Ngeit ha U Khrist

Ym don ka dkhot ha ka Baibl kaba la lah ban khring ïa ka jingpynleit jingmut bad kaba kot ïa ka jingpawnam kum ka Ïoannis 3:16. Ka long ka dkhot kaba la pule lyndet eh, ithuh eh, ieit eh bad ba la sot eh ha ka Baibl hi baroh kawei. Lehse, ka jingkren jong ka shaphang ka jingieit U Blei ba la paw ha ka jingphah ïa la U Khun kum ka jingsiewspah ban pyllait ïa u briew na ka pop, ka long kaba la shem jingsngewbha hapdeng bun ki Khristan. Ha kiwei pat, ka lah ban dei ka jingkular ïa ka jingimbymjukut kaba khring ïa ka jingmut jingpyrkhat ka jong ki. Bad don ruh sa kito kiba kam ba ka jingpawnam jong ka ka wan na ka jingpyrshang jong ki ban pule lyndet ïa kane ka dkhot ha ki Sabbath Skul bad ki Sunday Skul bapher bapher. Katba long ka daw jong ka jingpawnam ba shyrkhei jong ka, nga ngeit ba kane kam dei kaei kaei kaba shu leit jia ryngkhat. U Blei hi U la buh ba kan long kumne namar ba kane ka dkhot, watla ka long kaba suk, ka ai ïa ki mat bakongsan ka jingshisha kiba kren shaphang ka jingïadei bashisha hapdeng U Kpa bad U Khun.

Hynrei haba kren shaphang ka jingpawnam, kam mut ba tang namar ba ïa kane ka dkot la sot ne pule, ba kiba bun kin kem bad bat ïa ka khubor ba kane ka dkot ka don ban ai ha uba sngap ne uba pule ruh. Ngam lah ban kren na ka bynta kiwei pat ki kynhun Khristan, hynrei ha kaba ïadei bad ki paid riew ngeit OTG (One True God/Uwei U Blei Bashisha), ka jingpyleh jingmut jong ngi ka leit bha tang sha ka bynta banyngkong eh jong kane ka dkhot kaba ong, “Naba U Blei U la ieit katta katta ïa ka pyrthei katba U la aiti noh ïa la U Khun ba la kha marwei”. Ka jingsngewtynnad jong ngi ïa kane ka dkhot ka wan na ka jingshisha ba kine ki kyntien ki ban jur halor ka jingshisha ba U Blei U long Uwei, Uba don ka met, Uba don ym tang ïa U Khun, hynrei pynban, TANG UWEI U KHUN BA LA KHA MAWEI ban ai ïa kane ka pyrthei badum bad baïap.

Ngi pynskhem ïa ka jingngeit jong ngi da kiwei kiwei de ki dkhot kum: “Kane ka long ka jingim bymjukut, ba kin ïoh ithuh ïa Me U Blei Uba shisha tang ma Me hi, bad ïa U Jisu Khrist, ïa Uba Me la phah”, bad, “Hynrei ïa ngi don tang Uwei U Blei U Kpa, na Uba long kiei kiei baroh, bad ma ngi ha U; bad Uwei U Trai Uba U Jisu Khrist, da Uba long kiei kiei baroh, bad ma ngi da U.” (ïoannis 17:3; 1 Korinth 8:6). Watla bun kiei kiei la kren bad la pynbna paidbah shaphang ka jingithuh bashisha jong U Blei, bad bun ki jingmaïan” la lah ban sngewthuh na ka daw ba ngi la sngewthuh ïa kane ka jingshisha bakongsan, hynrei ka lynti kam kut tang hangne! Peit kaei kaba ka Baibl ka kren shaphang ki angel ba la hap noh ha ka pop.

“Me me ngeit ba U Blei U long uwei; me leh bha keiñ: kita ki ksuid ruh ki ngeit, bad ki sngewkuih keiñ.” (Jakob 2:19)

“Ki ksuid ruh de ki la mih noh na kiba bun, ki da pyrta jam, ki da ong ruh, Me long U Khrist U Khun U Blei. Hynrei haba U la sneng ïa ki ban kren, naba ki la tip ba U long U Khrist.” (Loukas 4:41)

Kumba long ha kiba bun na ngi, ki angel bapop ruh ki tip thik thik mano ba dei U Blei bad U Khrist hynrei ki long kiba khlem ka jingim. Namarkata, ka long kaba shong nia ba, watla ki briew U Blei ki la pynjot noh namar bymdon jingtip, ka long kaba shisha ruh ba tang ka jingitp marwei kam don bor ban pynim ïa ngi. Kane ka jingtip ka lah ban kynthup ruh ïa ka jingshisha shaphang ka jingpynim, ne kaba la tip kyrteng ruh kum “ka khubor ka hok da ka jingngeit”. Katba ka jingtip ka long kaba bha bad kaba donkam, da lade ha lade hi, kam don jingmyntoi pat lada kam don kano kano ka jingkylla pat ha ka jingim jong ngi ba man la ka sngi. Kane ka jinglong kam dei kaba don tang ha ka ñiam Khristan ha kine ki sngi ba mynta, hynrei kane ka jingeh ka la don naduh ki ïa banyngkong jong ka ñiam Khristan hi.

Lyngba ka jingpynshait bor jong U Mynsiem Bakhuid ba la theh buk ha ka sngi Pentekos, ki nongbud U Khrist ki la ïalap ïa ka khubor ka jingpynim ha kito kiba la don ha Jerusalem bad ha baroh ki bynta jong ka Hima Rom. Kum U Thomas ruh, la don katto katne kiba la leit ruh sha ki bynta bakhyndong eh jong ka pyrthei ban rah ïa ka gospel kaba kynthup ïa ka jingshisha shaphang U Blei bad U Khrist. Lyngba ka jingïatrei lang jong ki apostol bad ki evangelist, bad lyngba ka bor bakynja Blei kaba la kyrshan ïa ka kam jong ki, bun ki mynsiem la jop sha U Khrist. Hapdeng kine ki dkhot bathymmai, ki long ki lyngdoh.

“Te ka ktien U Blei ka la roi; bad la man bun shikaddei ki synran ha Jerusalem, bad u paidbah babun na ki lyngdoh u la kohnguh ha kata ka jingngeit.” (Ki Kam 6:7)

Ki Kam Ki Apostol ka kern ruh shaphang “ki kynja Pharisi kiba la ngeit”, khelm kano kano ka jingartatien, ba U Jisu U long “U Khrist, U Khun U Blei baim.” (Ki Kam 15:5; Mathaios 16:16). Kam pher haduh katno ka jingshisha bad ka jingsngur kata ka jingskhem jong ki ba U Jisu U dei shisha U Nongpynim, kine ki briew kim shym la long shisha kiba la kylla kaba mut. Ki shu pynpaw ïa ka jingkylla ha ka jinglong ñiam hynrei ym ïa ka jingkylla jong ka dohnud. Ha Ki Kam, ka lynnong 15 bad ka dkhot 1, ngi pule ïa kane:

“Te la don ki briew kiba la wan hiar na Judia, bad ki la hikai ïa ki parabangeit, ki ong, Lymda otsher ïa phi kat kum ka ñiam ka rukom U Moses phim lah ban ïoh lait im.” (Ki Kam 15:5)

Ki Pharisi ki long shibynta bad kita “ki briew” kiba na Judia kiba la ban jur halor ka jingdonkam ban sumar ïa ki hukum katkum ka kitab Lebitikus kum ka lynti ban ïoh ïa ka jingpynim. Ki la hukum ruh ïa baroh kiba la kylla Khristan, ki Jiw bad ki Jentil, ba ki dei ban sumar ïa ki hukum bad ki aiñ ba la ai da U Blei lyngba u shakri jong U, U Moses.

“Hynrei la ïeng kiba na ki kynja Pharisi kiba la ngeit, ki da ong, Kadei ban otsher ïa ki, bad ban hukum ïa ki ban sumar ïa ka hukum U Moses.” (Ki Kam 15:5)

Namar ba U Moses u long uba la kheiñ kor bha ha ka imlang ka sahlang jong ki Jiw, bad kaei kaei kaba ïadei bad une u briew la bat ïa ka kum kaei kaei kaba kyntang, te ka jingai jingmut jong ki Pharisi ha kaba ïadei bad ka jingpynim da ka jingsumar ïa ki hukum U Moses ka la ïoh ïa ka jingkyrshan ba khlaiñ bha. Kine ki briew ki la ïaid ha ka lynti kaba long marpyrshah ïa ki jinghikai U Khrist. Ka mat pdeng jong ka khubor jong ki ka thmu ban pyntlot bor ïa kaei kaba U Khrist U la leh na ka bynta jong ki bad jong ka jaitbynreiw hi baroh kawei; bad ki la ïit ban bujli ïa kane da ki jingpyrshang jong u briew bad ki jinglah jong u kum ki lad ki lynti ban pynroi bad pyndap ïa kaei kaba U Khrist U la da dep jop lypa na ka bynta jong ki. Wat lada ki ngeit naduh ka dohnud jong ki baroh ba U Jisu U long U Messiah Uba la wan ban pyllait ïa u briew na ka pop bad ki jingeh jong ka, hynrei kane ka jingtip kam shym la don ka jingktah ba paw ha ka jingïaid jingïeng jong ki ba man la ka sngi namar ba ka jingngeit bashisha kam shym la don. Namar kane, kim shym la ïit tang ïa kiwei de ki lad ki lynti ban ïoh ïa ka jingpynim, hynrei ki la hikai bad pynbor ruh ïa ki parabangeit ban pyndem ïa lade hapoh kine ki jingsngewthuh ba ïalam bakla jong ki.

Ka jingktah jong kane ka jingleh bapynthame jong ki Phrisi bad ki nongkyrshan jong ki ban khring ïa ki parabangeit na U Khrist kum kata ka lynti sha ka jingpynim ka la long kaba shykhei haduh katta katta. Ka bor kaba la don ryngkat bad kaba la kyrshan ïa ka balang naduh kaba sdang jong ka jingïaid lynti jong ka sha ki thong bad ki jingthrang jong ka ka la sdang ban tlot bad, tang hapdeng katno katne por, ka lah jah noh haduh bym ïohi shuh ïa ka. Ka balang ka la ngam ha ka jinglong bakynja mynsiem kaba tlot bad ka jingduh jingkyrmen haduh bad ki jingjop jong ki sngi ba la leit noh, mynba ïa ki kambah la leh bad ïa ki mynsiem la jop sha U Khrist, ki long tang ki jingkynmaw ïa kiei kiei kiba la jia mynshuwa eh.

Watla bun bah, ha kine ki sngi, ki la mih pyrthei ban pynbna ïa ka jingngeit jong ki shaphang Uwei U Blei bad U Khun jong U, kham bun na ki pat ki sahkut tang ha kane ka mat ba kim lah ban ngeit ha Ki. Hynrei kumba U Ïoannis 3;16 kam sdang bad kut da ka khubor ba U Blei U don ïa la U Khun ban ai, kumta ruh ka long ba, ka jingïaid lynti jong ngi, bad ka jingïaid lynti jong kito kiba hashuwa jong ngi, kam sdang bad kut tang ha ka jingtip ba ngi don shaphang U Blei bad U Khun jong U.

Hadien ba U la pynbna ïa ka jingieit U Blei ha ka jingphah ïa U sha kane ka pyrthei, U Jisu U la bteng ban ong, “… uei uei ruh uba ngeit ha U, un ym jot shuh, hynrei Un ïoh ïa ka jingim bymjukut.” Kane ka long ka bynta kaba ïoh ïa ka jingpynleh jingmut kaba duna bha bad, namarkata, ym don ba da peit bniah bad khlem da poi pyrkhat, ngi la kawang ïa ka sha kyndong kum ka mat kabym da don kano kano ka jingkongsan ha ka ha ka jingïaid lynti bakynja mynsiem jong ngi lem bad U Blei. Hynrei, ngi khelm shym la tip ba kane ka mat ka long kata kaba don hok tam eh ban ïoh kham bun ka jingpynleh jingmut ka jong ngi naba dei ha ka ba don u shabi uba lah ban wanrah ïa ka jingkylla baratbah ha ka jingim ka jong ngi. Jin ba ngi sdang ban ngeit kham bun ha U Khrist, bad ym tang kham bun shaphang jong U, ba ki kambah yn sa leh biang sa shisien pat ha ngi bad lyngba jong ngi.

Kam long kaba sngewphylla, namarkata, ba ha ki katto katne ki kyndong kynshrot jong kane ka pyrthei, ki briew jong U Blei kim sakhi ïa kajuh ka bor kaba paw pyrthei ha kiwei kiwei pat ki kynhun. Lehse, da kaba shaniah ha lade bad ha ka jinglah bad jingtbit jong u briew, ngi kheiñ poh ïa U Khrist bad ïa ka bor jong U ban wanrah ïa ka jingkylla ha ki jingim bad ki jingïashem ki jong ngi. Ngi shim ba ka jingeh kaba don ha khamt jong ngi ka long kaba ratbah haduh katta katta bad ngi kiar na kaban tur shaphrang ban ïakyduh ïa ka. Lada kane ka jinglong ka ïai sah, ngin long kiba bit dor ban shah ñiew lem bad kata ka kynhun kaba U Paul u la batai ba ki long ki briew kiba don tang ïa ka “dur ka jingriewblei, hynrei kiba la len ïa ka bor jong ka”. (2 Timothi 3:5)

U Jisu U kyntu jur ïa ki synran ki jong U ba kin don jingngeit – ka jingngeit kaba lah ban kynriah ïa ki lumbah lumsan. U kyntu ruh ïa ki briew jong u ha kine ki sngi ba kin don ïa kane kajuh ka jingngeit. Nga sngew ba, ka synjam kaba nyngkong eh kaban wallam ïa ngi sha kaban ïashem ïa kum kane ka jingngeit ka dei ban ngeit ha U.

******