Jingngeit dei ka Jingjop

Ha katei ka artikl kaba haneng, Ka Jinglong Bashisha Jong Ka Pop, ngi lah pynskhem na ka jingthoh ba ka pop kam dei tang ka jingbatai kaba ngi shem ha 1 Ïoannis 3:4, ha kaba la ong ba ka pop ka long ka jingpalat hukum. Ha ka jingshisha, ka pop ka long ka jinglong kaba ïa khlad na U Blei hynrei ym tang ka kam kaba pyrshah ïa ki aiñ jong ka hukum jong U. Ka jingpule kaba kham bniah halor katei ka jingthoh, kaba nga la jer kyteng haneng, kan pynpaw ba ka daw bashisha kaba la pynlong ïa u briew ban leh pop ka long ka jingbymngeit ne ka jingduna jong ka jingngeit. Kane ka lah wallam sha ka jingïakhald na U Blei kaba la pynlong ïa u briew ban shah synshar da ka mon jong u hi. Kane ka mon la ong ba ka long ka jingïaimut brai jong ka doh bad namar kata, ka ïai ïaleh pyrshah beit ïa ka mon bad ka hukum U Blei. Ha kiwei pat ki kyntien, ynda haba u breiw u ïoh ban pyndonkam laitluid ïa ka mon ka jong u, un poi jied ban leh ïa kiei kiei kiba pyrshah ïa ka hukum ne ban palat ïa ka hukum U Blei. Kaba mih na kane ka long ba u briew u la hap ban mad ïa ki jingjia basniew bad basngewsih na ka daw jong ka/ki rai kaba/kiba u la rai. Ïa kane lah ban kren kyllum lyngba kane ka jingjer kyrteng ïa ki mat katkum ka por ba ki la jia.

Ka jingbymngeit (bym don ka jingngeit)

Ka jingkhlad (nongpop) Ka mon lade (ka jingïaimut brai) Ki jingleh bymman (ka jingpalat hukum) Ki jingmih basngiew (ki jingtim)

Ka jingeh jong ka pop, katkum kane ka jingïohi, kam shym la sdang na ka mat kaba saw, kaba long ki jingleh bymman. Ki kam jong ngi ki dei tang ki sakhi bapaw shynna ba ngi long kiba pop. Ka jingeh hi ka sdang naduh ka mat banyngkong eh kaba long ka jingbymngeit ne ka jingduna ha ka jingngeit.

Mynta ba ngi lah tip kaei kaba la pynlong ïa ka pop ban teh ban khum ïa ki briew bad kumno ba ka pynpaw pyrthei ïa lade, ngi don kam ban kylli ïa lade kawei ka jingkylli, “Mano ne kaei kaba long ka jubab ïa kane ka jingeh?” Nga ngeit ba kiba bun na phi phi lah da tip lypa ïa ka jubab jong kane ka jingkylli bad kam don kano kano ka jingleh pyrshah ïa ka jingshisha ba U Khrist bad tang ma U hi U long ka jubab ïa kane ka jingeh. Ka Baibl ruh kam kren pyrshah ïa kane ka jinghikai naba ha Ki Rom ka lynnong bahynñiew, mynba U Paul u la kylli ïa ka jingkylli, “Ah nga u briew uba shah lanot khop! uei uban pyllait noh ïa nga na ka met jong kane ka jingïap?” (Rom 7:24), kaba mut, “Mano ban pyllait ïa nga na ka pop”, u lah ai noh ïa ka jingjubab ha ka dkhot kaba bud da kaba u ong, “Nga ainguh ïa U Blei da U Jisu Khrist Uba U Trai jong ngi!” (Rom 7:25). Kaei kaba U Paul u ong ka long ba ka jubab ka wan ha ngi lyngba U Khrist bad dei U Blei Uba ai ïa ngi ïa kane ka jubab kum ka jingaisngewbha. Peit kaei kaba U Paul u ong ha Rom 6:23.

“Namar ka bainong ka pop ka long ka jingïap; hynrei ka jingaiei ka jong U Blei ka long ka jingim bymjukut da U Khrist Jisu Uba U Trai jong ngi.” (Rom 6:23)

Watla ka long kaba suk ban ong ba U Khrist U long ka jubab na ka bynta ka pop, ka jingkylli kaba dang sah ha ki jingmut jingpyrkhat jong kiba bun ki Khristan ne kibym long Khristan ruh ka long, “Kumno ne ha kano ka dur ba U Jisu U long ka jubab ïa ka pop?” Kane ka dei kaei kaei kaba ngin ïa peit ha kane ka jingpule ka jong ngi. Bad ngan sdang naduh ka tyllong jong ka jingeh, kaba long ka jingbymngeit.

Lada phi kynmaw, nga lah ong ba ka pop ka long shibynta bad ka jinglong jingman jong u briew bad ba uwei pa uwei u briew la pun bad kha ïa u ha ka pop. Ban shu kren ha kawei ka rukom, uwei pa uwei u briew la kha ïa u da ka jinglong kaba shabar na U Blei bad u don ïa ka mynsiem kabym don ka jingngeit. Ïa kane la kren shai kdar ha Ki Salm 51:5 bad Ki Salm 58:3. Haba ngi la tip ïa kane, ka long kaba shisha ba ym don mano mano ruh ba la kha da ka jingsngewthuh ba don U Blei. Dei tad haduh ba ngi la shah hikai ba don U Longrynïeng bakhraw eh, Uba la thaw ïa kiei kiei baroh, ba ngin sa sngewthuh ba U Blei U don.

Ki khun Israel ki long ka nuksa bad ka sabut kaba paka eh ban pynpaw ïa kaei kaba nga pyrshang ban ong. Ki sawspah snem banyngkong eh jong kane ka jaitbynriew ka la long ha ka ri Ijipt. Katba ki don hangto, ki la shah ker sawdong da ki riti ki dustur jong ki nong Ijipt kibym mane bad kibym don ruh ïa ka jingtip shaphang U Blei jong ka Baibl. Nga ngeit ba ka rukom im jong ki nong Ijipt ka don ïa ka bor bakhaliñ bha halor ka jingmut jingpyrkhat bad ka jingim jong ki khun Israel haduh ba maki ruh, lait sa tang katto katne ki longïing, kim shym la don ïa ka jingitp shaphang U Blei Uba la jied ïa ki ban long ki briew ki jong U. Dei na kane ka daw, ba ha trai u lum Sinai ki khun Israel ki la kloi ban thaw da ka ksiar ïa ka dur khun masi bad ki la mane ruh ïa ka. Kane ka rukom mane ka long kaba jyllei bha ha ka ri Ijipt bamynhyndai. Na kane ka daw, U Blei U la jied ïa u nongïathuhlypa napeng jong ki, ym tang ban pyllait ïa ki na ka jingshah teh mraw hynrei ban ïai kdew ïa ki dohnud jong ki sha U Blei baim bad bashisha. Ki khlam kiba la lynshop ïa ka ri Ijipt ruh ki long kum ki sabut na ka bynta ki Jiw bad ki nong Ijipt ba U Blei U don. Ha ka jingshisha, la slem bah ba ki briew bala jied jong U Blei kim shym la don ïa ka jingtip shaphang U Blei jong ki kpa tymmen ki jong ki – U Abraham, U Issak bad U Jacob.

Ka jinglong jingman jong ki khun Israel ha ki sngi U Moses ka phalang ïa ka jinglong jingman jong ka pythei ha kine ki sngi. Ngi im ha ka juk ba ki briew kim tip lane kim thikna lada U Blei U don shisha ne em. Peit kaei kaba Ki Salm ki ong.

“Uba bieit u la ong ha ka dohnud, Ym don U Blei. Ki long kiba pyut, ki la leh ki kam kiba ijli; ym don shuh uba leh babha. U Trai U la jngoh arsut na bneng ïa ki khun bynriew, ban khmih la don ne em mano mano ba la shemphang, ba la wad ïa U Blei. Baroh ki la ïasakma noh; ki la kylla jakhlia lang noh; ym don shuh uba leh babha, em ym don uwei ruh.” (Salm 14:1-3)

Katkum kane ka dkhot, ka jingbymtip ïa U Blei bad ki lynti ki jong U ka long kaba jynrei bha. Kane ka wan na ka jingshisha ba u briew u kiar na kaban ïit ïa U. Ka Baibl ka ong ba kiba bieit kim phla ïa ka jingdon jong U Longrynïeng bakynja Blei bad Uba long ha khlieh tam eh bad ki isish ïa ka jingtip (Proberb 1:22). Kham bun sien, kane ka jingtip ka kdew ïa ka jingtip shaphang U Blei kaba la jer kyteng ruh kum “ka jingsheptieng ïa U Trai”, kumba la shem ha ki Proberb.

“Namarba ki la isih ïa ka jingtip, bad ba kim shym la jied ïa ka jingsheptieng ïa U Trai.” (Proverb 1:29)

“Kumta te men shemphang ïa ka jingsheptieng ïa U Trai, bad men shem ïa ka jingtip ïa U Blei.” (Proverb 2:5)

Ha kine ar ki dkhot, ngi shem ïa ka nuksa bakynsai bha jong ka rukom thoh kaba la pawnam bha hapdeng ki nongthoh jong ka testamen barim, ha kaba ki ong ïa kawei kaei kaei bad kin sa pynbud bad da kajuh ka jingong, hynrei ha ki kyntien kiba pher, khnang ban pynsngewthuh ïa ka jingkit jingmut jong ka jingong kaba nyngkong.

Ka long shisha kaba shai ba ka jingtip ïa U Blei ka duna bha ha ka imlang ka sahlang ka jong ngi bad namar kane, ka jingbymngeit ha U Blei ruh ka jynrei bha bad ka lah ruh ban nang ïar bad pur katba dang ïaid ka por. Bad kumno keiñ ba phi lah ban buh ïa ka jingngeit ka jong phi ha kano kano ne uno uno uba phi phim ithuh ne thikna ba u don. Ka long kabym lah. U Paul u kren halor kane ka mat ha ka rukom kaba skhem bha, khlem da ieh kano kano ka jingartatien, bad u ai ruh ïa ka jubab ban weng ïa kane ka jingeh.

“Namar uno uno baroh uban khot kyrpad ïa ka kyrteng U Trai, yn pynim ïa u. Kumno te kin ïakhhot kyrpad ïa Uta Uba kim shym la ngeit? kumno de kin ïoh ngeit ha Uta shapahng Uba kim shym la ïohsngew? kumno de kin ïohsngew khlem uba ïalap?... Kumta te kata ka jingneit ka jia na kaba ïohsngew, bad kata kaba sngew da ka ktien U Blei.” (Rom 10:13,14,17)

Shisha keiñ, ka jingngeit ha U Blei lah ban pynkhie-im biang sa shisien pat lada ka pyrthei ka ïohsngew ïa ki jinghikai ka ktien jong U. Hynrei balei pat ka ktien U Blei? Hato ka dei namar ba kiba thoh ïa ka ki la shah pynïaid da ka bor U Blei mynba ki dang thoh ïa ka? Watla kane ka long kaba shisha na kawei ka liang, ha kawei pat ka liang, kaei kaba pynlong ïa kane ka kitab kaba kyrpang ka long ba ka kren shaphang uwei u briew, bad uta u long U Jisu.

“Phi ïit bha ïa ki jingthoh, naba ha ki phi mut ba phi ïoh ka jingim bymjukut; kita ruh ki long kiba ïaphla ïa Nga.” (Ïoannis 5:39)

U Khrist U la wan ban pynpaw ïa U Kpa sha kane ka pyrthei bad da kaba leh ïa kane, U weng lut ïa ki jingsngewthuh babakla kiba la lang lyngba ki spah snem ba la leit noh namar ki jinglamler kiba U Soitan u ïathuh ïa ka pythei shaphang U Blei. Ngim don shuh ïa ka jingïasyllok bakynja doh lem bad U Nongpynim jong ngi, hynrei ki jingïathuhkhana shaphang ka jingim U Jisu kumba la shem ha ka Baibl ki kren shaphang kaei kaba U la leh bad hikai. Namar kata, ki sla ki jong ka ki pynpaw shynna ïa ka jinglong U Blei lyngba ka jingim U Khun jong U. Kane ka jinglong lah ban shem ruh ha U Khun, naba ka Baibl ka hikai ba U Jisu U long ha “ka dur hi ka jinglong tynrai” ka jong U Kpa. (Hebru 1:3). Ynda haba ka pyrthei kabym don ka jingngeit ka khmih ïa ka burom U Kpa ha U Khun, lyngba ki kyntien ba la pyrsad mynsiem, ka bor U Mynsiem Bakhuid, kaba long hi U Khrist, ka khring ïa ki dohnuh jong ki ban bret noh ïa ka mynsiem bymngeit ka jong ki bad ban wan sha U Blei da ka jingngeit.

Ki kmie ki kpa banyngkong eh ki jong ngi ki la ïaphet rieh na U Blei namar ba ki sheptieng ba ïoh U wan ban pynshitom ïa ki namar ki jingleh bymman jong ki. Kane ka jingsheptieng ka long ruh ka jingmih na ka jingpynthohbria ïa ka jinglong U Blei da U Soitan. Hynrei ki la kyndit pynban ban shem ba U Blei U la wan sha ka kper ban pynpaw ïa ka jingieit bymkylla ka jong U ïa ki da kaba kular ïa ki ba Un sa phah ïa U Khun ba la kha marwei U jong U ban seiwspah ïa ki na ka pop. Ïa kane ka jingkular, U Blei U ïai pynkynmaw ha ki briew kiba im ha ka ïa jong ka testamen barim, lyngba ki nongïathuhlypa. U long Uba ïaineh ban leh ïa kata kaba U la kular bad ynda “haba la jia ka ïa kaba biang, U Blei U la phah ïa la U Khun” sha kane ka pyrthei. (Galatia 4:4). U la leh ïa kane ban pynpaw ïa ka jingieit ka jong U ïa ngi.

“Ha kane la pynpaw shynna ïa ka jingieit U Blei ha ngi, ba U Blei U la phah ïa U Khun ba la kha marwei sha kane ka pyrthei, ba ngin ïoh im da U.” (1Ïoannis 4:9)

Shisha shisha, ka jingthmu ban phah ïa la U Khun ka long ba lyngba jong U ngin ïoh lait im. U Blei U khlem shym la phah ïa U Khun ban pynrem ïa ka pyrthei hynrei ba ka pyrthei kan ïoh lait im da U. (Ïoannis 3:17). Ka bynta jong ngi ka dei ba ngin ngeit ha kaei kaba U Khrist U la leh na ka bynta jong ngi. Ka dei ka jingbymngeit ka jong ngi hi kaba pynrem ïa ngi. Namar kane, ka Baibl ka ong, “Uta uba ngeit ha U yn ym pynrem; hynrei uta ubym ngeit u la rem lypa, naba ym shym la ngeit ha ka kyrteng U Khun U Blei ba la kha marwei.” (Ïoannis 3:18)

Ha ka por ba ka pyrthei ka long ka nongshun U Blei, U Blei U la pynïasuk ïa ka sha lade lyngba ka jingïap U Khun jong U. (Rom 5:10). Kaei kaba kane ka ïathuh ha nga ka long ba, shuwa ba ngan sngewthuh ba nga donkam ïa ka jingmap; ha shuwa ba ngan sngewthuh ba nga donkam ïa ka jingïasuk bad U Blei, U Blei U la da leh lypa ïa kata na ka bynta ka jong nga lyngba U Khun jong U. Kane ka long ka jingshisha naba kam long kaba lah ba U Blei Un lamler. Lada kane kam lah ban bthat ïa u kynjri jong ka jingbymngeit ha U Blei, ngam tip kaei kaba lah ban leh ïa kata.

Ynda haba u briew u la ngeit, ka synjam kaba bud ka long ban long kawei bad U Blei. Nga ngeit ba U Blei ruh U thrang ba ngin long kawei bad U. Hynrei watla u nonpop bad U Blei ki ïa mynjur lang ban long kawei, ka jingeh pat ka long ba ym don mano mano ruh ban lah ban leit sha U Blei da lade hi. Sa shisien pat, U dei U Khrist Uba wan hapdeng bad Uba ai ïa ka jubab ïa kane ka jingeh.

Ka Baibl ka ong ba ngi lah ban wan sha U Kpa lyngba U Jisu tang da Uwei U Mynsiem. (Ephesos 2:18). Une U Mynsiem U long Ka Mynsiem jong U Khun kaba la phah hi da U Kpa sha ngi. (Galatia 4:6). Ïa kane ka jinghikai la kren kyllum da U Jisu Khrist hi ha Ïoannis 14.

“U Jisu U la ïathuh ha u, Nga Uba long kata ka lynti, bad ka jingshisha, bad ka jingim de: ym don uba wan ha U Kpa, hynrei tang da Nga.” (Ïoannis 14:6)

Ha kano ka dur ba dei tang U Khirst Uba long ka lynti ba pynïasoh ïa ngi bad U Kpa? Ka jubab ïa kane lah ban sngewthuh na ka jingshisha ba U Khrist U long Uba nyngkong eh na ki briew bad tang ma U, hadien ka jingrung jong ka pop, Uba long kawei bad U Blei. U kren ïa kane ha ngi ha kane ka dkhot kaba U ban jur halor ka jingtylli ka jong U lem bad U Kpa.

“Mem ngeit ba Nga Nga long ha U Kpa, bad Uta U Kpa ha Nga? Kita ki ktien kiba Nga kren ma Nga ha phi, Ngam kren na lade; hynrei Uta U Kpa Uba shong neh ha Nga, U hi U leh ïa ki jingleh jong U. To ngeit ïa Nga ba Nga long ha U Kpa, bad Uta U Kpa ha Nga:” (Ïoannis 14:10,11)

Nalor ba U long tang ma U napdeng ki briew Uba long kawei bad U Blei, U dei tang U Jisu ba haduh mynta ruh Uba lah ban ai ïa kane ka jingim ha uno uno uba ngeit bad uba thrang ïa ka jingim bymjukut. U Khrist U leh ïa kane da kaba U shongneh ha ngi lyngba Ka Mynsiem ka jong U. Dei na kane ka daw ba U Paul U ong ba ka jingkyrmen ka burom ka long “U Khrist ha phi.” (Kolossai 1:27). Ha kane ka rukom, U Nongpop U kylla long Uba hok, ym da ki buskit ki jong u hi, hynrei da ka jingim bahok jong U Khrist kaba tap ïa u.

Ka jingeh kaba lai ha ka lis ka dei ka mon ha lade kaba la tip kyrteng kum ka jingïaimut brai jong ka doh. U Paul u ong ba kane ka jait jinglong ka long ka nongshun jong U Blei bad kam lah satia ban pynhapoh ïa lade hapoh ka hukum bad ka mon jong U. (Rom 8:7). Ka long ka jinglong kaba long ka hukum da lade ïa lade bad ka kwah ban ïaineh ban long kumta. Hynrei lyngba ka jingshong neh U Khrist ha ka templ jong ka dohnud, suki pa suki, mian pa mian, ka mon lade ka wan hapoh ka jingïalam ka mon U Blei.

Kumno ba kane ka long kaba lah? Ha ka jinglong tynrai ka jong U, U Khrist U don ïa ka jinglong kaba sngewtynnad ban leh ïa ka mon U Blei. Ha khmih kaei kaba U phla shaphang lade ha ki synran.

“U Jisu U ong ha ki, Ka jingbam jong Nga long ba Ngan ïoh leh ïa ka mon jong Uta Uba la phah ïa Nga, bad ba Ngan ïoh pyndep ïa ka kam jong U.” (Ïoannis 4:34)

Ban leh ïa ka mon jong U Kpa ka long ka jingthrang jong ka dohnud ka jong U Khrist naba ka pynsngewbha eh ïa U ban pynsngewbha ïa U Kpa.

Kane ka long ruh ka jingshisha wat hapeng ki khep kiba eh ruh. Mynba U shem ïa lade hapdeng ki jingïakynduh kiba eh, U Jisu U khlem shym la lait na kaban shah ïalam da ka mon U Blei. Kum ka nuksa, ha ka kper Getsemane, watla U la kwah eh ha la ka dohnud ba kan don da kawei pat ka lynti ban weng ïa ka jingeh jong ka pop bad U la dwai ruh ha U Kpa ba lada ka long kaba lah, Un yn hap ban ïaid lyngba ka lynti kaba Un sa hap ban ïaid shen, hynrei U la pynkut ïa la ka jingdwai da ki kyntien, “Ym ïa kaba Nga mon hynrei ïa kaba Me mon” (Markos 14:36)

U Khrist U thep ïa kane ka juh hi ka jinglong ha ka dohnud jong uba ngeit, uba la aiti ïa la ka dohnud hapoh ka mon jong U, kaba pynlah ïa u nongpop ba la kylla kaba mut ban pyndem ïa lade hapoh ka jingïalam ka jong U Blei.

Bad nalor kane ruh, ynda haba ngi aiti ïa la ka jingim ha U Nongpynim, ka jingim ka jong U ka long ruh ka jingim ka jong ngi. (Kolossai 3:4). Ka mon ka jong ngi bad ka jingim ka jong ngi ruh ka jah noh ha ka mon bad ka jingim ka jong U. Kumba U Khrist U shah ïa U Kpa ban pynïaid ïa ka jingim ka jong U ha ki khep baeh bad badum, ka jinglong kaba skhem bad baïaineh ka jong U kan pynlong ruh ïa ngi ban shah ïa U Blei ban ïalam ïa ngi haba ngi don hapdeng ki jingïakynduh kiba eh bad ngin kiar, da la ki jong ki kam, ban ïit ïa ka lynti ban lait na ki jingeh ba ngi ïashem ïa lade. Kane ka lah ban long lait sa tang ba ngi ngeit.

Ynda haba ka mon ka shah ïalam da U Blei, kaba bud ka long ba kane ka mon kan pynpaw pyrthei ïa lade ha ki kam bad ki kyntien jong uta uba ngeit. U Kpa Uba ha bneng U thrang ba ngin pynmih ïa ki kam kiba bha khnang ba lyngba jong ki ngin dup lah ban pyndonburom ïa U kum U Blei bad U Nongthaw U jong ngi. Sa shisien pat, kane ka bynta ka long kaba lah namar ba U Blei U im hapoh jong ngi bad U trei ruh ha ngi ban leh ïa kiei kiei kiba pynsngewbha ïa U.

“Namar dei U Blei Uba trei hapoh jong phi ïa kaban mon ruh bad ïa kaban trei, namar ka jingsngewbha jong U.” (Philipi 2:13)

Namar ba ngi la ong mynne ba dei tang U Khrist Uba long ka jubab ïa ki jingeh baroh jong ka pop, te hangno ba U Jisu U don ha kane bynta? Ka long kaba shisha, katkum ka shithi sha ki nong Philipi 2;13, ba U Blei Uba im ha ngi U ïarap ïa ngi ban leh ïa ki kam ba pynsngewbha ïa U. Hynrei ynda haba ngi pule ïa Ki Hebru ka lynnong bakhadlai, ka dkhot baarphew bad arphew-wei, ngi lah ban ïohi ïa ka dur bad ka jingmut kaba kham ïar jong ka dkhot kaba ngi la pule na Philipi.

“Te U Blei ka jingsuk … Un pynjanai ïa phi ha ka jinleh babha baroh, ïa kaban leh ïa ka mon jong U, da kaba trei ha phi ïa kata kaba pynsngewbha eh ha khmat jong U, da U Jisu Khrist; ha Uba to long ka burom sha bymjukut ki bymjukut: Amen.” (Hebru 13:20,21)

Kine ki kyntien ki kren shai bha ba U dei U Blei Uba trei ha ngi lyngba U Khun jong U ban pynmih ïa ki kam kaba “pynsngewbha eh ha khmat jong U.”

Mynta pat ngi wan sha ka jingeh kaba san bad kaba khadduh, kaba long, ki jingmih basniew ne ki jingtim. Bad haba ngi ïakren shaphang ki jingmih jong ka pop, ka jingmih bakhraw eh na ka jingïakhlad na U Kpa, Uba long ka tyllong jong ka jingim baroh, ka long ka jingïap. Namar kata, kam long kaba sngewphylla ba U Paul un ong ba ka bainong jong ka pop ka long ka jingïap. (Rom 6:23). Hynrei kane ka dkhot kam kut tang hangne.

“Namar ka bainong jong ka pop ka long ka jingïap, hynrei ka jingaiei ka jong U Blei ka long ka jingim bymjukut da U Khrist Jisu uba U Trai jong ngi.” (Rom 6:23)

Ynda haba, da ka jingaiei lyngba ka jingngeit, ngi lah ban long biang kawei bad U Blei lyngba ka jingshongneh jong U Mynsiem jong U, ïa ngi la pynïasoh biang bad U Tyllong jong ka jingim baroh. Nga ngeit ba ka long kaba paw shynna ba Uta Uba pynïasoh ïa ngi lem bad U Blei U long U Khun U jong U bad tang ma U hi. Namar kata, ka long kaba shongnia ba ka jingai sngewbha ïa ka jingim bymjukut ka wan ruh tang lyngba U Khun jong U.

“Kane ka long kata ka jingphla, ba U Blei u la ai ha ngi ïa ka jingim bymjukut, bad kane ka jingim ka long ha U Khun jong u. Uta uba don uta U Khun, u don ka jingim; te uta ubym don U Khun U Blei, um don kata ka jingim.” (1 Ïoannis 5:11,12)

Ka jingim bymjukut ka long ka jong ngi lada ngi ngeit. Kam dei kaei kaei kaba ngin sa ïamad ha ka lawei. U Khrist U donkam ban im hapoh jong phi MYNTA khnang ba ka jingpynim kan wan ha ka jingim jong phi. Lada phi don ïa kane ha phi, phim don daw ban tieng ïa ka jingïap naba ka jingim jong phi la burieh ha U, Uba la jop ïa ka jingtep.

Nga kyrmen ba lyngba kane ka jingthoh, ngi la lah ban ïohi katno ka jingitynnad ka long kata ka bynta kaba U Khrist U leh ban pyllait im ïa ki nonpop na ka pop. Kumba kam long kaba lah, da ka bor briew, ban pynkhiah ïa uba pang ñiang lyngkut, kumta ruh kam long kaba lah ban pynim ïa uba pop da ki jingpyrshang jong u briew. Tang U Khrist marwei Uba lah ban pynkhiah ïa kiba pang ñiang lyngkut ha ki sngi ki jong U, bad tang ma U hi Uba lah ruh ban pynkhiah ïa ngi na ka pop bad ki jingmih jong ka.

Ka jingkylli mynta pat ka long, hato phi ngeit ha ka gospel jong ka jingpynim lyngba U Khrist ba ka long ka jingshisha? Nga kylli ïa kane ka jingkylli naba watla baroh ki Khristan ki ong ba U Khrist U long tang ma U ka jubab ïa ka/ki jingeh jong ka pop, pynban kim pdiang bad ngeit pura ba ka long kumta bad ki pynmih bun ki jinghikai kiba ong da kumwei pat. Ngim lah ban ong ba kawei kaei kaei ka long kaba shisha bad ha kajuh ka por pat ngi kyntait noh ïa kaba sah namar ba kan pynlong hi ïa ngi ban sahkut sah ha ka jaka kaba ngi shem ïa lade naduh kaba sdang.

“Namar shisha ha ngi ruh la ïalap ïa ka gospel kumba ha kita ruh: hynrei kata ka kyntien ba la ïohsngew kam shym pynmyntoi ïa ki, namar ym shym la khyniot lang ïa ki da ka bad ka jingngeit ha kita kiba la ïohsngew.” (Hebru 4:2)

Ka jingeh jong ka pop ka la sdang da ka jingbymngeit. Namar kata, ka long kaba donkam ban ngeit ha shuwa ba ngin sngewthuh ïa ka jingshisha ba ngi lah ban long kiba laitluid na ka pop. Kam long kaba phylla ba ka Baibl ka ïai ban shi ïai ban ïa ki kyntien “ngeit” bad “jingngeit”. Ïoannis 3:16 ka da kren ha ka rukom kaba sngewtynad bad bahun shisha haba ka ong ba ngim dei tang ban shu ngeit hynrei ba ngi dei ban ngeit ha “U Khun ba la kha marwei” jong U Blei bad, namar kane, ngin ym jot noh, hynrei ngin “ïoh ka jingim bymjukut.” Na kane ka daw, ka long kaba kongsan eh ba ka jingngeit jong ngi ka dei ban shong halor Uta Uba la jop ïa ka pop bad ka jingïap.

“… te kane ka long kata ka jingjop kaba la jop noh thiaw ïa kata ka pyrthei, ka jingngeit jong ngi keiñ.” (1 Ïoannis 5:4)

******