Balei U Blei u thaw ia U Lucifer haba U lah iohi lypa ba un sa leh pop bad thaw jingjynjar?

Dang shen la don ba kylli ia kane ka jingkylli harum:

"U Blei u tip ia kiei kiei baroh. U tip shuwa ba kiei kiei kin jia. Kata ka long kumba ong, U tip ia ka lawei.

Ka jingkylli jong nga ka long: Hashuwa ban thaw ia U Lucifer, U Blei u la tip lypa ba U Lucifer un sa leh pop bad un thaw jingjynjar, hynrei balei patde U thaw ia u?"

Kane ka jingkylli ka la pynshitom jingmut bad pynmong ia shibun ki mynsiem kiba tlot, na uba nga la ju long uwei na kita. Namar kata, ka long kaba donkam ban ktah la kumno kumno ia kane ka jingkylli, lada ym dei ha ka rukom kaba janai ruh, hynrei tang ban pynksan ia ka jingbha U Blei, kumba U Blei hi u la shah khnang ban pyllait ia ngi na ka jingartatien.

Kane harum ka la long ka jubab kaba nga la jubab ia u paralok bad ha kane ka blog nga la kham edit bad thep shuh shuh ki dkhot Baibl bad la pynwan dur ia ka ha ka rukom jong ka artikel.

Ka jubab banyngkong

Ka don ar rukom ban jubab ia kane ka jingkylli tangba kim long kaba janai bad kiba pura kumba ka dei ban long namar ngim tip lut ia ka jingthmu bastad jong U Blei uba leh ia kiei kiei baroh katba kum ka jingmut jong U. Phi tip hi ba U Blei u ong, "Namar ki jingmut jong nga kim long kum ki jingmut jong phi, lymne ki lynti jong phi kum ki lynti jong nga, ong U Trai. Namar katba ki bneng ki long kiba kham jrong ban ia ka khyndew, kumta ki lynti jong nga ki kham jrong ban ia ki lynti jong phi, bad ki jingmut jong nga ban ia ki jingmut jong phi.” (Isaiah 55:8,9).

1. Da kaba buh sharud ia ki jingpyrkhat jong kiei kiei kiba lah ban long, U Blei u khlem thaw ia U Lucifer katba kum ka jingiohi lypa jong U kumba U Lucifer u long mynta. U Blei u thaw ia U Lucifer katkum ka jingthmu babymjukut jong U ba un long kumba U Blei u kwah ia U ban long, uba khuid, uba hok ha U Khrist, ban leh kmen ha ka jingkyrkhu kyrpang kaba u la ioh na U Blei bad kum u kherub rangbah uban ialam ia ka kynhun bah ha bneng. 'Ka jingthmu bymjukut jong U Blei' ka don jingiapher bad 'ka jingiohi lypa jong U Blei ia kaba sniew.' Ka jingthmu bymjukut U Blei - ka dei kaei kaei kaba U Blei u kwah ban long. Ka jingiohi lypa jong U ia kaba sniew - ka dei kaei kaei kaba U Blei um kwah ba kan long. Ka long kumjuh kumba U Blei u la thaw ia U Adam. U Khlem shym la thaw ia U Adam kum uba tlot lane uba khlem ka lad jingiada, ym shym la thaw ia u ban pyniahap bad ka jingtip lypa. Watla U Blei u la iohi lypa ia ka jinghap jong u briew, U Blei u la “thaw hok ia u briew” bad U la pynbna ba u long uba “bha eh” (Eklesiastis 7:29; Jenesis 1:31). U Blei u tip ia kaei kaban sa jia, hynrei u khlem pynlong ia ka ba kan jia. Hangne nga iohi ba ym barabor ba U Blei u leh ia kiei kiei katba kum ka jingtip lypa jong U. U Blei u khlem khang ban ai ka jingaiei ha kito kiba ngeit ha U Jisu ha kaba nyngkong, watla U la iohi lypa ba kin sa phaidien bad poi sha dujok. Ki don ki por ha kaba 'kaei kaba U Blei u leh' ka iapher bad 'kaei kaba u tip lypa'. Bad ha kajuh ka por (kane ka long kaba maian ia nga), ka jingiohi lypa jong U Blei ia kaba sniew kam lah ban khang ia U Blei ban leh ia kaei kaei kaba bha katba kum ka jingstad bymjukut jong U. U Blei u ong, “To kynmaw ia kiei kiei kiba mynshuwa na mynbarim: namar nga nga long U Blei, bad ym don uwei pat; nga long U Blei, bad ym don uba kat nga: uba da iathuh ia kaba kut naduh kaba sdang, bad ia kiei kiei kibym pat leh naduh mynbarim; da kaba ong, Ka jingthmu jong nga kan ieng, bad ngan leh ia la ka jingsngewbha baroh.” (Isaiah 46:9,10).

2. Ka mon laitluid bad ka hok ban jied laitluid, ka iatyngkhuh lang hangne. Ka don jong U Lucifer ka dei ka jingjied bad jingmon jong U Blei katba kum ka jingthmu bymjukut jong U. Hynrei katba ka jinghap bad jingjynjar pat kam dei ka jingjied jong U Blei hynrei jong U Lucifer. U Blei u ong ha U Lucifer, “Me la long u kherub ba la sleh uba kah: bad nga la buh ia me, kumta ba me la long halor u lum bakhuid jong U Blei; me la iaid sharum shaneng hapdeng ki maw bameh ding. Me la long janai ha la ki lynti naduh kata ka sngi ba la pynlong (thaw) ia me, haduh ba la shem ia ka jingbymhok ha me. Da ka jingbun ka jingkhaii jong me ki la pyndap ia ka pdeng jong me da ka jingleh bor, bad me la leh pop: namarkata nga la bred noh ia me kum uba sang na u lum U Blei; bad nga la pynjot ia me, ko kherub uba kah, napdeng ki maw bameh ding. Ka dohnud jong me ka la meng namar ka jingitynnad jong me, me la pynsniew ia la ka jingstad na ka daw ka jingphyrnai jong me: nga la bred ia me ha ka khyndew, nga la buh ia me ha khmat ki syiem, ba kin shu khmih ia me.” (Esekiel 28:14-17). La jar katta ruh, ka jingtip lypa U Blei ka khlem khang ia U ban thaw ia U Lucifer katkum ka jingthmu babha jong U. La U Blei u la thaw janai ia U Lucifer, U Blei u khlem shym la pynlong ia u ban leh pop pat hadien.

3. Baroh kaba ngi tip ka long ba U Blei u la dep thaw ia U Lucifer nalor ba U la tip lypa ba un sa hap bad un sa pynmih jingjynjar. Ka jingkylli mynta ka long, ngin kynnoh ia U Blei ne ia U Lucifer? Phi sngewthuh kumno? Nga te shimet ngam artatien ba ka dei na ka jingrai U Lucifer. (Bad ngam lah ban kynnoh ia U Blei tang namar ba U la thaw ia U Lucifer. U Lucifer u don ka mon ban jied bad u don ka jingkit khlieh kaba khraw, bad kumta ruh ka long ha ngi iwei pa iwei.)

4. Ka don ka jingkyrkhu bakhraw ha ka jingthmu bymjukut U Blei, kata ka long - ba ha U Khrist kiei kiei baroh kin long ba la kyrkhu. Watla u nongpop u la duh lehnohei noh ia ka jingkyrkhu jong U Khrist namar ka jingjied jong ki ia ka pop, ki lah ban ioh pat ia ka jingkyrkhu lada ki kylla kaba mut bad phai sha U Khrist. Ka jingthmu bymjukut U Blei kan ieng skhem. Watla ka jingiohi lypa U Blei ia U Lucifer ka long kaei kaei kaba sngewsih haduh katta katta, U Blei u la thaw ka lad ban pynduh noh ia ka pop kaba la synshar ha ka dohnud U Lucifer katba kum “ka jingthmu bymjukut, ia kaba u la thmu ha U Khrist Jisu uba U Trai jong ngi.”, “uba la pynim ia ngi, bad uba la khot ia ngi da ka jingkhot bakhuid, ym katba kum ki jingleh jong ngi, hynrei katba kum ka jingthmu bad ka jingaiei jong u hi, ia kaba la ai ha ngi ha U Khrist Jisu mynshuwa ki ia bymjukut.” (Ephesos 3:11; 2 Timothi 1:9). Katno ka long kaba sngewtynnad ban pyrkhat ba ka jingiohi lypa jong U Blei ia ka lawei bymjukut ha U Jisu Khrist ka long kaba itynnad bym lah ong shuh.

Kawei pat ka rukom jubab

[Ia kane ka bynta harum nga la phah biang sha u paralok jong nga, ioh lehse u pyrkhat da kumwei pat halor ka jingkylli jong u.]

Lada u briew u kylli da ka jingpyrkhat babha - Balei U Blei u thaw ia U Lucifer lane ia U Adam? Ka jubab kan long- Ka dei ka mon U Blei, U Blei u sngewbha ban thaw ia ki. Ba kin mad ia ka jingkyrkhu jong U. U thaw ia ki na ka bynta ka burom jong U, kata ka mut U Blei u sngewbha ban pyntreikam ia ka bor jong U ha kaban thaw ia kiei kiei kiba phylla, ban ai jingim, ban leh isynei, ban leh kambah. “Naba ha kine kiei kiei nga sngewbha keiñ, ong U Trai.” Kane ka dei ka jinglong U Blei lane ka burom U Blei. U Blei u ong, “To kynmaw ia kiei kiei kiba mynshuwa na mynbarim: namar nga nga long U Blei, bad ym don uwei pat; nga long U Blei, bad ym don uba kat nga: uba da iathuh ia kaba kut naduh kaba sdang, bad ia kiei kiei kibym pat leh naduh mynbarim; da kaba ong, Ka jingthmu jong nga kan ieng, bad ngan leh ia la ka jingsngewbha baroh.” (Jeremaiah 9:24; Isaiah 46:9,10).

Hynrei lada u briew u kylli da ka jingpyrkhat basniew - Balei U Blei u thaw ia U Lucifer? ka jubab ka long kaba kham pher shibun. Lada uwei un ong, nga lah sngewthuh hi ba ka dei ka jingjied jong U Lucifer ba ka sa wan ka jingjynjar, nga sngewthuh hi ba U Blei u khlem thaw da ka jingthmu basniew ia U Lucifer, nga sngewthuh hi ia kita kiei kiei, hynrei haba U Blei u la tip lypa ba un sa hap la kumno kumno ruh, balei pat U dang leit thaw ia U Lucifer? Hato U leh namar u ioh jingmyntoi ia lade? Lehse uwei pat un ong, ka dang bha ba U Blei yn ym thaw hi ruh ia U Lucifer lada U la iohi lypa ba un sa poi sha dujok. Balei U Blei u thaw ia U Lucifer, walta U tip ba un sa leh pop bad thaw jingjynjar, ka long kaba eh ban batai janai da uno uno u briew. Ban shu jubab da ka jingngeit bad jingshaniah ha U Blei ha ka jingsngewthuh balyngkot kat kaba nga tip da ka jingaiei U Blei, ka long: (1) Ka dei ka mon U Blei, (2) U Blei u leh da ka jingsngewthuh bad da ka jingstad, (3) Na ka bynta ka jingbha, (4) Ngam tip bha ia ka jubab.

Kat kaba nga la batai hangne ia kata nga sngewthuh shai bad ngam artatien hynrei palat ia kata ngam nud ban ryngkang ia u pud bakyntang jong U Blei namar ngam tip lut ia kiei kiei baroh. Bad nga ngeit ba ym don uno uno ruh u briew uba lah ai ka jubab kaba pura ia kane ka jingkylli kaba ngi iakren mynta.

Bun ki briew ki pyrkhat ba U Blei u bakla lane u duna ha kane ka bynta ba U kum thaw ia U Lucifer. Katto katne pat ki pyrkhat ba U Blei u lah ban don ka jingthmu basniew ba U sa thaw ia U Lucifer. Katto katne ki kynnoh sniew ia U Blei katba ki dang phla patde ia U ha ki jingialap bad ha ki jingdwai lane ki jingrwai ba U Blei u long U babha, tang ban pynkulmar jingmur ia ki briew.

Ka don tang kawei ka jingkylli ia ki nongwad dong – Lada U Blei u long shisha kumba phi pyrkhat, iathuh ha ngi uei uba kham bha ban ia U Blei Jehobah? Hato dei uta uba shun ia kaba bha, U Soitan? Hato dei kita kiba long ki mraw jong ka pop, ki briew jong ka pyrthei? Shah ba U Jisu un iathuhlypa ha phi ia ka jubab shuwa ba phin iawad hi da lade: “Ym don uba bha, hynrei tang uwei, uba U Blei.” (Markos 10:18). Em, ym don shuh nalor U Blei jong ka Baibl.

Namar ba ym don shuh kat U Blei Jehobah, ngi dei tang ban shu shaniah bad pyndem ia lade ha ka jingstad bad ka bor jong U. Kan sa poi ka por ba ngin sa tip ia ka jubab kaba janai bad kaba pura na U Khun ba la kha marwei jong U Blei markhmat markhmat. Ia mynta hi to ngin sngewhun ha kaei kaba U Blei u la pynpaw, kam myntoi ba ngin iawad pynshitom bad pynlamwir kai ia lade shaphang kaei kaei kaba U Blei u khlem ai jingshai. Kumba la thoh, “Kita kiei kiei ruh kiba rieh ki dei ki jong U Trai uba U Blei jong ngi: hynrei kita kiei kiei ruh ia kiba la pynpaw ki dei ki jong ngi bad jong ki khun jong ngi ha la ka rta, ba ngin ioh leh ia ki ktien jong kane ka hukum baroh.” (Deuteronomi 29:29).