Ka Jingpynïasuk kam dei ka Jingpynim!

Nga ngeit ba ka khubor ka jingpynim jong ka Baibl baroh kawei la kren kyllum ha kawei ka dkhot. Kane ka dkhot ka dei Ki Rom 5:10

“Namar lada, mynba ngi long ki nongshun, la pynïasuk noh ïa ngi bad U Blei da ka jingïap U Khun jong U, te khamtam shibun, haba la pynïasuk ïa ngi, la pynim ïa ngi da ka jingim jong U.” (Rom 5:10)

Kane ka dkhot ka phiah ïa ka kam jong ka jingpynim ha ki ar bynta: ka kam jong ka jingpynïasuk bad ka kam jong ka jingpynim. Hangne phin shem ïa ka jingkren balyngkot shaphang kine ar tylli ki bynta jong ka jingthmu ka jingpynim.

KA KAM KA JINGPYNÏASUK

“Namar lada, mynba ngi long ki nongshun, la pynïasuk noh ïa ngi bad U Blei da ka jingïap U Khun jong U, … (Rom 5:10a)

Ka jingngeit ba pawnam ka ong ba ka jingïap U Khrist ka dei kata kaba pynim shisha ïa ngi. Hynrei, ki kyntien U Paul sah ki nong Rom, ki pyrshah ïa kata kaei kaei kaba kiba bun ki shim ba la long ka daw ba ïa ngi la pynim. Ha ka jingshisha, kine ki kyntien ki kren da kaba shai ba ka jingïap U Khrist ka wanrah ïa ka jingpynïasuk hapdeng jong ngi bad U Kpa. Ka daw ba ka jingpynïasuk ka long kaba donkam kum kawei na ki bynta jong ka jingthmu ka jinpynim namar ba ngi long ki nongshun U Blei, Kane ruh ka long ka jingshisha haba ngi kren shaphang ar ne kham bun ngut ki briew kiba ïa pyrshah ïa iwei iwei namar ka jingbymshgnewthuh jingmut.

U Paul ruh u ong ba mynba ngi long ki nongshun U Blei, ïa ngi la pynïasuk bad U. Kane ka pynpaw ba u nongshun u khlem shym la hap ban leh ei ei na ka liang jong u ban ïoh ïa kata ka jingïasuk. Ka dei beit tang ka kam U Blei. Te mano, katkum ka jingthoh, ba long u nongshun U Blei?

“…hato phim tip ba kata ka jingïalok bad ka pyrthei ka long ka jingshun ïa U Blei? namar kata uno uno ruh uba mon ban long u lok ka pyrthei, u pynlong ia lade uba shun ia U Blei kein.” (Jakob 4:4)

Ha khmih, ba ka jingïalok bad ka pyrthei ka dei kaei kaei kaba pynlong ïa ngi ki nongshun U Blei. U apostol Ïoannis u batai shuh shuh ha ngi shaphang ka jingmut jong ka “jingïalok bad ka pyrthei.”

“Phi wat ieit ïa ka pyrthei, lymne ïa kita kiei kiei ruh kiba ha kata ka pyrthei. Lada uno uno ruh u ieit ïa ka pyrthei, kata ka jingieit U Kpa kam don shuh ha u. Naba baroh kaba ha kata ka pyrthei, ka jingkwah brai jong ka doh bad ka jingkwah brai jong ki khmat, bad ka jingsarong thala shaphang ka jingim, kam long na U Kpa hynrei na kata ka pyrthei ka long.” (1 Ioannis 2:15,16)

Hangne, U Ïoannis u ong ba “ka jingïalok bad ka pyrthei” ka long ban “ieit ïa ka pyrthei” kaba kdew sha kiei kiei ba ka pyrthei ka beh. Kine ki kynthup ïa ka jingkwah brai jong ka doh bad ki khmat; bad hooid, ka kynthup lang ruh ïa ka jingsarong. Ngim shem ïa kine ki jinglong ha U Blei. Ïa kine lah ban shem tang ha u nongpop uba don ïa ka jinglong bakynja doh. U Paul u ong shaphang kane ka jinglong ba kynja doh ne ka jingïaimut brai jong ka doh kum kata kaba long ka nongshun pyrshah U Blei bad kabym lah ban pyndem ïa lade hapoh ka hukum bad ka mon U Blei.

“Naba kata ka jingïaimut brai jong kata ka doh ka long ka jingshun ïa U Blei: namar kam pynhapoh ïa lade ïa ka hukum U Blei, lymne shisha kam lah keiñ.” (Rom 6:7)

Kane ka long kata ka jingmut kaba ngi ïoh pdiang kum ka jingïoh pateng na u kpa bakynja pyrthei jong ngi, U Adam. Bad haba kren shaphang ka “jingïaimut” ne ka “jingmut”, ka ktien U Blei ka kyntu ïa ngi ban don ïa ka “jingmut U Khrist”.

“To ïoh ïa kane ka jingmut ha phi, kaba long ruh ha U Khrist Jisu: Uba haba U long ha ka dur U Blei, Um shym la ñiew eh ïa kaban bat ban long marryngkat bad U Blei, hynrei U la pynsuda ïa lade, u da shim ïa ka dur mraw, haba u la jia long ha ka jingsyriem ki briew; te haba la shem ïa U ha ka rukom kum u briew, u la lehrit ïa lade, haba u la jia long uba kohnguh wat haduh ka jingïap, hooid, ka jingïap ka deingphna keiñ.” (Philip 2:5-8)

Kitei ki kyntien haneng ki kubur ba ka ktien “jingmut” la pyndonkam ban thew ïa ka jinglong. Ka jingmut ne ka jinglong U Khrist ka dei kata kaba sngewrit bad kaba kohnguh. Te haba U Paul u kren shaphang ka jingïaimut brai jong ka doh, ka long kaba shai ba u kren ïa ka jinglong bapop, kaba ha ka jinglong tynrai jong ka hi, ka long kabym kohnguh bad kaba sarong – ka juh hi ka jingmut ba U Adam u la ïoh hadien ba u la artatien ïa U Blei bad ba u la pynkhlad noh ïa lade na U. Kane ka pynpaw ba u khun bynriew u don ïa ka jingim kabym lah, da lei lei ruh, ban ïaleh pyrshah ïa ka pop bad ka jingthom bor jong ka kumba ngi lah ban shem ha kane ka jingong jong U Paul shaphang ka jingïashem jong u bashimet.

“Namar ïa kata kaba bha ïa kaba nga mon ngam leh; hynrei pleng ïa kata kaba sniew ïa kaba ngam mon, ïa kata keiñ nga leh.” (Rom 7:19)

Dei ha kane ka jinglong ha kaba ngi ïai ïaleh pyrshah ïa U Blei, ba U Blei U la jied ban pynïasuk ïa ngi bad U lyngba ka jingïap U Khun jong U. Te, ha ka jingai ïa la U Khun, U Blei U tyrwa ïa u khun bynriew ïa ka jingïasoi ban don ka jingïasuk. Kane ka jingïsoi ïa ka jingïasuk ka la dei ban pynmyntoi ïa u bangeit bad ubym ngeit ruh ha kajuh ka por. U apostol Paul ha ka shithi baar jong u sha ki nong Korinth u pynpaw shynna ïa kane ka jingshisha ha ngi.

“Kata ka long ba U Blei U dang pynïasuk ïa ka pyrthei ha lade hi ha U Khrist, khlem da ñiew ha ki ïa ki jingpalat jong ki; bad ba U la buhti ïa ngi ïa ka ktien kane ka jingpynïasuk.” (2 Korinth 5:19)

Ïano la pynïasuk bad U Blei? Ka dei ka pyrthei – ka pyrthei hi baroh kawei – kaba la pynïasuk bad U Blei. U runar ba ehrang tam bad ki nongsyshar ba sniew tam la pynïasuk ïa ki bad U Blei. Ki pop jong ngi kim long shuh ki dieng pyngkiang kiba lah ban pynïakhlad ïa ngi na U Blei namar ba U Khrist U la weng shi shyndon ïa kane ka bynta jong ka jingeh naduh ka tyllong, kaba long ka jingïakhlad na U Blei. Ka jingïap jong U ka la plie ïa ka khyrdop khnang ba baroh ki nonpop ki lah ban wan sha U Blei kumba ki long.

Ïa kane ka jinghikai la pynïeng pharshi da ka jinglehñiam ka jinglait. Mynba ki Israel ki la jan dei ïa ki ban mih na ka ri Ijipt, U Blei U la hukum ïa ki ban tah ïa ka snam jong u khunlangbrot ka jinglait ha ki dieng shawkad khnang ba ynda haba u angel ka jingïap u ïohi ïa kata ka snam, un ïaid lait noh na kata ka ïeng bad un ym pynïap ïa ki khun nyngkong jong uwei pa uwei u jingthaw jong kata ka longïing. Ïa kane ka jinglehñiam la thaw dur ïa ka ha kata ka rukom ba ki Jiw lem bad ki nong Ijipt kin lah ban myntoi na ka. Ka longïing ki nong Ijipt ki lah ban lait na kane ka khlam tang lada, da ki don ka jingngeit, ki lah ban ïoh jaka rieh ha ka ïing jong uno uno u khun Israel uba kohnguh ïa ka jingbthah U Blei. Namar kane, ka snam jong u khunlangbrot la mang ban pynim ïa ki Jiw bad ki nong Ijipt. Ki Jiw ki ïeng pharshi ïa ki briew kiba tip bad ithuh ïa U Blei katba, ki nong Ijipt pat ki ïeng ïa kito ki briew kibym don ïa ka jingtip shaphang U Blei bashisha.

Namar ba ïa ka pyrthei hi baroh kawei la pynïasuk, hato ka dei mo ba baroh kawei ka pyrthei kan lait im? Hato baroh ki briew kiba la im naduh mynshua, naduh ka por U Adam haduh kine ki sngi, kin ïoh pateng ïa ka jingim bymjukut? Em, ym kumta. Balei? Namar ba U LUM KABARI UM DEI KA JINGPYNIM!!! U SHU PLIE ÏA KA KHYRDOP SHA KA JINGPYNIM!!!

Ka daw ba baroh kin ym ïoh ïa ka jingpynim ka long ka jingbymngeit. Ka jingbymngeit ka la pynduh lad ïa ka pyrthei na kaban pdiang ïa ka jingaisngewbha jong ka jingpynïasuk ba la wanrah da ka jingïap jong U Khrist. Ka jingbymngeit ruh ka la pynlong pat ïa kito kiba la pdiang ïa ka jingaisngewbha jong ka jingpynïasuk ban sangeh noh ha ki kjat u diengphna; ka la pynmatlah ïa ki ban sngewthuh ba ka jingïaïaid lynti kam dut tang hangne. Ka jingbymngeit ka la kah ïa ki briew na kaban rung lyngba ka khyrdop kaba la plie sha ka jingim bymjukut. Ka jingbat skhem ïa “u diengphna ba thynrim” kan ym lah ban pynlong ïa ngi ki Khristan kiba kham bha. Ha ka jingshisha, ngi long thik kum ki nongpop bashyrkhei tam naba ka diengphna ka dei tang na ka bynta ki nongpop.

Nalor kane, kam dei ka jingïap kaba long kaba kongsan. Lada tang ka jingïap ka la biang ban pynim ïa ngi, te yn leh aïu ba U Khrist Un mih pat? Hynrei ka Baibl ka hikai ïa ngi ba ka long kaba donkam eh ba U Khrist U dei ban mihpat na kiba ïap.

“Te lada ïa U Khrist ym shym la pynmihpat, ka jingngeit jong phi ka long kaba thala; phi dang sah ha ki pop jong phi. Te kumta ruh, kita kiba la ïohthiah ha U Khrist, ki la jot noh keiñ. Lada tang ha kane ka jingim hi ngi long kiba kyrmen ha U Khrist, ngi long kiba kordit tam na ki briew baroh.” (1 Korinth 15:17-19)

KA KAM JONG KA JINGPYNIM

Namar kata, ka long kaba kongsan eh ba U Khrist U hap ban mihpat namar khlem U Nongpynim ba la mihpat, ki jingim jong ngi ki long kiba khlem ka jingkyrmen. Hynrei ka jingim U Khrist pat ka don ïa ka bynta kaba kham kongsan, kata ka long ka jingthmu ban pynim ïa ki mynsiem briew. Katba ka jingïap jong U ka pynïasuk ïa ngi bad U Blei, kadei ka jingim jong U pat kaba pynim shisha ïa ngi ha kaba kut.

“… te khamtam shibun, haba la pynïasuk ïa ngi, la pynim ïa ngi da ka jingim jong U.” (Rom 5:10b)

Balei ka jingim U Khrist? Namar ka jingjop U Khrist halor ka pop ka dei eh ha ka diengphna. Dei hangne ba ïa U “la pynlong ka pop” bad u la pynrem ïa ruh ïa ka. Ban shu batai bniah khyndait, ha ka sien kaba nyngkong bad kaba khadduh eh, ka pyrthei ka shem ha U Khrist TANG KAWEI ka jubab ïa ka jingïaleh pyrshah ka pop bad ki jingtim jong ka. Kane ka jingim ka long ka jingim bahok U Khrist, tang kane ka hok kaba U Blei U pdiang. La ong ruh shaphang jong ka ba ka long ka “jingim bymjukut.” Bad haba ong ka “jingim bymjukut”, kam thew eh tang katno slem ngin im hynrei ïa ka jingim kaba kumno ngi im. Hynrei wat leit sngewthuh bakla ba kane ka jingim ka dei tang ka jingim U Khrist kaba im hapoh jong ngi, hynrei U dei hi U Khrist Uba im ïa ka jingim jong U hapoh jong ngi bad lyngba jong ngi da U Mynsiem jong U. Dei ïa kane keiñ ba ka Baibl ka khot “ka jingkyrmen ka burom.”

“U Khrist ha phi, ka jingkyrmen ka burom.” (Kolossai 1:27)

Namar kata, kam da dei eh ka jingïap hynrei ka jingim bajop jong U Nongsiewspah ka pyrthei kaba long kaba kongsan tam. Ka bynta jong ngi ka dei ban shu NGEIT – ban don ka jingngeit – ka jingngieit ba treikam.

******