (Math 24:7). Dei ka pop kaba long ka daw tynrai jong ki jingpang jingshitom baroh, bad dei ma ka kaba la wanrah ia kane ka jingjynjar. Bad ym tang kumta hynrei haba nga bishar na ka jingsngewthuh shimet ia ka hok jong U Blei, u dei u Soitan uba long shalyndet jong kane ka khlam baroh. U la leh ia kiei kiei kiba sniew katban kynnoh ia U Blei na ka bynta ki jingmih basniew baroh. U Soitan u la pyndonkam ia ka khlam Covid-19 kum kawei na ki lad ki lynti khnang ban ioh pynurlong noh ia kaei kaba u thmu la slem. Kane ka jingpang ka la pur kynsan ha shisatlak ka pyrthei hynrei bun ki briew kim pat sngewthuh naei ka wan. Ka la dei ka jingthmu jong u Soitan ban pynkulmar ia ki briew da ki jait pa ki jait ki conspiracy theories khnang ba kin ym sngewthuh ia ka tynrai bad ia ka jingthmu bashisha jong kane ka khlam.
Ha kawei ka kot kaba kyrteng “Ka jingialeh bakhraw” nga la shem ia ki jingthoh kiba nga da sngewiahap shisha, kaba ktah ia ki jingjia khamtam kiba iadei bad kine ki sngi khadduh, bad ka nongthoh ka la ong kumne,
“U Soitan u trei ruh lyngba ki jor-tynrai ka mariang ban lum ia ka jingjot jong u ia ki mynsiem jong kito kibym shym la pynkhreh. U la pule bniah ia ki jingbuhrieh/jingmaian (secrets) jong ki jaka trei-kam jong ka mariang (laboratories of nature), bad u pyndonkam ia baroh ka bor jong u ban synshar halor ia ki jor-tynrai katba U Blei u shah. Haba ia u (Soitan) la shah ban pynshitom khop ia u Job, katno kloi-lan ki kynhun langbrot bad ki kynhun jingri-jingdup, ki shakri, ki iing, ki khun, la sar noh ia ki, kawei ka jingshitom ka bud ia kawei pat la kum ha ka shi khyllipmat. Dei U Blei uba iada ia ki jingthaw jong U bad U ker sawdong ia ki na ka bor jong u nongpynjot. Hynrei ka pyrthei Khristan ka pyni ia ka jingniewbein na ka bynta ka hukum jong U Jehobah; bad U Trai un leh thik ia kata kaba U la pynbna bad Un leh – Un weng noh ia ki jingkyrkhu jong u na ka pyrthei bad Un weng noh ia ka jingsumar kaba iada jong U na kito kiba ialeh-kiat pyrshah ia ka hukum jong U bad kiba hikai bad kiba pynbor ia kiwei pat ban leh ia kane kajuh. U Soitan u don ka bor synshar halor baroh ia kiba U Blei um shym la iada kyrpang. Un leh bha bad pynmanbha ia ki katto-katne khnang ban pyniaid shaphrang ia ki jingthmu jong u hi, bad un wallam jingshitom jingsaja halor kiwei pat bad ialam ia ki briew ban ngeit ba dei U Blei uba pynshitom pynjynjar ia ki.
Katba u (Soitan) paw sha ki khun ki briew kum u nongpynkhiah bakhraw uba lah ban pynkhiah ia baroh ki jingpang-jingkhrew jong ki, un wallam jingpang bad jingjia basniew shyrkhei, haduh ba ia ki nongbah babun paid byllien la pynjot thiaw bad la pynkynjah jar. Wat mynta hi ruh u iai-trei kam. Ha ki jingjia ryngkhat bad ki jingjia-shyrkhei ha duriaw bad ha ryngkew, ha ki jingpluh-ding bakhraw, ha ki eriong ba-itriem bad ki jinghap-phria bajur, ha ki jingatphyllung, ki jingshlei, ki er-kyllang, ki jingatphyllung batur-bakynran shyrkhei, bad ki jingkhynñiuh-jumai, ha kawei-pa-kawei ka jaka bad ha ki hajar ki dur-ki rukom, U soitan u pyntreikam ia ka bor jong u. U sar noh ia u kew-u kba ha ka jingot-jinglum, te ka nemsniew bad ka jynjar-ka kyrduh ki bud. U buh ha ka lyer suiñ ia ka bih bapyniap, bad da ki hajar ki iap noh ha ka khlam-ka ngoh. Kine ki jingwanjia-wanhap ki nang bun na ka por sha ka por bad nang jur shyrkhei shuh shuh ha ka jingpynjot. Ka jingpynjot kan long ha baroh ar, ha ki briew bad ki mrad. “Ka khyndew ka iam-sngewsih bad ka tlor noh,” “u paidlang bameng . . . u sngew-lywait. Ia ka khyndew ruh la pyntngit hapoh kiba shong ha ka; namar ki la ryngkang ia ki hukum, ki la pynkylla ia ka rukom, ki la pynkhein ia ka jutang bymjukut.” Isaiah 24:4,5.” [The Great Controversy, sla. 589]
Haba puson bad pyrkhat jylliew, kane ka jingjia mynta ka pyni ha ngi ia ka dur kaba shai shaphang kaei kaban sa jia ynda la pyntreikam ia ka dak u mrad khlaw. Mynta ngi la lah ban iohi ba kam long shuh kaba eh ia ka bor synshar pyrthei ban pynlong aiñ ia kano kano hukum ha shi satlak ka pyrthei bad ba kan treikam sted haduh katta katta ba wat tang hapoh ki khyndiat bnai ka la lah ban pyndem ia ki briew baroh jong ka pyrthei. Ka la ai hukum shaphang ka jingleit jingwan ki briew, ka jingiadie iathied bad ban khang ia kita kiba ka imon ban khang. Ngi la lah ban sngewthuh ba kan sa long kaba eh bha ha ka lawei ban ialeh pyrshah ia ka bor synshar namar kin don ki kyndon pynshitom katba kum ka aiñ. Kane ka jingjia ka pyni ruh ba ka bor synshar pyrthei kam sngewtynnad ia ki briew ba kin long laitluid wat ha ka jingim bad ha ka kam shimet jong ki bad ban im shabar ki aiñ jong ka sorkar. Naduh shaduh ka sorkar ka kwah ba ki briew kin long hapoh ka jingpyniaid jong ka ym dei hapoh ka jingsngew bad jingkwah shimet jong ki briew. Te kane ka jingjia nga ngeit ka plie lynti bad kan lam sha kata ka por ha kaba u Soitan un ioh ban pynurlong ia ka jingthmu jong u ban pynbor ia ki briew baroh ban ialeh pyrshah ia U Blei bad ban kohnguh bad ban mane syiem ia ka bor synshar jong u. Hynrei wat hadien kane ka khlam ruh ki jingjynjar kin dang mih ter ter bad kin nang bun bad nang jur, bad ki briew kiba pdiang ia ka dak jong u mrad khlaw kin sa kynnoh ia ki briew jong U Blei ba ka dei na ka daw jong ka jingialeh pyrshah jong ki ba ka jia kine kiei kiei ruh kumba ka long ia u Elijah mynshuwa (1 Ki Syiem 18:17,18).
Climate change: U Nongialam bahakhmat eh jong ki Katholic u la ong ba ka jingmih jong u khniang jingpang coronavirus ka lah ban long kawei na “ki jingpynphai kylliang jong ka mariang” ha ki briew baroh kawei ka pyrthei kiba kyntait ban tehlakam ia ki jingmih bashyrkhei jong ka jingkylla ka suiñbneng (climate change). “Ka don kawei ka jingong ha ka ktien Spain: ‘U Blei u map barobor, ngi map teng teng, hynrei ka mariang kam ju map,’” la ong u pope ha ka jingiakren bad ka lad pathai khubor ‘The Tablet’, ka kot khubor ba man ka taiew jong ki Katholic hapoh ri Bilat (UK), kaba la pynmih ha ka 08/04/2020. Haba la kylli la u pyrkhat ne em ba kane ka jingpang khlam coronavirus kan jia long ka lad na ka bynta ka jingkylla ha ka imlang sahlang bad ka jingsngewskhem thymmai ia kiei kiei kiba kongsan bad ka rukom im, u pope u la ban ba ka imlang sahlang kam pat shym la leh ei ei ia “ki katto katne ki jingpynjot jong ka mariang” kiba la mih na ka jingsniew jong ka suiñbneng (climate crisis). “Mano ba kren mynta shaphang ki jingpluh ding ha Australia, lane ba kynmaw ba 18 bnai mynshuwa kawei ka lieng ka lah ban kam sha shiliang ia ka North Pole namar ki lynglun thah ki la um lut baroh?” u la kylli. “Mano ba kren mynta shaphang ki jingshlei um? Ngam tip lada kine ki long ka jingpynhiarkput jong ka mariang, hynrei khlem jingartatien ki long ki jingpynphai kylliang jong ka mariang.” [1] Kum u nongialam badonbor jong ki paidbah, u pope u don bun ki nongkyrshan ha ka pyrthei. Uwei na ki nongkyrshan kiba donbor, u president barim jong ka USA u la maham ba ki pateng bynriew ha ka lawei kin sa iakynduh biang ia kajuh ka jingjynjar lada ia ka jingkylla jong ka suiñbneng la iehnoh khlem ka jingtehlakam. “Ngi la iohi baroh haduh katno ka long kaba sniew ki jingmih jong kito kiba len ia ki jingmaham jong kane ka khniang jingpang,” la thoh u Obama ha ka Twitter post. “Ngim lah shuh ban shu ailad biang ia ki jingmih basniew namar ka jinglen ia ka jingkylla ka suiñbneng. Baroh na ngi khamtam ki samla, ki dei ban dawa ia kaba khambha na ka sorkar jong ngi ha baroh ki liang bad ban vote ia kane ka jinghap.” [2] Bad kawei ka jingdawa kaba kongsan eh kaba u pope u ai jingmut ia ki paid bynriew jong ka pyrthei ka long ban pynlong noh ia ka sngi Robibar (Sunday) kum ka sngi ban shongthait na ki kam ki jam. Katkum ka shithi kaba paw bha jong u pope Francis, ka ‘Laudato si’ (2015), ka ong kumne,
“Ha ka sngi Robibar (Sunday), ka jingiashim bynta jong ngi ha ka Eukharist ka long kaba kongsan bad kaba kyrpang bha. Ka sngi Robibar (Sunday), kum ka Sabbaton jong ki Jiw, la thmu ba kan long ka sngi kaba pynkhiah ia ka jingiadei jong ngi bad U Blei, bad ialade, bad kiwei pat bad lem bad ka pyrthei.” [Laudato Si, sla 237]. [3]Dang shen ruh u pope u la pynkynmaw biang ia kane ka shithi jong u sha ka pyrthei ha ka por ba u khot sngewbha ia ka pyrthei Katholic ba kin rakhe ia ka jingdap san snem jong ka shithi jong u ka ‘Laudato Si’ kaba kren bha shaphang ka climate change, u la thaw ia ka jingrakhe kynmaw kaba haduh shitaiew ba la khot ka ‘2020 Laudato Si Week’ kaba la pynlong ha ka 16-24 tarik jong u bnai May, 2020.[4]
Khlem da khein ia ka jingdei ne jinglait ha kaba iadei bad ka jingpyrkhat halor ka climate change, nga ngeit ba ka jingangnud jong u pope kan sa urlong shen namar baroh baroh ki sdang ban sngewiahap ia ka jingai jingmut jong u bad ki la sdang ban ia leh da ka kam. Hooid, nga ngeit ba ki don sa kiwei kiei kiei ki jingjia bad ki jingialeh pyrshah bad ki jingjynjar kiban dang mih ia kiba ngam shym la ktah mynta hynrei nga ngeit ba katne ruh ka biang hi ban sngewthuh ia ka jingthmu jong u Soitan. Mynta bun ki nongialam bad ki riewkhraw jong kane ka pyrthei ki dawa ia ka rukom synshar kaba thymmai (New World Order). Khlem jingartatien, ka pyrthei kan sa pher bha hadien jong kane ka khlam bad ngin sa don ki aiñ ki kyndon kiba kham khlain ban ia kiba mynshuwa. Ngim tip haduh lano kane ka khlam kan neh, hynrei da shu peit te i kumba ka nang slem khyndiat. Kumba ong u President Donald Trump ba kane ka khlam “kan sa jur bha hashuwa ba kan man bha.” [5] Ngam tip lut ha kano ka dur kane ka New world Order kan long, tang ka bneng kaba tip khambha, hynrei kan sa long kaba pher bha. Hooid, ha kane ka New World Order ki ri kin long beit la ka jong ka jong kumba ju long bad ki sorkar jong baroh ki ri kin ym iap noh, bun na ki constitution ruh kin neh kumjuh, ki syiem, ki president bad ki prime minister kin dang don kumba ju long hynrei ka jingiakren bad ka rukom treikam kan sa pher bak-ly-bak. Ka rukom pyniaid ia ka pisa ka pilain kan sa long kaba thymmai, ka rukom pyniaid ha ki school, ki college bad ki university kan sa kylla, nangta ka rukom khaii pateng, ka jingleit jingwan jong ki briew, bad bun kiei kiei kin sa pher bha. Ym slem shuh ba ngin sa iohi ia kine kiei kiei ruh da la ki jong ki khmat.
Hynrei kumba U Blei u long uba donbor halor baroh, nga ngeit ba ka don hi ka jingshisha haba ki para Khristan ki ong ba dei U Blei uba la wanrah ia kane ka khlam. Tangba lada ngan ong ba dei U Blei uba wanrah ia kane ka khlam, ngan ong ia kata ha kane ka rukom – ba U Blei u shu shah ia u Soitan ban pyntreikam ia la ka jong ka jingthmu shipor. Bad ym dei pat ha kane ka rukom – ba U Blei u la thmu ia kane ka jingjynjar lane la thaw ma U ia kane ka khlam.
Ka Conspiracy Jong U Soitan
Ki Jingjynjar – Ki khlam, ki nemsniew, ki jingpluh ding, ki jumai, ki jingatphyllung, ka jinghap ka ioh ka kot, bad kiwei kiwei de.
Bun ki briew kin shem jynjar bad kin iam na ka bynta ka jingiarap. Kin ym sngew don lad don lynti shuh hynrei tang ban phai sha ka sorkar.
Ka sorkar kan sa ioh bor ban synshar halor ki briew baroh hapoh ka rukom synshar kaba thymmai (New World Order). Hadien kane ka khlam kan sa don hi ka jingsuk shipor tangba kan long ka jingsuk kaba thymmai (new normal). Ha kawei ka liang ki bor synshar jong ka pyrthei kin ialong kawei bad ha kawei pat ka liang kin dang ialeh iwei ia iwei namar ka jingieit jong kiba bun kan man khriat. (Jpw 17:13; Math 24:6,7,10,12).
Ka sorkar kan sa pynmih kawei ka ain kaba pyrshah ia ka hukum U Blei. Kan long ka jingtynjuh bakhraw ia ki briew U Blei namar kan don ka jingdawa ban kohnguh. Kino kino kiban kyntait ban pdiang kin ngat ha ka jingpynshitom katba kum ka aiñ. Kane ka dei ka jingsynshar donbor jong u mrad khlaw uba ar. Kam slem shuh ia ka dak jong u mrad khlaw ban treikam da ka jingshukor bakhraw jong u Soitan. (Jpw 13:-11-17)
Kane ka long ka jingsngewthuh shimet jong nga halor ka tynrai bad ka jingktah jong u Covid-19. Nga ngeit ba don bun ki riewngeit na kylleng sawdong ka pyrthei kiba pynkutnia ha kane ka rukom. Lehse phi lah ban nym iamynjur bad ka jingsngewthuh jong nga. Ngam sngewei ei ia kata. Ka bha ba phin ym shaniah kulmar hano hano ruh. Wat nym sngewsalia eh ia ka jingsngewthuh jong nga. Nga pynshlur bad kyntu ia phi ban wad hi da lade bad ban dwai sha U Blei na ka bynta ka jingpynshai jong U Mynsiem Bakhuid. Ban pynkhlain ia ka jingshaniah jong phi ha U Blei ka long kaba kham kongsan eh ban ia baroh. Nga la poi ban pynkut nia kumne namar ia nga la ialam ban pule bad sngewthuh ha kane ka rukom. La kumno kumno ruh, nga dwai ba phin lah ban sngewthuh ba ka don kaei kaei kaba sniew shalyndet jong u Covid-19.
Ki artikel kiba iadei bad kane ka post:
Ka Par Jingtip:
1. Pope Francis- “There is an expression in Spanish: “God always forgives, we forgive sometimes, but nature never forgives.” We did not respond to the partial catastrophes. Who now speaks of the fires in Australia, or remembers that 18 months ago a boat could cross the North Pole because the glaciers had all melted? Who speaks now of the floods? I don’t know if these are the revenge of nature, but they are certainly nature’s responses.” https://www.thetablet.co.uk/features/2/17845/pope-francis-says-pandemic-can-be-a-place-of-conversion-
2. Barack Obama - "We've seen all too terribly the consequences of those who denied warnings of a pandemic," "We can't afford any more consequences of climate denial. All of us, especially young people, have to demand better of our government at every level and vote this fall."https://www.eenews.net/stories/1062754487
3. “On Sunday, our participation in the Eucharist has special importance. Sunday, like the Jewish Sabbath, is meant to be a day which heals our relationships with God, with ourselves, with others and with the world.” Laudato Si, 237. https://catholicecology.net/blog/laudato-si-day-praise-which-heals-our-relationships
4. The Laudato Si Week - https://www.vaticannews.va/en/pope/news/2020-03/pope-francis-laudato-si-week.html
5. Trump concedes pandemic to 'get worse before it gets better' https://www.bbc.com/news/world-us-canada-53494766
Comments