Balei ka Jingpyniasuk da ka Jingiap?
“Namar lada, mynba ngi la long ki ngonshun, la pynïasuk noh ïa ngi bad U Blei da ka jingïap U Khun jong U, te khamtam shibun, haba la pynïasuk ïa ngi, yn pynim ïa ngi da ka jingim jong U.” (Rom 5:10)
Kawei na ki jingsngewthuh ba nyngkong tam eh kaba kiba bun ki la ban ïoh kem na ka dkhot, Ki Rom 5:10, ka long ba U Blei U long Uba thrang snam, Uba shem sngewbha ha ka jingïap bad ka jingphlei snam namar kat kum ki kyntien jong kane ka dkhot ka pynpaw, ka dei ka jingïap ba itieng bad baishyrkhei jong U Khrist kaba long ka daw ba ïa ki nongpop la pynïasuk sha U Blei. Ïa kane ka jingsngewthuh lah ban pyndonkam da kiba bun ki briew kiba la don lypa ïa ka jingsngewthuh ba U Blei U long Uba domriang bad Uba lah ban shah pynsuk bad pynhun tang da pyndonkam ïa ki lad ki lynti ban pynshitom beiñ ïa kiwei. Da shisha, ka jingsngewthuh ba ka jingïap bad ka jingphlei snam kum ki lynti ban pynhun ïa U Blei kim ïa hap bad ka jingsngewthuh ba U Blei U long ka jingieit. Te, kaei ka jingmut bashisha jong katei ka dkhot haneng? Shaei ba ka Baibl ka pyrshang ban kdew ïa ngi haba ka ong ba ïa ki nongpop la pynïasuk ïa ki bad U Blei da ka jingïap U Khun jong U? Khnang ba ngi lah ban jubab ïa kine ki jingkylli bad ban kham sngewthuh kaei shisha ba ka ktien U Blei ka ong, ngi donkam ban sngewthuh ïa ka thymmei kaba donbynta ha ka jinghap noh jong u briew bad kumn ba kane ka thymmei pat ka ktah ïa ka thymmei kaba don bynta ha ka jingthmu jong ka jingsiewspah.
Ngi dei ban buh jingkynmaw ba ka pop ka wan na ka daw ba u briew u la don ïa kawei pat ka jingsngewthuh shaphang U Blei, kaba pher na ka jingsngewthuh ba u la ju don naduh mynnyngkong eh mynba ïa u la thaw. Ka jingthohbria ïa ka jinglong U Blei da U Soitan kam shym la pynkylla tang ïa ka rukom ïaid rukom ïeng jong U Adam bad Ka Im, hynrei ka la ktah jur bha haduh katta katta ba ka jinglong jong ki ruh ka lah kylla sha kata kaba ki la ñiew ïa U Blei kum u nongshun bad kim shym la lah satia ban pyndem ïa la ki jingmut jingpyrkhat hapoh ka ka mon bad ka jingthmu U Blei.
“Namar kata ka jingïaimut brai jong ka doh ka long ka jingshun ïa U Blei: namar kam pynhapoh ïa lade ïa ka hukum U Blei, lymne shisha kam lah keiñ.” (Rom 8:7)
Kane ka jingïaimut brai ba U Adam bad Ka Im ki la don hadien ba ki la hap ha ka pop bad ba u khun bynriew hi ruh u la ïoh, ka la paw ha ka rukom ba ki la burieh ïa lade na U Blei mynba U la wan sha ka kper ban ïit ïa ki. Ka jingleh jong ki ka long pynban kaba i khyllah haba ngi sngewthuh ïa ka jingshisha ba, shuwa ba ka pop ka la wan bsuh ha ka jingim jong ki, ki la sngewbha eh ban pynlut por bad U Blei. Kaei ba kane ka ong ha ngi ka long ba u briew u la kylla namar ka pop. Um sngewtynnad shuh ïa ka jingïalang bad la U Nongbuh Nongthaw bad u briew ruh um lah ban leit phai biang sha U Blei namar ka jinglong ka jingïaimut brai kaba mynta ba u la don, ka la khang lad ïa u ban leh ïa kane. Hynrei U Blei U khlem shym la kylla namar kaei kaba u briew u la leh. Wat la u briew u la jied ban ym kohnguh ïa U, U la wan ban ïit ïa la ki khun kumba ju long ka dustur jong U. Hynrei katba U Blei U la nang wan kham jan sha ki, katta ki nang ïai phet na U. Kane ka paw ba dei u briew uba donkam ban pynpra ïa ka jingïakhlad kaba don hapdeng jong u bad U Blei, bad u dei ban lah ban leh ïa kane ha ka jinglong bapop bad ka jinglong baïaimut brai jong u. Ha kiwei pat ki kyntien, dei ban don mano re mano napdeng u khun bynriew hi uba, ha ka jinglong bapop, baïaimut brai bad ba long shabar jong U Blei, uba dei ban laha ban leh ïa kabym lah long, kaba long ban bat ïa ka kti U Blei. Hynrei namar ba ka jingeh bakhraw kaba ïeng hapdeng u khun bynriew bad kane ka thong ka dei ka jingïaimut brai, U Blei U la hap ban wad kawei pat ka lad ka lynti ban pyntrei kam ïa kane.
Dei hangne ba ka jinglong briew jong U Jisu ka long kaba la donkam kum ka lad ban pynïoh ïa ka jingpynim. Ka thong jong ka jingpynïasuk la pyndep ha ka diengphna namar dei hangne ba ïa U Nongpynim ka pyrthei la pynïakhlad na U Blei. Namar ba ïa U la pynkhlad na U Kpa, U Jisu U la don ha kajuh ka jaka ba u khun bynriew u la shem ïa lade kum ka jingmih na kaei kaba la jia long ha ka kper Eden mynba U Adam u la kylla long uba pop mynba u la rai ban ieh noh ïa U Blei. Bad namar ba ngi tip ba ka pop ka long ka jinglong ba ïakhlad na U Blei, dei halor u diengphna ba U Khrist U la shah ieh noh ha U Blei bad namar kata la pynlong pop ïa U.
“Namar ïa Uta Ubym shym la tip ïa ka pop, U la pynlong ka pop na ka bynta jong ngi, khnang ba yn pynlong ïa ngi ka U Blei ha U.” (2 Korinth 5:21)
Da kaba jied ïa U Blei shabar jong U Blei, U Khrist U la jied ban pynïashoh lem bad U Blei bad U la leh ïa kane na ka bynta u khun bynriew hi baroh kawei, bad dei da kane ba U la weng ïa ka bor jong ka pop kaba la ring mraw ïa u khun bynreiw la bun bun snem. Dei ha kane ka rukom ba ka kam jong ka jingpynïasuk la lah ban pyndep. Khadduh khadwai, mynta lah don U Briew uba la lah ban pynlong ïa kabym lah ban long bad kata ka long ba U kner ïa la ki kti sha U Blei ha ka jingmut jingpyrkhat bapop bad baïaimut brai. Namar kata, u khun bynriew u la shah pynïasuk bad U Blei lyngba U Jisu.
“Te kiei kiei baroh ki long na U Blei, Uba la pynïasuk noh ïa ngi ha la de hi da U Jisu Khrist…” (2 Korinth 5:18)
Kawei pat ka rukom ba ngi lah ban peit ïa kane ka long ba ka thong ban pynïasuk ïa ngi bad U Blei ka la seisoh namar kaei kaba U Jisu U la leh bad kam dei satia halor ka nongrim ba Um shym la leh ne Um shym la lah ban leh. Kaei kaba nga mut ban ong ka long ba, kam dei ka jingpynïakhald lymne ka jingïap kaba la pynïoh ïa ka jingpynïasuk, hynrei ka dei kaei kaba U Khrist U la leh hapdeng ka por ba U la shah ieh noh ha U Blei bad ka jingïap jong U. Kynmaw ba ym dei U Khrist hi Uba la pynïakhlad ïa lade na U Kpa hynrei Un ym jin da la ong, “U Blei jong Nga, U Blei jong Nga, balei ba Me la ieh noh ïa nga?” Nalor kane, U khlem shym la pynïap ïa lade; ka dei namar ba U la shah pynkhlad noh na U Tyllong ka jingim, U Blei ba U Kpa, ba U la ïap.
Lada ka jingïap U Khrist kam shym la pynïoh ïa ka jingpynïasuk, te balei ba ka Baibl pat ka ong ba U Blei U la pynïasuk ïa ngi da ka jingïap U Khun jong U? Ki kyntien ha Rom 5:10 la mang ban pyndep ïa lai tylli ki jingthmu. Ba nyngkong eh, kane ka dkhot la mang ban lam ïa ki jingmut jingpyrkhat jong ngi sha kaei kaba la jia mynba la sah narphna ïa U Jisu naba kadei hangne ba U Blei, kahdduh kadwai, U la lah ban pynïasuk ïa u khun bynriew sha lade namar kaei kaba U Khun jong U U la leh. Ha ka jingshisha, lada U Khrist, mynba U long shabar U Blei, U khlem shym la jied ïa U Blei, Um jin da la lah ban ïoh ïa ka jingjop halor ka pop bad kane kan dup pynpullom lut ïa ka jingthmu kaba ma U U la wan ban pyndep bad u khun bynriew Un ïaineh sah khlem kano kano ka jingpynïasuk bad U Blei. Kaba ar, da kaba ong ba U Blei U la pynïasuk ïa ngi da ka jingïap U Jisu, ka shu pynpaw ba ka jingïap jong U ka pynskhem khlem kano kano ka jingartatien ba U Khrist U la da shah buh shisha ha ka jaka ba u khun bynriew u la shem ïa lade, ba u long uba pop, kaba thew ïa ka jinglong shabar na U Syiem ka bneng salonsar. Kaba lai, namar ka thymmei kaba la don bynta, ka jingpynïakhlad ka long kaba donkam eh ban kot ïa ka thong jong ka jingpynïasuk. Da kaba weng noh ïa lade na la U Khun, U Blei U tip ba ka jingmih na kane ka long ba U Khun jong U Un ïap. Hynrei namar ba dei tang kane ba long ka lynti ba ïa ka pop yn lah ban jop bad ba ka jingpynïasuk lah ban ïoh, U Blei Um don lad da kawei pat ka lad hynrei ban bthat ïa ka jingteh ba khum ïa U sha la U Khun. Dei na ki daw kiba kum kine ba U Paul U la ong ba U Blei U la pynïasuk ïa ngi da ka jingïap U Khun jong U. Namar kata, ym dei ka jingïap kaba la lah shisha ban leh ïa kaei kaei kaba kongsan (wat ka jingpynïasuk ruh). Namar kane, ki kyntien jong ka dkhot, Rom 5:10, kam kut ha ka bynta jong ka jingpynïasuk hynrei ka ïai bteng shuh ban ong ba namar ïa ngi la pynïasuk, ïa ngi ruh la pynim da ka jingim U Nongpynim.
Ka dei halor kine ki jingshsisha baratbah jong ka gospel ka jingpynim ba U Jisu U long bad Un ïai long barabor ka lynti sha ka jingpynim. Kam long kaba sngewphylla, namar kata, ba U Jisu U ong kumne ha kawei ka por, “Nga Uba long kata ka lynti, bad ka jingshisha, bad ka jingim de: ym don Uba wan ha U Kpa, hynrei tang da Nga.” (Ïoannis 14:6) Namar kata, ki briew baroh ki don shibun ban myntoi na ka jingim U Khrist. Dei tang ba ka pyrthei ka ngeit bad ka bat skhem ïa ki jingkular ba la ai da U Blei ba kan mad ïa ka jingsuk bad ka jingtngen kaba lah ban shem tang ha U Nongpynim ka pyrthei.
******