Ka Jingkut ka Hukum

Ki lah ban don napdeng jong ngi kiban ïeng-shkor haba ki ïohi ïa ka kyrteng jong kane ka jingthoh, hynrei kine ki long ki kyntien kiba don ha ka Baibl hi, ba la sot ïa ka na ki jingthoh u apostol Paul bad lah ruh ban shem ïa ka ha Rom 10:4

Namar U Khrist U long ka jingkut ka hukum ïa kaban long ka hok ïa uwei uba ngeit. (Rom 10:4)

Kaei ka jingmut jong kane ka ktien, “ka jingkut”, kumba U Paul u la pyndonkam ïa ka ha kane ka dkhot? Don katto katne ki jingmut kiba lah ban don jingïadei bad kane ka kyntien, bad hooid ka long kaba shisha ba Ki Khristan ki batai ha ka rukom bapher bapher katkum ka balang ha kaba ki ki long ki dkhot. Bunsien ka jingkit jingmut jong kane ka kyntien ka ju long ka jingkut, ka jingpynkut noh, ka jingpynduh, ka pud ha kaba kaei kaei kam don shuh. Hynrei ka lah ruh ban kdew ïa ka thong, ka jingthmu ne ka jingthmu ïa kaei re kaei. Bun ki Khristan ki sngewthuh ba U Paul u ong ba ïa ka hukum (ki shiphew hukum) la pynduh noh. Hynrei, ki Khristan basumar Sabbaton pat ki batai ba kane ka kyntien ka mut ba ka jingthmu bad ka thong jong ka hukum ka long U Khrist. Ha kiwei pat ki kyntien ïa ka hukum la thmu ban long kata kaban ïalam ïa ngi sha U Khrist, hynrei haba mynta ngi la wan sha U Khrist kam mut pat ba ka hukum ka la leit noh, ka dang ïai long hi kaba donkam kumba ka ju long naduh ki por mynshua.

Bunsien ynda haba ngi shem ar tylli ki jingsngewthuh kiba ïa pyrshah ïa iwei iwei halor kano kano ka subjek, ym don kawei ruh ka jingsngewthuh kaba don ïa ka jingshisha bapura. Bunsien ka don ka jingbymïabiang ha baroh artylli ki liang bad ka jingshisha pat ka don hango re hangno hapdeng jong kine ar. Nga ngeit ba kane ka long ruh ka jingshisha ha kaba ïadei bad kane ka jingong U Paul. Ka matpdeng jong ka jingïakren ka long kaba kongsan eh. Ha kaba bun eh ka jingim ka jong nga, ngan ym jin da la mynjur bad kito kiba ong ba ïa ka hukum la pynduh pyndam noh, hynrei, namar ba ka jingsngewthuh jong nga shaphang ka Baibl bad ka jingthmu ka jingpynim ka la kham shai, mynta nga la poi ban mynjur ba ha kaba ïadei bad ka matpdeng jong ka jingïakren jong kane ka dkhot, ka kyntien “ka jingkut”, ka mut shisha, “ka jingpynduh pyndam noh”.

Peit ba ka ong ba U Khrist U long ka jingkut jong ka hukum khamtam ha kaba ïadei bad ka hok. “U Khrist U long ka jingkut ka hukum ïa kaban long ka hok”. To shah ba ngan kylli ïa ka jingkylli, hato ka hukum la pynduh pyndam noh ha kaba ïadei bad ka rukom ba ngin ïoh ïa ka hok? Ka jubab ka long, hooid! Ïa ka hukum la pynduh pyndam noh kum ka lynti ban ai ïa ka hok! Kam don bynta shuh ha ka jingmad jong ngi ïa ka hok, te katkum ka matpdeng jong ka jingkren U Paul ka long kaba dei ban ong ba ïa ka hukum la pynduh. Hooid kane kam nut satia ba ka hukum kam long shuh kaba kongsan ne ba ka hikai ïa kiei kiei kiba bakla.

U Khrist U long ka jingkut jong ka hukum ha kaba ïadei bad ka hok. Dei kane kaba ngi donkam ban sngewthuh. Hynrei khnang ba ngin lah ban sngewthuh janai ïa kaei kaba u kren, ngi don kam ban leit phai biang sha ka ïa kaba nynkong eh jong ka histori jong ka pyrthei bad ban sngewthuh katto katne ki mat tynrai.

KA JINGÏADEI BA LA DKUT NOH

Mynba U Blei U la thaw ïa U Adam bad Ka Im bad U la buh ïa ki ha Eden, naduh kaba sdang U la ai ïa ki ïa ka hukum, la mana ïa ki ban bam na u dieng jong ka jingtip ïa kaba bha bad kaba sniew. Balei ba U Blei U la ai ïa ki ïa kane ka hukum, kaei ka jingthmu jong ka? Naduh kaba sdang ïa ka jingthmu U Blei la sngewthuh bakla bad kane ka la ïalam ïa u khun bynriew sha ka lynti kaba la ktah ïa ka jingsngewthuh ka jong ngi ïa ki jingshisha bakynja mynsiem haduh kine ki sngi.

Ka jingsngewthuh bapawnam ka long ba ka jingthmu ba sha lyndet jong ka hukum ka long, ka jinglong babha. U Blei U kwah ban khang lad ïa u briew na kaban tuh, U kwah ban peit lada u briew un im ne em katkum ki rukom babeit bad badon burom. Hynrei kane ka long ka jingsngewthuh babakla, U Blei U khlem shym la tynjuh ïa ka jinglah ne jingmong jong u briew ban im ha ka rukom babeit bad badon burom. Ka mat bakongsan shisha hapdeng U Blei bad u briew ka long ka mat jong ka jingïadei, ka jingïadei kaba la pynshong nongrim halor ka jingshaniah. Lada ngi sngew ba ka mat ka long shaphang ka jinglong babha, te ngi ïai bteng ban tei halor kata ka jingsngewthuh ba ka jingtip ïa ka kaba bha bad ka jingim babha ki long ka nongrim ha ka jingïadei jong u briew lem bad U Blei. Hynrei lada ngi sngewthuh ba ka mat ka long ka jingshaniah, bad ba ka hukum kaba ïadei bad u soh ka shu dei tang ka lad ban tynjuh ïa ka jingshaniah jong u briew ha U Blei, te ngi poi ban sngewthuh ba ka bynta bakongsan ha ka jingïadei jong u briew bad U Blei bad ha ka jingïaleh hapdeng kaba bha bad basniew hi baorh kawei, ka long ka jingshaniah. Ka long ka haduh katno keiñ shaniah ïa U Blei. Ha kiwei pat ki kyntien, ka jingjulor bashisha ha Eden kam dei ka hukum ba la pynkheiñ, hynrei ka dei ka jingïadei ba la bthat noh, ka dei ka jingduh noh ïa ka jingshaniah.

Lada ngi sdang ban sngewthuh ba ka jingeh ka long ka hukum ba la pynkheiñ, te kadei ruh na kane ka jingsngewthuh ba ngin pyrshang ban sngewthuh ïa ka jingpynim. Ngi khmih ïa ka Baibl kum ka kitab kaba pynleh jingmut kham bun eh ha ka jinglong babha bad ka jingthmu jong ngi ka kylla long ka jingpyrshang ban buh ïa ka hukum ha ka kyrdan kaba hajrong tam eh. Da shisha keiñ, kam long kaba eh haduh katta katta ban srydep ïa ka hukum ba la pynkheiñ, ka shu donkam ïa u briew ba la pynkheiñ ïa ka ban sdang ban sumar khuid biang ïa ka, ka long kaba suk haduh katta.

Hynrei ka jingduh ïa ka jingshaniah ka long ka jingeh kaba kham khraw. Ka jingshaniah kam dei kaei kaei kaba lah ban pynlong da ki hukum ne ki jingkyrpad ne ki jingsynshar. Ynda haba ïa ka jingshaniah kam dun shuh hapdeng ar ngut ki briew, ki sdang ban kiar na iwei iwei, ki jingïakren ki jong ki ki sdang ban kylla, ki kiar na kaban peit ïa iwei iwei markhmat bad ki peit ïa ka jingleh jong iwei iwei da ka jingsuba suda. Kane ka long ka jinglong jingman basniew kaba la mih hapdeng u briew bad U Blei mynba U Adam bad Ka Im ki khlem shym la shaniah shuh ïa U Blei bad ki la pyndkut ïa ka jingïadei hapdeng jong U bad u khun bynriew. Dei na kane ka daw ba ka mat pdeng jong ka Baibl ka long ka mat jong ka jingngeit, dei kane kaba la shah pynkheiñ sbisha bad dei kane kaba donkam shisha ïa ka jingpynkhiah. U Blei U lah shem ïa ka lynti ban pynkhiah ïa ka jingïadei ba la dkut noh hynrei kan shim bun spah snem jong ka jingsaja, ka jingsngewthuh babakla bad ka jingshah pynthoh bria shuwa ba ïa kane ka jinglong jingman yn pynkhiah bad ba ka jingïadei ba u briew u ju don bad U Blei naduh kaba mynnyngkong yn pynïoh biang.

KA HUKUM HA SINAI

Bad ka hukum ka la rung nalor kata, khnang ba kata ka jingryngkang kan da mih byllien. Hynrei ha kaba ka pop ka roi byllien, ka jingaiei ka la roi khamtam eh: (Rom 5:20)

U Paul u ong ba ka hukum ka la rung. U mut aïu da kane? Haei, bad mynno ka hukum ka la rung? Lada ngi peit ïa ka mat pdeng jong ka lynnong, Rom 5, ngin shem ba u ong ba ka hukum ka la rung ha ka jingthmu jong U Blei ban pynïadei ïa lade bad u khun bynriew. Ngim lah ban kren bniah halor kane ka phang ha kane ka por, hynrei lada ngi pule sani bha ïa kane ka lynnong, kan paw shynna bha ba ka dei kane ba U Paul u kren. Ka la don ka por ha kaba ka hukum ka la wan ha ka jingïadei hapdeng U Blei bad u briew bad ka long kaba shisha bad kaba paw shynna ba ha shuwa kane ka por, ka hukum kam shym la long shi bynta bad kata ka jingïadei. Ym shym la buh jaka ïa ka ha ka jingthmu banyngkong eh jong kiei kiei baroh.

Kham palat 2000 snem hadien ba u briew u la pynjot ïa ka jingïadei bad U Blei ha Eden, U Blei U la ai ïa katto katne ki jingbthah ha ki nong Hebru ha u lum Sinai. U Blei U la seng ïa ka jingïadei ba da ka jutang bad kine ki briew, la pynithuh ruh ïa ki kum kita kiba long ki jong U ha ka rukom kaba kyrpang bad U la ai ha ki ïa ki jingbthah kiba synshar ïa kawei pa kawei ka bynta ka jingim jong

ki. Kane ka long ka sien kaba nyngkong eh naduh ka Kper Eden ba U Blei U lah ai ïa ka hukum ha u khun bynriew. Ïa ka jingkylli lah ban kylli, balei ba U Blei U la rai mynta ban ai ïa kine ki hukum ha ki kynja Hebru? U apostol Paul u ai ha ngi ïa artylli ki jubab ïa kane ka jingkylli.

NAMAR KA JINGPALAT

Ïa ka ban lei te la long kata ka hukum? La ai ïa ka namar hadien ki jingpalat, haduh ban da wan uta u symbai ha uba la ai ïa kata ka jingkular; bad la ai ïa ka da ki angel ha ka kti u ksiang. (Galatia 3:19)

Phin shem bha hangne ba ka hukum ka don ïa ka por jong ka jingsdang bad ka jingkut. U Paul u ong ba ka hukum la ai hynrei tang haduh ba uta u symbai (U Khrist) un wan. U la ong ba la ai ïa ka namar ki jingpalat. Ha kiwei pat ki kyntien, kawei ka daw ba U Blei U la ai ïa ka hukum ka long namar ba ka la donkam ban pynduna bad ban tehlakam ïa ka jinglong basniew jong ki briew. Ka jingsniew ka la nang san bad ka jinglong jingman jong u briew ka la nang hiar, ka jingpalat ka la nang roi bad khnang ban buh ïa ka hapoh ka bor kaban tehlakam ïa ka, U Blei U la ai ïa ka hukum. Hooid ka long kaba shisha ba ka hukum kam shym la lah ban pynlong kham bha ïa ki briew (Hebru 7:19) – ki hukum kim lah ban pynkylla ïa ka jinlong jong u briew – hynrei ka lah pat, tang haduh katto katne, ban pynbor ïa ki ban synshar ïa la ki jingleh ki bapaw pyrthei. Ki jingpynshitom kiba ïaid ryngkat ryngkat lem bad ka jingpynkheiñ ïa ka hukum ki pynbor ïa ki briew ban ïaleh ban tehlakam ïa ki kam basniew ki jong ki, watla kim lah ban pynkylla ïa ki jinglong bad ki jingthrang basniew jong ki.

Kane ka long ka daw banyngkong ba pynlong ïa U Blei ban ai ïa ka hukum. La “ai ïa ka namar ki jingpalat.”

BAN PYNKHREH NA KA BYNTA U KHRIST

Kumta ka hukum ka long ka nonghikai ka jong ngi ban ïalam ïa ngi sha U Khrist, khnang ba yn pynksan ïa ngi da ka jingngeit. (Galatia 3:24)

Sa kawei pat ka daw ba U Blei U la ai ïa ka hukum ka long ba ïa ka la thaw dur ban pynkhreh ïa ki briew jong U na ka bynta ka jingwan U Khrist. Ka leh ïa kane ha artylli ki rukom; nyngkong eh ha ka rukom jong ka hukum don bun tylli ki jinglehñiam leh rukom kiba la thmu ban long ki lad jinghikai, ki jingbatai kiba hikai ïa ki jingshisha shaphang ka jingim bad ka kam jong U Khrist, bad ïa ka jingthmu ka jingsiewspah. Kum ka nuksa, ka jingkñia ïa ki mrad ka long ka jingpynshai da kiei kiei kiba kynja doh shaphang ka jingïap U Khrist.

Hynrei kaba ar pat, ka hukum ka pynkhreh ruh ïa ki briew na ka bynta ka jingwan U Khrist namar ka pynsngewthuh ba ka don ka jingjngai bakhraw eh hapdeng U Blei bad u briew. Ka pynlong ïa ki ban sngewthuh ba kim long kiba bitdor ban don ka jingïadei bad U Blei bad kane ka pyndon ïa ka jingthrang ban don mano re mano uba lah ban ïalam biang ïa ki sha kata ka jingïadei bakit jingmut lem bad U. Te da kaba pynlong ïa ka jingthrang ban don u ksiang, ka da pynkhreh shisha ïa ki ha ka rukom kaba kynja mynsiem, na ka bynta ka jingwan U Khrist.

BAN PYNSNGEWTHUH ÏA KA JINGDON JONG KA POP

Ka daw balai ba ïa ka hukum la ai ka long ban pynsngewthuh ïa ka jingdon jong ka pop. Kane ka long ka daw ba u apostol Paul u ban jur bha ban ïa kiwei kiwei pat bad ha kaba ïadei bad ka mat jong kane ka jingthoh ka long kaba donkam eh ba ngin sngewthuh bha shaphang jong ka.

Hato kane kaba bha ka la jia long ka jingïap ïa nga? Em, ym kumta! Hynrei ka pop keiñ ba kan ïoh paw ba ka long ka pop, da kaba trei pynshait ïa ka jingïap ha nga da kata kaba bha; ba kumta kata ka pop da kata ka adong kan da paw kaba pop shikaddei eh. (Rom 7:13)

Namar kata ka hukum ka ka pynlong noh ïa ka jingpynbitar; namar ha kabym don ka hukum, hangta ym don ka jingpalat. (Rom 4:15)

Te ka sni jong ka jingïap ka long ka pop, bad ka bor ka pop ka long ka hukum. (1 Korinth 15:56)

Peit bha ïa ki dkhot haneng; ki ong aïu shisha? Katkum kine ki dkhot ym shym la thmu ba ka hukum kan long ka jubab ïa ka pop, hynrei pynban, ban pynkhraw bad ban pynsan ïa ka jingeh jong ka pop! Kane kam dei ma nga ba thep ïa ka jingsngewthuh ka jong nga ha ka Baibl, kane ka dei kaei kaba U Paul hi u hikai. Hynrei to ngin ïa shim katto katne por ban sngewthuh shisha kaei kaba u ong.

Ka pop ka long ka thymmei kaba pynïakhald ïa u briew na U Blei bad ka wanrah ïa ka jingïap. Hynrei haduh katno ka pop ka long kaba donkam ban wanrah ïa kane ka jingïakhlad bad ka jingïap? Katno tylli ki jingbakla ka shim khnang ba ka pop kan pynmih ïa kane ka jingïakhlad hapdeng U Blei bad u briew? I pop barit tam eh ruh i lah biang, ka bainong ka pop long ka jingïap, khlem da donkam ban thew haduh katno ka jingkhia jong kata ka pop ba la don kti. U khun bynriew baroh, uwei pa uwei u briew u lah shah pynrem da ka jingdonkti ka jong u ha ka pop. Kane ka long ka jingeh kaba ngi la ïoh pateng na U Adam, namar ba U Adam u la kynthup lang ïa ngi ha ka pop bad dei na kane ba ïa ngi la ïathuh ba U Adam u la wanrah ïa ka pop bad ka jingpynrem ha baorh ki briew.

… da kawei ka jingryngkang kat ka jingkut bishar ka la wan hap ha ki bynriew baorh … … da kata ka jingbymkohnguh jong uta uwei u briew, la pynlong ka pop ïa kita kiba bun… (Rom 5:18-19)

Te ka hukum kam shym la weng noh ïa ka jingeh kaba naduh kaba sdang jong ka jingïadei ba la dkut bad U Blei bad kata kam shym la long hi ka jingthmu jong ka. Ka long kaba shai ba kam long ka jubab ïa ka jingeh jong ka pop. Ha ka por ba ïa ki paid Israel la synshar hapoh ka bor jong ka hukum, ïa U Blei la ïohi kum Uta Uba itieng, uba pynhiarkput, bad Uba ngi dei ban kiar, te ka hukum kam shym la wanrah ïa ka jingïasuk hapdeng U Blei bad u briew, hynrei pynban, ka la nang pynkhraw shuh shuh ïa ka jingïakhlad! La ju don ki por ha ka ïa jong ka hukum ba ka i kumba U Blei U long Uba khor bad Uba dawa ïa ka jingkohnguh bajanai bad teng teng, kane kam long kaei kaei kaba suk ba ngin sngewthuh. Hynrei kiei kiei baroh ki dei ban long kumne hapoh ka hukum. Man ba ngi don jingïadei bad ka hukum, ka don ka jingdonkam ïa ki jingpynshitom. Ym don ka hukum ba lah ban pyndep ïa ka jingthmu jong ka lymda ym shym la don ki jingpynshitom kiba ïasoh lem bad ka bad nalor kane, katba ka jinlong jingman ki briew ka la nang kham sniew, katta ka jingban khia jong ki jingpynshitom ruh ki donkam ban long. Lada ngi ïohi lyngba kane ka jingshisha, kan ïarap ïa ngi ban kham sngewthuh kham bha balei ba U Blei U hap ban pynïadei bad ki briew kum ba U la leh ha ka ïa jong ka hukum. U la hap ban ïa dei kam bad ki briew kiba lyngkar bad kiba runar, kiba khlem kano kano ka bor ha lade, kiba shah ban da ka jingïaimut brai jong ka doh. Ïa ki dei ban shah synshar da ka kti nar.

Hynrei, kam shym la dei shaphang ka hukum, ka hukum kam shym la dei ka jubab ïa ka jingeh bashisha bad ka shu long tang ka bor pynïaid ba tang shipor arpor. Haba ka jingeh ka mih hapdeng ki paralok bad ka jingïadei ka la dkhut, ka jingdonkam bashisha ka long ban tei biang ïa ka jingshaniah bad ka jingsngewskhem. Hooid, uwei na ki u lah ban wan ha uwei pat bad ong, “phi lah ban shaniah ïa nga”, hynrei ka jingshaniah kam trei kam kumta. Ynda haba ka jingïadei ka la pullom, ki briew ki sangeh ban shaniah ïa ki daw, ki jingthmu, bad ruh ïa ki kyntien jong uwei pat u briew. Wat ki jingleh babha ruh la ñiew da ka jingsuba sniew. Te haba ka jingïadei hapdeng u briew bad U Blei ka la pullom, U Blei Um lah ban shu wan ong, “shaniah ha Nga”. U lah ban pyntieng ïa ngi khnang ba ngin pyrshang ban sumar ïa ki aiñ jong U bad ban long kiba shida, hynrei kane kan ym tei ïa ka jingïadei jong ka jingieit bad ka jingshaniah bad lada u briew u shakri namar ka jingsheptieng, ka kham biang ba un long u mraw! Kane ka long ka jingeh ba U Blei u ïa kynduh, U ïaleh ban tei ïa ka jingïadei bad ki khun bynriew kiba, ha ka jinglong tynrai jong ki hi, ki long kiba sheptieng ïa U. Ka long ka jingeh kaba jwat bha namar ka jingïaimut brai jong ka doh kam lah khlem da shun ïa U Blei (Rom 8:7). Kane ka long ka daw bashisha balei ba ka long kaba eh ban kreh ha ki briew ba riew pyrthei shaphang U Blei; ki don ka jinglong ban sheptieng ïa U bad kim don ka jingthrang ban wan shajan jong U bad ban shakri ïa U. Te kane ka long ka jingeh ba U Blei U kynduh, kumno ban pynlong ïa ki khun jong U kiba sheptieng, sngewthuhbakla bad kiba isih ruh ïa U ban wan sha U. Dei hangne ba ka wan bsuh ka gospel.

KA GOSPEL

Ka jingeh ka long ka jingïadei ba la dkut bad ka jingdonkam ka long ka jingpynïasuk. Kane ka long ka jingeh naduh ka por ba u briew u la phai dien noh na U Blei ha ka Kper Eden bad ka la ju long ka jingeh bashisha naduh kato ka por. Ka jingshaniah bad ka jingïadei ka dei kaei kaei kaba la pulom bad ngi la long ki nonshun U Blei.

Ka jubab U Blei ïa ka jingïadei ba la dkut kam shym la dei ka hukum. Kaei kaba U Blei U la leh ka long ba U la shim ïa uwei u briew, uwei uba don ïa ka jinglong briew bad ha une u la pynïoh biang ïa kata ka jingïadei ba la dkut noh hapdeng jong U bad u khun bynriew. Une U long U Khun jong U Uba la wan long u khun u briew, U Jisu Khrist. Une U long u briew uba la ithuh ïa U Blei haduh katta katta ba U shaniah ha U Blei shispah na ka shispah. Ha Une u briew U Blei U la pynïasuk, ym tang ïa uta uwei u briew hynrei ïa u khun bynriew hi baroh kawei ïa uba une uwei u briew mynta u la long shibynta.

Te kiei kiei ki long na U Blei, Uba la pynïasuk noh ïa ngi ha lade hi da U Jisu Khrist, bad Uba la aiti ha ngi ïa ka jingpyntrei ïa ka jingpynïasuk; kata ka long ba U Blei U dang pynïasuk ïa ka pyrthei ha lade de ha U Khrist, khlem da ñiew ha ki ïa ka jingpalat jong ki; bad ba U la buhti ïa ka ktien kane ka jingpynïasuk. (2 Korinth 5:18-19)

Namar lada, lada ngi la long ki nongshun, la pynïasuk noh ïa ngi bad U Blei da ka jingïap U Khun jong U, te khamtam shibun, haba la pynïasuk ïa ngi, yn pynim ïa ngi da ka jingim jong U.” (Rom 5:10)

Kane ka long kaba phylla shikaddei eh! Ha khmih ba mynba ngi dang long ki nongshun, ba ïa ngi la pynïasuk! Ha khmih ba ka dei ka pyrthei kaba ka la shah pynïasuk sha U Blei! Ym dei ki rukom leh, ki jinglah ban leh, ka jingsumar ïa ki hukum jong ngi ba don bynta ei ei ruh em bad kane ka jingpynïasuk, ka dei kaei kaei kaba la jia shabar jong ngi, khlem ma ngi, ba la pyndep lut da U Khun U Blei! Ngi khlem shym la don hangto bad ngim shym la don ban shim bynta, ïa ngi la pynïasuk khlem ka jingdon jong ngi! Ha U Jisu Khrist U Blei U la weng lut shisyndon ïa ka jingeh jong ka pop sharud. Kan ym dei ban long biang ka daw kaban wan hapdeng U Blei bad u briew, U Jisu Un ym hap ban ïap biang sa shisien na ka bynta ka pop. Ha khmih ïa ka jingong baphylla ha 2 Korinth 5:19, “khlem da ñiew ha ki ïa ki jingpalat jong ki.” U Blei Um ju bat nud ïa ka pop jongno jongno ruh pyrshah ïa uno uno uba leh ïa ka pop, ïa ki la dep pynkhuid lut lyngba U Jisu Khrist. Ka pop kan ym long shuh ka kynroh kaba ïeng hapdeng ka jingïadei u briew bad U Blei.

Lymda kumta ka la dei ïa U ban shah bunsein naduh myndang long ka pyrthei; hyhrei mynta tang shisien la pynpaw ïa U ha kaba kut ki ïa, ïa kaban pyndam noh ïa ka pop da kaba kñia ïa lade. (Hebru 9:26)

Te balei pat ba bun ki briew kin dang ïai long hi kiba la jah bad kin mad ïa ka jingïap bymjukut? Ka dei namar ba kin ym ngeit ïa ka jingshisha, ka jingeh bahsisha ka long ka jingeh jong ka jingbymngeit ym ka jingeh jong ka jingpynkheiñ hukum! Ka dang ïai long hi ka jingeh jong ka jingduna ka jingngeit bad ka jingshaniah ha U Blei. Ka jingeh jong ka hukum ba la pynkheiñ la dep ban syrdep bun bun snem mynshuwa, hynrei ka jingbymngeit ka shong ha uwei pa uwei u briew bad dei na kane ba ka dang ïai long hi ka jingeh kaba ratbah, ka jingeh kaban wanrah ïa ka jingduh babymjukut ïa kiba bun bah ki briew kiba ïa ka pop jong ki baroh la dep ban pynkhuid lut. Ka don ka jaka ïa uwei pa uwei u briew ha ka bymjukut, hynrei ka jingsngewsih ka long ba bun kin ym pdiang ïa kaei kaba long ka jong ki.

Te ïa ngi la pynïasuk bad U Blei ha ka dur ba U Blei Um don shuh ka kynroh hapdeng jong U bad ngi, hynrei to ngin ïa shim ïa kawei ka jingkylli, kaei kaba thaw pynlong ïa kata ka jingkah hadeng u briew bad U Blei? Ka long ka jingbymngeit bad ka jingbymdon ka jingshaniah. Hynrei ynda haba ka hukum ka wan rung, ka la long ka jingeh kaba kham jylliew ban ïa ka jingbym don ka jingshaniah. Ka hukum ka la nang pynkha ïa ka jingeh namar ba ka hukum ka pynlong ïa u briew uba la rem. Te kam dei tang ba ïa ngi la pynkhlad na U Blei hynrei ngi long ruh kiba la rem, te ngi don ar tylli kiei kiei kiba pyrshah ïa ngi. Mynta ka Baibl ka ong ba ïa ngi la pynïasuk bad U Blei, hynrei khnang ba ka jingpynïasuk kan long kaba pura, ka longkaba shai ba don ar tylli kiei kiei kiba donkam ban shah weng. Kawei ka long ka jingbymngeit, ka jingbymdon ka jingshaniah dei ban shah weng noh bad kaba ar ka dei ka jingsngew rem. Khnang ba u briew un ïoh biang ïa ka jingïadei basngewtynnad bad bapura bad U Blei ka jingpynrem la dei ban shah kynriah noh sharud.

KA JINGPYNDAM ÏA KA JINGSNGEWREM

Hynrei lada hap weng noh shisyndon ïa ka jingsngewrem, kumno ba kane kan long kaba lah lada kata kaba wanrah ïa ka jingsngewrem ka ïai don sah? Lada ïa ka jingsngewrem dei ban weng noh shisyndon na ka jingïadei hapdeng U Blei bad u briew, te kata kaba pynlong ïa kata ka jingsngewrem dei ban weng noh na ka jingïadei! Katba ka hukum ka dang don bynta ha ka jingïadei ngin nang ïai pynlang sah ïa ka jingsngewrem, bad ka jingsngewrem kan ïai bteng ban long ka deingpyngkiang ha ka jingïadei jong ngi bad U Blei. Kane ka lah ban long ka jingsngewthuh kaba eh bha ïa bun na ngi ban pdiang, hynrei phi dei ban sngewthuh ba ngam shym la ong ba ïa ka hukum la pynduh noh kum kata ka jingbatai shaphang kaei kaba bha bad kaei kaba sniew, shaphang kaei kaba dei bad kaei kaba lait. Kaei kaba nga ong ka long ba ïa ka hukum la weng noh kum kata ka tarajur ban rai ïa ka jinglong jingman jong kata ka jingïadei hapdeng U Blei bad ki briew ki jong U. Ha kiwei pat ki kyntien, ka jingïadei jong ngi bad U Blei kam shong shuh halor ka jingbha jong ngi ne haduh katno kata ka jingbymlah jong ngi ban sumar ïa ka hukum! Dei ïa kane kaba u apostol Paul u la kren haba u ong ha ngi,

Kiei kiei baroh ki long kiba dei ïa nga, hynrei kiei kiei kim long kiba myntoi: kiei kiei baroh ki long kiba dei ïa nga, hynrei ngan ym shah ban pynlong mraw ïa nga hapoh kaei kaei ruh. (1 Korinth 6:12)

Te ha kaba ïadei bad ka jingkren jong U Paul ha Rom 10:4, ka long kabym bakla ban ong ba U Khrist U la pynduh pyndam ïa ka hukum. Te halor kane ka jingsngewthuh, ïa kane ka dkhot lah ruh ban pynwan pat da kumne,

Naba U Khrist U long ka KA JINGPYNDAM NOH jong ka hukum ha kaba ïadei bad ka jingïadei bad U Blei, ha uwei pa uwei uba ngeit. (Rom 10:4)

Ha kiwei pat ki kyntien, kum ka lad ka lynti ban ïoh ïa ka hok, ïa ka hukum la pynduh pyndam noh. Kam don bynta shuh ha ka jingïashem jong ka jingïoh ne ka jingduh noh ïa ka hok. U Khrist U la pynkut noh ïa ka jingïadei bad U Blei kaba da ka hukum. Ïa ngi ym shym la pdiang namar ka jinglah jong ngi, ka jingsumar ïa ka hukum ne kino kino ki kam. Kaba da khongpong ka long pynban ka jingshisha, ngin ym shah kyntait namar ki kam jong ngi ne ki jingbym lah jong ngi ban sumar hukum. Kumba uwei u briew u ong, “kata kabym lah ban pynlong hok ïa ngi, kam lah ruh ban pynlong ïa ngi ban long kibym hok.” Ha kaba ïadei bad ka jinglong hok, U Khrist U la pynkut noh ïa ka hukum! Te u apostol Paul u la ong ha ngi da kaba shai bha,

Ïa kaban ïaroh ïa ka burom ka jingaiei jong U, kaba U la ai ei ha ngi ha Uta U Baieit. (Ephesians 1:6)

Ïa ngi la pdiang sngewbha “ha Uta U Baieit”. Ym don pat sa da kawei ka nongrim na ka bynta ka jingïadei ka jong ngi bad U Blei – ym don shuh da kawei pat kaban don bynta. Ngi long kiba la pynim ne ba la jah halor ka nongrim jong ka jingïadei jong ngi bad, “Uta U Baieit”, U Jisu Khrist.

KI SHAKRI BAD KI KHUN

Kane ka long ka jingïapher hapdeng uta uba long u shakri bad uta uba long u khun U Blei. Ha Galatia 4, u apostol Paul u ong shaphang ki Khristan:

Ba kumta phim long shuh u mraw hynrei u khun keiñ: te lada u khun, u nongïoh pateng ruh da U Blei. (Galatia 4:7)

Ka don ka jingïapher babak-ly-bak hapdeng u shakir bad u khun. Ka jingdon jong u shakri ha ka ïing ka shong ha ki kam ki jong u, ka shong ha ka jinglah jong u ban sumar ïa ki hukum bad ka jingkohnguh jong u ïa la u kynrad jong ka longïing. Lada um kohnguh, u buh ïa ka jaka jong u ha ka jingma, lada u pynbitar ïa la u kynrad te ka lah ban long ba u hap man mih noh. Hynrei ki khun pat kim im ha kane ka rukom, ka hok ban im bad ban sah ha ka ïing ka dei ba wan na ka jingïoh pateng, ka shong halor ka nongrim ba ki shim bynta lang ïa kajuh ka jingim ba baroh ki dkhot jong ka longïing ki don, ki long ki dkhot jong kajuh ka longïing. Kam don kano kano ka jingma ba ïoh ki shah beh noh na ïing. Wat lada ka jingleh jong ki ka long kaba sniew, ki don ïa ka jingskhem ba ka longïing longsem kan ïaleh ban ïarap ïa ki ban long kiba kham bha, ym ba kin duh noh ïa ka jaka sah jong ki. Ka jingleh jong ki kam don bynta ei ei ruh em ha kaba ïadei bad ka jinglong dkhot ha ka longïing.

Te U Blei Um shym la weng noh sharud tang ïa ka jingsngewrem ka jong ngi, hynrei U buh ïa ka jingïadei ka jong ngi halor ka nongrim baskhem, kaba ym lah mano mano ruh ban pynkhih. U leh ïa kane da kaba weng noh sharud ïa kata kaba pynlong ïa ka jingsngewrem, kaba long ka hukum. Hato ngi lah ban ïohi ïa ka jingitynnad jong kane kaei kaei? Ngim donkam shuh ban sngew sheptieng ne artatien haba ïadei bad ka jingïadei ka jong ngi lem bad la U Kpa Uba ha bneng. Hooid, ngim lah ban leh ïa kaei kaba U kwah ïa ngi ban leh ne teng teng ngim kot ïa ka thong ba la buh, hynrei kane kam lah ban buh ïa ka jingïadei ka jong ngi bad U ha ka jingma namar ba ka jinglah ne ka jingbymlah ka jong ngi la weng noh sharud kum kata kaban batai ïa ka jinglong jingman jong ka jingïadei jong ngi bad U. Ka dei tang ka jingïadei ka jong ngi bad U Jisu Khrist kaba long kaba kongsan.

Mynta ngi leh ïa kaba dei, bad ki jingim jong ngi ki ïahap sur bad ka hukum, hynrei kam dei namar jong ka hukum, hynrei namar ba ngi don ïa ka jingim U Khrist ha ngi bad ngi long ki khun U Blei baim. Ngi leh kum ki khun namar ngi long ki khun, “u symbai jong U u ïaisah hapoh jong ngi” bad ngin ym leh pop namar ïa ngi la kha na U Blei (1 Ïoannis 3:9). Ki kam jong ki kum ki Khristan ym shym la thew da ka jingpynleh jingmut jong ngi ïa ka hukum namar ba ka hukum kam don bynta shuh ha ka jingim jong ngi bad kumno ngi im ïa ka, ki kam jong ngi ki wan na Uta Uba im hapoh jong ngi.

KA BYNTA JONG NGI

Ha ka jingmad ïa ka jingpynim, u briew u don tang kawei ka bynta ban pyndep bad kata ka long ka jingngeit, u briew u dei ban ngeit. Hynrei ka jingngeit kam long hi ruh ka jingai jong u briew namar dei U Blei ba ri bad ba pynsan ïa ka jingngeit ha ngi, hynrei dei ma ngi ba dei ban pyntreikam ïa kata ka jingngeit. Dei tang kane ka jingai ka jong ngi ha ka lynti ka jingpynim, ym don shuh kaei kaei kaba ngi lah ban ai na ka liang jong ngi. Baroh kiei kiei ki long ka kam U Blei hi.

Don napdeng jong ngi kiba lah ban ong ba ka jingaiti ka long ruh kawei kaei kaei kaba ngi wanrah, hynrei ka jingaiti ka long shibynta bad ka jingngeit. Ha kiwei pat ki kyntien, ka jingngeit bad ka jingaiti la kynthup lang hajuh, ka jingaiti ka long ka kam kaba ïaid ryngkat ryngkat ne kaba long shibynta bad ka jingngeit bashisha. Ka jingngeit bashisha ka ju pynmih ïa ka jingaiti.

Kane ka long ka jingshisha baphylla jong ka jingaiei U Blei. Lada ka kam u briew ka don bynta ha ka jingpdiang jong ngi ïa U Blei, te kumno ba ngin lah ban long kiba jop? Ka long kaba thikna beit ba ngin ym lah ban jop, hynrei U Blei ha ka jingieit bashikaddei ka jong U U la pynlong ba kan shong tang ha ka jingaiei ka jong U. Ainguh ïa U Blei namar U Jisu! Ainguh ïa U Blei namar ka gospel! To ai ba ngi baroh ngin ngeit ïa ka, bad ban im ruh da ka!

[Ïa kane ka jingthoh la shim na ka Open Face newsletter, ka issue 120, bad la shon ruh ïa ka da ka jingïoh jingbit ba la ai ha ngi da U David Clayton jong ka Open Face Fellowship, Jamaica. Ban tip kham bha shaphang kane ka ministry, phi lah ban leit sha ka website jong ki – www.restorationministry.com ]

******