10 TYLLI KI JINGSHISHA SHAPHANG KA SNGI BANYNGKONG (SUNDAY)

Hato ka Baibl ka buh jingkynmaw mo ia ka jingkylla ka Sngi Sabbaton na ka sngi kaba hynñiew jong ka taïew sha ka sngi kaba nyngkong? Hato ki apostol ki rakhe ia ka Sngi Sunday? Hato ia ki Khristan la hukum ban rakhe khuid ia ka Sngi Sunday kaba long ka sngi nyngkong jong ka taïew hadien ka jingmihpat jong U Jisu? Ha ka jingshisha, ka Baibl ka don tang khyndiat eh ban kren shaphang ka sngi banyngkong jong ka taïew (ia ka ktien ‘Sunday’ ym shem ha ka Baibl, lait noh tang ha ka Goodnews Bible).

Hangne harum don shiphew tylli ki jingshisha na ka Baibl shaphang ka sngi banyngkong jong ka taïew:

1) Ka jingbuh jingkynmaw kaba nyngkong eh ha ka Baibl shaphang ka sngi kaba nyngkong jong ka taïew ka long ba ka sngi kaba nyngkong ka dei ka sngi ha kaba ia ka kam la leh – ka sngi ha kaba U Blei U la sdang ban thaw bad pynlong ia ka pyrthei (Creation) ka la long ka sngi kaba nyngkong. Jenesis 1:1-5. Ym don kaei kaei ruh kaban pyniakhlad kyrpang ia ka sngi kaba nyngkong na kiwei pat ki sngi trei kam jong ka taïew Jingpynlong.

2) U Blei u hukum ia la ki briew ban trei ia la ki jingtrei ha ka sngi kaba nyngkong jong ka taïew kum shibynta jong ki hynriew tylli ki sngi ban trei jingtrei – Eksodos 20:8-11.

3) U Blei u kdew kyrpang ia ki hynriew sngi ban trei jingtrei ha ka shitaiew – kiba kynthup ruh ia ka sngi kaba nyngkong – da kaba pynpher ia ki bak-ly-bak na ka sngi bakhuid jong U, ka Sngi Sabbaton – Esekiel 46:1.

4) Ym shym la buh jingkynmaw hangno-hangno ruh ha ka Baibl ba U Blei u la kyrkhu ia ka sngi kaba nyngkong lymne ba U la kyntang khuid ia ka.

5) Ym shym buh jingkynmaw hangno-hangno ruh ha ka Baibl ba ki kpa tymmen, ki nongiathuhlypa, ki apostol lane kino kino ki briew jong U Blei ba ki la iapdiang ia ka sngi kaba nyngkong (Sunday) jong ka taïew kum ka Sabbaton jong U Blei lane ba ki la ju rakhe khuid ia ka.

6) Ym don kano kano ka hukum na U Blei ha kano kano ka bynta jong ka Baibl ban rakhe khuid ia ka sngi ba nyngkong jong ka taïew.

7) Ka Baibl ka sngap jar-jar shaphang ka jingpynkylla ia ia ka Sabbaton bakhuid U Blei na ka sngi kaba hynñiew jong ka taïew sha ka sngi kaba nyngkong.

8) Ka Bible ka iathuh ba ki kynthei ki la wan sha ka jingtep jong U Jisu dang step phyrngab ha ka sngi banyngkong jong ka taïew- hadien ba ka Sabbaton ka sngi ka ba hynñiew ka la kut noh. Mathaios 28:1; Markos 16:1.2.

9) Ka Baibl ka buh jingkynmaw tang shisien ha kaba ki Khristan ki la ialum lang ban “kdiah kpu” bad ruh ban iohsngew ia ka jingialap u Apostol Paul ha ka sngi nyngkong jong ka taïew (Ki kam 20:7). Ka buh jingkynmaw ruh ba ki parabangeit Khristan kiba mynnyngkong ki ju ialum lang man la ka sngi ban kdiah kpu (pynlong ia ka jingiabam lang) bad ban ai ka jingiaroh ia U Blei (Ki Kam 2:46, 47). Ym don ei ei ruh shaphang ka jingialang ba la thoh ha Ki Kam 20 kaba pyni ba kine ki Khristan ki la kheiñ ba ka sngi banyngkong jong ka taïew ba ka long kaba khuid ne ba U Blei u la pynkynriah ia ka Sabbaton na ka sngi kaba hynñiew jong ka taïew sha ka sngi kaba nyngkong.

10) U Paul u la bthah ia ki parabangeit ha Korinth ban buh kyrpang ia ka pisa jingkynshew ha lade (ne ha la iing) shimet shimet man la ka sngi nyngkong jong ka taïew (1 Korinth 16:2) khnang ba yn ym hap pyrkhat pat katno yn pynnoh synniang sha ka jingkynshew tang ynda u la poi ma u ha Korinth. Don katto katne kiba pyni nia ba kane ka dkhot ka pynpaw ba ki Khristan ha Korinth ki la ia mane lang ha ka sngi kaba nyngkong jong ka taïew bad ba ki la ialum jingkynshew ha kita ki por jingia-mane lang. Hynrei kane ka dkhot ka kren shai shaphang ka jingbuh lypa ia ka pisa man la ka taïew khnang ba U Paul un ioh lum ia ka haba u wan; kam shym la kren ei ei shaphang ka jingia-mane lang ha ka sngi kaba nyngkong jong ka taïew.