Hato U Blei u thaw ia u Soitan?
Phi la ju ioh sngew ha ka jingim jong phi ba ong: “ Ia kaei kaba phim tip kam nym pynmong ia phi.” Hynrei ka jingshisha ka long kaei kaba phim tip kan pynmong ia phi, namar u don uwei u jingthaw uba stad bha uba riam ia ka jingim jong phi jong nga sha ka jingjot. Bad ki buit sian ki jong u la lah ban pynshisha. Kumta shuh shuh, u la pynpra, pynjulor ia long iing long sem, ia ki nongbah bad ia ka pyrthei hi baroh kawei. U long uba shisha bad ki buit jong u ban wan rah jingsniew, ki jinghiar dor ia ka man briew long briew, ki jingsngewsih, jingpait dohnud, ka pop bad ka jingiap ki la nang kiew. Kaba kham shyrkhei ka long ba u thmu ban knieh noh ia ka jingim jong phi. Hynrei ka ktien ui Blei ka pynpaw ia u, ka pyni ia ki buit sian jong u bad kumno ban lait na ka kti jong u.
1. Ka pop ka sdang tynrai na no?
“.. Naba uta u soitan u ju leh pop naduh kaba nyngkong..." 1 Ioannis 3:8. “.. Uta u bsein tymmen ia uba la khot u ksuid bad u soitan..." Jingpynpaw 12:9.
Jubab: U soitan uba la khot u ksuid, u dei u tynrai jong ka pop. Khlem ka ktien U Blei; ka jingsdang jong ka jingsniew ym nym lah ban sngewthuh.
2. Kaei ka kyrteng jong u soitan shwa ba un leh pop? Haei u sah ha kata ka por?
“Nga iohi ba u soitan ba u hap kum ka leilieh na bneng." Loukas 10:18.
“..Me la long halor u lum bakhuiod jong U Blei." Esekiel 28:14.
Jubab: Ka kyrteng jong u ka long Lurshai (Lucifer). Ia u Lucifer ne Lurshai la pynsyriem da ka pharshi kum u syiem ka Tyros ha Isaiah 14 bad ha Esekiel 28.
3. Kaei ka tynrai jong u Lurshai(Lucifer)? Ka kyrdan ba kumno u bat? Kumno ka Baibl ka barai shaphang jong u?
“La pynlong ia me." Esekiel 28:13, 15. “Me la long u Kherub ba la sleh uba kah…." Esekiel 28:14. “.. Me pyndait laha ia ka jingjynma, ba la dap da ka jingstad, bad ba la janai ha ka jingitynnad. Me la long ha Eden ha ka Kper U Blei; u mawkordor baroh u la long ka jingkup jong me, u sardios, u topas, u sapphire, u Emerald, bad u Karbonkl, bad ka ksiar. Ka jingshna ia ki kanjari jong me bad ia ki tangmuri jong me ka la don ha me; ha ka sngi ba la pynlong ia me la tair ia me. Me la long u Kherub ba la sleh uba kah: bad nga la buh ia me, kumta ba me la long halor u lum bakhuid jong U Blei; me la iaid sharum shaneng hapdeng ki maw ba meh ding. Me la long janai ha la ki lynti naduh kata ka sngi ba la pynlong ia me, haduh ba lashem ka sngi ba la pynlong ia me, haduh ba lashem ia ka jingbymhok ha me.” Esekiel 28:12-15.
Jubab: Ia u lurshai (Lucifer) la thaw da U Blei kumba long kiwei de ki angel.(Ephesos 3:9). U Lurshai(Lucifer) u la long u Angel uba kah. Uwei u angel u long ha ka liang ka diang bad uwei p[at ha ka liang ka mon (Salm 99:1). U Lurshai (Lucifer) u la long uwei na kine ki angel kiba khraw. Ka jingitynnad jong u ka long kaba janai bad ka jingthaba jong u ka long kaba itynnad bha.
Esekiel 28:13 ka pyni ba u don ka jingtriem ha ka sap ia put ia tem.
4. Kaei kaba jia ha ka jingim jong u kaba pynlong ia u ban leh pop? Ka pop aiu u la leh?
Jubab: “Ka dohnud jong me ka la meng namar ka jingitynnad jong me, me la pynsniew Ia la ka jingstad na ka daw ka jingpyrnai jong me: nga la bred ia me ha ka khyndew, nga la bud ia me ha khmat ki Syiem, ba kin shu khmih ia me.” Esekiel 28:17. “Te me la ong ha la ka dohnud, Ngan kiew shaneng, ngan kyntiew ia la ka khet haneng ki khlur jong U Blei; bad ngan shong halor u lum ka jingiaseng, ha kiba kut phang shatei; ngan kiew sha lyndet ki lyoh; ngan long kum uba hajrong tam." Isaiah 14:13,14.
Ka Jingsarong, ka jingbhisni, ka jingbymhun, ka jingsngew long halor ne ka jingsngewmeng ka pynlong ia u Lurshai (Lucifer) ban leh pyrshah ia u Blei. U Kwah ban ba un long kum U Blei ban kyntiew khet ia lade halor ki jingthaw baroh jong U Blei bad ban ioh ia ka jingmane.
Note: Balei ka jingmane ka long kaei kaei ka ba kongsan bha bad ka dei ia ngi ba ngin pyrkhat janai bha?
Ka jingmane ka la long kawei ka mat pdeng ba kongsan eh ha ka jingialeh hapdeng U Blei bad u soitan. Ia ki briew la thaw ia ki ba kin dap da ka jingkmen bad ban ioh pura ba dap biang ia ka jingkmen ka dei tang lada ngi pyndem ia lade ha khmat U Blei bad ai ka jingmane sha u.
Wat ia ki angel khuid ki bym shim la hap, ngim dei ban mane. Jingpynpaw 22:8,9. U soitan u kwah ia ka jingmane naduh ka jingsdang ka jingleh pyrshah jong u ia U Blei.
Kumta u la pynpaw ia kane ka jingkwah wat ha ka jingthmu jong u ban pynngop ia U Khrist ha ki jingpynshoi jong u. Matthaios 4:8-11.
Ha ki sngi kiba khatduh, U Blei u khot ia ki briew ban mane biang ia U bad kane ka pynbitar ia u soitan bad u soitan u leh syndon da ka bor ban pynbor ia ki briew ban mane ia u da kaba ki hap ban kohnguh ia ka ain jong u. Jingpynpaw 13:15.
Baroh ki mane iano re iano ne ia kaei re kaei: Ka bor, ka spah, ka jingsngew lade, ka jingsngewbha pyrthei, ka jingbhabriew bad kiwei kiwei de.
U Blei u ong— “Men ym ioh kiwei pat ki blei nalor jong Nga..” Eksodus 20:3
Lada ngim mane bad kohnguh ia U Blei, ngi leh pyrshah ia u. Matthaios 12:30.
Kane ka lah ban pynkyndit ia phi bad ia nga, hynrei kane ka long kaba shisha. Lada ngim don sha ka liang U Blei, kaba mut ngi don sha ka liang u soitan. Kam don pat da kawei pat ka lynti kaba long hapdeng, ka don ar tylli ka lynti kaba khim bad kaba kylluid. Ka lynti U Blei bad ka lynti u soitan. Ka dei ha ngi shimet shimet ba ngin jied.
Lada kano kano ne kaei kaei ka wan hashwa jong U Blei, ngi la pynlong ia kata k aba kham kordor ia U Blei bad ha ka jingbymtip ngi la kum mane bleithaw kaba long ba ka jingmane jong ngi ka leit sha u soitan. Kumta lada ngi buh iano iano nyngkong eh ban ia U Blei , kumta shisha ngi la len ia U Blei bad mane ia kata kaba wan nyngkong eh ha jingim jong ngi.
Ngi dei ban buh ha ngi i aka jingkylli kaba kongsan eh ha jingim jong ngi. Hato nga buh ia u Blei nyngkong eh ha jingim jong nga?
Lada ngim pat leh ia kata, to ngin iai duwai ba U Blei un ai bor ha ngi lyngba U khrist ba ngin buh ia U Blei nyngkong eh ha jingim jong ngi.
5. La jia aiu ha bneng hadien ka jingleh pyrshah u Lurshai (Lucifer)?
Jubab: “Bad ka thma ka la long ha bneng: U Mikhal bad ki angel jong u ki la ialehthma ia uta u iakjakor; te uta u iakjakor ruh bad ki angel jong u ki la ialehthma; hynrei ym shym la jop, lymne iaka jaka jong ki ym shym la shem shuh ha bneng. Te la shop noh arsut ia uta u iakjakor bakhraw, uta u bsein tymmen ia uba la khot u ksuid, u soitan, uba shukor i aka pyrthei baroh kawei; la shop noh arsut ia u sha ka khyndew, bad ia kita ki angel jong u la shop noh arsut lem bad u.” Jingpynpaw 12:7-9.
U Lurshai(Lucifer) u la khring ia kaba lai ka bynta ki angel bad wan rah ia ka jingialeh pyrshah jong u ha bneng.(Jingpynpaw12:7-9). U Blei u hap ban weng noh ia u Lurshai bad ki angel jong u na bneng. Kane ka long ka thma kaba khraw eh. U Lurshai u kwah i aka khet U Blei, da kaba ia lam ia u wat sha kaban pyniap (Ioannis 8:44). Hadien ka jingshah weng noh na bneng, ia u Lurshai la khot u soitan (ka jingmut soitan ka mut ka jingleh pyrshah) bad u ksuid (ka jingmut ksuid ka long u nongmudui uba shukor, uba pynjah burom ia kiwei da kaba shukor da ki kyntien ja-li ja-um ban ioh burom ia lade) bad ia ki angel jong u la khot ki mynsiem bymman lane ki ksuid hi.
6. Haei ka jaka shong jong u soitan? U don jingsngew aiu ia ki jaidbynriew?
“Bad U Trai u la ong ha u soitan, Nangno me la wan? U soitan te u la iathuh ha U Trai, bad u la ong, Na kaba leit shane bad shawei ha ka khyndew, bad na kaba iaid shaneng bad sharum ha ka.” Job2:2.
"Naba kumta to iakmen,koki bneng,bad phi kiba shong ha ki.Kordit ia kata ka khyndew, bad iaka duriaw! Naba uta u ksuid u la leit hiar haphi uba don ka jingbitar bakhraw,nabau tip ba u don tnag khyndiat por.” Jingpynpaw 12:12.
“To phin leh adkar, to phin sharia; naba uta u nongialeh jong phi uba u soitan kum u sing bakyrhuh u iaid kylleng, u da wad khnang ia uno uno ruh ba un ioh nguid tylli.” 1 Petros 5:8
Jubab:Ka jingngeit jong kiba bun hi ka long ba ka jaka shong jong u soitan ka dei ka ding ka dujok, hynrei ka Baibl ka hikai ia ngi ba u soitan u im u sah ha kane ka pyrthei jong ngi ym ha kata ka dujok ding. U Blei u la ai lut ha Adam bad ka im ba kin long kum ki sordar bad ki nongsynshar jong kane ka khyndew (Jenesis 1:26) ha ka por ba ki leh pop, ki duh noh ia la ka hok kum ki nongsynshar jong kane ka khyndew ha ka kti u soitan (Rom 6:16), bad kumta u la long kum u syiem jong kane ka pyrthei (Ioannis 12:31). U soitan u da isih shisha ia ki briew ia kiba la thaw ha ka dur jong U Blei. Te haba um ioh ban leh eiei ia u Blei, te kumta u da ai bih bad pynshoi bad pynshitom ia ki briew kiba long ki khun U Blei. Ka jingkwah jong u ka long ban pynjngai ia ngi naka kti u Blei uba long u tynrai jong ka jingim. Kumta ha ba u leh kaei kaei ia ngi kumta u pynmong ia u Blei.
7. Ha ka por ba U Blei u la thaw ia u Adam bad ka Im, Kaei ka hukum ba u ai ha ki ba kim dei ban leh? Kaei kaba mih na ka jingbymkohnguh jong ki?
“Hynrei na u dieng ka jingim ka jingtip ia kaba bha bad kaba sinew men ym ioh bam na u: naba ha kata ka sngi ba men bam na u, da kaba iap men iap shisha.” Jenesis 2:17.
Jubab:Kim dei ban bam na u dieng ka jingtip ia kaba bha bad kaba sniew. Ka jingmih na ka jingbymkohnguh jong ki ka wan rah ia ka jingiap.”
8. U soitan u pyndonkam iano ban pynshoi ia ka Im? Ka jingshukor ba kumno u shukor ha ka Im?
“Te uta u bsein u la long uba kham sian ia ki mrad baroh ka rynkew ia kiba U Trai uba u Blei u lah thaw. Bad u la ong ha kata ka briew, Shisha, ka long kumta, ba U Blei u la ong, phin ym ioh bam na u dieng baroh ha ka kper? Bad kata ka briew ka la ong ha uta u bsein, Na u soh ki dieng ha ka kper ngi ioh ban bam: hynrei na u soh jong uta u dieng uba hapdeng ka kper, U Blei u la ong, Phim ym ioh bam na u, lymne ktah ia u, ba ioh phin iap noh? Te uta u bsein u la ong ha kata ka briew, Phin ym iap noh shisha:Namar U Blei u tip ba, ha kata ka sngi ba phin bam na u, un sa pynpeit ia ki khmat jong phi, bad ba phin long kum ki blei, kiba tip ia kaba bah bad ia kaba sniew.” Jenesis 3:1-5
Jubab: U soitan u pyndonkam da u bsein ban shukor ia ka Im -à u bsein u long uba kham sian, u jingthaw uba itynnad bha kaba U Blei u la thaw. Don kiba ong ba u bsein u don thapbniang ha kane por ha Eden (Isaiah 14:29; 30:6). Kynmaw ba u bsein um pat par haduh ka jingtim jong U Blei ia u (Jenesis 3:14). Ki jingshukor jong u soitan ki long:
(1) Phin ym iap bad kaba (2) Da kaba bam ia u soh adong phin long kum ki blei (Jenesis 3:5). U soitan uba sdang ia ka jingshukor bad uba long ruh uba thaw nyngkong eh iaka jingshukor (Ioannis 8:44), u la khleh lang ia ka jingshisha bad ka jingshukor bad kumta u la shukor ia ka Im. Ki jingshukor kiba la khleh lang bad ki jingshisha ki long ki jingshukor kiba kthah bha bad kiba khlain bha ban pynlong ia ki nongshah shukor ba kin ngeit. Ka long shisha kaba dei ba kin tip ia kaba sniew hadien ba ki la bam ia u soh adong. Ha ka jingieit U Blei u la bat ia ki ba kin nym tip ia iaka jingtip jong ka jingsngewsih, ka jingpang, ka jingiap bad kumta ter ter. U soitan kumba u leh ha ki por mynta hi, u pynlong ia kaei kaei kaba sinew ia kaban long kaba itynnad bha ha khmat ki briew.U soitan u shukor ban pynhiar kyrdan ia ka jinglong jong U Blei, namar u tip lada ki briew bad ki jingthaw hi baroh lada kin iohi ba U Blei u long ka JINGIEIT, baroh hi ki briew kim nym phai na U Blei uba dap da ka jingieit suda tang lada ki sngewthuh bakla ia kata te kumta kin sa phai lyndet noh na u NONGBUD NONGTHAW.
9. Hato da kaba bam ia iwei I soh ka long shisha kaba sniew? Balei la weng noh ia u Adam bad ka Im na Kper Eden?
“Namar kata, ha ubatip ban leh ia kaba bha, bad ubym leh, ha uta kein long ka pop." Jakob 4:17. “Ka pop ka long ka jingpalat hukum." 1 Ioannis3:4. “Jar uba iaileh ia ka pop u long na u soitan." 1 Ioannis 3:8. “U Trai uba u Blei u la ong ruh, Ha khmih, uta u briew u la wan long kum uwei na ngi hi, kat bantip ia kaba bha bad ia kaba sniew: te mynta, ba ioh un kner ia la ka kti, bad shim ruh na u dieng ka jingim, bad bam, bad im junom ruh de. Namar kata U Trai uba U Blei u la beh noh ia u na ka kper Eden ia kaban rep ia ka khyndew na kaba ;a shim ia u. Kumta kein u la beh noh ia uta u briew; bad u la buh ia ki kherub shaphang mihngi ka kper Eden, bad ia kaba kum ka waitlam baphyrnai, kaba da khih talain baroh sawdong, iakaban sumar ia ki lynti sha uta u dieng ka jingim" Jenesis 3:22, 24.
Jubab: Hooid, da kaba bam ia u soh adong ka dei ka jingbymkohnguh ia u Blei bad ka dei ka pop namar ka jingkyntait ia ka hukum U Blei. Da kaba kyntait bad da kajingbym lah ban kohnguh ia ka hukum U Blei, u Adan bad ka Im ki ia long kumba snoh kti lang bad u soitan ban leh pyrshah ia ka hukum u Blei bad kumta ki wan rah ka jingiakhlad hapdeng jong ki bad U Blei bad dei ka pop ba pyniakhlad ia ki na U Blei. (Isaiah 59:2). U soitan u thmu bad kyrmen ba u Adam bad ka Im kin ba kin leh pop bad bam na u dieng ka jingim bad ban long ki nongpop ki bym iap shuh. Hynrei U Blei u weng noh ia kata shwa ia ban jia kiei kiei ki jingthmu jong u soitan.
10. Kiei ki jingshisha ba khraw ba ka Ktien U Blei ka pynpaw shaphang ki lad u soitan ban pynmong,ban thok,ban pynduh mynsiem bad ban pynjot ia ki briew?
Jubab: U soitan u pyndonkam baroh ki lad ban pynbiej bad ban pynjot ia ki briew . Ki mynsiem bymman kin pynpaw ia lade kum ki riewhok,wat ki riew niam ruh.U soitan un wan paw kum u angel jong ka jingshai u ba khraw bad uba donbor wat ban khot ia ka ding na bneng sha khyndew. Un wan pyrthuh kum U Jisu.Hynrei la maham lypa ia ngi, wat nym ngop ha ki jingpynthame lamler jong u .Ha ka jingwan u Jisu, ka khmat baroh kan iohi ia U (Ka Jingpynpaw 1:7).Un paw ha ki lyoh bad un nym wan iuhkjat ha sla pyrthei. (1 Thessaloni 4:17).
Ka ktien U Blei ka ong ba u soitan u:
Shet Kylla,/Pynshitom bein (Ka Jingpynpaw 12:9,13)
u Pynbakla ia ki jingthoh na ka ktien U Blei (Mathaios 4:5,6)
Ki jingpharep/Jingpyniap(Ka jingpynpaw 22:10 Ioannis 8:44)
Setkut (2 Timothi 2:26 1 Petros 5:8)
Pynhiar thma pyrshah ia ki briew jong U Blei (Ka jingpynpaw 12:17)
Jingshahteh/Jingshukor ba man ka por (Loukas 13:16 Ioannis 13:2,21) Jingshahset(Ka Jingpynpaw 2:10)
Longtrai/pyntroin (Loukas 22:3-5 1 Sha Ki Thessaloni 2:18)
leh ki kam phylla/thok (Ka Jingpynpaw 16:13,14; Ioannis 8:44)
Wanpaw kum u angel jingshai (2 Sha Ki Nong Korinth 11:13-15)
Wanlam ia ki jingpang/pynjynjar (Job 2:7) Ki bymman ki
Pyrthuh kum ki nongialap (2 Shithi sha Ki Nong Korinth 11:13-15)
Kren sniew sha lyndet.Khot ia ka ding na bneng (Ka Jingpynpaw 13:13).
11.Katno ka jingkhlainbor bad ka jingtreikamki buit ban pynshoi jong u soitan?
U khring:u khring shi bynta na ki lai bynta ki angel na bneng-(Ka Jingpynpaw 12:3-9) ; u shukor bad khring ia U Adam bad ka Im (Jenesis 3); ha ka por u Noah ia ka pyrthei baroh kawei lait noh Phra ngut ki lait im na ka um (1 Petros 3:20) . U pynsngewshngain ia kiba la jah (Mathaios 7:21-23). Jan baroh ka pyrthei kan bud ia u (Ka Jingpynpaw 13:3) . Tang khyndiat ki ban ioh jingpynim (Mathaios 7:14; 22:14).
Ka jing I long jop jong u soitan ka i long kaba I khraw haduh katta katta ba ym I lah ban ngeit.U shukor shi bynta na ki lai bynta ki angel.Ha ka por u Noah,tang phra ngut ki lait na ka jing shukor jong u.Shwa ka jingwan arsien jong U Jisu,u soitan un wanpaw kum U Jisu.ki bor shukor jong u ki long kiba khlain bor bad ka lad ba ngin lait na ki,ka long tang ba ngin kyntait ban iohi ia u (Mathaios 24:23-26).Lada phi kyntait ban peit bad ban sngap ia u,U Jisu un iada ia phi na ka jingshah shukor (Ioannis 10:29).
Ki bor pynshoi jong u soitan ha ki sngi ba khatduh kin long kiba khlain bor haduh katta ba jan baroh ka pyrthei kin bud ia u.
12. Lano bad hangno ba u soitan un ioh jingsneng?kaei kata ka jingpynshitom ba un ioh?
“Namar kata,kumba ialum ia kita ki nuit bad ba thang ia ki ha ka ding,kumta kein kan long ha kaba wai noh kane ka pyrthei.U khun u briew un phah noh ia ki angel jong u, bad kin ialum na ka hima jong u ia kiei kiei baroh kiba pynthut, bad ia kita ki ba leh bymman,bad kin bret ia ki ha ka lawar ding: hangta kein yn long kaba lynniar bad kum dait bniat." Mathaios 13:40-42 “Te ia uta u soitan uba shukor ia ki la bred kein sha kata ka pung ka ding bad u kyndok, ha kaba ki don ruhuta u mrad khlaw bad uta u nongiathuhlypa ba lamler: bad yn pynkordit ia ki mynsngi bad mynmiet sha ki bymjukut bymjukut." Ka Jingpynpaw20:10. “Ynda kumta un ong ha kita ruh sha ka diang, to khie leit noh na nga, phi ia kiba la tim, sha ka ding ka bymjukut,ia kaba la buh lypa ia u soitan bad ia ki angel jong u." Mathaios 25:41.
“Da ka jingbun ki jingbymhok jong me, ha ka jingbymhok ka jingkhaii jong me, la leh bein sang ia la ki jaka kyntang; namar kata nga la pynmih ia ka ding napdeng jong me, ka la thang duh ia me, bad la pynkylla dpei ia me halor ka khyndew hakhmat kita baroh kiba ia khmih ia me. Baroh kiba ithuh ia me hapdeng ki kynja bynriew kin lyngngoh ia me: me la kylla long ka jingitieng, bad men ym long shuh lano lano ruh." Esekiel 28:18,19.
Ha kaba wai noh ka pyrthei,ia u soitan yn bred ha ka pung ding, ka ban pynkylla dpei ia u bad ban pynkut syndon ia ia jingdon jong u shyrta.
Ia u soitan yn bred noh ha ka pung ding ha ka ba wai noh ka pyrthei. Ka ding kan bamduh ia u soitan,kan pynkylla dpei ia u, bad kan pynduh syndon shyrta ia ka jingdon jong u ha ka pyrthei. Kane ka ding kan pynjot ruh ia baroh ki nongpop. Ha kane ka jingialeh kaba khatduh, yn ym don u wei ruh uba don ha ka liang U Blei u ban iap bad uba don ha ka liang u soitan u ban lait im.
Kam long kaba lah ban batai ia ka jing sngewsih bad jingkthang ka jong U kpa bad U Khun ia ka jing shah pynjot u soitan.U long u ba jan tam bad ki ban ia uno uno u briew-u paralok ba iaieit bad ba iajan eh. Ban pynjot ia u bad ia ki million ngut kiba bud ia u kan pynmong ia U Kpa bad U Khun palat ban ia ka jinging ban shah thang ha ka ding.
13. Kaei kata ka ban pynduh junomia ka jingeh ne jing jynjarba shyrkhei jong ka pop?Hato ka pop kan mih biang?
“Namar la thoh: Katba nga im, ong U Trai, ka khohsiew baroh kan dem khrup ha nga, bad u thylliej baroh un phla ha U Blei." Rom 14:11. (Peit ruh –Sha Ki Philipi2:10,11; Isaiah 45:23.) “ Phi pun aiu pyrshah ia U Trai? U te un pynkut noh khoit: ka jingjynjar kan ym mih arsien." Nahum 1:9.
Ki artylli ki jingjia ba kongsan ban pynduh ia ka pop:
Ka ba nyngkong, baroh ki briew ha bneng bad ha khyndew, kynthup ia u soitan bad ki angel jong u, da ka mon lajong hi kin dem khohsiew bad kin phla pyrthei ba U Blei U long uba shisha, u bym shah shilliang, bad u ba hok. Yn ym don ki jingkylli ban dang sah khlem jubab. Baroh ki nongpop kin kubur ba ki la jah namar ba ki kyntait ban pdiang ia ka jingieid U Blei bad ka jing pynim ei.Kin mynjur ruh ba ka jing bishar ka dawa ba kin iap. Baroh kin phla ba ki dei hok ban ioh ka jingiap bymjukut.
Kaba ar, Yn sait khuid noh ia ka pop ha ka pyrthei da ka jing pynjot ba khatduh jong ka pop, ki nongpop, u soitan, bad ki angel jong u.U Blei U la tikna ha kane ka por: Ka pop kan nym mih shuh ha ka pyrthei jong U Blei.
Ki briew jong U Blei ha bneng kin lait na ka pop shyrta.Ka pop kan ym mih shuh.
14. Mano ba rat diengkhong shi syndonia ka pop na sla pyrthei?
“Jar u ba iai leh ia ka pop u long na u soitan: naba uta u soitan u ju leh pop naduh ka ba mynnyngkong. Ia kane khnang la pynpaw ia U Khun U Blei, ba un ioh pynjot noh ia ki jingleh jong uta u soitan." 1 Ioannis 3:8 "Namarkata haba kita ki khun ki long ki nongioh bynta na ka doh bad ka snam, ma u hi ruh da ka juh ka rukom u la shim bynta na ki juh: ba da ka jingiap un ioh pynduh noh ia uta u ba don ka bor ka jingpyniap, uta u long u soitan kein." Sha ki Hebru 2:14.
Lyngba ka jingim jong U,ka jing iap, bad ka jingmihpat,U Jisu U la pynlong ia ka jing ratdiengkhong ia ka pop.
U Jisu U la pynlong ia ka jingpynjot noh ia ka pop.
15. Kumno U BleiUba U KpaU sngew shaphang ki briew?
“Namar uta U Kpa hi U ieid iaphi, naba phi phi la ieit ianga bad phi la ngeitba nganga la mih noh na U Blei." Ioannis 16:27. (Peit ruh Ioannis 3:16; 17:22, 23.)
U Kpa U ieid ia ki briew haduh katta katta kumba ieid U Khun.Ki jingthmu jong U Jisu ha ka jingim ka l0ng ban pynpaw ia ka jinglong U Kpa jong U ha ka rukom im jong U khnang ba ki briew kin tip katno U Kpa U ieit ia ki. (Ioannis 5:19) .
U Blei, U kpa jong ngi,U ieid ia ngi palat ban iauno uno u kpa ha pyrthei un ieid iala ki khun.U Blei um lah ap ban pdiang iangi sha ka hima ba thymmai jong U.
U soitan u pynsngewthuh bakla shaphang U Kpa: U soitan u pynsngewthuh bakla ia U Kpa kum u bym don jingsngew, u ba Pyrkhing, U ba jngai na ngi ( ki jinglong jong u soitan hi). U nud ruh ban pyniaryngkat dor ia ka jingsniew jong u, u kynnoh ba ki kam ba shyrkhei ban pynjot jong u kum “ki kam U Blei”. U Jisu U la wan ban weng noh ia ki kam u soitan ha ka kyrteng U Kpa jong U bad ban pynshai hangi ba U kpa jong ngi U ba ha bneng U ieid iangi palat ban ba ka kmie ka ieid ia la I khun lajong. (Isaiah 49:15) . Ki mat ba kongsan tam jong U Jisu ki long ka jingiaishah,ka jingjem mynsiem bad ka jingmap ei jong U Blei.
U Kpa Um lah ban ap shuh :- Khnang ban pynkmen ia ki briew, U Kpa jong ngi uba ha bneng U la pynkhreh ka iieng shong neh kaba khraw na ka bynta jong ki. Ki jing pyrkhat jong ngi kim iahap bad ka jing ap jong U! Um lah ap ban pdiang ia ki briew jong U ha ka sngi ba kin wanphai ba kmen.To ngin ia pynkhreh ia lade. Ka jing niew ka la dep sdang.
16.Nga sngewkmen eh ban tip ba U Blei U Kpa U ieid ianga kum ba ieid U Jisu.
Jubab: Phi hap ban kut jingmut hapoh ka dohnud ban ngeit bad ban kohnguh ia U Blei bad U Jisu.
AMEN
******