U Adam Katkum Ka Jingthmu Bymjukut, Bynta-2
Ha ka bynta kaba nyngkong, ngi la pule ba ki jingkyrkhu baroh kiba ki jingthaw ki la ïohpdiang ki long “katba kum ka jingthmu bymjukut ïa kaba (U Blei) u la thmu ha U Khrist Jisu uba U Trai jong ngi.” (Ephesos 3:11).
Ka jingthmu bymjukut jong U Blei ha kaba ïadei bad ki jingthaw baroh ka long kane, “HA U KHRIST BAROH KA JINGPYNLONG KA LONG KABA LA KYRKHU”. Katkum ka jingthew salonsar, ki jingthaw baroh kiba don jingim bad kibym don jingim ki long katkum ka jingthmu bymjukut. Baroh ki shem ïa ka jingim jong ki, ka jingneh jong ki, ka jingkmen jong ki lyngba U Khrist. Ki mrad ki mreng, ki dieng ki siej, ka sngi, u bnai bad ki khlur kim shym la long hi. Ka Baibl ka ong, “Da u (Khrist) la long kiei kiei baroh; bad khlem ma u ym shym la long kaei kaei ruh kaba la long.” (Ioannis 1:3).
Hynrei ka don kawei ka bynta ha kane ka jingthmu bymjukut jong U Blei, kaba ngim lah ban thew lut ïa baroh ki jingthaw, hynrei tang ïa ki jingthaw bastad kiba ngi lah ban khot kum ki khun U Blei, bad kata ka long– ka jingshong sah jong U Blei ha ki. Naduh ki angel bakhraw haduh ki briew, U Blei u la thaw ïa ki ban long “ka templ jong U”. (1 Korinth 3:16; 6:19, 2 Korinth 6:16). Haba kren shaphang kane ka bynta ngim lah ban ong ba U Blei u shong ha ki dieng ki siej ne ha ki maw ne ha ka mariang ne ha ki mrad. Kawei ka sakhi kaba biang eh ba U Blei um shongsah ha baroh ki jingthaw dei ka jingbym shongsah jong U ha ki nongpop ne kiba kynja-doh (Rom 8:9). U Blei uba khuid um ju shong ha ka temple kaba tngit, hynrei tang ha ka temple kaba khuid (1 Korinth 3:16). Hooid U Blei u dap bad u don ha ki jaka baroh, hynrei ngi sngewskhem katkum ka jingthoh bakhuid ba U Blei u iaisah bad u shongsah tang ha ki jingthaw bastad jong U, ha kita kiba U la thaw ban long syriem katba kum ka dur jong U.
(Sngewbha buh jingkynmaw: Ki don arngut ki longrynieng lane ki kynja-blei kiba ïapher – U Blei U Kpa bad U Jisu Khrist U Khun. Bad haba ngi kren shaphang ka templ jong U Blei, ngim shym la klet ïa U Khrist. U Khrist hi u long uba kongsan kum U Blei. U Blei bad U Khrist ki ïalong kawei. Hangta ba don U Blei hangta U Khrist ruh un don bad hangta ba don U Khrist hangta U Blei ruh un don. (Ioannis 17, Ioannis 14:23, Rom 8:9,10).
Mynta ngin ïa peit noh sa ïa ki mat jong kane ka bynta kaba ar, kiba long kine harum: Ka jingskhem jong ka jingthmu bymjukut, ka jingbakla u Adam, ka jingduh jingmyntoi jong u na ka jingthmu bymjukut, kumno ka ktah ïa ngi, bad kumno U Blei ka jingieit u kyllie pat ïa u briew na ka jinglongpoh ba la wallam da ka pop. Baroh kine ki mat ki don ka jingbatai kaba kham jrong, ngi sngewbha eh ban ïasam bad phi kham jylliew ha kawei pat ka por lada ka long ka mon U Blei hynrei mynta ngin shu kren kyllum lang ïa ki baroh hajuh ha kane ka artikel. Bad nga ngeit ba kane ka artikel kan ym pynjot ne pyntlot ïa ka khubor babha jong ka jingieit bah U Blei.
JINGKYRKHU LA SHEM TANG HA KA JINGTHMU BYMJUKUT
Ngi la pule ha ka bynta banyngkong ba: mynba U Blei u thaw ïa U Adam-
U long “U Khun jong U Blei”.
U long “shitylli bad U Blei”.
U long ha “ka dur jong U Blei - uba bha, uba ieit, uba janai, uba hok, uba khuid”.
U long uba “hok khlem ka hukum”.
La pynkup bad pynphong pansngiat ïa ki da “ka burom bad da ka jingpyndonburom”.
La ai ha u ban “synshar halor kiei kiei baroh kiba don ha ka pyrthei”.
U don ïa “ka jingim bymjukut”.
U long “ka templ U Blei – U Khrist u im ha u”.
Kine ki jingkyrkhu baroh kiba u Adam u don ki shong ha U Khrist. Te katba u Adam u sumar bad pynneh ïa ka jingïadei jong u bad U Khrist, baroh kiba u la ïohpdiang kin iai long ki jong u. Ka long kumjuh ïa ki jingthaw baroh, kynthup ïa ki angel. Baroh ki jingkyrkhu kim lah ban long shabar U Khrist. Kumba U Khrist hi u la ong shisien, “To iaineh ha nga, bad ma nga ha phi. Kumba ka tnat kam lah ban seisoh na lade hi, lymda ka iaineh ha u dieng soh wain; kumta ma phi ruh, lymda phi iaineh ha nga. Ma nga long u dieng sohwain, ma phi ki tnat. Uta uba iaineh ha nga, bad ma nga ha u, uta u seisoh shibun; naba khlem ma nga phim lah leh ei ei ruh em.” (Ioannis 15:4-5).
Ban ïoh ïa ka jingim bymjukut, ka jinglong khuid, bad ka jinglong kawei bad U Blei, U Adam um shym la donkam ban leh eiei, ne ban thied ïa ki. U Blei um shym la buh kano kano ka kyndon hashuwa jong u. U Blei u la ai ha u Adam kum ki jingaisngewbha. Baroh ka long da ka jingaiei U Blei.
Hynrei ka don kawei ka kyndon kaba U Blei u buh, bad ha kaba ïadei bad kane nga kwah ïa phi ban pynleit jingmut bha ïoh phi kum sngewthuh bakla. Ka dei shaphang ka kyndon jong ka jingngeit bad jingkohnguh. Bad kane ka kyndon ka long, ba lada U Adam u iaineh bad U Blei, kiei kiei baroh kiba u la ïoh na U Blei, kin iailong ki jong U. Hynrei lada um iaineh bad U Blei, kiei kiei baroh kiba u la ïoh na U Blei, kin um long shuh ki jong u hynrei un duh noh. Bad kane ka long kata ka jingiaineh jong ki lada ki ngeit bad kohnguh ïa U Blei. Ka jingkmen bymjukut jong U Adam bad ka Im ka shong ha ka jingiaineh jong ki ha ka jingïadei jong ki bad U Khrist. Shaphang kane ka kyndon ngi shem ha Jenesis 2:16,17, ngi pule:
Jenesis 2:16,17 (16)Bad U Trai uba U Blei u la hukum ïa uta u briew, u da ong, Na u dieng baroh ha ka kper, da kaba bam me lah ban bam ei: (17)hynrei na u dieng ka jingtip ïa kaba bha bad ïa kaba sniew men ym ïoh bam na u: naba ha kata ka sngi ba men bam na u, da kaba ïap men ïap shisha.
Balei sha, lada u Adam un bam na u dieng adong un ïap noh? Kane ka la long kawei na ki jingkylli kaba eh ha ka jingmut jingpyrkhat jong ki briew – ki Khristan bad ki bym long khristan.
Kam don kano kano ka bih basniew ha u soh uba mih na u dieng ka jingtip ïa kaba bha bad kaba sniew. Hynrei lada u Adam un bam un sa ïap namar ba ka jingbymkohnguh lane ka pop kan pynïakhlad ïa u na ka jingim U Blei (Isaiah 59:2), kan pynjot ïa ka dur U Blei ha u bad kan pynjot ïa ka jingïadei jong u bad U Blei. Bad kane kan pynpulom ruh ïa ka jingthmu bymjukut jong U Blei ha u briew namar ka pop kan pynïakhlad ïa u na U Tynrai jong ka jingim bymjukut. U Khrist bad U Blei kim banse ban mih noh na u Adam, lada u Adam um sngewbha ban pdiang ïa ki. Bad namar ba ka jingim ka shong tang ha U Khrist, kumta ka jingïakhlad na U kan wanrah ïa ka jingïap.
Bad kane ka jingmih namar ka pop ka lah ban ktah jur haduh katta katta ba ki symbai jong u Adam ruh kin sa shah ktah lang, lada um ngeit bad um kohnguh shuh ïa U Blei. Ïa u Adam hi la thung ruh ban long u kpa bad u nongmihkhmat jong ki briew baroh. U Blei u la ong kumne ha u Adam bad ka Im, “To da nangkha, bad to da nangroi, bad to da pyndap ïa ka khyndew.” (Jenesis 1:28).
U Blei u la thaw tang kawei ka jingim- ha u Adam, bad U thmu ba lyngba jong u Adam ka jingim kan hiar pateng ha ki khun bynriew baroh lyngba ka ain tynrai jong ka jinghiar pateng. Namarkata haba ngi ong Adam, ngim kren shuh tang shaphang uwei u briew hynrei ïa ka jaidbynriew hi baroh kawei. Ka Baibl ka ïathuh ha ngi ba katba kum ka doh bad ka snam ngi baroh ngi long “ha U Adam”. (1 Korinth 15:22).
Te haba U Blei u tynjuh ïa U Adam, U Blei u tynjuh ïa ka jaid bynriew hi baroh kawei. Watla ngim pat don ha kato ka por ruh, ka jingjop bad jingrem jong ka jaidbynriew baroh kawei ka shong ha ka jingrai u Adam. U Adam u long “U Kpa bad U Nongmihkhmat” jong ka jaid bynriew.
Lada um bam ïa u soh u dieng adong ngi baroh ngin mat ïa ka jingkyrkhu. (Ngin ïoh pateng lyngba u Adam ïa ka jingim bymjukut, ka jingbha, ka jinglong kawei bad U Blei.) Hynrei lada un bam ïa u soh u dieng adong, ngi baroh ngin mat ïa ka jingtim. (Ngin mat ïa ka jingïakhlad na U Blei, ngin ïoh ka jingmut jingpyrkhat basniew, ka jingïap kan synshar ha ngi). Lada u kohnguh ngin ïoh jingmyntoi, lada um kohnuh ngin duh jingmyntoi.
U Soitan u la tip ïa kane, namar ba u la dep mad ïa kajuh ka jingïashem ha bneng. Bad u kwah ban pynhap lang ïa kiwei. Peit u ong kumno ha ka Im, “Te uta u bsein u la ong ha kata ka briew, Phin ym ïap noh shisha. Namar U Blei u tip ba, ha kata ka sngi ba phin bam na u, un sa pynpeit ïa ki khmat jong phi, bad ba phin long kum ki blei, kiba tip ïa kaba bha bad kaba sniew.” (Jenesis 3:4,5).
Ha kiwei pat ki kyntien, u soitan u ong ha ka im ba ka jingïakhlad na U Blei kan ym wanrah ïa ka jingïap; ïa ka jingim lah ban shem hawei de. Kane ka long ka jingïaleh pyrshah direk ïa ka jingthmu bymjukut U Blei, kaba long- Ha u Khrist baroh ka jingpynlong ka long kaba la kyrkhu.
Baroh ngi tip ïa kane ka jingjia basngewsih ba u Adam bad ka Im ki la hap ha ka jingpynshoi jong u soitan, bad ha ka jaka ban jied ban kohnguh ïa U Blei bad ban pynneh ïa ka jingïadei jong ki bad U, ki la jied ban nym kohnguh bad ban pynïakhlad ïalade na U Blei.
Bad haba u Adam u hap, baroh ka jaidbynriew ka hap ha ka pop, bad ka la duh ei noh ïa ka burom U Blei namar baroh ngi la leh pop ha u Adam, mynba u bam ïa u soh adong. Bad ka jingmih bashyrkhei eh ka long ka jingïap ha ka mynsiem, ngi baroh ngi la ïap ha khmat U Blei. Ka Baibl ka ïathuh, ba “ha u Adam baroh ki ïap noh.” (1 Korinth 15:22). Ka jinglong khwan lane ka lade ka la shim noh ïa ka jaka jong U Khrist. Kaei kaba u Adam u la duh noh hadien ka jinghap – ka dei ïa U Khrist. O katno ka long ka jingduh kaba khraw! Bad ka dei namar kane ka jingsngewthylli lane ka jingbym don ïa U Khrist, kaba pynlong ïa ngi ban leh pop mynta.
Ko ki nongpule baieit, lada phi sngewsih bad sngewduh jingkyrmen ban tip ïa kane ka jingshisha, nga kwah ban ong ei ei ïa phi, ba U Blei u ieit bad u sngewtynnad ïa phi, bad u don ka khubor babha ban ïathuh ha phi. Hato phi kloi ban sngap? Nga kyrpad ïa phi, sngewbha pule ha ban da kut ba phin tip ïa kaei kaba U Blei u la leh na ka bynta jong phi shimet shimet.
KA JINGBAKLA U ADAM BAD KA JINGSKHEM KA JINGTHMU BYMJUKUT U BLEI
Ka jinghap jong u Adam kam dei namar ba ka don jingduna ha ka jingthmu bymjukut jong U Blei. Ngi la ïa peit ha ka bynta banyngkong, ba ka jingthmu U Blei ka long kaba janai bad kam don jingduna ha ka. Ka long kabym lah ban kylla, kam long kaba tang shipor, hynrei kaba bymjukut, naba U Blei u sngewbha ba kan iai long kumta sha ki bymjukut – junom la junom ba ki jingthaw jong u kin shem ïa ka jingim bad ka jingkyrkhu ha U Khrist.
Ka dei namar ka jingbymngeit jong u Adam ba ka jingthmu bymjukut kam lah ban trei kam shuh ha u. Lyngba ka jingpynshoi bad jingshukor jong u soitan, u Adam u la duh jingngeit bad jingshaniah ha ka jingieit bah U Blei, bad u la pynïakhlad ïalade na U Tynrai jong ka jingim bad jingkyrkhu. (Pule Jenesis 3). U la poi ban ngeit ïa kaei kaei kabym lah long, ïa kaei kaei kaba pyrshah ïa ka jingthmu bymjukut U Blei, u la poi ban ngeit ba ka jingim bad ka jingkmen lah ban shem shabar U Khrist.
Bad hadien ba u Adam u bam ïa u soh adong, ka jingsngewthylli bad jingsngew lyngkhuid ka wan ha u. Hato phim shem ba ka long kumta ha phi? Lyngba ki yrta bah ngi la pyrshang ban pyndap ïa kata ka jaka kaba thylli hapoh jong ngi da kiei kiei jong kane ka pyrthei, katto katne na ngi ngi la phai sha ka spah, katto katne na ngi ngi la phai sha ki kam awria, sha ki jingsngewbha ba bun jait kum ki jinglehkai ba pynbyrnia, ki jingleit party, ki jingïadih ïabam sngewbha, ki jingleit shang pyrthei, khnang ban ïoh ïa kata ka jingsuk bad ka jingsngewhun, ngi la leh lut ïa ki jait pop baroh ban pynhun ïa ka jingkwah jong ka doh, pynban na ka por sha ka por wat hadien ba ngi la ïoh lut ïa ki jingkwah jong ka doh baroh, ngi iai sakhi hi ba kata ka jingthylli bad ka jingsngewrem ka dang sah ha ngi. Nga ngeit ba wat lada yn ai por biang ïa u briew sa shiphew hajar snem ruh, un ym lah ban pyndap ïa kane ka jaka bathylli da kiei kiei jong kane ka pyrthei. Mano heit uba lah ban dap ha phi, lymda dei Uta ïa uba u Adam u la duh noh?
KA JINGPYNÏOH PAT ÏA KA JINGIM
Da ka jingbymkohnguh u Adam u la kut noh ban long ka templ U Blei. Te kumta ka jingthmu jong ka jingpynim kaba la dawa ïa ka jingkheinduh jong U Blei ïa la U Khun ba la kha marwei ka long ban tei biang ïa ka templ ha u briew, khnang ba U Blei lyngba U Khrist un lah ban im biang ha ki briew. Hato phim kwah mo ban tip shuh shuh shaphang kane ka khubor babha?
Wat hapdeng kane ka jingtim ba la wallam da ka pop, ka jingieit U Blei kam shym la rem. Ka Baibl ka ong, "Ha kane la pynpaw shynna ïa ka jingieit U Blei ha ngi, ba U Blei u la phah ïa la U Khun ba la kha marwei sha kane ka pyrthei, ba ngin ïoh im da u.” (1 Ioannis 4:9).
Wat hadien ka jinghap, U Blei u dang ieit hi kumjuh ïa u Adam, u ieit ïa ngi ruh. U tip ba ngim shym la jied ban long kumne ha u Adam. Te u phah ïa la ‘U Khun ba la kha marwei’, ban wan long briew, ban ‘pynrem ïa ka pop ha ka doh’, ban ‘ïap ïa ka pop’ bad ban ‘im pat’. Ban ai ha ngi ïa ‘ka jingim bymjukut’. (Ioannis 3:16; Rom 8:3; Jingpynpaw 1:18). U la wan ban pyndap pat ïa ka jaka ba thylli, kata kamut, ban im pat ha ki briew.
Ka jingpynim hi ka dei ka jingpynïoh pat ïa kaei kaba u Adam u la duh. U Blei bymjukut um donkam ban thaw sa kawei pat ka jingthmu lane ka plan kaba ar na ka bynta ka jingpynim ïa u briew. Katba im U Trai, kane ka jingthmu bymjukut jong U kan iai long barabor kaba janai. U Blei uba janai baroh u lah ban khyllie pat ïa u briew da kane kajuh hi ka jingthmu. U Paul u ong,
Ephesos 3:11,16-19 (11) Katba kum ka jingthmu bymjukut, ïa kaba u la thmu ha U Khrist Jisu uba U Trai jong ngi; (16) ba un ai ha phi, katba kum kata ka jingkynrei spah ka burom jong u, ba yn pynkhlain ïa phi bad ka bor da U Mynsiem jong u ha u briew bashapoh; (17) ba U Khrist un shong da ka jingngeit ha ki dohnud jong phi; (18) khnang ba, haba la pynsuh thied bad ba la pynshong nongrim ha ka jingieit, phin long kiba khlain ban shemphang lem bad ki riewkhuid baroh, kaei ka jingjlan, bad ka lynter, bad ka jingjylliew, bad ka jingjrong: (19) bad ban tip ïa ka jingieit U Khrist kaba palat eh ïa ki jingtip, ba kumta yn ïoh pyndap ïa phi shaduh ka jingdap U Blei baroh.
Ko ki nongpule baieit, Ym don mano mano lane kaei kaei kaba lah ban pyndap ïa ka jaka bathylli ha ka dohnud jong phi, dei tang U Khrist marwei uba lah, namar ka la ju long ka kamra jong u, kaba u soitan u la knieh naduh ka jinghap U Adam. Bad lada mynta ngi pyndem rit ïalade bad ngin pdiang noh ïa U Khrist ha ka dohnud, kynmaw ba U Blei un wan hapoh jong phi lem bad U Khun jong U. Ka Baibl ka ïathuh ha ngi ba U Blei lyngba U Khrist u la lah ban long lem bad ngi. Ïa ngi la ïathuh na ka por sha ka por ba ngi dei ban ngeit ha “ka kyrteng jong U Khun U Blei” khnang ba ngin ïoh jingpynim, bad kawei ka kyrteng ba sngewtynnad jong U Jisu ka long, “EMMANUEL, kaba long, haba la batai - U BLEI LEM BAD NGI.” (1 Ioannis 5:13, Mathaios 1:23).
Kawei ka nongthoh kot Khristan kaba nga sngewtynnad, ka la ong kumne ha kaba ïadei bad kane ka subjek: “Naduh ki yrta bymjukut ka la long ka jingthmu jong U Blei ba baroh ki jingthaw, naduh ki angel seraph baphyrnai bad bakhuid haduh u briew, ki dei ban long ka templ ha kaba U Nongthaw U shongsah. Namar ka pop, ka jaid bynriew ka sangeh noh ban long ka templ na ka bynta U Blei. Ba la pyndum bad pyntngit da ka jingsniew, ka dohnud u briew kam pynpaw shuh ïa ka burom jong Uta Uba kynja Blei. Hynrei da ka jingwan long briew jong U Khun U Blei, ïa ka jingthmu jong ka bneng la pyndep. U Blei u shongsah ha ka jinglong briew, bad lyngba ka jingaiei kaba pynim ka dohnud jong u briew ka kylla long biang ka templ jong U. U Blei u la thmu ba ka templ ha Jerusalem kan iai long ka sakhi ïa ka jingkut badonburom kaba la plie na ka bynta kawei-pa-kawei ka mynsiem. Hynrei ki Jiw kim shym la sngewthuh ïa ka jingmut jong kata ka jingtei ïa kaba ki la niewkor da ka jingsarong. Kim shym la pyndem ïa lade kum ki templ bakhuid na ka bynta U Mynsiem jong U Blei. Ki phyllaw jong ka templ ha Jerusalem, kiba la pyndap da ka jingkhynwin bad ki kam khaii bymkhuid, ki mihpli shisha eh ïa ka templ jong ka dohnud, kaba la pyntngit da ka jingdon jong ka jingkwah-brai ba-awria bad ki jingpyrkhat bymkhuid. Ha ka jingpynkhuid ïa ka templ na ki nongïadie-ïathied jong ka pyrthei, U Jisu U la pynbna ïa ka kam jong U ban pynkhuid ïa ka dohnud na ka jingpyntngit jong ka pop, --- na ki jingthrang bakynja pyrthei, ki jingkwahbrai bakhwan-lade, ki jingmlien basniew, kiba pynpyut plak ïa ka mynsiem.” (Desire of Ages, p.161).
Naduh 2000 snem mynshuwa, U Jisu Khrist u la dep jop ïa u soitan, hato phi kloi ban wan sha U ban pdiang ïa U hapoh jong phi bad ban pynkhuid ïa phi na ka jingbymhok baroh? Kynmaw ba Um ju rung da ka bor, U Jisu u ong:
Jingpynpaw 3:20 “Ha khmih, nga ieng ha ka jingkhang bad nga tied: lada uno uno ruh un ïohsngew ïa ka ktien jong nga, bad un plie ïa kata ka jingkhang, ngan wan rung hapoh ha u, bad ngan ïakhawai miet lem bad u, bad ma u lem bad nga.”
Phi ïohi ko ki hynmen bad ki para jong nga, U Jisu Khrist u ieit ïa phi, u kwah ban im ha phi namar u sngewbha ban ïohi ba phin kmen ha khmat jong u barabor. U Khrist u kwah ban ai ha phi ïa hok jong U bad ban sait khuid noh ïa ki pop jong phi baroh kiba mynshuwa. Lada U Khrist um long uba kloi ban map ei ïa phi, hato phi tharai un jin da la wan ban kren hapoh ka dohnud jong phi na ka por sha ka por?
To ngin ym ïa kyntait ïa kane ka jingtyrwa U Khrist, haba u tyrwa ïa phi da la ka jong ka jingim bakordor. Ah ba ngin da sngewthuh ïa ka jingkordor jong U Jisu! Ka jingpynslem bad ka jingniew sting kan wanrah ïa ka jingma kaba ngim lah ban batai. U Paul u ong, “Mynta keiñ” u khlem ong lashai ne lashisngi, hynrei “mynta keiñ ka long ka sngi ka jingpynim.” (2 Kornth 6:2). Shuh shuh u Paul u maham ïa ngi, kumne:
1 Korinth 3:16,17 (16) Phi phim tip ba phi long ka iingshong (templ) U Blei, bad ba U Mynsiem U Blei u shong sah hapoh jong phi? (17) Te lada uno uno ruh u pynjot ïa kata ka iingshong U Blei, ïa uta keiñ U Blei un sa pynjot: namar kata ka iingshong U Blei ka long kaba khuid, kaba long ma phi keiñ.
Hato kane kam long ka jingmaham kaba shyrkhei ïa phi? Ngi pynjot ïa ka templ jong U Blei ym tang da ki jingbam basniew bad da ki kam awria hynrei da kaba ai jaka ïa ka lade bad ïa u soitan ban im ha ka jaka jong U Khrist. Hato phin kyntait noh ïa U Jisu tang na ka bynta ka jingsngewbha ba tang shipor? Hato phin long kum u Iso uba la die noh ïa la ka jinglong hynmen tang na ka bynta shibul ka syrwa? Hato phi mon ban iehnoh ïa ki pop jong phi na ka bynta U Khrist uba la ieit ïa phi kat haduh ban ïap na ka bynta jong phi?
Mynta nga kyrpad jur ïa phi; To kylla-kaba-mut bad to pdiang noh ïa U Khrist mynta mynta hi, bad khot ïa U ban wan ha dohnud jong phi bad ban pyndep ïa ka jingthmu bymjukut jong U Blei. Ynda kumta phin sa mat ïa ka jingkmen bad ka jingsuk kaba phi la wad baroh shi katta, bad phin sa shem ba wat ki jingjynjar bad ki jingshitom kin ym lah ban pynkhih ïa phi bad ban pynïakhlad ïa phi na ka jingieit bah jong U Blei. Ka long kaba shisha ba kam don da kawei pat ka lynti ba phi lah ban kmen janai lait na U Jisu Khrist.
[Phi lah ruh ban peit da ka video lyngba ka youtube channel jong ngi: U Adam katkum ka jingthmu bymjukut https://youtu.be/070FbHGC0vM ]
******