U Moses, U Aaron Bad U Diengduh
Katno ngut ki briew ngi shem ha kane ka jingïathuhkhana? Kane ka long ka jingshisha baitynnad shaphang ka Jinglong Blei kaba pynpaw ba ka jinghikai lai-ha-uwei blei ka long kaba bakla. Kam don kano kano ka jingartatien ba U Moses, U Aaron bad u diengduh ki ïeng pharshi ïa U Kpa, U Khun bad U Mysiem Bakhuid. Hynrei ha kane ka dur kaba U Blei U la ai ha ngi ha ka ktien ka jong U, ka pyni ba ka jinghikai jong ka ‘3 ha 1’ jong u blei trinity, lada ka long lai ki longrynïeng ne uwei u longrynïeng ha ki lai ki person, KAM LAH ban long kaba shisha. Te ïa ngin ïa peit balei ka long kumta.
Eksodos 7:1 ‘Bad U Trai U la ong ha U Moses, Ha khmih Nga la pynlong blei [Elohyim] ïa me ha U Pharaoh; bad U Aaron u hymen jong me un sa long u nongïathuhlypa jong me.”
Te U Blei U la pynlong ïa U Moses kum ‘U Elohiym’ ha khmat U Pharaoh. Mano ba long ‘U Elohiym’ jong ka Jenesis 1? Bun ki briew ki kynnoh ba U Elohyim ha Jenesis 1 u kdew ïa u blei trinity, namar ki ngeit ba Elohiym u dei U Blei ba kham bun ban ïa uwei (plural God). Hynrei hangne haneng, ïano U Blei U ong ban long kum U Elohyim? Hato U Blei U ong ba U Moses LEM BAD U Aaron kin long kum U Elohyim? Namar ba kata kan ïahap sur lang bad ‘U Blei ba kham bun ban ïa uwei.’ Em! U Blei U ong ba tang U Moses MARWEI un long kum U Elohyim ha U Pharaoh. Bad U Aaron un dup long u ‘nongïathuhlypa’ U Moses. Kaba phylla shisha! Ngan shim khyndiat eh ka por ban pynthikna ka jingmut BASHISHA jong ka ktien Elohiym.
1 Khronikl 29:10-11 "Namar U Dabid u la kyrkhu ïa U Trai ha khmat u paidlang baroh: bad U Dabid u la ong, Long ba la kyrhuh ïa Me, Ah Trai, U Blei [Elohyim] jong U Israel u kpa jong ngi, junom la junom. Ka jong Me, Ah Trai, long ka jingkhraw, bad ka bor, bad ka burom, bad ka jinglah, bad ka jinglong syiem: naba baroh kaba don ha beng bad ha khyndew ka long ka jong Me; ka jong Me ka long ka hima, Ah Trai, bad la kyntiew ïa Me kum u khlieh halor baroh.”
Kum ba phi lah ban ïohi, U Dabid u pynthikna ba Elohyim U long U KPA, bad kaei ka ‘jingbun’ (plurality) jong ka ktien Elohyim? U Dabid u pyni ïa ngi. U pynshkhem ba ka JINGBUN JONG KA JINGKHRAW U Blei U Kpa – ‘ka jingkhraw’ bad ‘ka bor’ bad ‘ka burom’ bad ‘ka jinglah’ bad ka ‘jinglong syeim’. KANE ka long ka jingbun jong U Elohyim, YM ka jingbun jong ki person.
Bad U Dabid u pynskhem ba Une U Blei Elohyim U long “u khlieh halor baroh”. Mano ba long u khlieh halor baroh katkum ka jingong u apostol Paul? 1 Korinth 11:3 ‘Hynrei nga mon ba phin tip, ba u khlieh u briew baroh u long U Khrist; bad u khleih ka kynthei long u rangbah; bad ba u khlieh U Khrist de long U Blei.’ U Blei U Kpa U long u ‘khlieh halor baroh’, bad ruh ‘u khlieh U Khrist’. Te dei ïa U Blei U Kpa ba U Moses U la dei ban ïeng pharshi. Bad kumno pat shaphang U Aaron? U long ‘u nongïathuhlypa U Moses’. U Aaron u la dei ban long u ‘ksiang’ hapdeng U Moses bad U Pharaoh. Dei ma u uba hap ban ‘kren’ ïa U Pharaoh na ka bynta U Moses. Bad ka Baibl ka ong ba dei mano ba long Uta ‘Uwei U Ksiang’ hapdeng U Blei bad u briew? Uta Uba ‘kren’ na ka bynta U Blei?
1 Timothi 2:5 "Namar don Uwei U Blei, bad Uwei U Ksiang ruh hapdeng U Blei bad ki briew, U Khrist Jisu, Uba U hi ruh u briew.”
“Naduh ka pop jong ki kmie ki kpa banyngkong jong ngi YM SHYM LA DON SHUH KA JINGÏAKREN BASHIMET SHIMET HAPDENG U BLEI BAD U BRIEW. U Kpa U la ai ïa ka pyrthei HA KI KTI U KHRIST, ba lyngba KA KAM JONG U KUM U KSIANG U lah ban siewspah ïa u briew bad ban pynksan ïa ka bor bad ka jingkhuid jong ka hukum U Blei. BAROH KI JINGÏAKREN HAPDENG KA BNENG BAD KA JAITBYNRIEW BA LA HAP NOH KA LA LONG LYNGBA U KHRIST.” (Ki Kpa Tymmen bad Ki Nong ïathuhlypa, sla. 366)
Ha Ïoannis 12:49, U Jisu U pynskhem ba ki kyntien ba U kren kim long ki jong U hi, hynrei ki long kiba U Kpa hi U bthah ïa U ban kren. Bad mano ba ong ïa U Aaron kaei ba u dei ban kren? Eksodus 4:15, Eksodus 7:9,19 ki pynskhem ba u dei U Moses uba ong ïa U Aaron kaei kaba u dei ban kren. Kane ka long ka jingshisha bad ka jingpynwan dur kaba itynnad haduh katta katta ba U Blei U pyndonkam ban pyni ïa ngi, kaba kdew ïa ka Jinglong Blei jong U Kpa bad U Khun.
Eksodos 4:16 "Bad un long u nongpynkren jong me ha u paidbah: kumta ma u shisha un long kim ka shyntur ïa me, bad ma meh ruh kum U Blei ïa U."
Te ka long kaba shai bha ba U Moses bad U Aaron ki ïeng pharshi ïa U Kpa bad U Khun. U Moses u ïeng ïa U ‘blei’ [Elohyim – U Kpa] ha U Pharaoh, bad U Aaron pat u dei ban long ‘u ksiang’ [Khrist]. Te kumno pat shaphang u diengduh? Dei hangne ba ka jingshisha ka long kaba itynnad bad kaba shai!
Dei da u diengduh jongno ba ïa ki kam phylla la leh? Eksodus 4, ki dkhot 2,4,17,20 ki pynthikna ba u diengduh u dei jong U Moses. Bad la AI ïa uta u diengduh ha U Aaron, khnang ba U Aaron un leh ïa ki dak bad ki jingphylla da u, bad naduh kata ka por la tip ïa u kum “u diengduh U Aaron” (Eksodus 7:9,19).
Ka i shai bha ba u diengduh u ïeng ïa U Mynsiem Bakhuid, naba lyngba u diengduh, ba ïa ki dak bad ki jingphylla bad KA BOR U Blei la pynpaw. Mynta to pyrkhat sani bha shaphang kane. U diengduh U LONG JONG U Moses naduh kaba sdang, bad nangta pat U Moses u la AI noh ïa une u diengduh ha U Aaron. Te U Aaron mynta u long uta uba DON ïa u diengduh. Bad kaei kaba ka Baibl ka pynskhem shaphang U Mynsiem Bakhuid?
Ki Kam 2:33 "Namar kata haba la kyntiew ïa U da ka kti kamon U Blei, bad HABA U LA ÏOH DIANG na U Kpa ïa ka jingkular ïa U MYNSIEM BAKHUID, U la theh noh ïa kane, ïa kaba phi mynta phi ïohi bad phi ïohsngew.”
Jingpynpaw 5:6 "Bad nga la ïohi hapdeng kata ka khet bad kita ki saw ki jingthaw baim, bad hapdeng kita ki tymmen basan, ïa U KHUN LANGBROT U da ïeng, kum ïa Uba la pynïap, U DA DON hynñiew tylli ki reng, bad hynñiew ki khamt, kiba long kita ki hynñiew ki Mynsiem U Blei, ïa kiba la phah noh sha ka pyrthei."
Titos 3:4-6 "Hynrei haba la paw ka jinglehsbun U Blei U Nongpynim jong ngi bad ka jingieit jong u sha u bynriew, u la pynim ïa ngi, ym na ki jingleh ka hok kiba ngi hi ngi la leh, hynrei katba kum ka jingisnei ka jong U, da ka jingsait ka jingkha arsien, bad ka jingpynthymmai U Mynsiem Bakhuid, ïa Uba la theh noh kyrhai noh ha ngi, da U Khrist Jisu U Nongpynim jong ngi."
Hato phi ïohi mo ïa ka jingshisha baphylla? Mano ba long uta uba DON ïa U Mynsiem Bakhuid? U long U KHRIST. Kumba ha U la AI ïa U Mynsiem Bakhuid da U Kpa. Kumba U Aaron u long uta uba DON ïa u diengduh bad la AI ha u da U Moses. U la dei u diengduh U Moses ba u la AI ïa U Aaron. Kumba U Mynsiem Bakhuid U long ka mynsiem U Kpa, kaba U la AI ïa U Khrist. Kane ka long ka jingïeng pharshi kaba itynnad bha jong ka Jinglong Blei BASHISHA, kaba U Trai U la ai ha ngi lyngba U Moses bad U Aaron.
Mynta, pyrkhat shaphang kane. Ynda haba phi peit ïa ka dur U Moses, U Aaron bad u diengduh, katno ngut ki longrynïeng (ki jingim) ki don hangne? TWO! Hato U Moses bad U Aaron ki ïaryngkat ha ka JINGLONG TYNRAI? Hooid! Kumta ruh U Kpa bad U Khun ki ïaryngkat ha ka jinglong tynrai. Hato ‘u dieng’ [u diengduh] u ïaryngkat ha ka jinglong tynrai bad U Moses bad U Aaron? Em! Kumta ruh U Mynsiem Bakhuid UM DEI “u longrynïeng balai” Uba ïaryngkat ha ka jinglong tynrai lem bad U Kpa bad U Khun. U long KA BOR [jingim] U Blei U Kpa, kaba U la AI ha U Khun jong U, U Jisu Khrist. Kumta ruh U Moses u la AI ïa u diengduh jong u ha U Aaron ba pynpaw ïa ki dak bad ki jingphylla.
Bad U Aaron u poi ban long uei? U rangbah lyngdoh! Wew! Hato phi kem ïa ka jingmut bajylliew?
U Moses u ïeng pharshi ïa U Blei U Kpa bad U Aaron pat ïa U Jisu. Kumba U Jisu ruh U long U Rangbah Lyngdoh U jong ngi ha ka jaka ba kyntang tam ha bneng. Bad ki khun U Aaron ki long kiei? Ki lyngdoh U Blei. Ha ka rukom baïasyriem, U Khirst ruh U la pynlong ïa ngi ki lyngdoh jong U Kpa jong U (Jingpynpaw 1:6). Bad kumba ngi tip, arngut na ki khun U Aaron kim shym la long kiba ïaineh (U Nadab and U Abihu) bad ïa ki la pynjulor noh, katba arngut pat ki long kiba ïaineh (U Eliser bad U Ithamar). Namar kata, ki ïeng pharshi ïa ki khun U Blei kiba ïaineh bad kibym ïaineh. Ah katno ka jingitynnad!
Ngi lah ban shem ïa kajuh hi ka jingpynïasyriem dur ha ka jingïathuhkhana U Abraham bad U Issak. Katno ngut ki longrynïeng ki shim bynta ha kane ka jingai ïati ïa U Issak kum ka jingkñia? AR NGUT – U Kpa bad U Khun jong U!
Lada don shisha u blei trinity uba don 3 ki longrynïeng/ ki person, te balei ba ym shym la don 3 ki longrynïeng/ki person kiba ïa shim bynta ha ka jingkñia ïa U Issak? Balei ba ka tnga U Abraham kam shym la don bynta ha kata? Naba don TANG U Kpa bad U Khun ba dei ban shah ïeng pharshi. Ym shym don ‘u longrynïeng/u person balai’ uba don bynta ha ka jingthaw jingpynlong bad ka jingpynim jong ngi. U Mynsiem Bakhuid U long ka Mynsiem bakynja Blei bad ka jingim U Kpa kaba U la AI ha U Khun jong U, U Jisu Uban sa ai pat ha ngi, kumba la pynpaw da U Moses, U Aaron bad u diengduh.
U Blei U Kpa U la pynlong pynman ïa kine kiei kiei baroh ha ka rukom bajanai bad pynpaw ïa Lade, ïa U Khun jong U bad ïa ka Mynsiem bakynja Blei ka jong U hi lyngba kine ki jingïathuhkhana bad ki jingjia jong ka Baibl. Ka jingai jong U Abraham ïa U Issak kum ka jingkñia ka long ka jingkdew kaba janai jong U Blei U Kpa haba U aiti ïa la U Khun, U Jisu na ka bynta ka jingpynim ka jong ngi, bad TANG ar ngut ki longrynïeng ki shim bynta ha kane. Ka jingïathuhkahana U Moses bad U Aaron ba ki leit ha khmat U Pharaoh ka long ruh ka jingpynpaw bajanai shaphang Uta Uwei U Blei bashisha, U Kpa, U Khun jong U Uba long u nongïathuhlypa and U Ksiang jong ngi, bad U Mysiem jong KINE AR. Kine ki long tang katto kane na ki sabut kiba BYLLAI ba pyni ba ka jinghikai jong u blei trinity ka long kaba bakla, naba u dienduh jong U Aaron um lah da lei lei ruh ban ïeng pharshi ïa U LONGRYNÏENG uba MARRYNGKAT bad U Kpa bad U Khun ha ka jinglong tynrai. Don tang AR ki longrynïeng ha kane ka dur. Bad don tang AR ki longrynïeng ha ka Jinglong Blei bashisha, U Kpa bad U Khun. Bad u diengduh u ïeng ïa ka bor bad ka khmat U Blei U Kpa, kaba la pynpaw LYNGBA U Khun jong U, U Jisu, Uba tang ma U hi marwei ba long U Ksiang hapdeng U Blei bad u briew.
[Ïa kane ka jingthoh la sam ha ka WhatsApp group chat, “OTG Ministry of Healing,” da U Marvin Lai bashong basah ha ri Malaysia. Ïa kane ka jingthoh ruh la shon bad pynmih da ka jingpan jingbit na une ujuh hi u parabangeit. Hynrei, ngim tip ïa ka kyrteng jong u nongthoh naba U Marvin um shym la lah ban kynmaw mano ba long u/ka nongthoh jong kane ka artikl.]
******