Ka Jingkyrmen Jong Kiba Ngeit Ha U Khun U Blei
1. HATO U JISU KHRIST U KULAR NE EM BA UN WAN PHAI BIANG SHA KANE KA PYRTHEI?
Ka jubab ka long hooid!
U Khrist hi da lade u la kren kine ki kyntien ba la shem ha ka Gospel U Ioannis :- "Wat khih khuslai ha ka dohnud jong phi. To ngeit phi ha U Blei, to ngeit ha nga ruh. Ha ka ing U Kpa jong nga don bun ki jaka shong neh; lymda kumta, nga la iathuh ia phi. Ngan sa leit ban khreh ka jaka ia phi. Bad lada nga leit khreh ka jaka ia phi, NGAN WAN PAT BAD NGAN shimti ia phi ha lade hi ba ha kaba nga long ma nga phi ruh phi lah ban long." Ioannis 14:1-3.
Shwa ba U Jisu un leit kiew sha bneng, u iathuh skhem ia ki nongbud jong U, "Ngan wan pat!" U la kular ban wan phai bad shimti ia kito kiba shaniah ha U bad ialam ia ki sha ka jaka ba U la leit pynkhreh ia ki. Ki jingthoh ki kren shaphang ka jingwan arsien jong u kumba 2500 sien. Ka jingshisha ba U Jisu un sa wan sha kane ka pyrthei sa shisien ka long ka baskhem bha. Kumba la jia long bad la pyndep ha ki jingiathuhlypa ia ka jingwan kaba nyngkong kaba la jia ar hajar snem mynshwa, da kumta shisha ka jingiathuhlypa jong ka jingwan ba arsien jong U Khrist kan jia shisha. Ka jingkylli ka mih-
2. KUMNO U JISU UN WAN? (i) U Jisu un wan ne em ha ka barieh?
"Ha khmih nga la iathuhlypa ia phi. Namar kata la kin ong ha phi, ha khmih u don ha ka ri khlaw; phi wat mih noh: ha khmih u don ha ki pulit ba jar jar: phi wat ngeit. NABA KUMBA KA MIH KA LEILIEH na mih-ngi, BAD KA SHAI haduh sepngi, KUMTA RUH KAN LONG KATA KA JINGWAN U KHUN U BRIEW." Mathaios 24:25-27.
Lah ban iohi jngai ia ka jingtba ka leilieh, kumjuh ruh ka jingwan U Jisu kam dei ka jingjia kaba rieh lane ka jingjia kaba tang ha ka jingmut ki briew. (ii) Hato U Jisu Un wan pat kum u briew shisha?
"Te haba ki dang ia khmih shain sha bneng, katba U dang kiew, ha khmih arngut ki rangbah ki la ia wan ieng hajan jong ki ha ki jain kup balieh; kiba la ong ruh, 'Ko rangbah Galilaia, balei phi ieng khmied sha bneng? UNE U JUH U JISU, ia uba la SHIM noh na phi SHA BNENG, UN WAN PAT HA KAJUH KA RUKOM kumba phi la iohi ia U ba u leit sha bneng." Ki Kam. 1:10,11.
Ha ka sngi ba u la leit noh na ka pyrthei jong ngi, ki angel ki la iathuh skhem ia ki synran ba uta u juh U Jisu uba la shim na ki sha bneng “ym da uwei pat” un wan pat ha ka dur kum u Syiem jong ki syiem. U juh U Jisu uba la pynkhiah ia ki bapang bad uba la pynpeit ia ki khmat uba matlah. U juh U Jisu uba la kren jai jai ha ka kynthei kaba la shem ha kaba klim. U juh U Jisu uba la niad ia ki ummat na ki khmat kiba iam sngewsih bad uba khot ieit ia ki khunlung ha ka pneh jong U. U juh U Jisu uba la iap ha ka diengphna ha Kalbari, uba la shong thait hapoh jingtep, bad uba la mih pat na kiba iap ha ka sngi balai.
(iii) Un wan ne em U Jisu khnang ba ngin iohi ia U?
"Ha khmih, u wan bad ki lyoh, TE KA KHMAT BAROH KAN IOHI IA U." Jingpynpaw 1:7.
Baroh kiba dang im haba U Jisu un wan pat, kiba hok bad ki bymhok kin iohi ia ka jingwan jong U.
Katno ngut U Jisu hi dalade u ong kiban iohi ia ka jingwan jong U?
"Ynda kumta te ka dak U Khun u briew kan paw ha bneng; te hangta ki jait bynriew baroh ka pyrthei kin ia lynniar lympat haba kin iohi ia U Khun u briew ba u wan ha ki lyoh bneng da ka bor bad ka burom bakhraw." Mathaios 24:30.
Baroh kiba dang im ha kane ka pyrthei kin iohi ia U Jisu ba U wan phai.
(iv) Kiei kiban wan lem bad U Jisu haba un wan?
"Haba U Khun u briew un wan ha ka burom jong u, bad baroh ki angel lem bad U te un shong halor ka khet ka burom jong U." Mathaios 25:31.
(v) Ngi lah ne em ban iathuh thik ia ka por ba U Jisu Un wan phai?
"Hynrei shaphang kata ka sngi bad kata ka por ruh ym don batip, lymne ki angel ki bneng, hynrei tang U Kpa jong nga hi. . . . Naba kumta, phi ruh to long kiba la kloi; na ba ha ka por ba phim mut, u wan U Khun u briew." Mathaios 24:36,44.
Baroh kin iohi ia ka jingwan badon burom U Jisu, hynrei kiba bun ki long kiba khlem pynkhreh ia kata ka jingjia. Hato phi shimet phi la pynkhreh ia U Jisu ynda U wan?
3. AIU U JISU UN LEH YNDA UN WAN PAT? (1) U Jisu un lum lang ia baroh kiba la pynim.
"Un phah noh ruh ia ki angel jong U da ka jingsawa bakhraw ka turoi, bad kin ialum ia kiba lajied jong u na ki saw lyer, naduh ki bakut jong ki bneng haduh ki bakut jong ki." Mathaios 24:31.
Lada phi shisha phi la aiti lut bad shah ia U Jisu ban pynkhreh ia phi ha ka dohnud bad ka jingim, phin sa iakynduh bad u da ka jingkmen kum u Nongpynim jong phi.
(2) U Jisu Un sa pynmih pat ia kiba hok kiba la iap.
"Naba U Trai hi Un wan hiar na bneng da ka jingrisa da ka ktien sawa u angel rangbah bad da ka turoi U Blei; BAD KITA KIBA IAP HA U KHRIST KIN IA MIH PAT SHWA." I Thessaloni 4:16.
U Jisu Un wan hiar na Bneng da ka jingrisa bad ia ka jingsawa bakhraw jong U lah ban iohsngew sawdong ka pyrthei. Ka jing plie jong ki jingtep ha kawei pa kawei ka jaka tep, bad la pynmih pat da ki millian ki briew kiba la pdiang ia U Jisu lyngba ki arta. Ka sngi ka bakmen haduh katno kata kan long!
(3) U Jisu un pynkylla ia ki bahok baroh ha ka jingwan jong U. Ym tang ia ki bahok kiba la iap, hynrei ia ki bahok kiba dang im ruh.
"Ynda kumta ma ngi kiba dang im ia kiba la pynsah, YN RONG NOH IA NGI LEM BAD KI ha ki lyoh, ia ka ban iashem ia U Trai ha ka suin bneng, te kumta ngin iai long junom junom lem bad U Trai." (dkhot 17).
Ban pynkhreh ia ngi ia ka bymjukut, U Khrist U pynkylla ia ki met baiap jong ngi sha ki met kiba itynnad bad ki bym iap shuh.
"Ha khmih nga iathuh ia phi ia ka jingmaian ngin ym iohthiah baroh, hynrei yn pynkylla ia ngi baroh shi syndon, ha kaba shi khyllipmat kein ha ka turoi kaba khatduh. Namar ka turoi kan sawa, ynda kumta ia ki baiap yn pynmih pat ki bym pyut, bad ia ngi yn pynkylla. Namar ka dei da lei lei ia kane ka bapyut ban phong ia ka bympyut, bad ia kane ka baiap ban phong ia ka bymiap." I Korinth 15:51-53.
Ynda U Jisu un wan "yn pynkylla ia ngi baroh." Pyrkhat: ym don jingpang shuh ha kata ka por, katno ka jingkmen haba U Khrist U la wan! (4) U Jisu un ialam ia ki bahok baroh sha bneng.
U dei U Jisu hi uba kular, "ngan wan pat bad ngan shimti ia phi ha lade hi" ha ing U Kpa jong nga (peit Ioannis 14:1-3). U Petros u kren ia ka jingioh pateng jong kiba la siewspah "ia kaba la ri ha bneng na ka bynta jong phi." (I Petros 1:4). Ngi lah ban khmih lynti ban ioh peit bniah ia ki jingphylla ka nongbah U Blei, ka Jerusalem bathymmai, bad ban ithuh ia U Kpa Uba ha bneng.
(5) U Jisu Un pyndam noh ia ka jingsniew bad jingjynjar baroh jong kane ka pyrthei.
Ki bymman kito kiba la kyntait barobor ia ka jingtyrwa U Jisu ia ka jingisnei ha ka jingshisha ki la rai pynrem ia lade hi. Haba ki peit ia ka khmat U Jisu haba U wan sha ki na ki lyoh ka bneng, ka jingkynmaw kynsan ia ki pop jong ki ka long kaba pang eh haduh katta katta ia ki ban shah; ki la pyrta ia ki lum bah bad ia ki mawsiang, "To hap ha ngi bad buhrieh ia ngi na ka khmat jong uta uba shong halor ka khet bad na ka jingbitar uta u khun langbrot." (Jingpynpaw 6:16). Ki kham jied ia ka jingiap ban ia kaba ieng ha khmat ka jingpeit basam lyngba jong U Jisu.
Ki tip mynta ba kata ka sur kren kaba tied kum u pyrthat na sahit bneng, shisien ka sngi ka la ju khroh ia ki ban pdiang ia ka jingaiei blei. Kito kiba la len ia lade ha ka jingiabeh ia ka spah ne ka jingsngewbha lane ia ka kyrdan mynta ki la sngewthuh ba ki la leh lyndet ia kata kaba tang ma ka hi kaba kordor ban don ha ka jingim.
Ka dei kane ka jingsngewthuh kaba khniot iap ia ki. Ha ka jingshisha, ym donkam ia uwei ruh na ki ban jah noh. Wat U Blei hi da lade "um shem jingsngewbha ha ka jingiap u bymman" (Esekiel 33:11). Um kwah "iano iano ruh ban jot noh, hynrei ba baroh kin poi sha ka jingkylla ka bamut" (II Petros 3:9). U Jisu U kyrpad jur ia ngi, "To wan ha nga, phi baroh kiba thait bad bakhia ka jingkit, te ngan pynjem ia phi" (Mathaios 11:28). Hynrei, ka bym sngew lah ngeit, katto katne ki kyntait sharud ia ka jingkhot ieit jong U.
4. PHI LA PYNKHREH IA KA JINGWAN U JISU? Na bynta jong phi jong nga, U Khrist u la siewspah ha diengphna bad da ka jingieit U khot ia phi ia nga mynta ban wan sha u bad ngeit ha ka bor jong u. Da shisha, U khrist un wan shim noh ia kiba la siewspah kiba long ki jong u.
"IA U KHRIST LA KNIA AINGUH TANG SHISIEN ia ka ban bah noh ia ki pop jong ki ba bun UN MIH PAW HA KABA ARSIEN, khlem bah ki pop ha kita kiba ap khmih lynti ia u, ia ka jingpynim." Heb. 9:28.
U Nongpynim uba la iap ha ka diengphna ban bah ia ki pop jong phi un wan ha kaba "arsien," bad un wallam jingpynim ha kito kiba ap khmih ia u." U Khrist U da kheinduh ia lade khnang ba un ioh tyrwa jingpynim ia iwei pa iwei na ngi. Hynrei khlem ka jingwan arsien ka diengphna ka long lehnohei. U Khrist U kwah ia ngi ban don ka ïing baskhem lem bad u. Te khnang ban pynlong ia kata kaba lah ban jia, ngi dei ban shah ia u ban synshar ia ki dohnud jong ngi kum U Trai bad U Nongpynim mynta hi.
Ha ki por thma kiba ngi ju iohi kiba la jia ha ki thain pdeng mih-ngi (Middle East), katno ki briew kiba sah shato ki thain ki kwah ban lait noh na ki shah thombor ha ka bor jong ka thma, katno kan long ka jingkmen lada ka thma kat kjt noh bad ka jingsuk kan wan. Bun ki ju phetwir noh na kawei ka jaka sha kawei pat ka jaka. Ha ka por ba ki Jiw ki shah pyllait na ka jingshah thombor jong ki Nazi, katno ka jingkmen jong ki millian ki Jiw kiba im ha kito ki por ba ki la ioh ia ka jingpynim. Kumta da shisha ma ngi ruh ki Khristan kiba long ki nongbud U khrist Jisu, katno shisha kan long ka jingkmen ba U Nongpynim jong ngi un wan bad ka thma ba kynja mynsiem ka la kut. Hato ngim kwah da shisha ba u Khrist un wan, kadei tnag kata hi ka jingkyrmen ka jong ngi kiba ngeit, ka jingkyrmen ba U Khrist un wan pat sa shisien ban wan shaw ia la ki jong.
Shen U Jisu Khrist U Khun U Blei JONG NGI, U Nongpynim JONG NGI un hiar na ki lyoh ban pyllait ia ngi. Kan don ka jingrisa ka jingkmen ha kata ka sngi jong kiba ngeit, ka jingpyrta ka jingkmen khatduh la sngewthuh. Kaba kmen eh ka long ba Uta U syiem ki syiem u ithuh ia la ki jong, un ithuh ia phi ia nga lada ngi don sha ka liang jong u.
Phi la kloi ne em ban pdiang sngewbha ia U Syiem ha ka Burom jong u? Lada phim pat kloi, sngewbha khot ia U Jisu da lade sha ka jingim jong phi mynta hi. Kumba ia ki jingeh jong ka pyrthei yn pynjem da ka jingwan U Jisu, te ka jingwan jong u ha ka dohnud kan iarap ia phi bad ia ki jingeh ba phi ia kynduh man ka sngi. U Nongpynjem bakhraw ia ki jingeh u lah ban pyllait ia phi na ka jingpalat bad na ki jingkit bakhia ka pop te un ai ha phi ia ka jingim bymjukut.
Phi lah ban shaniah ha U Jisu. Un pynkhreh ia phi ia ka jingwan jong U bad ai ha phi ia ka jingsngew thikna ia ka jingim jong ka jingsuk bymjukut.
KI DAK BA U KHRIST UN WAN PHAI HA KI SNGI JONG NGI Hadien ba U Jisu U la dep pynthikna ia ki synran jong u ba un wan biang sha kane ka pyrthei jong ngi ha ka sien ka baar (Mathaios 23:39), ki kylli aiu ki synran ia U?
"To iathuh ha ngi, lano ba kine kiei kiei ruh kin long? Bad KABA KUMNO KA DAK ka jingwan jong me bad kaba wai noh kane ka pyrthei?" Mathaios 24:3.
U Jisu U jubab shai bad skhem. Ha ka lynnong 24 u Mathaios bad 21 u Lukas. U da lade hi u la iathuh bun ki dak ne ki sakhi, da kaba ngi lah ban tip ba ka jingwan jong u ka la jan. Kiwei na ki jingiathuhlypa ka Baibl ki iarap ban pynshai shuh shuh ia ki jinglong jong ka pyrthei shwa ba U Khrist un wan phai. Kumba ngin sa iohi, kine ki jingiathuhlypa ki urlong ha kaba ngi lah ban iohi da la ki khmat jong ngi, ki pynpaw ba ka jingwan U Khrist sha pyrthei ka la jan.
To ngin ia peit ha ki 10 tylli ki dak ka jingiathuhlypa ka Baibl ha ka lynti bah sha Bneng, bad eksamin ia ki jingkylli kiba ki nongleit jingleit mynta ki lah ban kylli katba ki pule ia ki. Dak Ba Nyngkong - ka jingkordit! Ka jingtriem, ka jinglyngngoh!
Palat ia ka khat khyndai spah snem mynshwa U Jisu U la ai ki jingiathuhlypa jong ka jingim kaba iadei ha kata ka por kaba sawa kum kaba ioh na ka kot khubor:
"Kin don ruh ki dak ha ka sngi, ha u bnai, bad ha ki khlur, bad ha ka khyndew ka jingjynjar jong ki jaitbynriew, ki da sngewlyngngoh namar ka jingkyrhuh ka duriaw bad ki jingat phyllung. Ki briew ki da iap ler da kaba sheptieng bad da kaba ap lyngngoh ia kita kiei kiei ruh ki ban sa jia thred ha ka pyrthei; naba yn pynkhih ia ki bor jong ki bneng. YNDA KUMTA TE KIN IOHI IA U KHUN U BRIEW BA U DA WAN ha u lyoh da ka bor bad ka burom bakhraw. Te haba kine kiei kiei ruh ki sdang ban jia long, to khmied bad to mied ia la ki khlieh, naba ka jinglaitim jong phi ka la jan." Loukas 21:25-28.
Ym don shuh ka jingiathuh kaba kham shai ia ka jinglong ka pyrthei mynta ban ia kane: "ki briew ki da iapler da kaba sheptieng bad ap lyngngoh ia kiei kiei kiba jia long ha ka pyrthei." Ki atiar ialehthma ki lah ban pynjot ia kane ka pyrthei baroh kawei.
Kan long kumno lada ki nongpyntriem kin ioh ia u bom bad pynbthei ia u?
U Jisu U ai ia ngi ka nongrim ia ka jingkyrmen ha ki por kiba jynjar. Ki jingeh kiba don mynta kiba pynkordit bad pynlyngngoh ia ka pyrthei ki nang pynthikna shuh shuh ia ki jingshisha ba ka jingwan U Khrist ka "la hajan." Ki briew mynta ki iam sngewsih ha ka jingkut lad, "peit kumno ka pyrthei ka la long!" Hynrei kiba pule ia ki jingiathuhlypa ka Baibl bad ki ba pdiang shisha ia U Khrist ha ka jingim jong u kin sngewthuh ia shibun kiei kiei baroh bad kin nym don jingsheptieng.
Dak Ba Ar - Ki Jingjynjar ka pyrthei
Kumno ki jingjynjar ba shu long hi ki iadei bad ki jingjia jong ki sngi khatduh?
"Ki JINGKHYNNIUH JUMAI kiba jur kin long bad ha shibun ki jaka, ki NEMSNIEW bad ki JINGIAPTHEM ruh bad kin long ruh kiei kiei kiba shyrkhei bad ki dak bakhraw na bneng. . . Ynda phin iohi ba la jia kine kiei kiei ruh, to phin tip ba ka hima U Blei ka lajan." Loukas 21:11,31.
Pyrkhat shi khyllipmat shaphang ka nemsniew. Ki dur jong ki khynnah bad ki kpoh kiba at ki paw ha ki kot khubor. Hato kam long kaba sngew phylla ba ka pyrthei kaba lah ban phah ia ki briew sha u bnai KAM LAH ban ai bam ia ki briew jong ka baroh? U Jisu U la tip ba ki nemsniew kin wan, ba ka jinglong khwan lalot u briew kan nang jur sha bajan kut ki por.
Hynrei kumno shaphang u jumai? Kat kum ka World Almanac jong u 1999, ha kawei ka spah snem hadien kawei pat jong ka juk Khristan la don ka jingjia ki jumai bakhraw: ha ka 18 spah 6 tylli ki jumai bakhraw, 19 spah - 7, ha ka 20 spah palat 100 tylli. Kumta ka sakhi ka pyni ba ki jingkhynniuh jumai ki la nang bun katba nang poi sha ki sngi jong ngi.
Kitei ki dak jingkhein ki pynskhem ia ki jingiathuhlypa U Jisu. Ki nemsniew bad ki jingkhynniuh jumai ki la kot shaduh ka jingsawa bajam ___ "Ka hima U Blei ka la jan!" Hato ka spah snem kaba 21 kan nang pynbun shuh ki jumai bakhraw, lane ka jingwan jong u Syiem ki syiem?
Dak Ba Lai - Ka Jinglum Spah
Kaei ka jingmut jong ka jingtuid ka spah sha ki kti ki khyndiat ngut katba kiba kham bun pat ki nang hap ha ka jingkyrduh?
"Phi la kynshew ia ki jingkynshew ha ki sngi khatduh." Jakob 5:3.
Nalor baroh ka jingialeh ban pyniaid bad ka jingiohi jngai ia ka ioh ka kot ha pyrthei, kiba riewspah ki nang riewspah shuh shuh bad ki baduk ki nang kyrduh. Ka jingroi ka spah ka hajar ka dei kawei pat ka dak kaba pyni ia ngi ba "ka jingwan U Trai ka la jan." (dkhot 8).
Dak Ba Saw - Ka jingbymsuk bymhun u paidbah.
Balei ka jingbym don jingsuk jinghun hapdeng ki nongtrei ka la nang kiew palat?
"Ha khmih, kata ka bainong jong kita ki nongtrei kiba la ot ia ki lyngkha jong phi, ka kyang-kyrpad: te kita ki jingkyang jong kita kiba la ot ia ki ka la leit bsut sha ki shkor U Trai ki paid. To iai shah slem ruh ma phi, to pyneh skhem ia la ki dohnud naba kata ka jingwan U Trai ka la jan." Jakob 5:4,8.
Hadien ba la dep iathuhlypa ia ka jingkynton spah kaba ym lah ban ianujor bad kano kano ka por kum ha ki sngi jong ngi, u Jakob u la iohi lypa ia ka jingiakhih u paidbah kaba mih na ka jingbymhun shuh u nongtrei. Ka jingsngew iapyrshah hapdeng kiba don bad ki bym don ka dang iai long bad nang khraw. Sa kawei ka dak ba "ka jingwan U Trai ka la jan."
Dak Ba San - ka jinglong babha ka la troin.
Balei ba ka akor babha ha ka imlang sahlang ka la imat pra lyngkhot lyngkhai?
"Hynrei to tip ia kane, ba ha ki sngi kiba khatduh kin wan ki por bashitom. Namar ki briew kin long kiba ieit tang ia lade, kiba ieit sbai, kiba kren sarong, kiba khraw, kiba kren sniew, ki bym kohnguh ia la ki kmie ki kpa, ki bymsngewnguh, ki bymkhuid, kiba khlem ieit ia la ka kynja, kiba khlem map, kiba kren siat, ki bymsuidniew, kiba runar, ki bym ieit ia ka babha, ki nongdie lok, kiba hangamei, kiba leh meng, kiba ieit ia ka jingsngewbha khamtam ban ia kaba ki ieit ia U Blei; kiba don ka dur ka jingriewblei, hynrei kiba len ia ka bor jong ka; na kine ruh to phai noh. . . Hynrei ki briew basniew bad ki nongshukor kin nangsniew nang sniew, ki da shukor bad shah shukor." II Timothi 3:1-5,13.
Don hi uno uno uba lah ban iathuh kaba kham shai kham biang ia ka jinglong ka pyrthei jong ngi? Pynphai ia ka kamara shondur sha kano kano ka liang te phin iohi ia ka dur jong ka jingsarong namar ka spah. Phin iohi ia ki kam leh jubor bad lehbein ia ki khynnah. Phin iohi ia ki dur ki bym lahniew shuh ia ki samla kibym lah synshar, ki khynnah dang 13, 14 snem kiba ia pyniap bad pyndkoh khlem pyrkhat. Kine ki jingiohi babun jait bun rukom ki ia pyrta jam ba ka jingwan U Jisu ka la ha jan.
Dak Ba Hynriew - Ka jingphriang ki kynhun niam.
Balei ba ngi iohi ka jingroi kynsan ki kynhun niam?
"Naba ki Khrist lamler bad ki nongiathuhlypa kin mih bad kin pyni ia ki dak bakhraw bad ki jingphylla kat ban shukor lada lah, wat ia kiba la jied." Mathaios 24:24.
Kine ki jingong ki iathuhlypa ba sha ki por kiba kut kin don ki dak bad ki jingphylla, ki jingpynpaw balamler kiba palat ia ka bor briew. Ki nongleh byrtong bad ki nongai ksuid kin paw wat ha ki Telebishon. Ki briew jong ka kynhun New Age ki la phriang kylleng, ki die ia ki jingleh jadu bad pyni ia ki mynsiem kiba la iap. Ki dak khyllah bad ki jingphylla ki la roi kynsan.Kine baroh ki la nang pynshai shuh shuh kumba la iathuhlypa da U Jisu, nga la poi ha ki por ba ka jingwan U Khun u briew ka la ha jingkhang (dkhot 27). Dak Ba Hynniew - Ka pyrthei kaba la kyndit
Kaei ka jingmut jong kane ka jingkyndit ka pyrthei ha Africa, ha Middle East, Eastern Europe, bad ki jait bynriew jong ka Far East.
"AI KI JAIT BYNRIEW KIN PYNKHIH IA LADE; . . . To suh ia ka rashi, naba ka jingot ka la ih. . . naba ka jingbymman jong ki ka la bun! Ki paidbah, ki paidbah ha ka them ka jingpynkut! Naba ka SNGI U TRAI KA LA JAN ha ka them ka jingpynkut!" Joel 3:12-14.
Ha kine ki por ki ri ha Asia bad Africa, ha Eastern Europe, ka Soviet Union ba mynshwa, bad ki ri ha Middle East, ngi iohi ia ka jingkyndit ki jait bynriew barit bad bakhraw ha kylleng la kylleng kaba ym pat la ju don ha ka histori," namar ba ka sngi U Trai ka la jan."
Dak Ba Phra - Ka jingthmu ia ka jingsuk bad ka jingpynkhreh ia ka thma.
Ngi ia im ha ka pyrthei kaba khyllah. Baroh ngi ia mynjur ba ngi dei ban ai lad ia ka jingsuk. Ngi kren ia ka jingsuk; hynrei ngi pun ia ka jingiashun, katto katne da ki spah snem, sa pluh ha ki jingialeh pyrshah bapaw. U Mikah bad U Joel ki la iathuhlypa ba ha kata ka por ba ki jaitbynriew ki ia kren ba ki kwah jingsuk (Mikah 4:1-3), hynrei ka jingbym shaniah ia la ki para marjan ka la pynlong ia ki ban pynkhreh ia ka thma (Joel 3:9-13).
La slem bah ka Baibl ka la pynpaw ia ka jingleh ki jait bynriew ha kine ki sngi ___ ka jingsuk ___ ka thma, hynrei ka jingsuk kan synshar ha khyndew tang ynda U Jisu Un wan.
Dak Ba Khyndai - Ka jingroi ha ki sngi mynta
Balei hadien ynda ka histori ka la iaid da ki bun spah snem ka leit ka wan bad ka iakren ia khana ka la pyniajan lang ia ka pyrthei haduh katta katta?
"HADUH KA POR JONG KA BAKUT KEIN; bun ki long ki ban phet shane shatai, bad ka jingtip kan roi." Daniel 12:4.
U Daniel u kdew hangne ba ka jingtip ia ki jingiathuhlypa jong u kan "roi", lane "tad haduh ka por jong ka bakut." Hynrei ki jingiathuhlypa jong u ki imat kdew beit sha ka juk komputer kaba ai jingpyntip ha kine ki por. Ki jait jingtip baroh ki la roi stet kum ka leilieh ha kine ki khyndiat snem. Ladon kham bun ki jingkylla ha ki 50snem ba la dep ban ia ki ar hajar snem kiba mynshwa.
"BUN KIN IA LEIT SHANE SHATAI ban pynroi ia ka jingtip." Shwa u 1850, ki briew ki leit shane shatai da ki kulai bad kali kulai, la jan kumba ki ju leh naduh ba sdang ki por. Mynta ki briew ki leit kham stet ban ia ka jingiaid ka jingsawa.
Ka jingroi ha ka leit ka wan bad ha ki jingshem thymmai kaba la dap la shlei ia ka pyrthei ki nang sakhi shuh shuh ba ngi im "ha ki sngi khatduh." Dak Ba Shiphew ___ Ka Gospel Sha Ka Pyrthei Baroh.
U Jisu U iathuhlypa shwa ba un wan ia ka gospel yn ialap sha ka pyrthei baroh:
"Te ia kane ka gospel jong ka hima yn ialap ha ka pyrthei baroh, ia ka ban long ka jingphla ha ki kynja bynriew baroh; ynda kumta kein kan jia ka bakut." Mathaios 24:14.
Da ki bun phew snem la jan shiteng shiliang na ka pyrthei la shu khang khyrdep sha lyndet ka pyrda nar, la shu khang lad ia kiba shong hangta ban iohsngew ia ka khubor babha. Hynrei tang ha kawei ka miet ka Eastern Europe ka la lait bran na ki tyrsim nar jong ka Kommunist. Ia ka
kynroh jong ka Berlin la pynkyllon kram, bad ka hima Soviet bakhlain ka la pra lyngkhot lyngkhai. Kynsan shiteng na ka pyrthei ka la plie ia ki jingkhang jong ka ia ka gospel.
Ka gospel da shisha ka la leit sha "kylleng ka pyrthei" kumba kam pat ju la leit mynshwa. Lyngba uta u satellite ia ka khubor ka jingpynim la ialap la jan sha man la ka jait bynriew. Ngi ia im ha ki sngi kiba U Jisu U la kren mynba u la pynbna: "Te ia kane ka gospel jong ka hima yn ialap sha ka pyrthei baroh ia ka ban long ka jingphla ha ki kynja bynriew baroh; ynda kumta kein kan jia kaba kut." Mathaios 24:14.
LANO U JISU UN WAN PHAI? Hadien ba u la iathuh ia ki jingjia kiba iathuh ia ka jinglong jong ka por shwa ka jingwan arsien jong U, U Jisu U pynkut ia ka jingkren da kaba ong,
"Shisha nga ong ha phi, kane ka pateng bynriew kan ym leit noh, tad ynda la pyndep noh ia kine kiei kiei baroh." Mathaios 24:34.
Ka jingpynkut ka long kaba paw shai ___ ka pateng bynriew kaba la pyni da kine ki dak jong ki jingiathuhlypa, kin sa iohi ia U Jisu ba U wan phai sha ka pyrthei ha ka sien ba ar. Kan ym slem shuh ba un sa sar noh ia ka pop bad jingjynjar bad pynieng ia la ka hima, U Jisu U maham, "Ym don ba tip . . . ia ka sngi lymne ka por" (dkhot 36).
Te U Jisu U la bteng: "Naba kumta, phi ruh to long kiba la kloi; naba ha ka por kaba phim mut U wan U Khun u briew." Mathaios 24:44.
U JISU, U JINGKYRMEN BA TANG MA U HA KA PYRTHEI U Khrist U long ka jingkyrmen babha tam bad bakhatduh jong ka pyrthei namar dei tang ma U Uba lah ban ialeh ia kata kaba pynjot kaba long - ka pop. U Jisu U la iap ha Kalbari ban pynlong kaba lah ban pynrem ia ka bymman bad ban pyllait ia kito baroh kiba pdiang ia ka jingpynim ba la tyrwa.
"Jar uba iai leh ia ka pop u long na u Soitan; naba uta u Soitan u la ju leh pop naduh kaba mynnyngkong.Ia kane khnang la pynpaw ia U Khun U Blei ba Un ioh pynjot noh ia ki jingleh uta u Soitan." I Ioannis 3:8.
U Nongpynim jong ngi U la thaw ka lad na kane ka pyrthei kaba la jot la pra jong ngi da kaba kheinduh ia la ka jong ka doh ka snam. Bad uta U juh U Jisu, Uban sa pynkhiah ha kawei ka sngi ia ki jingpang baroh da kaba pynjot ia ka pop, U tyrwa mynta hi ban pyndam noh ia ka jingpynrem ka pop na ka jingim jong phi. Phim donkam ban ap ia ka jingwan arsien ban ioh jinglait na ka jingpynrem, bad na ka jingkhuslai bad ki jingleh bapynduh. U Jisu U long Uba kloi ban ai ha phi ia ka jingsuk ha kane hi ka khyllipmat.
Ha kawei na ki jingiaseng ialap kawei ka thei samla ka sngew ha la ka mynsiem ba la pynkhih ia ka da ka khubor ka gospel ba la ai hangta. Katba ka shah shkor ia ka jingiathuh ia ka jingwan shen U Nongpynim, baroh ki lyngkhot lyngkhai ki la sdang ban iadait ha la ki jaka. Ka jingialap kaba sngewdei. Ka la sngewthuh ba ka la wad shitom ia ka jingieit, ka jingsuk, bad jingkmen sha ki jaka ki bym dei. U dei U Jisu Uba don ia kitei baroh ba ka wad.
Ha ka sngi ka ba bud, ynda u nongialap bad u paralok jong u ki leit jngoh ia ka, ka la iathuh ia ki jingiashem bakthang jong ka jingim ba la pait la pra jong ka. Ka la ngam shaduh sha trai ha ka jingdih kiad, bad ka la die ialade ban ioh pisa ban im. Ynda ka la dep iathuh ia ki jingeh jong ka, ka la iam. "Phi la kren shisha ia nga hi hynnin ka miet."
Hynrei kata ka sur kren kaba la kren ha ka dohnud jong ka ka dei ka sur kren jong U Blei.Bad U kren ha ka da ka bajem jai. Ka la rai kut ban bred lut ha ki kjat U Jisu. Te ka khot ia U Jisu ban wan ha ka jingim jong ka kum U Nongpynim bad U Trai, bad pynskhem ia lade ha ka jingkyrmen ia ka jingwan shen jong U.
Ha ki taiew kiba bud, ka sdang ban shem ba ki jingtieng ba bun jait jong ka bad ka jingbymsngewthikna, kiba la shait pynngop ha ka jingdih, mynta ka la ioh lait, ka la pynlut por ban ia kren bad U Jisu. U sdang ban pyllait ia ka na ka jingpynbor kaba la pynjot ia ka jingim jong ka.
Ka la leh shibun kiei kiei kiba pynlehrain ia ka. Hynrei ka jingaiei bad ka jingmap U Jisu ki kham khlain ban ia ka jinglehrain jong ka. Ka jingiakynduh u nongtuh halor ka diengphna ka la ai jingtngen ia ka. Ha ki kynta ba khatduh bad bakhlem jingkyrmen u phai sha U Nongshah shitom Bahok hajan jong u bad pan, "Ko Jisu, sngewbha kynmaw ia nga ynda me poi ha ka hima jong me." (Loukas 23:42)
Mar kumta hi U Jisu U la jubab da kaba kular ia uta u nongtuh ia ka jaka shong bad u ha ka paradais (dkhot 43). Uta u juh U Jisu Uba la tyrwa sngewsynei ia ka jingmap ha u nongtuh uba la jan iap, mynta U tyrwa ha phi ia ka jingpynim, ka jingmap kaba pura bad ka jingsuk ha ka jingmut. To shem ia kata na ka bynta ia lade mynta ka sngi.
Phi ruh phi lah ban duwai lem bad u nongtuh uba la jan iap: "Ko Jisu, to kynmaw ia nga ynda me poi ha ka hima jong me." Bad U Jisu un jubab, "ngan wan pat, bad phin don lem bad nga ha paradais."
******