Ka Jingkheiñ duh bakhraw tam eh

Ha kawei na ki jingïakren jong U bad ki Jiw kiba kob da ka jingshitrhem bakhraw shaphang ka jinghiarpateng jong ki na U Abraham, hynrei ha ka juh ka por pat ki kyntait ïa baroh ki sabut bapaw shynna ba U long Uta U Messiah Uba ki la ap khmih la bun bun snem, U Jisu U la kren ïa ki kyntien ba ot kiba long ruh kum ka jingsneng jingkhraw ïa ka jingleh khnang ka jong ki ban ïakhun pyrshah ïa ka jingsngewthuh baskhem ba la ban jur ha ki dohnud jong ki da U Mynsiem Bakhuid.

“U Abraham u kpa jong phi u la shad kmen ban ïohi ïa ka sngi jong Nga: te u la ïohi bad u la sngewkmen.” (Ïoannis 8:56)

Ka long kaba shisha ba U Abraham u khlem shym la im slem haduh katta katta ba un lah ban sakhi da la ki jong ki khmat hi ïa ka jingpyndep ïa ka jingïathuhlypa shaphang ka jingwan U Messiah. Namarkata, kine ki kyntien kiba la kren da U Jisu ki pynthikna bad nang pynskhem shuh shuh ïa ki sabut kiba bun bah ha ka Testamen Barim ba U Abraham um long shisha tang u nongïathuhlypa uba la don ka jingïakren bad U Blei, hynrei ka pynpaw ruh, ba kum u nongïathuhlypa, u la ïoh ïa ka kabu ksiar ba u da ïohi shisha lyngba ki jingithuh paw ïa ka jingwan jong U Nonpyllait im ban siewspah ïa u briew na ka pop. Kane ka la wanrah ïa ka jingkyrmen ha ka dohnuh jong une u kpa tymmen bad ka jingthikna baskhem ba Uta “U Symbai ka jingkular” Uba dei ban hiar pateng na u, Un kyrkhu ïa ki jaitbynriew baroh lyngba ka jingim, ka jingïap bad ka jingmihpat jong.

Hynrei, ka don sa kawei pat ka jingpynpaw ba U Blei U la pynpaw ha U Abraham kaba la wanrah ïa ka jingsngewthuh bapura shaphang ka jinglong bashisha ha kaba ïadei bad ka jingtreikam jong ka jingthmu ka lad ka jingpynim. Kane ka jingpynpaw ka long kaba ïasyriem ïa ka jingshisha haduh katta katta ba ka jingktah jong ka ka la long kaba khraw bad kaba la neh slem ha ka jingmut jingpyrkat jong U Abraham haduh ba, ynda u la lah ban ïohi ïa ka jingmut jong ka, u la leh kmen bad dap da ka jingsngewbha bakhraw eh. Kane ka jingpynpaw ka long ka jingïathuhkhana shaphang ka jingieit baïaineh jong U Blei bad U Khrist na ka bynta u briew ba Ki kloi ban leh lut khnang ban pynim ïa ngi. Kane ka jingïathuhkhana ka dei shaphang ka jingkheiñ duh bakhraw tam eh.

Arphew snem duna hadein ka jingkha ïa U Isaak, U Abraham u la hap ban ïaid lyngba ka jingtynjuh bakhrawtam jong ka jingim jong u. U Blei sa shisien pat U la ïakren bad u, ha kaba U la hukum ïa u ban leit sha ka ri Moraïa bad ban ai ïa U Isaak kum ka jingkñia ainguh thang ha kliar jong u lum uba U Blei hi U la jied. Watla kane ka hukum ka long marpyrshah ïa ka jinglong jong U Blei Uba ishi ïa ka jingleh jong ki briew ban kñia ïa la ki khun, U Abraham u la long uba ïaineh ban pyndep ïa kane ka hukum, da kaba shaniah lut ba U Blei U don ki jingthmu ba kham bha na ka bynta jong U. Ka jingpynpaw ïa kane ka jingngeit lah ruh ban sakhi ha ka jingjubab jong u ïa ka jingkylli U Isaak shaphang u khun langkñia.

“Te U Isaak u la kren ha U Abraham u kpa jong u, bad u la ong, Ko kpa jong nga: u ruh u la ïathuh, Ha khmih, ma nga, ko khun jong nga. Hadein kata u da ong, Ha khmih ka ding bad ki dieng: hynrei haei u khun langbrot ïa ka jingkñia ainguh thang? Bad U Abraham u la ïathuh, Ko khun, U Blei Un pynïoh lypa hi ïa lade ïa u khun langbrot ïa ka jingkñia ainguh thang: kumta ki la ïaleit baroh arngut ryngkat.” (Jenesis 22:7,8)

Ka jingeit jong U Abraham la kren kyllum ruh ha ki kyntien u apostol Paul ha ka shithi jong u sha ki Hebru ha kaba u la ong ba U Abraham u la ngeit ba U Blei U lah ban pynkhie im biang ïa U Isaak na ka jingïap.

“Da ka jingngeit U Abraham, ba la tynjuh ïa u, u la kñia ainguh ïa U Isaak: hooid, uta hi uba la lah pdiang da kaba kmen ïa kita ki jingkular, u la kñia ainguh ïa la u khun ba la kha marwei; … u da kheiñ ba U Blei U lah ban pynmihpat wat na kiba ïap; nangta ruh u la ïoh pdiang pat ïa u ha ka jingsyriem.” (Hebru 11:17-19)

Ym lah ban len ba ynda haba U Abraham u la shah tynjuh, U Blei U la tynjuh ïa ka jingngeit jong U Abraham. Ha kaba kut, u la pynshisha ba u don ka jingngeit ha U Blei bad u la pynpaw ïa kane ka jingshisha da kaba shaniah bad kohnguh ïa ka ktien U Blei bad dei na kane ba ïa u la ñiew lang bad kita ki riew khraw, shynrang bad kynthei, jong ka jingngeit kiba la jer kyrteng da U Paul ha Hebru ka lynnong bakhadwei. Namar kane, u la ïohi bad shem ba ka jingngeit ka lah ban pynkynriah ïa ki “lumbah lumsan” bad ïa ki jingdwai la jubab. Lehse ka dei na kane ka daw hi ba ka jingngeit ka long ka subjek ba ha khmat tam eh ha ka jingïakren ha kaba ïadei bad kane ka jingïathuhkhana. Bad ha jan baroh ki jingïalap kiba nga la ïohnsgew ba la ïalap halor kane ka jingjia la shad tawiar halor ka jingneit U Abraham. Hynrei khlem da kheiñ haduh katno ka jingkhraw ne ka jingaimynsiem kata ka jingneit U Abraham ka long, ki don ki jinghikai ba kham khraw ba U Blei U thmu ban hikai ïa ngi lyngba kane ka jingïathuhkhana.

Nyngkong eh, kane ka jingïathuhkhana ka ai jingshai halor ka jinglong Blei. Kaba pyrshah ïa ka jingngeit ba pawnam, ka jingthmu jong ka jingpynim ka kynthup tang ïa arngut ki Longrynïeng – U Kpa bad U Khun. Ym don sabut ha ka Baibl baroh kawei ba kdew ïa ka jingdon jong lai ngut ki Longrynïeng bakynja Blei kiba don kti ha ka jingpynim ïa ki briew. U Sekharaïah u la kren shaphang ka “jingïapyrkhat ka jingsuk” kaba long hapdeng ar ki Longrynïeng – U TRAI bad U TNAT - bad ym lai ngut. ¹ Ki nongïathuhlypa, U Isaiah bad U Jeremiah, ki phynthikna ba Une “U TNAT” U long U Jisu hi. ² Ka jingïathuhkana shaphang ka jingtynjuh ïa ka jingneit U Abraham ka phalang ïa kane ka jingshisha ha ka rukom ba shai bha.

Ka jingkñia ainguh ka long ka jingleh ñiam kaba kdew ïa ka jingïap U Khrist halor ka diengphna ha kaba u khun langbrot u ïeng pharshi ïa U Khrist hi. Dei na kane ka liang ba ka Baibl ka jer kyrteng ïa U Jisu barabor kum “U Khun Langbrot U Blei”. Ha ka khep jong ka jingtynjuh bajngan jong U Abraham, ïa u khun langbrot la mihpli da la u khun jong u hi, U Isaak. Namar kata, ka long ka jingshisha bym lah ban len ba U Isaak u ïeng ïa U Jisu. Ka jingleh jong U Kpa ba ha bneng ban ai ïa la U Khun ba la kha marwei ban long ka jingkñia na ka bynta ki pop ki jong ngi ka ïahap bad ka jingleh U Abraham ban ai ïa la “u khun ba la kha marwei” kum ka jingkñia ainguh thang halor ka duwan. Ngi lah ban ïoh ïa ka jingsngewthuh ba kham ïar ynda haba ngi nujor ïa U Ïoannis 3:16 bad Hebru 11:17

“Naba U Blei U la ieit katta katta ïa ka pyrthei katba U la aiti noh ïa la U Khun ba la kha marwei…” (Ïoannis 3:16)

“Da ka jingngeit U Abraham, ba la tynjuh ïa u, u la kñia ainguh ïa U Isaak: … la u khun ba la kha marwei”. (Hebru 11:17)

Ka long kaba suk ban ïohi ba kine artylli ki dkhot ki don ka jingïasyriem kaba ïajan bha haduh katta katta. Ha ïoannis 3:16, ïa U Jisu lah jer kyrteng kum “U Khun ba la kha marwei” jong U Blei bad ha Hebru 11:17 pat, ïa U Isaak la ong ba u long u “khun ba la kha marwei” jong U Abraham. Ka long kaba shisha ba U Isaak um lah ban ïeng pli ïa U Khrist ha ka rukom bajanai kum uba la kha marwei naba nalor jong u, sa hynñiew ngut ki khun shynrang la kha ha U Abraham. Hynrei ha kaba ïadei pat bad u khun jong ka jingkular, U Isaak u long u khun ba la kha marwei jong une u kpa tymmen kumba la batai ha ka kitab ki Hebru.

“Da ka jingngeit U Abraham, ba la tynjuh ïa u, u la kñia ainguh ïa U Isaak: hooid, uta hi uba la lah pdiang da kaba kmen ïa kita ki jingkular, u la kñia ainguh ïa la u khun ba la kha marwei; ha uba la ong: ha U Isaak yn khot u symbai jong me.” (Hebru 11:17,18)

Kum ka jingkren lyngkot, ki jingjia ba la urlong ha ka ri Moraïa ki pynskhem ba ka jinghikai Lai-ha-Uwei la pynshong nongrim ha ki jingmutdur jong u briew bad ym don kano kano ka sakhi sabut ha ka Baibl ba lah ban shem kaba kyrshan ïa kane ka jinghikai babakla.

Kaba ar, ka jingïathuhkana ha Jenesis 22 ka pynpaw ïa ka jingïakhun bym lah ban mutdur jong U Blei ha ka jingaiti noh jong U ïa la U Khun kum u nongkit khlieh na ka bynta ka jaitbynriew ba la hap noh bad haduh katno ka pud ba U la long Uba kloi ban kheiñ duh ïa lade khnang ban siewspah ïa u briew na ka pop. Ka jinglehñiam ka jingkñia ainguh kam dei ka rukom kaba thymmai ha ki sngi U Abraham. Naduh ka por ba U Adam bad Ka Im ki hap ha ka pop, ïa ki la hukum da U Blei ban leh ïa kane ka jinglehñiam ha kaba ki dei ban kñia ïa u khun langbrot ba khlem thoh bria halor ka duwan. Ïa kane ka ka jinglehñiam la dei ban sumar da ki briew U Blei lyngba ki arta haduh ba ka jingïap U Khrist ha ka diengphna kan wanrah ïa ka jingkut ïa kane ka jinglehñiam. Da kane ka jinglehñiam, U Blei U thmu ba ki briew ki dei ban don ïa ka jingsngewthuh ba ka pop ka la pynlong ïa ka jingphlei snam ba lui lui ban pyllait ïa ki na ka pop. Lehse, kane ka jingsngewthuh ïa ka jingsngewsih namar ka jingïap jong U Briew ba lui lui, na ka daw ka jingbymhok jong uwei pat, ka kham jur bha ha ki briew kum U Abel kiba ka kam ka jong ki ka dei ban sumar ïa ki mrad ka lyngkha. Nga ngeit ba kan jin da la long kaei kaei kaba eh bha ïa ki briew kum ma u ban sakhi ba ïa ka jigim jong iwei na ki jingri jong u ba yn shah shim noh, khamtam eh lada uta u mrad u dang don ha ki rta banyngkong eh ka jingim jong u. Hynrei ka jingshitom mynsiem kam shym la kut tang hangne. Ka jinglehñiam ka jingkñia la pynwan dur ha kata ka rukom ba uno uno uba hap ban ai ïa u khun langbrot kum ka jingainguh thang halor ka duwan, u dei ban pynïap hi ma u ïa une u mrad shuwa ba U Blei Un pdiang ïa ka.

Hynrei, ki don ki khep ha kaba ka jingpynïap ïa u mrad kam dei kaei kaei kaba eh ïa u briew ban leh bad ka jingthmu jong kane ka jingleh kam don bor ban ktah ïa ki katto katne ki briew, kaba long ka jingshisha ha kaba ïadei bad kiba bun na ki Jiw kiba shim ïa kane ka jinglehñiam tang kum ka kamram ba hap ban pyndep khnang ba yn lah ban pynïasuk ïa ki bad U Blei namar ki pop ki jong ki. Ka long kaei kaei kaba sngewsih ba kum kine ki briew kim shym la sngewthuh ïa ka jingkordor jong ka khubor ba U Blei U thrang ban hikai lyngba kane ka jinglehñiam. Nga ngeit ba ka dei na kum kane ka daw ba U Blei U la jied ban pyndonkam ïa U Abraham bad U Isaak kum ki lad jinghikai ban ai ïa ka khubor kaba kham donbor ha kaba ïadei bad ka jingthmu jong ka lad ka jingpynim. Kane ka khubor ka long ba, dei U Blei hi Uba pynïap ïa la U jong U Khun! Ïa kane ka jingleh la paw ha ka jingdonkam jong U Abraham ban shim ïa ka jingim jong U Isaak.

Ka jinghikai bapawnam ka ong ba ka long kaba donkam ba U Khun U dei ban wan long briew namar ba ha ka met bakynja Blei ka jong U, Um lah ban ïap naba U don ïa ka jingim bymjukut. Te ha ka jingwan long briew pat, U Jisu U la ieh noh ïa ka jinglong jong U bym lah ban ïap bad kane ka la pynlong ïa U ba Un lah ban shah ban da ka jingïap. Hynrei, nga shem ba kane ka jingsngewthuh ka don bun ki jingbakla ha ka na ka daw ba ha ka jingwan long briew ka jong U, kam shym la don kano kano ka jingkren ha ka Baibl ba kdew ba U ïoh pateng ïa ka jingim U Adam kaba ïakhlad na U Blei. Ka long kaba shisha ba U la wan ha ka dur ka doh pop, hynrei ym ha ka jingim bapop jong u briew. Lada U Khrist U ïoh ïa ka jingim bapop jong U Adam, kane ka mut ba U la long Uba pop naduh ba la pun ïa U ha ka kpoh jong ka Mari. Hynrei ki kyntien U Jisu hi ki pynpaw shynna ba ka met ka jong U ka la ju ïai long beit hi ka temple jong U Blei lait noh sa tang katto katne por ba halor ka diengphna mynba ïa U la pynlong ka pop.

“U Jisu U la ïathuh bad U la ong ha ki, Phin pynjot ïa kane ka templ, te lai sngi Ngan pynïeng pat ïa ka. Ynda kumta kita ki Jiw ki la ïaong, Sawphew hynriew snem shu dang tei ïa kane ka templ, ma Me te lai sngi Men pynïeng pat ïa ka? U hynrei u kren shaphang ka templ ka met jong U.” (Ïoannis 2:19-21)

Shuh shuh, ha ka jingkylla ka jong U na ka met Blei sha ka met briew, ym shym la don ka jingsangeh ha ka jingim ka jong U Jisu. Namar kane, ha shuwa bad hadien ka jingwanlong briew ka jong U, U Khun U Blei U don ïa ka jingim bymjukut. Kane ka jingshisha lah ban shem ha kine ki kyntien harum ba la shem ha ka gospel U Ïoannis.

“Namar kumba U Kpa U don ka jingim ha lade, kumta U la ai ha U Khun ruh ban ïoh ka jingim ha lade”. (Ïoannis 5:26)

Kane ka “jingim ha lade” kaba U Kpa U don ka dei ka jingim bymjukut. Bad lada ka dei kane ka jingim ba U la ai ha la U Khun, te ka long kaba shongnia ban ong ba U Khun ruh U don ïa ka jingim bymjukut. Ïa kane ka jingim la ju khot ïa ka ha kawei ka por kum ka jingim “kaba tynrai, kaba khlem pan kylliang, kaba khlem ïoh pateng”. ³ Don kito kiba kloi ban ong ba lada kane ka long ka jingim ba U Khrist U don, te katkum ka jingkit jingmut jong kine ki kyntien, ka beit ban ong ba U long U Longrynïeng Uba don kajuh ka jinglong jong U Kpa hi, Uba khelm kano kano ka jingsdang, kaba pynlong ïa U U Blei hi. Ha kiwei pat ki kyntien, ka Lai-ha-Uwei ka len ïa ki kyntien bashai jong ka Kotbah ba U Khrist U ïoh ïa ka jingim na U Kpa. Hynrei ïa kito kiba poi ban ngeit ïa kum kine ki jinghikai, ka long kaba donkam ïa ki ba ki dei ban peit ïa kine ki kyntien ba la thoh hi da ka nongthoh kaba la ong ba ka jingim U Khrist ka long ka jingim “kaba tynrai, kaba khlem pan kylliang, kaba khlem ïoh pateng”.

“Ha [U Khrist] don ka jingim, kaba tynrai, kaba khlem pan kylliang bad ba khlem ïoh pateng. Kane ka jingim kam shym don ha u briew. U lah ban ïoh ïa ka tang lyngba U Khrist. Um lah ban ïoh da kaba trei shitom; ka dei kaei kaei kaba la ai ha u kum ka jingai sngewbha lada un ngeit ha U Khrist kum U Nongpynim jong U.” (U Khrist U Nongai Jingim da ka Ellen G. White, Signs of the Times, April 8, 1897, par. 2)

Katkum kane ka jingong, ym don kano kano ka jingpyrshah ïa ka jingshisha ba u briew ruh u lah ban ïoh pdiang ïa ka jingim “kaba tynrai, kaba khlem pan kylliang, kaba khlem ïoh pateng”, ka juh ka jingim kaba bun ki shim ba ka pyntbit ïa U Khrist ban long uwei na ki Longrynïeng jong ka Lai-ha-Uwei, ba khelm ka jingsdang. Hynrei ha kajuh ka por, ka long kabym shongnia pat ban ong ba u briew um don ïa ka jingsdang bad ba u long naduh bymjukut sha bymjukut, kaba mut ba u long u blei. Kumjuh ruh, ka long kabym shongnia ban ong ba tang namar ba U Jisu U don ïa ka jingim “kaba tynrai, kaba khlem pan kylliang, kaba khlem ïoh pateng”, ba Um don ka jingsdang.

Namar ba U Khrist U don ïa ka jingim bymjukut, ka long kaba shong nia ban ong ba Um lah da lei lei ruh ban ïap. Kane ka mut ba, baroh ka jingshah sympat ba U la ïoh, ki prek ba la sah ha ki kti bad ki kjat jong U bad ka snam ba la mih na ki jingmong jong U kim don bor ban pyndkut ïa ka jingim ka jong U Khun U Blei. Bad ruh, ka jingïap da kaba shu sah narphna ka long ka jingïap bashyrkei bha, kaba la thaw dur ha kata ka rukom ba uno uno uba shah sah narphna un ïai im katto katne sngi shuwa ba un ïap. Hynrei ka jingjia bakhyllah ka la jia ïa U Khrist naba dei tang ma U Uba la ïap tang hapoh katto katne kynta hadien ba la sah narphna ïa U. Ki shipai kiba la sah ïa u ha u diengphna ki la lyngngoh ban sakhi ïa kum kane ka jingjia bakhyllah haduh katta katta ba uwei na ki u la sngew ba u dei ban pynthikna ïa ka jingsuba ka jong u da kaba u sam ïa ka met U Nongpynim da u som. Kane ka long ka sabut ba ka

jingïap jong U kam shym la dei na ka daw jong ka jingleh ki briew hynrei ka kti bakynja Blei ka la don bynta ha kaban pynlong ïa U Khun U Blei ban ïap. Ki kyntien U Isaiah, u nongïathuhlypa ki phla ïa kane ka jingshisha.

“Shisha [U Khrist] U la bah ïa ki jingkhuslai jong ngi, bad u la kit ïa ki jingsngewsih jong ngi: pynban ngi la ñiew ïa U ba la pynmong, ba la shoh da U Blei, bad ba la pynjynjar. Hynrei la pynmong ïa Une namar ki jingryngkang jong ngi, la pynlwet ïa U namar ki jingleh bymhok jong ngi: … Pynban [U Kpa] U la mon ban pynlwet ïa U; U la pynkhuslai ïa U…” (Isaiah 53:4-10)

Kumno ba U Blei U la pyndep ïa kane ka bynta jong ka jingthmu? Ka dei da kaba weng noh ïa lade na la U Khun. Namar ba la shah bthat noh na U Tyllong jong ka jingim, U Khrist, ha kaba kut, U ïap noh. Namar kata, ka long kaba shongnia palat ba ka bainong ka pop (ka jinglong kaba ïakhlad na U Blei, Uba tang ma U Uba long U Tyllong ka jingim) long ka jingïap.

Lyngba ka jingïashem jong U Abraham bad U Isaak, U Blei U pyrshang ban shon ha ki jingmut jingpyrkhat ki jong une u kpa tymmen bad ha ngi ruh kiba im ha kine ki sngi ba lada U Abraham, uba long u nongpop, u shem jingeh ban shim noh ïa ka jingim u khun jong u, katno tam lei ka long ka jingeh bakhraw ïa U Blei Uba khlem pop bad Uba long ka jingieit ban pynïap ïa la U Khun ba la kha marwei. Kane ka ngan ai jingshai shuh shuh bad ai jingmut shuh shuh halor ka jingmut jong ki kyntien, “Naba U Blei U ieit katta katta ïa ka pyrthei”. Ka jingieit U Blei ka kham khraw ban ïa ka jingim hi ba U la kloi ym tang ban aiti noh ïa la U Khun hynrei U la long Uba ïaineh ruh ban pyndep ïa ka jingthmu ban shim wat ïa ka jingim jong U Khun jong U khnang ba ngi lah ban ïoh sa kawei pat ka lad. U apostol Ïoannis sa shisien pat u la ai ïa ka jingkren baïahap bha haba u la ong ïa kane harum:

“Ha kane la pynpaw shynna ïa ka jingieit U Blei ha ngi, ba U Blei U la phah ïa la U Khun ba la kha marwei sha kane ka pyrthei, ba ngin ïoh im da U.” (Ïoannis 4:9)

Khadduh kadwai, halor ka jingshisha ba ka jinglong briew U Khrist kam shym la pynkylla ïa ka jingshisha ba Um lah ban ïap, ka long kaba shisha ban ong ba ki don ki jingthmu ba kham jylliew bad ba kham kongsan ba ka jinglong briew ka jong U ka don ban pyndep. Kawei na kine ki jingthmu ka long ban weng ïa ka jingtim jong ka pop. Ban sngewthuh ïa kane, ka long kaba kongsan ban kren ïa ka jingshisha ba dei U Adam banyngkong ba la wanrah ïa ka jingtim ha lade bad ha u khun bynriew hi baroh kawei na ka daw jong ka pop ka jong u, bad ka donkam ïa u briew kum ma u hi ban jop ïa ka pop bad ha kajuh ka por ban weng ruh ïa ka jingtim jong ka pop. Ïa kane ka jinghikai lah ban shem ha ka jingïashem U Isau. Da kaba die noh ïa ka hok jong u kum u khun nyngkong jong U Isaak ha ki kti jong u para jong u, U Jakob, U Isau u la duh noh ïa ki jingkyrkhu ba la mang na ka bynta jong u bad mynta u la buh ïa lade hapoh ka jingsynshar jong u para jong u. Ki jingtim ba la kren da u Isaak ha U Isau la pynpaw ha U Isaak lyngba ka jingithuhpaw bad ym don kano kano ka lad ne ka lynti ban pynkylla ïa kine ki kyntien naba ki long ki khubor ba la pyrsad mynsiem da U Blei hi. Hynrei ka dang don ka jingkyrmen na ka bynta U Isau, namar ba U Isaak u la da kren da kaba shai ba hadien ba U Isau u la don hapoh ka jingsynshar u para jong u, ha kawei ka sngi un sa pynkhyllem ïa kane ka jingtim.

“Te U Isaak u kpa jong u u la ïathuh, bad u lah ong, … Bad da ka waitlam men im, bad ïa la u para men shakri; kan jia ruh haba la ïoh jop ïa me, ba men pynkheiñ ïa ka lyngkor jong u na la ka ryndang.” (Jenesis 27:39,40)

Kine ki kyntien U Isaak kim thew tang ïa U Isau marwei, hynrei ki kynthup ruh ïa ki pateng jong u. Te ka jingpynkheiñ ïa ka lyngkor na ka ryndang U Isau ka thew ruh ba ïa ka jingtim lah ban pynkheiñ da uno uno u dkhot jong ka pateng bynriew U Isau. Ki soh jong kane ka jingjop bad ka jinglaitluid ki dei na ka bynta jong baroh ki khun U Isau. Ha kajuh ka por, lada don kum uta u briew uba lah ban jop ïa ka pop bad pynkheiñ ïa ka jingtim jong ka, u dei ruh ban lah ban ai ïa kane ka jingim bajop ka jong u sha baroh kiba ngeit bad bakloi ban pdiang ïa ka. Khnang ba kane kan trei kam, da kumno kumno ruh, yn donkam ar tylli ki kyndon. Nyngkong eh, ka jingim jong uta u briew kam dei ban shah pyntngit da ka pop lano lano ruh. Ha kiwei pat ki kyntien, ka jingim jong u dei ban ai tang na u bad lyngba jong u. Um lah ban pyndonkam ïa la ka tnga ban ai ïa kane ka jingim sha ki khun pateng jong u bad ki khun bynriew hi baroh kawei namar ha ka jingïakhun ka jong u pyrshah ka pop bad ka jingpynshoi, dei tang ma u marwei uba la ïoh ïa ka jingjop halor ka pop bad ym ka tnga ka jong u. Kaba ar, u dei ruh ban don ka bor ban tyrwa bad ai ïa kane ka jingim ha uno uno bad ha baroh kiba kloi ban pdiang ïa ka ha kano kano ka por. Ban pynsngewthuh khambha, ka donkam ïa u ban long ubym lah ban ïap, uba don ha man la ki jaka, uba khrawbor eh bad uba tip lut ïa kiei kiei baroh. Don tang uwei u briew uba tbit ban leh ïa kane ka kam bad uta u long U Jisu Khrist namar u la mihpat na ka jingïap da ka jingim bymjukut bad ha ka jingpyndon burom ïa U, ki bor ba kynja Blei, kiba kynthup ïa ka jingdon ha man la ki jaka, ka jingkhrawbor eh bad ka jinglah ban tip lut ïa kiei kiei la pynïoh biang ha U. Dei na kane ka daw ba tang ma U ba long ka lynti, ka jingshisha bad ka jingim; bad namar kane, U ïoh ruh ïa ka nam kum U Adam bakhadduh.

¹ “To kren ha u da kaba ong kumne, Kumne U kren U Trai ki paid, Ha khmih uta u briew uba kryteng U Tnat; bad un mih lung na la ka jaka, bad un tei ïa ka templ U Trai: un tei ma u keiñ ïa ia ka temple U Trai: bad un bah ïa ka burom, bad un shong bad un synshar halor la ka khet: bad ka jingpyrkat ka jingsuk kan long hapdeng jong ki baroh ar.” (Sekharaiah 6:12,13)

² “Te un mih u tnat lung na ka met U Jesse, bad u tnat na ki thied ki jong u un seisoh:” (Isaiah 11:1)

“Ha khmih ki sngi kin wan, ong U Trai, ba Ngan pynmih ha U Dabid ïa U Tnat uba hok, te Un synshar kum U Syiem bad Un leh stad, bad Un leh ïa ka jingbishar bad ïa ka hok ha ka ri.” (Jeremiah 23:5)

³ “Ha U Khrist don ka jingim, kaba tynrai, kaba khlem pan kylliang, kaba khlem ïoh pateng.” (Ka Jingthrang ki Arta da Ka Ellen White, Lynnong – 58, sla 702)

******